Read Tabaa Zapotec San Lucas 22 Bible Online

San Lucas 22 - Tabaa Zapotec bible

San Lucas 22

¹Ba zua gagu laní gate dxelawe̱' xeta xtila da quebe nachixre cua zichaj chee̱ xeta xtila, da naca na Laní Pascua gate dxulusá lazre̱' ca da be̱n Dios gate bebéaje̱' bénneache chee̱' lu xe̱zr la xu Egipto.

²Lu zra ca' benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na belílaje̱' ájala xelune̱' xelútie̱' Jesús bagácheze, lawe' da dxelezrebe̱' da xelún benne' zan ca'.

³Nadxa guxú'u Satanás da xriwe̱' lu lázrdau Judas, bénnea' cá'anqueze le̱' Iscariote. Naque̱' tu benne' chazrinnu gubáz ca' chee̱ Jesús.

⁴Judas nigá guxíaje̱' xeajchálajle̱ne̱' benne' xíchaje̱ ca' chee̱ bxruze ca', ne benne' blau ca' chee̱ xudau', na' bchálajle̱ne̱' benne' ca' ájala gune̱' gudée̱' Jesús lu na' benne' ca'.

⁵Benne' caní gulebene̱', na' guleche̱be lazre̱' xulunézruje̱' le̱' dumí.

⁶Judas na' guzí' lu ne̱'e̱ dumí na', na' guzú lawe̱' dxílaje̱' ájala gune̱' gudée̱' Jesús lu na' benne' ca' gate quebe nu chilá' benne'. Da dxágudxu chee̱ cheajsá lazrdxu ca gute Xránadxu

⁷Bzrin zra laní gate dxelawe̱' xeta xtila da quebe nachixre cua zichaj chee̱ xeta xtila, gate dxal-la' xelútie̱' zríla'dau' ca' chee̱ Laní Pascua.

⁸Na' Jesús gusel-le̱' Pedro ne Juan, na' guzre̱'-be': ―Le chjaca, ne le gucuéza da gágudxu chee̱ Laní Pascua.

⁹Benne' caní buluche̱be̱' Le̱': ―¿Ga dxaca lazru' gucuézentu' na?

¹⁰Na' beche̱be Jesusen': ―Gate chu'ule lu xe̱zre, na' xezrágale tu benne' biu zenu'e̱ tu dxe'e nisa. Le chjácale̱ne̱' xu'u naga xezrine̱',

¹¹na' le xe̱ xrane xu'u na': “Benne' Wese̱de dxe̱'e̱ lue': ¿Ga zua xu'u naga gágule̱na' benne' ca' dxusé̱dea' zríla'dau' chee̱ Laní Pascua?”

¹²Nadxa gulé'ene̱' le'e tu xu'u zren da zua chupa cuia sibe, da bache nucá'ana chawe'. Le gucuéza da gágudxu na'.

¹³Benne' ca' xjaque̱', na' belezrélene̱' xúgute̱ ca da ba guzre Jesús le̱', na' bulucueze̱' da xelawe̱' chee̱ Laní Pascua.

¹⁴Gate bzrin zra, Jesús ne benne' ca' dxusé̱dene̱' gulezré̱'e̱ ga xelawe̱' na.

¹⁵Nadxa gunná Jesús, dxe̱'e̱ benne' ca': ―Guzá lázrele̱'a gágule̱na' le'e chee̱ Laní Pascua nigá nédxudxa ca quebe ne gatia'.

¹⁶Dxapa' le'e québedxa gawa' da nigá cadxa gaca li na naga dxenná bea Dios.

¹⁷Nadxa guqué̱'e̱ tu zruágadau', na' guzre̱' Dios: “Xcalenu'”, na' gunné̱': ―Le xi'aj late' weaj tu tule le'e.

¹⁸Dxapa' le'e québedxa xí'aja' chee̱ nisa uva caní cadxa xida xel-la dxenná bea chee̱ Dios.

¹⁹Nadxa guqué̱'e̱ xeta xtila, ne guzre̱' Dios: “Xcalenu'”, na' bzúzruje̱' na, ne bnézruje̱' na benne' ca', dxenné̱': ―Da nigá naca na be̱l-la' dxen chia', da guzúa' waláz chee̱le. Le gun da nigá chee̱ cheajsá lázrele chia' neda'.

²⁰Cá'anqueze be̱ne̱' nen zruágadau' na' ca gudé gulawe̱' xrche', na' gunné̱': ―Zruágadau' nigá zéaje̱ na xel-la wezría cube, da guzúa chúchua' nen dxen chia', da gulálaja' waláz chee̱le.

²¹’Na'a, zrua na' benne' biu na' tu zren nen na'a ga zua da dxágadxu, bénnea' gudée̱' neda' lu na' benne' dxeledábague̱' neda'.

²²Neda', Benne' Gulje̱' Bénneache, waxá'a lu neza da ble'e Dios neda' naga gatia', san edxugúa bénnea' gudée̱' neda' chee̱ gatia'.

²³Nadxa benne' ca' dxuse̱de Jesús gulezú lawe̱' dxuluche̱be ljwezre̱' nu na' gudé Jesús. Dxuluche̱be ljwezre̱' nule̱' gácadxe̱' blau

²⁴Cá'anqueze buluche̱be ljwezre̱' nule̱' gácadxe̱' benne' blau.

²⁵Na' Jesús guzre̱' le̱': ―Benne' wenná bea chee̱ xe̱zr la xu ca' dxelenná bé'ene̱' bénneache ca xrane bénneache ca', na' benne' xíchaje̱ chee̱ benne' ca' dxelenné̱' zaj naque̱' benne' dxelune̱' da chawe' chee̱ benneáche ca'.

²⁶Le'e quebe dxal-la' gunle ca'. Benne' nácadxe̱' blau ládujla le'e dxal-la' gaque̱' ca benne' nácadxe̱' cuide', na' benne' dxenná be'e̱ dxal-la' gaque̱' ca benne' nada'u chee̱ ljwezre̱' ca'.

²⁷¿Nu nácadxa blau, benne' dxe'e̱ dxawe̱', che benne' dxudée̱' xel-la wagu? ¿Quebe naca bénnea' dxe'e̱ dxawe̱'? Neda' zúale̱na' le'e ca tu benne' dxune̱' zrin chee̱le.

²⁸’Le'e guzúale̱quezle neda' gate neda' guzí guzaca'.

²⁹Chee̱ le̱ na' dxunna' le'e lataj nna beale, ca be̱n Xra', be̱nne̱' na neda',

³⁰chee̱ xi'aj gágule ga naca chia' naga nna be'a neda', na' cue'le lataj blau ca' chee̱ guchí'ale chee̱ chazrinnu cue' xrtia Israel. Jesús dxenné̱' Pedro nne̱' quebe núnbe'e̱ Le̱'

³¹Na' gunnáqueze Xránadxu: ―Simón, Simón, Satanás, da xriwe̱' ba gunaba na le'e chee̱ seque gudé na le'e lu dul-la ca dxun tu benne' dxudxixre dxutul-le̱' xizre za.

³²Neda' guta' xueda' Xra' gácale̱ne̱' lue' chee̱ quebe guníteu' xel-la dxeajlí lazre chiu'. Na' lue', gate bache bexacu' dipa lazre', gúcale̱ le sa' ljwezru' ca' chee̱ xelezé̱ chache̱'.

³³Na' gunná Simón, guzre̱' Jesús: ―Xran, ba zúaqueza' sá'le̱na' Lue' lizre xia, ne chee̱ gátequeza' nen Lue'.

³⁴Jesús guzre̱' le̱': ―Pedro, dxapa' lue', ná'ate̱la ne dé̱dxela cuezre xjeaj, lue' wannáu' chunna lasa quebe núnbe'u neda'. Ba zua gagu zra si saca Jesús

³⁵Nadxa Jesús bche̱be̱' benne' ca': ―Gate gusel-la' le'e quebe bíale xixruj, ne naga cu'ule dumí, ne zrélale, ¿bxázrjele bi da guchínnele? Benne' ca' belexeche̱be̱': ―Gutu bi de̱.

³⁶Nadxa guzre̱' benne' ca': ―Na'a, benne' nape̱' xixruj dxal-la' gu'e̱ na, ne naga dxugu'e̱ dumí. Bénnea' quebe nape̱' xia da dxuluchínene̱' lu wedil-la, dxal-la' xexutie̱' xicha chee̱', na' si'e̱ xia chee̱'.

³⁷Dxapa' le'e dxal-la' gaca chia' néda'queza' ca da naxúaj na lu xiche chee̱ Dios, dxenné̱': “Gubabe̱' ca tu benne' we̱n da zrinnaj.” Xúgute̱ da naxúaj na chia' dxal-la' gaca li na.

³⁸Nadxa benne' ca' gulenné̱': ―Xran, nigá de̱ chupa xia. Le̱' beche̱be̱': ―Da naze. Jesús dxuchálajle̱ne̱' Dios naga nazí le na Getsemaní

³⁹Nadxa bedxúaj Jesús xu'u na', na' ca dxúnqueze̱', guxíaje̱' lu Xi'a Xaga Olivo, na' benne' ca' dxusé̱dene̱' xjácale̱ne̱' Le̱'.

⁴⁰Gate belezrine̱' na', Jesús guzre̱' le̱': ―Le naba lau Dios chee̱ quebe seque da xriwe̱' cu'u na le'e lu dul-la.

⁴¹Nadxa Jesús guzé̱'e̱ ca tu legu'una xiaj naga zaj zra' benne' ca', na' bzu zribe̱' bchálajle̱ne̱' Dios.

⁴²Gunne̱': ―Xrae, che dxaca lazru', bcuasa neda' ca naca da dxal-la' saca', da naca na ca tu da sla' da dxal-la' xí'aja', quegá gaca na ca dxaca lazra' neda', san ca dxaca lazru' Lue'.

⁴³Nadxa ble'e lau naga zua Jesús tu gubáz chee̱ xabáa, na' btipe̱' lazre' Jesús.

⁴⁴Gate ne dxezácale̱'e̱, du lazre̱' bchálajle̱ne̱' Dios, na' xesa chee̱' guca na ca dxen dxelezrún na lu xu.

⁴⁵Ca bexuzre bchálajle̱ne̱' Dios, na' bexase̱', na' bezrine̱' naga zaj zra' benne' ca' dxusé̱dene̱', na' blé'ene̱' dxelase benne' ca', lu xel-la dxelexewi'ine lazre' chee̱'.

⁴⁶Nadxa guzre̱' benne' ca': ―¿Dxáselale le'e na'a? Le chasa, ne le naba lau Dios chee̱ quebe seque da xriwe̱' cu'u na le'e lu dul-la. Dxele̱le̱' Jesús

⁴⁷Ne dxuchálajte̱ Jesús gate belelá' benne' zan ca'. Bénnea' le̱' Judas, tu benne' chazrinnu ca', ze̱'e̱ zria lawe̱' lau benne' ca', na' gubigue̱' cuita Jesús chee̱ gunupe̱' Le̱'.

⁴⁸Nadxa Jesús guzre̱' le̱': ―Judas, ¿dxunupu' neda', Benne' Gulje̱' Bénneache, chee̱ gudéu' neda' lu na' benne' dxeledábague̱' neda'?

⁴⁹Benne' ca' zrále̱ne̱' Jesús, ca belelé'ene̱' ca da dxaca, na' buluche̱be̱' Jesús: ―Xran, ¿guchínentu' xia?

⁵⁰Tu benne' ca' dxedále̱ Jesús be̱ne̱' zi' tu bi we̱n zrin chee̱ bxruze blau, guchugue̱' nágabe' zua xabe̱la.

⁵¹Jesús gunné̱': ―Québedxa gunle ca'. Cá'anze. Nadxa Jesús bte̱' naga bi we̱n zrin na', na' bexune̱' na.

⁵²Na' guzre̱' benne' xíchaje̱ ca' chee̱ bxruze, ne benne' blau ca' chee̱ xudau', ne benne' gula sina ca', benne' zá'aque̱' xeleché̱'e̱ Jesús, gunné̱': ―¿Blale le'e nen xia, ne xaga chee̱ qué̱lale neda' ca dxé̱lale tu gubán?

⁵³Gate guzúa' neda' lu xudau' nen le'e tu zra tu zra, quebe bi be̱nle le'e chia', san zra nigá naca na zra chee̱le, gate dxenná bea da zua na lataj chul-la. Pedro dxenné̱' quebe núnbe'e̱ Jesús

⁵⁴Nadxa gule̱le̱' Jesús, na' guleché̱'e̱ Le̱' lizre bxruze blau, na' Pedro zíaje̱' nawe̱' Le̱' zítu'la.

⁵⁵Na' gulebé'e̱ guléchaje̱' xi' na', na' Pedro gudxé'e̱ ládujla benne' ca'.

⁵⁶Nadxa tu nu'ula we̱n zrin, gate blé'ene̱' Pedro dxe'e̱ dxu'a xi' na', guzúe̱' dxenné̱'e̱ le̱', na' gunné̱': ―Cá'anqueze benne' nigá guque̱' tuze le̱n Jesús.

⁵⁷Pedro gunné̱': ―Nu'ula, quebe núnbe'a bénnea'.

⁵⁸Xetú chí'idau' guca, na' ble'e xetú benne' xula Pedro na', na' gunné̱': ―Cá'anqueze lue' nacu' tu zren benne' ca'. Pedro gunné̱': ―Cabí. Quebe naca ca'.

⁵⁹Xelate gudé na', xetú benne' be̱n chúchue̱' xrtizre̱', gunné̱': ―Da li, benne' nigá guque̱' tuze le̱n Jesús, lawe' da naque̱' benne' Galilea.

⁶⁰Nadxa gunná Pedro: ―Benne', quebe nezda' nu chee̱ na' dxuchálaju'. Dxácate̱ na' ne dxuchálajte̱ Pedro ca', na' gudxezre xjeaj.

⁶¹Nadxa Xránadxu bzechaj xíchaje̱', gunné̱'e̱ Pedro, na' Pedro xeajsá lazre̱' ca da guzre Xránadxu le̱', gunné̱': “Ná'ate̱la ne dé̱dxela cuezre xjeaj, lue' wannáu' chunna lasa quebe núnbe'u neda'.”

⁶²Nadxa bedxúaj Pedro, na' gudxezre xáche'le̱'e̱. Dxelún le̱' chee̱ Jesús

⁶³Na' benne' ca' zaj nuxre̱' Jesús belún le̱' chee̱', na' buluzalje̱' Le̱'.

⁶⁴Bulucache̱' lawe̱', na' belegape̱' xrague̱', dxelé̱'e̱ Le̱': ―Gunné̱ xa'a nu be̱ Lue'.

⁶⁵Da zan da gulenné̱', dxelenné̱' schanni' chee̱ Jesús. Jesús dxezrine̱' lau benne' ca' chee̱ xu'u lawe' blau chee̱ judío ca'

⁶⁶Gate naca te zra, na' belezraga benne' gula sina ca' chee̱ judío ca', ne benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na, na' guleché̱'e̱ Jesús lau benne' ca' chee̱ xu'u lawe' blau chee̱ judío ca'. Na' buluche̱be̱' Le̱':

⁶⁷―Gunná, ¿nacu' lue' Cristo? Na' beche̱be Jesús: ―Che xapa' le'e: Awe', quebe chéajle̱le,

⁶⁸na' che bi guche̱ba' le'e, quebe xeché̱bele chia', ne quebe gusanle neda'.

⁶⁹Ná'ate̱la neda', Benne' Gulje̱' Bénneache, cue'a chalá'a xabe̱la chee̱ Dios nape̱' dute̱ xel-la waca.

⁷⁰Nadxa xúgute̱' buluche̱be̱' Le̱': ―¿Nacu' Lue' Zri'ine Dios? Jesús beche̱be̱': ―Naca', ca dxennáquezle le'e.

⁷¹Nadxa gulenná benne' ca': ―¿Núzradxa chínnedxu bi nne̱' chee̱ benne' nigá? Dxí'uqueze ba bénedxu ca da gunnáqueze̱'.