Read Tabaa Zapotec San Lucas 20 Bible Online

San Lucas 20 - Tabaa Zapotec bible

San Lucas 20

¹Tu zra gate zua Jesús chale'aj xudau' dxusé̱dene̱' benne' ca', ne dxuchálajle̱ne̱' le̱' ca naca dizra' chawe' chee̱ Dios, na' belezrín na' benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na, ne benne' gula sina ca',

²na' gulé̱'e̱ Le̱': ―Gunná bi xel-la dxenná bea napu' dxunu' da caní. ¿Nuzra be̱nna lue' xel-la dxenná bea nigá?

³Na' gunná Jesús: ―Cá'anqueze neda' guche̱ba' le'e tu. Le xeche̱be chia'.

⁴¿Nuzra gusel-la Juan guchúe̱' bénneache nisa? ¿Dios che bénneache?

⁵Na' gulezú lawe̱' dxelé̱ ljwezre̱': ―¿Bizra nnadxu? Che nnadxu gusel-la Dios le̱', na' guche̱be̱' dxi'u: “¿Bizr chee̱ na' quebe guxéajle̱le chee̱'?”

⁶Che xe̱dxu Le̱', bénneache gulesel-le̱' le̱', benne' zaj zre̱'e̱ nigá wuluzríe̱' dxi'u xiaj, lawe' da zaj neze xánnie̱' bchalaj Juan waláz chee̱ Dios.

⁷Nadxa belexeche̱be̱' quebe zaj nézene̱' nu gusel-la Juan bchue̱' bénneache nisa.

⁸Na' Jesús guzre̱' benne' ca': ―Cá'anqueze neda' quebe xapa' le'e bi xel-la dxenná bea napa' dxuna' da caní. Da dxulé'e na ca naca chee̱ benne' we̱n zrin cale̱la ca'

⁹Na' guzú lau Jesús dxuchálajle̱ne̱' benne' ca' zaj zre̱'e̱ na', dxuchálaje̱' da dxulé'e na, dxenné̱': ―Guzúa tu benne' bde̱'e̱ lba uva lu xe̱zr la xu chee̱', na' ca gudé na' bca'ane̱' na lu na' benne' we̱n zrin ca', na' guzé̱'e̱ na' zane' iza.

¹⁰Gate bzrin zra xuluchibe̱' uva ca', na' gusel-le̱' tu bi we̱n zrin chee̱' zeajxenábabe' tu cue' chee̱ lina na' da dxal-la' xezi'e̱, san benne' we̱n zrin ca' buluzálaje̱'-be', na' belexesel-le̱'-be' cá'aze.

¹¹Nadxa xrane lina na' gusél-le̱' xetú bi we̱n zrin chee̱', na' cá'anqueze bi nigá bulucháchale̱ne̱-be', ne buluzálaje̱'-be', na' belexesel-le̱'-be' cá'aze.

¹²Xrane na' gusél-le̱' xetú bi we̱n zrin chee̱', na' benne' we̱n zrin ca', cá'anqueze belune̱'-be' zi', na' belexebéaje̱'-be' lu lina na'.

¹³’Naga xeajche'te̱ na, xrane na' gunné̱': “¿ájazra guna'? Sel-la' zri'ina' nazrí'ite̱ lazra'. Gate xelelé'ene̱'-be' nalja xelape̱'-be' ba lá'ana.”

¹⁴Na' gate benne' we̱n zrin ca' belelé'ene̱'-be', na' gulé̱ ljwezre̱': “Bi nigá xezí' lu na'be' da de̱ chee̱ xránadxu. Gútedxu-be', chee̱ gácadxu xrane na dxí'uqueze.”

¹⁵Nadxa belexebéaje̱'-be' lu xe̱zr la xu na', na' belutie̱'-be'. Nadxa Jesús bche̱be̱' benne' ca': ―¿Bizra gun xrane na' chee̱ benne' we̱n zrin ca'?

¹⁶Xelé̱'e̱, na' gutie̱' benne' we̱n zrin ca', na' gudée̱' xe̱zr la xu na' lu na' benne' xula ca'. Gate belén benne' ca' ca gunná Jesús, na' gulenné̱': ―Dios quebe gu'e̱ lataj gaca ca'.

¹⁷Na' Jesús gunné̱'e̱ benne' ca', na' gunné̱': ―¿Bizra zéaje̱ da naxúaj na lu xiche chee̱ Dios? Dxenné̱' caní:Xiaj na' da buluzúa benne' we̱n xu'u ca' chalá'ala,le̱ na' naca na xiaj blau.

¹⁸Nútete̱ze benne' cheajchazie̱' lawe' xiaj na', na' chúzrujqueze bénnea', na' che xiaj na' xexruj na lawe' nu benne', gútute̱ na le̱'. Ca naca chee̱ da dxuchizruj xe̱zre zi'tu'

¹⁹Benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na gulaca lazre̱' xele̱le̱' Jesús zra ná'queze, lawe' da guleque bé'ene̱' bchalaj Jesús da dxulé'e na ca zaj naca le̱', san belezrebe̱' da xelún bénneache ca'.

²⁰Nadxa gulesel-le̱' benne' ca' xuluzuzre̱' Jesús, benne' xululé'e cuine̱' ca benne' xrlátaje ca'. Benne' caní dxelaca lazre̱' xelebéaje̱' Jesús dizra' chee̱ xelezéquene̱' xuludée̱' Le̱' lu na' bénnea' dxenná be'e̱.

²¹Chee̱ xelune̱' da nigá, buluche̱be̱' Le̱': ―Benne' Wese̱de, nézentu' dxennáu', ne dxusé̱denu' da naca li lazre', ne quebe dxuchi'u chee̱ bénneache cáte̱ze dxululé'e cuine̱', san lu da li dxusé̱denu' da naca chee̱ Dios.

²²Guzre netu', ¿naca na chawe' quízrujdxu da dxuchizruj César, bénnea' dxenná bé'ene̱' dute̱ xe̱zr la xu, che cabí?

²³Dxeque be'e Jesús ca naca da dxelaca lazre̱' xelune̱' chee̱', na' guzre̱' benne' ca': ―¿Bizr chee̱ na' dxaca lázrele gun xálele neda'?

²⁴Le gulé'e neda' tu dumí. ¿Nuzra lu'a na' da na nigá, ne nu la naxúaj nigá? Benne' ca' belexeche̱be̱': ―Chee̱ benne' dxenná bea na'.

²⁵Nadxa gunná Jesús: ―Le gunezruj bénnea' da naca chee̱', na' le gunezruj Dios da naca chee̱ Dios.

²⁶Quebe gulezéquene̱' xelún xálene̱' Jesús ca naca da beche̱be̱' lau benne' ca'. Belexebánene̱' ca naca da beche̱be̱', na' gulezúa zrie̱'. Ca gaca gate xelexebán benne' gate

²⁷Ca gudé na' bal-la benne' xudau' saduceo ca' belezrine̱' lau Jesús. Benne' saduceo ca' dxeléquene̱' quebe xelexebán benne' gate, na' gulé̱'e̱ Jesús:

²⁸―Benne' Wese̱de, Moisés bzúaje̱' chee̱ntu' che tu benne' gatie̱', ne gucá'ane̱' zru'ule̱', ne che quebe nu chilá' zrí'ine̱', na' bi biche bénnea' dxal-la' guchaga na'abe' nen nu'ula na' gute benne' chee̱' chee̱ galaj tu bidau' gácabe' ca zri'ine bénnea' ba gútee̱'.

²⁹Gulezrá' gazre benne' gulaque̱' zri'ine tuze xre̱'. Bi nedxu bchaga na'abe' nen tu nu'ula, na' gútebe', quebe nu chilá' bi chee̱be'.

³⁰Bi gudxupe' bchaga na'abe' nen nu'ula na', ne cá'anqueze gútebe' quebe nu chilá' bi chee̱be'.

³¹Nadxa bi guxunne' bchaga na'abe' nen nu'ula na', na' cá'anqueze belún bi ca' xezica, na' bi gazre ca' gulátebe' quebe nu chilá' bi chee̱be'.

³²Naga xeajche'te̱ na, na' gute nu'ula na'.

³³Gate xelexebán benne' gate, ¿nula bi ca' gaca zrú'ulabe' nu'ula na', lawe' da ca naca bi gazre ca' buluchaga na'abe' nen nu'ula na'?

³⁴Nadxa beche̱be Jesús: ―Lu xe̱zr la xu nigá dxuluchaga na' benne' biu ca' nen nu'ula ca'.

³⁵Na' benne' ca' naca chee̱' xelexexú'e̱ xe̱zr la xu da za za', ne chee̱ xelexebane̱' ládujla benne' gate, québedxa xuluchaga ne̱'e̱, ne québedxa xulunézruje̱' zrí'ine̱' lu xel-la wechaga na'.

³⁶Ca'an gaca lawe' da quebe nu gátedxa na'. Xelaque̱' ca zaj naca gubáz chee̱ xabáa ca', ne xelaque̱' bi chee̱ Dios lawe' da belexebane̱'.

³⁷Moisésqueze, gate bzuaje̱' ca guca chee̱ bisigá da guzúa na' xi', dxulé'ene̱' dxi'u dxal-la' xelexebán benne' gate. Naga naxúaj da nigá dxenná na ca naca chee̱ Dios, naque̱' Dios chee̱ Abraham, ne Dios chee̱ Isaac, ne Dios chee̱ Jacob.

³⁸Dios quebe naque̱' Dios chee̱ benne' gate ca'. Naque̱' Dios chee̱ benne' ban ca', lawe' da lau Le̱' zaj naca ban xúgute̱ bénneache.

³⁹Nadxa bal-la benne' ca', benne' dxuluxuzájle̱'e̱ da nadxixruj bea na gulé̱'e̱ Jesús: ―Cháwedau' dxennáu', Benne' Wese̱de.

⁴⁰Québedxa belexázrjne̱' bi xuluche̱be̱' Jesús. ¿Nu benne' naca Cristo zrí'ine̱'?

⁴¹Jesús guzre̱' le̱': ―¿Bizr chee̱ na' dxennale le'e naca Cristo zri'ine David?

⁴²Davídqueze gunné̱' lu xiche naga zaj naxúaj salmo ca':Xránadxu Dios guzre̱' Xrana':“Gudxé'e cuita' xabe̱la chia',

⁴³Cadxa guzúa' benne' dxelecuídene̱' lue' ca' zran ni'u.”

⁴⁴¿ájazra chee̱ na' naca Cristo zri'ine David, na' Davídqueze dxe̱'e̱ Le̱': “Xran”? Jesús dxenné̱' chee̱ benne' ca' dxuluxuzájle̱'e̱ da nadxixruj bea na

⁴⁵Ca naca benne' ca' zaj zra' na' dxuluzé̱ nague̱' chee̱ Jesús gate guzre̱' benne' ca' dxusé̱dene̱':

⁴⁶―Le guxúe xanne' cuínale chee̱ benne' ca' dxuluxuzájle̱'e̱ da nadxixruj bea na, lawe' da dxeledánene̱' dxeledé̱' zaj nacue̱' zre̱' tunna, ne dxelaca lazre̱' xelapa bénneache le̱' ba lá'ana lawe' xi'a ca', ne dxelebé'e̱ lu lataj blau ca' lu xu'u naga dxezrágale, ne lataj blau ca' naga dxelawe̱' zrue.

⁴⁷Benne' caní dxelequé̱'e̱ ca naca lizre nu'ula ca' ba gulate benne' chee̱', na' chee̱ xulucá'ana cuine̱' xrlátaje lau bénneache ca' dxululawízraje̱' Dios da tunna lu xu'u ca' naga dxezrágale. Benne' caní xelezaca zídxaqueze̱'.