Read Tabaa Zapotec San Lucas 18 Bible Online

San Lucas 18 - Tabaa Zapotec bible

San Lucas 18

¹Jesús bchálaje̱' da dxulé'e na ca naca chee̱ gusé̱dene̱' benne' ca' dxal-la' xuluwízrajtecaze̱' Dios, ne quebe xelexebigue̱'.

²Na' guzre̱' benne' ca': ―Tu xe̱zre guzúa tu benne' dxuchi'e̱ da dxaca, na' quebe gudape̱' ba lá'ana Dios, ne cá'anqueze bénneache.

³Lu xe̱zre ná'queze guzúa tu nu'ula ba gute benne' chee̱'. Guxíaje̱' xeajnabe̱' lau benne' dxuchi'e̱ da dxaca chee̱ guchi'e̱ da dxaca chee̱' nen tu benne' dxune̱' chee̱' da cale̱la.

⁴Zane' lásate̱ benne' dxuchi'e̱ da dxaca quebe guca lazre̱' guchi'e̱ chee̱ nu'ula na', san ca gudé na' gunné̱' lu xichaj lázrdawe̱': Lácala quebe dxapa' ba lá'ana Dios, ne cá'anqueze bénneache,

⁵san lawe' da nu'ula nigá dxune̱' neda' ze̱de, guchí'a chaza' da dxaca chee̱' chee̱ québedxa xide̱' gúnle̱'e̱ neda' ze̱de.

⁶Na' gunná Xránadxu: ―Caní na' gunná benne' we̱n da cale̱la na', benne' dxuchi'e̱ da dxaca.

⁷¿Quebe guchi'a Dios da dxaca chee̱ benne' ca' ba guqué̱'e̱, benne' ca' dxelenné̱' Le̱' te zra, ne chizrela? ¿Wazrene̱' xeche̱be̱' chee̱ benne' ca'?

⁸Dxapa' le'e, Le̱' guchi'e̱ da dxaca chee̱', ne quebe chene̱'. Gate xelá'a neda', Benne' Gulje̱' Bénneache, ¿wazréldxeda' tu benne' lu xe̱zr la xu nigá, benne' dxéajle̱'e̱ chia'? Da dxulé'e na ca naca chee̱ tu benne' fariseo, ne tu benne' wechizruj

⁹Jesús bchálaje̱' xetú da dxulé'e na, chee̱ xelene benne' ca' dxeléquene̱' zaj naque̱' xrlátaje, san dxuluzúe̱' chalá'ala le sa' ljwezre̱'.

¹⁰Gunné̱': ―Chupa benne' xjaque̱' xudau' chee̱ xuluchálajle̱ne̱' Dios. Tue̱' naque̱' benne' xudau' fariseo, na' xetúe̱' naque̱' wechizruj waláz chee̱ xe̱zre zitu'.

¹¹Benne' xudau' na' guzé̱' dxuchálajle̱ne̱' Dios, gunné̱': “Dios, xcalenu' quebe naca' ca benne' xula ca', zaj naque̱' gubán, ne benne' ca' dxelune̱' da cale̱la, ne benne' dxelún dul-la dxeláchajne̱' xrba chee̱ wechaga na', ne quegá ca benne' wechizruj nigá.

¹²Neda' dxuna' gubasa chupa lasa da gazre zra, ne dxunna' chiu' tu cue' chee̱ da chi cue' da dxezi'a.”

¹³Benne' wechizruj na' guzúe̱' dxu'a dxa xú'uze, ne quebe bexazrjne̱' chisa lawe̱' xabáa. Bé̱le̱'e̱ la chu'e̱, dxenné̱': “Dios, bexache lazre' neda', naca' benne' dul-la.”

¹⁴Dxapa' le'e, benne' wechizruj na' bezé̱'e̱ xexíaje̱' lizre̱', ne bexaque̱' xrlátaje lau Dios, san quegá caní guca chee̱ benne' xudau' na'. Ca' guca lawe' da benne' dxucá'ana szren cuine̱' wexéxrujla bénnea', san benne' dxucá'ana baxache' cuine̱' wegá'ana szrénqueze bénnea'. Jesús dxenabe̱' gaca chawe' chee̱ bidu ca'

¹⁵Belezrín benne' ca' zaj naché̱'e̱ bidu ca' lau Jesús chee̱ guzé̱ ne̱'e̱ le̱be'. Gate belelé'e benne' ca' dxuse̱de Jesús da nigá, na' gulezú lawe̱' dxeledil-le̱' benne' ca'.

¹⁶Jesús gunné̱' benne' ca' dxusé̱dene̱', na' dxe̱'e̱ le̱': ―Le güe lataj xelelá' bidu ca' naga zua', ne quebe guzágale-be', lawe' da benne' zaj naque̱' ca bidu caní welexu'e̱ naga dxenná bea Dios.

¹⁷Da li dxapa' le'e, benne' quebe si' lu ne̱'e̱ nna bea Dios le̱' ca dxelún bidu caní, québequeze chu'e̱ naga dxenná bea Dios. Tu benne' cuide' naque̱' benne' gunní'a

¹⁸Tu benne' xíchaje̱ bche̱be̱' Jesús: ―Benne' Wese̱de xrlátaje, ¿bi da dxal-la' guna' chee̱ zrué'eda' xel-la nabán zeajlí canna?

¹⁹Jesús guzre̱' le̱': ―¿Bizr chee̱ na' dxennáu' naca' xrlátaje? Netú benne' quebe naque̱' xrlátaje. Tuze Dios naque̱' xrlátaje.

²⁰Lue' núnbe'u ca zaj naca xrba chee̱ Dios:Quebe gunu' dul-la da dxachaj na xrba chee̱ wechaga na'.Quebe gutiu' benne'.Quebe cuanu'.Quebe nneu' chee̱ le sa' ljwezru' da quebe naca na.Gudapa ba lá'ana xra xrna'u.

²¹Benne' na' guzre̱' Jesús: ―Xúgute̱ da caní dxuna' ne nácatea' bídau'te̱.

²²Gate ben Jesús da nigá, na' guzre̱'-be': ―Ne dxexázrjenu' xetú da dxal-la' gunu'. Be̱te ca naca da de̱ chiu', na' bnezruj na chee̱ benne' xache' ca'. Nadxa gapu' xel-la gunní'a lu xabáa chee̱ Dios. Na' gudá sále̱nu' neda'.

²³Gate benne' cuide' na' benne̱' da nigá, bewí'inele̱'e̱ne̱' lawe' da nápale̱'e̱ da gunní'a.

²⁴Gate ble'e Jesús ca bewi'ine benne' na', gunné̱': ―Sté̱bete̱ naca chee̱ benne' gunní'a ca' xelexú'e̱ naga dxenná bea Dios.

²⁵Chadídxala te tu bea zren lu negue' tu xeche' zriche quegala chu'u tu benne' gunní'a naga dxenná bea Dios.

²⁶Na' benne' ca' dxelenne̱' gulenné̱': ―Che ca' naca na, ¿núzraqueze la?

²⁷Jesús guzre̱' benne' ca': ―Da quebe gaca xelún bénneache, waca Dios gúnqueze̱' na.

²⁸Na' gunná Pedro, guzre̱' Jesús: ―Xran, ba bsantu' ca da gudápantu' chee̱ zále̱ntu' Lue'.

²⁹Nadxa Jesús beche̱be̱': ―Da li dxapa' le'e, nútete̱ze benne' gusane̱' lizre̱', u xra xrne̱'e̱, u bi biche̱', bi zane̱' ca', u zru'ule̱', u zrí'ine̱' ca', chee̱ gune̱' zrin chee̱ xel-la dxenná bea chee̱ Dios,

³⁰benne' nigá wazi'e̱ da zrendxa lu xe̱zr la xu nigá, na' lu xe̱zr la xu da za za' wazi'e̱ xel-la nabán da zeajlí canna. Jesús dxuchálaje̱' xecha lasa ca gaca gate gatie̱'

³¹Na' Jesús gunné̱' chalá'ala benne' chazrinnu ca' dxusé̱dene̱', na' guzre̱' le̱': ―Na'a zexíajdxu Jerusalén, naga gaca li ca naca da buluzúaj benne' ca' buluchálaje̱' waláz chee̱ Dios ca gaca chia' neda', Benne' Gulje̱' Bénneache.

³²Benne' zaj zre̱'e̱ Jerusalén xuludée̱' neda' lu na' benne' zitu' ca', na' xelún le̱' chia', ne xelenné̱queze̱' schanni' chia', ne wuluzráqueze̱' neda' zrene̱'.

³³Welúequeze̱' neda', na' te na' xelútie̱' neda', na' zra guxunne' zra xebana' ládujla benne' gate.

³⁴Benne' ca' quebe guléajni'ine̱' da nigá, ne quebe zaj nézene̱' bi chee̱ na' dxuchálajle̱ne̱' le̱', lawe' da zaj naca da quebe guca xeléajni'iquezne̱'. Tu benne' la chul-la, benne' zue̱' xe̱zre Jericó

³⁵Gate Jesús bzrine̱' gagu naga zua xe̱zre Jericó, na' dxe' tu benne' la chul-la dxu'a neza dxenabe̱' guna'.

³⁶Gate benne̱' dxeledé benne' zante̱, na' benne' la chul-la na' bche̱be̱' benne' ca' bizra na' dxaca na.

³⁷Na' gulé̱'e̱ le̱': ―Jesús, benne' Nazaret dxedée̱' nigá.

³⁸Nadxa gudxezre xa'a la chul-la na', gunné̱': ―¡Jesús, Zri'ine David, bexache lazre' neda'!

³⁹Benne' ca' zaj zria lawe̱' lau Jesús guledil-le̱' benne' la chul-la na' chee̱ sue̱' zrize, san gudxezre xá'adxa le̱', dxenné̱': ―¡Zri'ine David, bexache lazre' neda'!

⁴⁰Nadxa gugá Jesús, na' gunná bé'ene̱' xeajlexrí'e̱ le̱'. Gate ble̱'e̱ lau Jesús, na' Jesús bche̱be̱' le̱':

⁴¹―¿Bi dxaca lazru' guna' chiu'? Beche̱be la chul-la na': ―Xran, dxaca lazra' xelé'eda'.

⁴²Jesús guzre̱' le̱': ―Gaca ca dxennáu'. Ba bexacu' lawe' da guxéajle̱'u chia'.

⁴³Zra ná'queze belé'e benne' la chul-la na', na' guxíajle̱ne̱' Jesús, dxue lá'ane̱' Dios. Xúgute̱ benne' ca' belelé'ene̱' da nigá cá'anqueze belúe lá'ane̱' Dios.