Read Tabaa Zapotec San Juan 1 Bible Online

San Juan 1 - Tabaa Zapotec bible

San Juan 1

¹Gate guzú lau zua xúgute̱ da de̱, ba zúaqueze Bénnea' le̱' Xrtizra' Dios, da zéaje̱ na Benne' naque̱' dute̱ da nácaqueze Dios, na' Bénnea' le̱' Xrtizra' Dios zúale̱ne̱' Dios, ne nácaqueze̱' Dios.

²Nédxudaute̱ Benne' nigá zúale̱ne̱' Dios.

³Lu na' Benne' nigá be̱n Dios xúgute̱ da de̱. Quebe bi de̱ da quebe nun Le̱'.

⁴Nácaqueze Le̱' xel-la' nabán, na' xel-la' nabán nigá naca na da dxusení na lu xichaj lázrdau bénneache chee̱ xelaca bane̱'.

⁵Xel-la' naxaní' nigá dxusení na lu da chul-la chee̱ dul-la da zaj nabaga bénneache, na' da chul-la nigá quebe dxezeque na xusula na xel-la' naxaní' nigá.

⁶Guzúa tu benne' le̱' Juan, gusel-la Dios bennea'.

⁷Benne' nigá ble̱'e̱ chee̱ bchálaje̱' ca naca chee̱ Bénnea' naque̱' xel-la' naxaní' nigá, chee̱ xeléajle̱ xúgute̱ bénneache chee̱ Bénnea' ne̱ chee̱ da dxenné̱'.

⁸Juan nigá quebe naque̱' xel-la' naxaní' na'. Ble̱'e̱ chee̱ bchálaje̱' ca naca chee̱ Bénnea' naque̱' xel-la' naxaní' nigá.

⁹Xel-la' naxaní' li, da dxusení na lu xichaj lázrdau xúgute̱ bénneache ba za' la' na lu xe̱zr la xu nigá.

¹⁰Bénnea' naque̱' Xrtizra' Dios zue̱' lu xe̱zr la xu nigá, na' lácala be̱n Dios xe̱zr la xu lu na' Bénnea', bénneache zaj zre̱'e̱ lu xe̱zr la xu quebe belexexúnbe'e̱ Le̱'.

¹¹Ble̱'e̱ naga zua da naca chee̱', na' benne' lazrie̱' ca' quebe gulezí' lu ne̱'e̱ Le̱'.

¹²Benne' ca' gulezí' lu ne̱'e̱ Le̱', ne guléajle̱'e̱ chee̱', be̱'e benne' caní lataj xelaque̱' bi ca' chee̱ Dios.

¹³Benne' caní québedxa zaj naque̱' ca zri'ine bénneacheze, bi ca' dxelálajbe' ne̱ chee̱ bénneache, u ne̱ chee̱ da dxezá lazre' tu benne'. Benne' caní zaj naque̱' bi ca' chee̱ Dios ná'queze.

¹⁴Bénnea' naque̱' Xrtizra' Dios gúlaje̱' ca tu bénneache, na' guzúe̱' ládujla dxi'u, zaj zúale̱ xel-la' zri'i lazre', ne da li Le̱'. Blé'entu' ca naca xel-la' szren chee̱', tu xel-la' szren da nunezruj Xradxu Dios chee̱ Zrí'ine̱' tu licha'.

¹⁵Juan bchálaje̱' ca naca chee̱ Bénnea', gunné̱': ―Benne' nigá naque̱' Bénnea' bchálaja' neda' chee̱' gate gunnéa' Bénnea' ze̱'e̱ te chia' neda' naque̱' szrendxa ca neda' lawe' da zúaqueze̱' nédxute̱ ca neda'.

¹⁶Xúgute̱dxu ba guzidxu xel-la' zri'i lazre' chee̱' da dxúnnaqueze Le̱'.

¹⁷Bla' da nadxixruj bea Dios ládujla dxi'u lu na' Moisés, na' xel-la' zri'i lazre', ne da li belelá' na lu na' Jesucristo.

¹⁸Netú benne' quebe ne lé'ene̱' Dios. Zrí'ine̱' tu licha', bi nazrí'ite̱ lazre̱', benne' nigá guque̱' tuz ca nácaqueze Xre̱'. Juan, benne' bchue̱' bénneache nisa, dxexeche̱be̱' chee̱ Jesús

¹⁹Benne' xíchaje̱ ca' chee̱ judío ca', benne' zaj zre̱'e̱ Jerusalén, gulesel-le̱' bxruze ca', ne xrtia Leví, benne' ca' dxelune̱' zrin chee̱ xudau', na' belezrine̱' lau Juan chee̱ xuluche̱be xánnie̱' le̱' nu naque̱'.

²⁰Beche̱be Juan du lazre̱', gunné̱': ―Quebe naca' neda' Cristo. (Dizra' nigá zéaje̱ na Benne' guche̱be lazre' Dios sel-le̱'.)

²¹Nadxa buluche̱be̱' le̱': ―¿Nuzra nacu'? ¿Nacu' Elías, bénnea' bchálaje̱' waláz chee̱ Dios? Beche̱be Juan: ―Cabí. Na' buluché̱bequeze̱' le̱': ―¿Nacu' bénnea' dxal-la' le̱'e̱, ne guchalaje̱' waláz chee̱ Dios, ca da gunná Moisés dxal-la' gaca na? Le̱' beche̱be̱': ―Cabí.

²²Nadxa buluché̱bedxaqueze̱' le̱': ―¿Nuzra nacu'? Dxun na ba xen gata' bi xeché̱bentu' chee̱ benne' gulesel-le̱' netu'. ¿Bi dxennáquezu' nu nacu'?

²³Juan beche̱be̱': ―Neda' naca' bénnea' naxúaj na ca naca chee̱' lu xiche chee̱ Dios, da dxenná: Wen chi'i tu benne' dxebezre xe̱'e̱ le̱'e̱ xixre' lawe' lataj, dxenné̱': “Le salaj tu neza li naga te Xránadxu.” Naquen cáte̱ze gunná Isaías, bénnea' bchalaje̱' waláz chee̱ Dios.

²⁴Benne' xudau' fariseo ca' gulesel-le̱' benne' caní chee̱ cheajlechálajle̱ne̱' Juan.

²⁵Le̱' buluche̱be̱' le̱': ―Che lue' quebe nacu' Cristo, ne Elías, ne bénnea' dxal-la' xedajchalaje̱' waláz chee̱ Dios, ¿bi xel-la' dxenná bea napu' dxuchú' bénneache nisa?

²⁶Juan guzre̱' benne' ca': ―Neda' dxuchúa' bénneache nisa lu nísaze. Zua tu benne' ládujla le'e quebe nézele ca szren naque̱'.

²⁷Benne' nigá ze̱'e̱ ca te chia' neda', na' zúaqueze̱' nédxudxa ca neda'. Quebe zaca' neda' cuéaja' zrele̱' da xu'u ni'e̱.

²⁸Xúgute̱ da caní guca na lu xe̱zr la xu chee̱ xe̱zre Betábara, da zua na chalá'a xe̱gu Jordán naga dxalaj gubizra, naga zua Juan dxuchúe̱' bénneache nisa. Jesús naque̱' Zríla'dau' chee̱ Dios, be̱ dxelutie̱' lau Dios ne̱ chee̱ xtul-le'

²⁹Zra xula ble'e Juan dxezrín Jesús naga zue̱', na' gunné̱': ―¡Le nna'xque! Benne' nigá naque̱' Zríla'dau' chee̱ Dios, cue̱' dul-la zaj nabaga bénneache.

³⁰Neda' bchálaja' ca naca chee̱' gate gunnéa': Te chia' neda' za tu benne' naque̱' szrendxa ca neda' lawe' da zúaqueze̱' nédxudaute̱ ca neda'.

³¹Néda'queza' quebe gunezda' nu naque̱'. Bla'a dxuchúa' bénneache nisa chee̱ xeleneze xe̱zre Israel nu Benne' naca Le̱'.

³²Cá'anqueze gunná Juan: ―Neda' ble'eda' Be' Lá'azxa bétaje̱' xabáa ca tu bgugu chíchedau', ne begá'anale̱ne̱' Benne' nigá.

³³Neda' quebe ne nezda' nu naque̱'. Dios na' nasel-le̱' neda' chee̱ guchúa' bénneache nisa, Le̱' guzre̱' neda': “Gate le'enu' Be' Lá'azxa xétaje̱' xegá'anale̱ne̱' tu benne', Benne' nigá gune̱' da zéaje̱ xel-la' dxedxúa nisa, guzúe̱' Be' Lá'azxa lu xichaj lázrdaule.”

³⁴Na'a ba ble'eda' guca da nigá, ne dxexeche̱ba' nácaqueze Benne' nigá Zri'ine Dios. Benne' nedxu ca' dxuse̱de Jesús

³⁵Zra xula zúaqueze na' Juan nen chupa benne' ca' dxusé̱dene̱'.

³⁶Gate blé'ene̱' dxedé na' Jesús, na' gunná Juan: ―¡Le nna'xque! ¡Benne' nigá naque̱' Zríla'dau' chee̱ Dios, bia gáteba' ne̱ chee̱ dul-la nabágadxu!

³⁷Dxúpate̱ benne' ca' dxuse̱de Juan belenne̱' ca da gunné̱', na' xjácale̱ne̱' Jesús.

³⁸Nadxa bexechaj Jesús, gunné̱'e̱ cúzrule̱', ne blé'ene̱' benne' ca' zá'aque̱' cúzrule̱', na' guzre̱' le̱': ―¿Bi dxexílajle? Benne' caní gulé̱'e̱ Jesús: ―Benne' Wese̱de, ¿gazra zu'?

³⁹Jesús beche̱be̱': ―Le da nna'le. Nadxa xjácale̱ne̱' Jesús, ne belelé'ene̱' naga zue̱', na' belexegá'anale̱ne̱' Le̱' zra na' lawe' da bache zeaj du dxedá' tapa.

⁴⁰Tu benne' chupa ca', benne' belenne̱' ca da gunná Juan, ne xjácale̱ne̱' Jesús, naque̱' Andrés, benne' biche Simón Pedro.

⁴¹Andrés nigá la guxíajte̱' xeajdílaje̱' bi biche̱' Simón, na' guzre̱' le̱': ―Ba bezrélentu' Mesías. (Dizra' nigá zéaje̱ na Cristo, Bénnea' guche̱be lazre' Dios sel-le̱'.)

⁴²Nadxa Andrés guché̱'e̱ Simón naga zua Jesús, na' gate ble'e Jesús Simón na', na' guzre̱' le̱': ―Lue' nacu' Simón, zri'ine Jonás. Si' lau' Cefas. (Dizra' hebreo nigá zéaje̱ na: Pedro, da zeaje̱ na: Xiaj.) Jesús dxenné̱' Felipe ne Natanael

⁴³Zra xula guca lazre' Jesús chéaje̱' naga nababa Galilea, na' bezrague̱' Felipe, ne guzre̱' le̱': ―Be̱n neda' tuze.

⁴⁴Felipe nigá naque̱' benne' xe̱zre Betsaida, da naca na lazre Andrés, ne Pedro.

⁴⁵Felipe guxíaje̱' xeajdílaje̱' Natanael, na' guzre̱' le̱': ―Ba bezrélentu' Bénnea' bzuaj Moisés chee̱' lu xiche naga zaj naxúaj da nadxixruj bea na, ne cá'anqueze chee̱ Benne' nigá buluzúaj benne' ca' buluchálaje̱' waláz chee̱ Dios. Benne' nigá naque̱' Jesús, zri'ine José, tu benne' xe̱zre Nazaret.

⁴⁶Na' gunná Natanael: ―¿Waca dxuaj tu da chawe' Nazaret? Felipe beche̱be̱': ―Gudá le'enu'.

⁴⁷Gate ble'e Jesús za Natanael naga zue̱', gunné̱': ―Nigá za' tu benne' naca xánnie̱' benne' Israel, benne' dxenné̱queze̱' da dxéquene̱'.

⁴⁸Nadxa Natanael bche̱be̱' Jesús: ―¿Ájazra naca núnbe'u neda'? Jesús guzre̱' le̱': ―Ble'eda' lue' nédxudxa gate za nne̱ Felipe lue', gate ze'u zran xaga higo.

⁴⁹Nadxa Natanael guzre̱' Jesús: ―Benne' Wese̱de, Lue' nacu' Zri'ine Dios. Lue' nacu' Wenná Bea chee̱ntu', benne' Israel.

⁵⁰Beche̱be Jesús: ―¿Dxéajle̱'u chia' lawe' da gucha' lue' ble'eda' lue' zran xaga higo? Walé'enu' da zaj naca na da szrendxa ca da nigá.

⁵¹Da li dxapa' le'e, walé'equezle le'e naxalaj xabáa, na' gubáz chee̱ xabáa ca' chee̱ Dios dxelétaje̱', ne dxelexegüene̱' naga zua neda', Benne' Gulje̱' Bénneache.