Read Tabaa Zapotec San Lucas 21 Bible Online

San Lucas 21 - Tabaa Zapotec bible

San Lucas 21

¹Gate zua Jesús chale'aj xudau', blé'ene̱' benne' gunní'a ca' dxelegú'e̱ dumí lu xí'ina chee̱ xudau'.

²Na' blé'ene̱' tu nu'ula naque̱' benne' xache', ne ba gute benne' chee̱', gulu'e̱ chupa dumídau'.

³Na' gunná Jesús: ―Da li dxapa' le'e, nu'ula xache' nigá gulú'udxe̱' da zrendxa ca benne' gunní'a caní,

⁴lawe' da dxelegú'u benne' ca' chee̱ da dxutínneze na, san nu'ula nigá, lu xel-la baxache' chee̱' bnézruje̱' ca naca da nape̱' da nunte̱ gawe̱'. Jesús dxuchálaje̱' ca gaca gate cuía xi' xudau'

⁵Bal-la benne' dxuluchálaje̱' ca naca chee̱ xudau' na', ne chee̱ xiaj xrtante̱ da zaj zrále̱'e̱ na ze'e xudau' na', ne chee̱ da xrtan da bulunezruj benne' chee̱ xudau' na'. Nadxa gunná Jesús, dxe̱'e̱ le̱':

⁶―Wazrín zra gate xelebía xi' xúgute̱ da caní dxelé'ele, ne quebe xegá'ana netú xiaj cuzru ljwezre na. Da xululé'e na gate cheajsé̱ chee̱ xe̱zr la xu nigá

⁷Nadxa benne' ca' buluche̱be̱' Jesús: ―Benne' Wese̱de, ¿bata gaca da na'? ¿Bi gulé'e na gate ba za xelaca da caní?

⁸Jesús gunné̱': ―Le guxúe xanne' cuínale, ne quebe güele lataj nu si xe̱ le'e, lawe' da xelelá' benne' zante̱ benne' xulusí' cuine̱' La' neda', xelenné̱' zaj naque̱' Cristo, ne xelenné̱' ba bzrin zra. Quebe chéajle̱le benne' ca'.

⁹Gate xénele dxaca wedil-la, ne xeledábague̱' bénneache xu'u lawe', quebe zrébele, lawe' da dxal-la' gaca da caní nedxu, san quebe ne zrin zra cheajsé̱ chee̱ xe̱zr la xu nigá.

¹⁰Nadxa guzre̱' benne' ca': ―Bénneache tu xe̱zr la xu xeledíl-lale̱ bénneache xetú xe̱zr la xu, na' benne' tu xe̱zre xeledíl-lale̱ benne' xetú xe̱zre.

¹¹Wazrú'le̱'e̱queze, ne gácale̱'e̱ gubina', ne gáta'le̱'e̱ xízrawe̱' du ca nácaqueze, na' zran xabáa lé'ele da guchébequeze na le'e, ne xel-la waca zri'a ca'.

¹²’Nédxudxa gate quebe ne gaca da caní xelé̱laqueze̱' le'e, ne xeláu zi' xúzrequeze̱' le'e. Xeleché̱'e̱ le'e lu xu'u ca' ga dxelezrague̱' chee̱ xelechugue̱' ca xelune̱' chee̱le, na' xelegú'e̱ le'e lizre xia, ne xeleché̱'e̱ le'e lau benne' wenná bea ca', ne lau benne' xu'u lawe' ca' lawe' da nácale neda' tuze.

¹³Gate gaca da caní gata' lataj guchálajle̱le benne' ca' ca naca chia' neda'.

¹⁴Le guzúa chacha lázrdaule, quebe gucuézale nédxula da dxal-la' nne̱le,

¹⁵lawe' da gunna' neda' le'e dizra', ne xel-la sina da quebe xelezeque benne' dxeledábague̱' le'e bi xelenné̱' chee̱ na.

¹⁶Wuludéqueze bénneache le'e lu na' benne' dxeledábague̱' le'e. Caní xelúnqueze xra xrnale, ne bi bíchele, ne xrtia ljwézrele, ne bi ljwézrele ca'. Welútequeze̱' bál-lale le'e,

¹⁷na' xúgute̱ bénneache welecuídene̱' le'e lawe' da nácale neda' tuze,

¹⁸san quebe nite tu xicha xíchajle lau Dios.

¹⁹Che sua cháchale, na' gápale xel-la nabán.

²⁰’Gate lé'ele zaj naxechaj benne' dxjaque̱' wedil-la xe̱zre Jerusalén, na' nézele ba za cuía xi' xe̱zre nigá.

²¹Lu zra na', benne' zaj zre̱'e̱ xe̱zre ca' zaj nababa Judea dxal-la' xuluzrúnnuje̱' chjaque̱' lu xi'a ca', na' benne' zaj zre̱'e̱ xe̱zre Jerusalén dxal-la' xeledxúaje̱' na', na' benne' zaj zre̱'e̱ le̱'e̱ xixre' quebe dxal-la' xelexezrine̱' xe̱zre na'.

²²Lu zra ca' Dios gudée̱' benne' ca' lu da zi' da xa', na' gaca li ca naca da naxúaj na lu xiche chee̱ Dios ca dxal-la' gaca chee̱ benne' ca'.

²³Edxugúa nu'ula zaj zue̱' zi'i lu zra ca', ne nu'ula ca' zaj nuxre̱' bidu dxelázrebe', lawe' da gáta'le̱'e̱ da xelezaca bénneache ca', na' gaca tu da ba xa' zrente̱ chee̱ benne' ca'.

²⁴Bal-le̱' xelatie̱' lu wedil-la na', na' xebal-le̱' xeleché̱'e̱ le̱' zaj nadxéaje̱' tu tu xe̱zr la xu ca', na' benne' zitu' ca' xululéaje̱' xe̱zre Jerusalén cadxa cheajsé̱ chee̱ zra xelenná bea benne' zitu' ca'. Ca gaca gate xelá' Benne' Gulje̱' Bénneache

²⁵Na' gunná Jesús: ―Lu zra na' xelata' da xululé'e na lau gubizra, ne lau beu', ne lau belaj ca', na' lu xe̱zr la xu xelezúa ste̱be benne' ca', ne xelezrebe̱' ca naca schaga' da gun nísadau', ne xeajxruza chee̱ na.

²⁶Benne' ca' xelate ni'a ne̱'e̱ ne̱ chee̱ xel-la dxelezrebe gate xulusá lazre̱' ca da dxal-la' gaca lu xe̱zr la xu, ne ca naca da zaj zra' zran xabáa, da zaj napa xel-la waca xelezrízequeze na.

²⁷Lu zra na' xelelé'equezne̱' neda', Benne' Gulje̱' Bénneache, xelá'a tu lu beuj, nen dute̱ xel-la waca zren, ne da xabáa chia'.

²⁸Gate su lau gaca da caní, le gun dipa lázrele, ne le chisa xíchajle, lawe' da ba za zrin zra lale lu da dxaca chee̱le.

²⁹Nadxa bchalaj Jesús tu da dxulé'e na, gunné̱': ―Le nna'xque xaga higo, u bítete̱ze xaga.

³⁰Gate lé'ele ba dxezría na laga' dxe'ene, nézquezle le'e ba za xaca beu' la.

³¹Cá'anqueze, gate lé'ele gaca da caní, dxal-la' nézele ba zua gagu zra nna bea Dios.

³²’Da li dxapa' le'e, xúgute̱ da caní xelaca na nédxudxa gate quebe ne xelate bénneache zaj zra' lu zra na'a zra.

³³Xabáa, ne xe̱zr la xu weledé chee̱ na, san dizra' chia' quebe te chee̱ na.

³⁴Le guxúe xanne' cuínale, quebe güele lataj xelú'u lu xichaj lázrdaule da cale̱la ca' ca naca xel-la dxagu xrata, ne xel-la dxezuzre, ne xel-la dxezá lazre' da naca chee̱ xe̱zr la xu nigá, chee̱ quebe gácale ca tu benne' nachúl-lene̱' lu xichaj lázrdawe̱' gate zrin zra na',

³⁵ne chee̱ quebe gaca na ca tu da que̱la na le'e, lawe' da caní gaca chee̱ xúgute̱ benne' zaj zre̱'e̱ lu xe̱zr la xu nigá.

³⁶Le sua le'e ban lazre', ne le naba lau Dios chee̱ gaca lale lu da dxal-la' gaca lu xe̱zr la xu nigá, ne chee̱ gaca gulé'e cuínale du lázrele lawa' neda', Benne' Gulje̱' Bénneache.

³⁷Jesús bsé̱dene̱' benne' ca' lu xudau' te zra, na' chizrela dxexíaje̱' lu Xi'a Xaga Olivo.

³⁸Xúgute̱ benne' ca' belezrine̱' lu xudau' na' xugu' zila chee̱ xelenne̱' chee̱ Jesús.