Read Tabaa Zapotec San Lucas 13 Bible Online

San Lucas 13 - Tabaa Zapotec bible

San Lucas 13

¹Ca lu zra na' belezrín bal-la benne' lau Jesús, na' buluzenne̱' Le̱' ca be̱n Pilato, be̱tie̱' bal-la benne' Galilea, na' bchague̱' dxen chee̱ benne' ca' nen dxen chee̱ be̱ xixre', bea ca' ba belutie̱' chee̱ xuluzríe̱' dxen chee̱ na lau Dios.

²Na' Jesús guzre̱' le̱': ―¿Dxéquele le'e caní gulezaca benne' ca' lawe' da zaj nácadxe̱' benne' dul-la ca benne' ca' xezícala zaj zre̱'e̱ xe̱zre ca' zaj nababa Galilea?

³Dxapa' le'e: Cabí, na' che quebe xebí'i lázrele le'e, xúgute̱le le'e cuía xile.

⁴¿Dxéquele le'e benne' chinu chunna ca' gulatie̱' gate guzría cha xu'u sibe le̱' da nazí le na Siloé zaj nabágadxe̱' dul-la ca xezícala benne' ca' zaj zre̱'e̱ xe̱zre Jerusalén?

⁵Dxapa' le'e: Cabí, na' che le'e quebe xebí'i lázrele, cá'anqueze le'e wabía xile. Xaga higo da quebe dxebía na da zixre

⁶Nadxa Jesús bchálajle̱ne̱' benne' ca' da dxulé'e nigá, dxenné̱': ―Tu benne' zua tu xaga higo chee̱' zua na lu xe̱zr la xu chee̱', na' xeajné̱'e̱ na che zría na, na' quebe bi bezrélene̱'.

⁷Nadxa guzre̱' benne' dxun zrin lu xe̱zr la xu chee̱': “Gunná'xque, chun ízate̱ ba bida' dxenná'a che zria xaga nigá, ne quebe bi bezréleda'. ¡Guchugu na! ¿Bizr chee̱ na' nulán na xe̱zr la xu nigá?”

⁸Bénnea' dxun zrin chee̱ xe̱zr la xu na' beche̱be̱': “Xran, bca'ana na xetú iza na'a. Guzúlujdxa' zran na, ne cua'a na be̱be.

⁹Nen da na', gúnnalja na, san che cabí, na' chugu' na.” Jesús dxexune̱' tu nu'ula nalegu cuzre̱'

¹⁰Gate naca zra dxulupá'ana judío ca', na' zua Jesús tu lu xu'u naga dxelezraga judío ca' dxusé̱dene̱' benne' ca',

¹¹na' zua na' tu nu'ula xu'e̱ we̱' ba guca chinu chunna iza. Tu be' xriwe̱' nun na le̱' cuzru legu, na' quebe dxácaqueze̱' xelíe̱'.

¹²Gate ble'e Jesús le̱', na' gunné̱' le̱', ne guzre̱' le̱': ―Nu'ula, ba bexacu' chee̱ xízrawe̱' chiu'.

¹³Nadxa guxrúa ne̱'e̱ nu'ula na', na' la ná'queze nu'ula na' belite̱', na' guzú lawe̱' dxue lá'ane̱' Dios.

¹⁴Na' benne' xíchaje̱ chee̱ xu'u na' bzre̱'e̱ lawe' da bexún Jesús nu'ula na' lu zra dxulupá'ane̱', na' guzre̱' benne' zaj zre̱'e̱ na': ―Xrupa zra dxal-la' gundxu zrin. Lu zra ca' waca xídale xexácale, quegá lu zra dxupá'anadxu.

¹⁵Nadxa Xránadxu beche̱be̱': ―Le'e, benne' dxelún láweze da xrlátaje, ¿quebe dxesé̱zrele le'e be̱zre chee̱le u burro chee̱le lu zra dxupá'anadxu chjua'le-ba' xelé'ajba' nisa?

¹⁶Nú'ula nigá naque̱' xrtia Abraham, na' da xriwe̱' nuchéaj na le̱' lu xízrawe̱' nigá ba zeaj chinu chunna iza, na' ¿quebe dxal-la' xebéaja' xízrawe̱' da nuchéaj na le̱' lu zra dxupá'anadxu?

¹⁷Gate gunná Jesús da nigá, xúgute̱ benne' dxeledábague̱' Le̱' belexedué'ene̱', na' xúgute̱ benne' xezícadxa gulebene̱' gate belelé'ene̱' ca naca da zrente̱ da dxun Jesús. Da dxulé'e na ca naca chee̱ bínnedau' chee̱ mostaza

¹⁸Nadxa gunná Jesús: ―¿Aja naca xel-la dxenná bea chee̱ Dios, ne bi gutil-le lé̱beda' na?

¹⁹Naca na ca tu bínnedau' chee̱ mostaza, tu benne' dxaze̱' na lu xe̱zr la xu chee̱', na' dxegula na, ne dxácate̱ na ca tu xaga zren, na' bxínnedu ca' dxuluzríaba' xrú'uneba' lu zruze na ca'. Da dxulé'e na ca naca chee̱ cua zichaj chee̱ xeta xtila

²⁰Cá'anqueze gunná Jesús: ―¿Bizra gutil-le lé̱beda' xel-la dxenná bea chee̱ Dios?

²¹Naca na ca cua zichaj chee̱ xeta xtila tu nu'ula dxuchague̱' na chunna xaga de xezaj, na' dxuchazra na ca naca cua na'. Dxa xu'u lechide'

²²Dxácate̱ xu'u Jesús neza zexíaje̱' xe̱zre Jerusalén, dxusé̱dene̱' bénneache lu xe̱zre ca', ne xé̱zredu ca' naga dxedée̱'.

²³Na' bche̱be tu benne' Le̱': ―Xran, ¿bábaze benne' xelelá? Beche̱be Jesús:

²⁴―Le gun ba xuzre chu'ule dxa xu'u lechide', lawe' da dxapa' le'e, benne' zan xelaca lazre̱' xelu'e̱ na', na' quebe xelezéquene̱'.

²⁵Ca te na' chasa xrane xu'u, ne gusézxuje̱' dxa xu'u, na' le'e zrale chalé'ajla nne̱le dxu'a dxa xu'u na', nnale: “Xran, gusalaj chú'untu'.” Na' le̱' xeche̱be̱': “Quebe nezda' ga benne' le'e.”

²⁶Nadxa su láuquezle le'e nnale: “Güe'e gudágule̱ntu' lue', na' lue' bsé̱denu' lu neza chee̱ntu' ca'.”

²⁷Le̱' xeche̱be̱': “Dxapa' le'e, quebe nezda' ga benne' le'e. Le cuasa cuita' neda', xúgute̱le le'e dxunle da cale̱la.”

²⁸Na' cuézrele, ne xagu xá'ate̱ lázxale gate lé'ele Abraham, ne Isaac, ne Jacob, ne xúgute̱ benne' ca' gulenné̱' waláz chee̱ Dios, zaj zue̱' naga dxenná bea Dios, na' le'e zrale chalé'ajla.

²⁹Welelá' benne' zaj zre̱'e̱ dapa saca chee̱ xe̱zr la xu nigá, na' xelebé'e̱ xelawe̱' naga dxenná bea Dios.

³⁰Nadxa bal-la benne' zaj naque̱' bzé̱bedxa na'a xelaque̱' benne' blau, na' benne' zaj naque̱' blau na'a xelaque̱' bzé̱bedxa. Dxebezre Jesús chee̱ xe̱zre Jerusalén

³¹Lu zra ná'queze, belezrín lau Jesús bal-la benne' fariseo ca', na' gulé̱'e̱ Le̱': ―Bezá' nigá, lawe' da dxaca lazre' Herodes gutie̱' Lue'.

³²Jesús beche̱be̱': ―Le chjaca cheajgué̱zrele benne' wilaj lazre' cale̱la na': “Na'a, ne wxre xebéaja' be' xriwe̱' ca' lu xichaj lázrdau benne' ca', ne xexuna' benne' we̱' ca', na' wizraj sueda'.”

³³Dxun na ba xen chéajle̱na' neza chia' na'a, ne wxre, ne wizraj, lawe' da quebe gaca gate tu benne' dxenné̱' waláz chee̱ Dios che quebe xelute benne' Jerusalén le̱'.

³⁴“Jerusalén, Jerusalén, le'e na' dxútele benne' dxelenné̱' waláz chee̱ Dios, ne dxuzríale xiaj benne' gubáz ca' dxesel-la Dios. Zane' lasa guca lazra' gutupa' bi chee̱le ca' ca dxun bedxuj, dxutúpaba' bédxujdu ca' zran xrílaba', san quebe guca lázrele.

³⁵¡Le nna'xque, na'a! Lízrele le'e xegá'ana na cá'aze. Dxapa' le'e québedxa xelé'ele neda' ca zrindxa zra nnale: ¡Lá'azxa naca Bénnea' ze̱'e̱ lu La Xránadxu!”