Read Tabaa Zapotec San Lucas 8 Bible Online

San Lucas 8 - Tabaa Zapotec bible

San Lucas 8

¹Ca gudé da nigá, gudá Jesús zane' xe̱zre, ne xé̱zredu ca', dxusé̱dene̱', ne dxuchálaje̱' ca dxenná bea Dios. Benne' chazrinnu gubáz ca' zjácale̱ne̱' Le̱'.

²Cá'anqueze zjácale̱ Le̱' bal-la nu'ula ca', benne' ca' bexune̱' le̱' ca naca xízrawe̱' chee̱', ne bebéaje̱' be' xriwe̱' ca' da zaj xu'e̱. Ládujla nu'ula ca' ziaj María Magdalena, nu'ula na' belexedxúaj gazre be' xriwe̱' lu xichaj lázrdawe̱'.

³Ládujla le̱' zíajqueze Juana, zru'ula Chuza, benne' na' xu'u lu ne̱'e̱ da napa Herodes. Cá'anqueze ládujla le̱' ziaj Susana, na' zjaca nu'ula zandxa na', nu'ula ca' dxelácale̱ne̱' Jesús nen da zaj nape̱'. Da dxulé'e na ca naca chee̱ benne' dxaze̱' zrua' xtila

⁴Benne' zan beledxúaje̱' lu xe̱zre ca' chee̱ xelelé'ene̱' Jesús, na' gate belezraga benne' zan naga zue̱', na' bchálaje̱' tu da dxulé'e na, dxe̱'e̱ le̱':

⁵―Tu benne' dxaze̱' guzé̱'e̱ zjaze̱' zrua' xtila. Ca zéaje̱' dxaze̱' na, bal-la bínnedu ca' xeajlechaze na dxu'a neza, na' benne' ca' bululéaje̱' na, na' belezrín bxínnedau' guláguba' na.

⁶Xebal-la bínnedu ca' xeajlechaze na lu xiaj ca', na' gate bínnedu caní belezría na, chadite̱ gulebizre na, lawe' da quebe gudxé' gupa'.

⁷Xebal-la bínnedu ca' xeajlechaze na naga zaj dxe' lue xeche', na' bululule xeche' ca' le̱ na.

⁸Xebal-la bínnedu ca' xeajlechaze na lu xu be̱be, na' gate belegula na, na' gulezríale̱'e̱ na. Bal-la na gulezría na tu gaxúa weaj. Gate bexuzre bchalaj Jesús da nigá, na' gunné̱' zizraj: ―¡Che le'e zua nágale, le xene! Jesús dxenné̱' bizr chee̱ na' dxuchálaje̱' da dxululé'e na

⁹Nadxa benne' ca' dxuse̱de Jesús gulenábene̱' Le̱' bizra zéaje̱ da dxulé'e nigá.

¹⁰Jesús guzre̱' le̱': ―Dios dxuzéajni'ine̱' le'e ca naca da nagache chee̱ xel-la dxenná bea chee̱', san benne' xula, dxuchálajle̱na' le̱' da dxulé'e na caní, chee̱ gate dxelelé'ene̱' xelaque̱' ca benne' quebe dxelelé'ene̱', ne gate dxelenne̱' quebe dxeléajni'ine̱'. Jesús dxuxuzájle̱'e̱ da dxulé'e na ca naca chee̱ bénnea' dxaze̱'

¹¹Na' gunná Jesús: ―Da nigá naca ca zéaje̱ da dxulé'e na': Bínnedu ca' zéaje̱ na xrtizra' Dios.

¹²Bínnedu ca' xeajlechaze na dxu'a neza zéaje̱ na benne' ca' dxelenne̱' xrtizra' Dios, san za' da xriwe̱', na' dxegúa na dizra' na' lu xichaj lázrdau benne' ca', chee̱ quebe xeléajle̱'e̱, ne quebe xelelé̱'.

¹³Bínnedu ca' xeajlechaze na lu xiaj ca' zéaje̱ na benne' ca' dxelenne̱' dizra' na', ne dxelezi'e̱ na dute̱ xel-la dxelebé, san quebe dxaze na lu xichaj lázrdawe̱'. Dxeléajle̱'e̱ tu chí'idau'ze, na' gate dxeledée̱' lu da zi' da xa', na' dxulusán lazre̱' na.

¹⁴Bínnedu ca' xeajlechaze na naga zaj dxe' lue xeche' zéaje̱ na benne' ca' dxelenne̱' dizra' na', na' dxeajxaque̱', na' lawe' da dxeleze̱ne̱' gunne xue da zante̱, ne dxelezé̱ lazre̱' xel-la gunní'a, ne da xele'aj xelawe̱' da zácale̱'e̱, na' xúgute̱ da caní dxulusunite na dizra' na', na' quebe dxun na zrin lu xichaj lázrdawe̱'.

¹⁵Na' bínnedu ca' xeajlechaze na lu xu be̱be zéaje̱ na benne' ca' zua chawe', ne du lazre' lázrdawe̱', na' gate dxelenne̱' dizra' na', dxuluzúa chache̱' na, na' dxun zrin dizra' na' lu xichaj lázrdawe̱'. Da dxulé'e na ca naca chee̱ tu da dxegú'u lení'

¹⁶Gunná Jesús: ―Netú benne' che gugale̱' da dxegú'u lení', quebe gudúsie̱' na tu xi'ina, u zranle ga dxasie̱', san guzúe̱' na sibe, chee̱ cu'u lení' na chee̱ benne' zaj zre̱'e̱ lu xu'u na'.

¹⁷Quebe bi de̱ da nagache' da quebe gulé'e lau na, ne quebe bi xu'u lu xichaj lázrdau bénneache da quebe gaca bea na, ne lá'te̱queze na.

¹⁸’Chee̱ le̱ na', le xene xanne'. Tu benne' nazi'e̱ xrtizra' Dios, wazidxe̱', san benne' quebe dxezi'e̱ na, wegá'a ca da du dxéquene̱' nape̱'. Dxelezrín lau Jesús xrne̱'e̱, ne benne' biche̱' ca'

¹⁹Nadxa xrna Jesús, ne benne' biche̱' ca' belezrine̱' naga zue̱', san quebe gulezéquene̱' xelezrine̱' lau Le', lawe' da zrále̱'e benne' zan ga na'.

²⁰Tu benne' na' bzenne̱' Jesús, gunné̱': ―Xrna'u, ne bi bichu' ca' zaj zre̱'e̱ chale'aj nigá, dxelaca lazre̱' xuluchálajle̱ne̱' Lue'.

²¹Jesús guzre̱' le̱': ―Benne' ca' dxelenne̱' xrtizra' Dios, ne dxelune̱' ca dxenná na, benne' caní zaj naque̱' ca xrna'a, ne benne' bícha'dau' ca'. Jesús dxuzúa zrie̱' be' bdunu', ne xeajxruza chee̱ nísadau'

²²Tu zra guxú'u Jesús tu lu da dxedá lawe' nísadau' nen benne' ca' dxusé̱dene̱', na' guzre̱' le̱': ―Cheajdxu xecha la'a nísadau'. Na' gusiá'que̱',

²³ne dxácate̱ zjaque̱' lu nísadau' na', guse Jesús. Na' guzú lau dxácale̱'e̱ be' bdunu' lu nísadau', na' guzú lau dxu'u nisa lu da dxedá lawe' nísadau' na', ne ba dxácate̱ waxaze na lu nísadau'.

²⁴Nadxa bulusebane̱' Jesús, dxelé̱'e̱ Le̱': ―¡Benne' Wese̱de! ¡Benne' Wese̱de! ¡Ba dxázedxu lu nisa nigá! Nadxa guxasa Jesús, na' gudil-le̱' be' bdunu' na', ne nisa na', na' ca naca da ca' belezúa zri na.

²⁵Nadxa Jesús guzre̱' benne' ca' dxusé̱dene̱': ―¿Quebe ne chéajle̱le chee̱ Dios? Benne' ca' belezrebe̱', ne belexebánene̱', na' buluche̱be ljwezre̱': ―¿Núzraqueze benne' nigá, dxenná bé'ene̱' be', ne nisa, na' dxuluzúa na dizra' chee̱'? Tu benne' Gadara xu'e̱ be' xriwe̱'

²⁶Nadxa belezrine̱' xecha la'a nisa lu xe̱zr la xu chee̱ xe̱zre Gadara, chalá'a ca'ala chee̱ Galilea.

²⁷Gate bedxúaj Jesús lu da dxedá lawe' nísadau' na', na' bzrin tu benne' xe̱zre na' lau Le̱'. Zánete̱ iza ba guca xu'u be' xriwe̱' ca' benne' nigá. Quebe gúcue̱' zra lane̱', ne quebe guzúe̱' netú lu xu'u, san xeajchu'e̱ tu lu ba ca'.

²⁸Gate blé'ene̱' Jesús, na' xeajzú zribe̱' lau Le̱', na' gudxezre xe̱'e̱, dxenné̱': ―¿Bizr chee̱ na' za'u naga zua', Jesús, Zri'ine Dios szrente̱? Dxata' xueda' Lue' quebe gusaca zi'u neda'.

²⁹Gunná na caní lawe' da ba gunná be'e Jesús be' xriwe̱' ca' xelexedxúaj na lu xichaj lázrdau benne' nigá. Zane' lasa be' xriwe̱' ca' ba gule̱la na benne' nigá. Benne' xe̱zre na' gule̱le̱' benne' nigá, ne buluchéaje̱' le̱' ni'a ne̱'e̱ nen du xia, san le̱' bzúzxuje̱' du xia na', na' be' xriwe̱' ca' guleché̱ na le̱' le̱'e̱ xixre' lawe' lataj.

³⁰Jesús bche̱be̱' be' xriwe̱' ca': ―¿Bi le̱le? Na' beche̱be le̱ na: ―Neda' lea': Da Zan. Ca' gunná na lawe' da xu'u be' xriwe̱' zante̱ benne' na'.

³¹Be' xriwe̱' ca' gulenaba na Jesús quebe sel-le̱' na lataj chul-la.

³²Lu xi'a naga zua Jesús, na' zrále̱'e̱ cuche zan dxeláguba', na' be' xriwe̱' ca' gulata' xue na Jesús gu'e̱ lataj da ca' cheajxezrá na lu cuche ca', na' bnezruj Jesús na lataj.

³³Nadxa be' xriwe̱' ca' belexedxúaj na lu xichaj lázrdau benne' na', na' gulú'u na lu cuche ca', na' xúgute̱ cuche ca' buluzrúnnujba', ne gulebíxreba' dxu'a chjéa, na' xeajlecházeba' lu nísadau', naga gulé̱peba', guláteba'.

³⁴Benne' ca' dxuluxúe̱' cuche ca', gate belelé'ene̱' ca da guca, na' buluzrúnnuje̱' lu xel-la dxelezrebe, na' gulé̱'e̱ benne' zaj zre̱'e̱ le̱'e̱ xixre', ne benne' zaj zre̱'e̱ lawe' xe̱zre ca da guca.

³⁵Nadxa benne' ca' beledxúaje̱' xeajlenné̱'e̱ ca da guca. Gate belezrine̱' naga zua Jesús, na' belelé'ene̱' bénnea' belexedxúaj be' xriwe̱' ca' lu xichaj lázrdawe̱', dxe'e̱ zran ni'a Jesús, ba nácue̱' ladxe', ne ba bezúa chawe' xichaj lázrdawe̱', na' benne' ca' belezrebe̱'.

³⁶Na' benne' belelé'e ca da guca buluchálajle̱ne̱' benne' xula ca' ca guca gate bexaca bénnea' guxú'e̱ be' xriwe̱' ca'.

³⁷Gate belenne̱' caní, ca naca benne' zaj zre̱'e̱ lu xe̱zr la xu chee̱ xe̱zre Gadara gulezú lawe̱' dxelata' xúene̱' Jesús xezé̱'e̱ lazrie', lawe' da dxelezrébele̱'e̱. Ca'an guca, guxú'u Jesús lu da dxedá lawe' nísadau', chee̱ xezé̱'e̱ xéaje̱'.

³⁸Bénnea' belexedxúaj be' xriwe̱' ca' lu xichaj lázrdawe̱' gunabe̱' lau Jesús gunézruje̱' lataj chéajle̱ne̱' Le̱', san Jesús busebague̱' le̱' xegá'ane̱' lázrie̱', na' guzre̱' le̱':

³⁹―Bexiaj lizru', na' bchalaj chee̱ xúgute̱ ca da ba be̱n Dios chiu'. Na' benne' na' bezé̱'e̱ zexíaje̱', na' bchálajle̱ne̱' benne' xe̱zre ca' ca da be̱n Jesús chee̱ le̱'. Jesús dxexune̱' bí nu'ula chee̱ Jairo, ne tu nu'ula xeajté̱' zra lane̱'

⁴⁰Gate bezrín Jesús xecha la'a dxu'a nísadau', benne' ca' zaj zre̱'e̱ na' gulezí' lu ne̱'e̱ Le̱' nen dute̱ xel-la dxelebé, lawe' da xúgute̱' dxelebeze̱' Le̱'.

⁴¹Nadxa bzrin tu benne' le̱' Jairo, benne' blau chee̱ xu'u naga dxelezraga judío ca', na' bzu zribe̱' lau Jesús, ne guta' xúene̱' Le̱' chéaje̱' lizre̱',

⁴²lawe' da zua tuze bi nu'ula chee̱'. Xu'ube' chazrinnu iza, na' ba dxaca wátebe'. Gate guzá' Jesús zéaje̱', benne' zante̱ zjácale̱ne̱' Le̱', ne buluchídete̱ ljwezre̱'.

⁴³Ládujla benne' ca' zeaj tu nu'ula quebe chawe' zue̱', na' chazrinnu iza ba zeaj dxé'ene̱' we̱' dxen da dxaca chee̱ nu'ula ca'. Ba gudízruje̱' benne' dxelexún bénneache ca' xúgute̱ ca da gudape̱', na' quebe bi gulezéquene̱' xelune̱' chee̱ xexaca nu'ula na'.

⁴⁴Nu'ula na' gubigue̱' cúzrula Jesús, na' xeajté̱' zran ni'a zre̱', na' la ná'queze bexágate̱ dxen da dxaca nu'ula na'.

⁴⁵Nadxa Jesús bche̱be̱': ―¿Nuzra bta neda'? Xúgute̱' gulenné̱': “Quebe nu ne gutá Lue'”, na' Pedro, ne benne' ljwezre̱' ca' gulenné̱': ―Benne' Wese̱de, benne' caní dxuluchídee̱' Lue', ne dxuluzrigue̱' Lue', na' dxuché̱bequezu', dxennáu': “¿Nuzra bta neda'?”

⁴⁶Jesús gunné̱': ―Tu benne' bte̱' neda' lawe' da gúquebe'eda' ben zrin xel-la waca chia' da bexún na tu benne'.

⁴⁷Gate gúquebe'e nu'ula na' ba neze Jesús da guca, nadxa gudée̱' dxezrízete̱', na' bzu zribe̱' lau Jesús, ne guxrúale̱pe̱' lau xúgute̱ benne' ca' bizr chee̱ na' bte̱' Jesús, ne ca guca bexácate̱'.

⁴⁸Nadxa gunná Jesús, guzre̱' nu'ula na': ―Zrí'ina'dau', ba bexacu' lawe' da guxéajle̱'u chia'. Bexíaj na'a, dute̱ xel-la dxebeza zri lazre'.

⁴⁹Ne dxuchálajte̱ Jesús, bzrin tu benne' naga ze̱ Jesús, benne' guzé̱'e̱ lizre Jairo, benne' blau chee̱ xu'u ga na' dxelezraga judío ca', na' guzre̱' Jairo: ―Ba gute bi nu'ula chiu'. Québedxa guzúa xuzru' Benne' Wese̱de nigá.

⁵⁰Gate ben Jesús ca gunné̱', na' guzre̱' Jairo: ―Quebe zrebu'. Con guxeajle̱. Bi nu'ula chiu' na' xexácabe'.

⁵¹Gate bzrin Jesús xu'u na', netú quebe be̱' lataj chú'ule̱ Le̱', san tuze Pedro, ne Jacobo, ne Juan, ne xra xrna bi nu'ula na'.

⁵²Xúgute̱ benne' zaj zre̱'e̱ na' dxelebezre̱', ne dxelebezre xache̱' chee̱ bi nu'ula na'. Jesús gunné̱': ―Quebe cuézrele. Bi nú'uladu nigá quebe nátebe'. Dxásezebe' na'.

⁵³Na' benne' ca' buluzrizre̱' chee̱', lawe' da zaj nézquezne̱' ba gútebe'.

⁵⁴Nadxa Jesús guqué̱'e̱ na' bi na', na' gunné̱' zizraj: ―¡Bi nu'ula, bexasa!

⁵⁵Na' bebanbe', ne bexásate̱be'. Na' Jesús busebague̱' le̱' xulunézruje̱' da gágube'.

⁵⁶Xra xrnabe' belexebánele̱'e̱ne̱'. Jesús busebague̱' le̱' quebe nu xelé̱'e̱ ca da guca.