Read Tabaa Zapotec San Juan 10 Bible Online

San Juan 10 - Tabaa Zapotec bible

San Juan 10

¹Na' gunná Jesús: ―Da li dxapa' le'e, bénnea' quebe dxu'e̱ dxu'a dxa xu'u chee̱ le'aj chee̱ zrila' ca', na' dxu'e̱ naga xula, naque̱' gubán, ne tu dxebánzqueze̱'.

²Bénnea' dxu'e̱ dxu'a dxa xu'u na' naque̱' benne' dxuxúequeze̱' zrila' ca'.

³Bénnea' zue̱' dxu'a dxa xu'u dxesálaje̱' chee̱ chu'u bénnea' dxuxúequeze̱'-ba', na' zrila' ca' dxelexúnbeaba' chi'e̱. Benne' nigá dxu'e̱ la tu tu zrila' ca', ne dxebéaje̱'-ba' lu le'aj chee̱ba'.

⁴Ca dxedé dxebéaje̱' xúgute̱ba', na' dxebía lawe̱' lauba', na' zrila' ca' zjácale̱ba' Le̱', lawe' da dxelexúnbeaba' chi'e̱.

⁵Quebe zjácale̱ba' tu benne' quebe zaj núnbeaba'. Dxuluzrúnnujba' lau benne' na' lawe' da quebe dxelexúnbeaba' chi'i benne' quebe zaj núnbeaba'.

⁶Bchálajle̱ Jesús benne' ca' da dxulé'e nigá, na' benne' ca' quebe guléajni'ine̱' bi zéaje̱ da guzre Jesús le̱'. Jesús naque̱' benne' chawe' dxuxúe̱' zrila' ca'

⁷Nadxa Jesús guzre̱' benne' ca' da xula: ―Da li dxapa' le'e, neda' naca' dxa xu'u naga dxelú'u bénneache zaj naque̱' ca zrila' chia' ca'.

⁸Xúgute̱ benne' dxuluxúe̱' zrila', benne' belelé̱'e̱ nédxudxa ca neda', gulaque̱' gubán, ne tu gulebánzqueze̱'. Zrila' ca' quebe beléneba' chee̱ benne' ca'.

⁹Neda' naca' dxa xu'u. Bénnea' chu'e̱ ne̱ chia' neda', láqueze bénnea'. Gaque̱' ca tu zrila' dxu'uba', ne dxuajba' le'aj chee̱ba', na' dxezréleba' zríe̱du dxáguba'.

¹⁰’Benne' gubán ze̱'e̱ tuze chee̱ cuane̱'-ba', ne chee̱ gútete̱'-ba, ne chee̱ guzría xi'te̱'-ba'. Neda' bla'a chee̱ gápale xel-la' nabán, ne chee̱ gapa xánnele na.

¹¹Neda' naca' benne' chawe' dxuxúa' zrila' ca'. Benne' chawe' dxuxúe̱' zrila' ca' dxuzúe̱' xel-la' nabán chee̱' chee̱ guselé̱' zrila' ca'.

¹²Benne' dxuxúe̱'-ba' lawe' da dxezi'e̱ lazruj, gate dxelé'ene̱' za becu' xi'a, na' dxusane̱' zrila' ca', ne dxuzrúnnuje̱', lawe' da quebe nácaqueze̱' benne' dxuxúe̱' le̱ba', na' zrila' ca' quebe zaj nácaba' be̱ cheé̱zqueze̱'.

¹³Benne' nigá dxuzrúnnuje̱' lawe' da dxunze̱' zrin chee̱ si'e̱ lázruje̱', na' quebe dxe'e̱ gunne xue chee̱ba'.

¹⁴’Neda' naca' benne' chawe' dxuxúa' zrila' ca'. Cáte̱ze núnbea Xra' neda', na' neda' núnbe'a Xra', cá'anqueze neda' núnbe'a zrila' chia' ca', na' le̱ba' zaj núnbeaba' neda'. Neda' dxuzúa' xel-la' nabán chia' chee̱ guselá' zrila' ca'.

¹⁶Cá'anqueze zaj zra' zrila' chia' quebe zaj zraba' lu le'aj nigá. Dxal-la' cheajxexri'a-ba'. Zrila' ca' xelunba' ca dxenná xrtizra', ne xelácaba' tu cueze, na' tuze benne' guxúe̱' le̱ba'.

¹⁷’Xra' nazrí'ine̱' neda' lawe' da dxuzúa' xel-la' nabán chia', na' xecá'a na.

¹⁸Quebe nu seque' cua xel-la' nabán chia'. Neda' xuzúa' na cáte̱ze dxaca lázrequeza' neda'. Napa' xel-la' dxenná bea guzúa' na, ne chee̱ xecá'a na. Da nigá naca na da gunná be'e Xra' neda' guna'.

¹⁹Gate benne' judío ca' belenne̱' dizra' caní, na' gulaque̱' chupa la'a xetú.

²⁰Benne' zan benne' ca' gulenné̱': ―¿Bizr chee̱ na' dxuzé̱ nágale chee̱ benne' nigá? Xu'e̱ be' xriwe̱', ne nadá xichaj lázrdawe̱'.

²¹Xebal-le̱' gulenné̱': ―Tu benne' xu'e̱ be' xriwe̱' quebe séquene̱' guchálaje̱' caní. ¿Waca tu be' xriwe̱' xexún na xiaj lau tu benne' la chul-la? Dxuluzúa benne' judío ca' Jesús chalá'ala

²²Naca na beu' zaga, na' lu xe̱zre Jerusalén zaj zue̱' laní gate dxulusá lazre̱' ca guca gate gulegú'e̱ xudau' na' lu na' Dios.

²³Jesús dxedé̱' chale'aj xudau' na' naga naca lachila chee̱ Salomón.

²⁴Nadxa benne' judío ca' guléchaje̱' Le̱', ne gulé̱'e̱ Le̱': ―¿Bátalaqueze québedxa gunu' lue' chupa lázrentu'? Che lue' nacu' Cristo, Bénnea' sel-la Dios, gunnáte̱gala.

²⁵Beche̱be Jesús: ―Ba gucha' le'e, na' quebe guxéajle̱le chia'. Ca naca da dxuna' neda', ne dxuchíneda' xel-la' dxenná bea chee̱ Xra', dxululé'e na nu naca' neda'.

²⁶Le'e quebe dxéajle̱le chia' lawe' da quebe nácale zrila' chia', ca ba gucha' le'e nédxula.

²⁷Zrila' chia' dxelexúnbeaba' chi'a, na' neda' núnbe'a-ba', na' le̱ba' dxelauba' neda'.

²⁸Benne' zaj naque̱' zrila' chia', dxunézruja' chee̱ benne' ca' xel-la' nabán da zeajlí canna, ne cabáta'quezdxa xelebía xi'e̱, na' quebe nu seque' xecá'a le̱' lu na'a neda'.

²⁹Xra' be̱nne̱' neda' benne' caní, na' Le̱' nácadxe̱' szren ca xúgute̱ bénneache, na' quebe nu seque' xecá'a benne' ca' lu na' Xra'.

³⁰Neda', ne Xra' tuze nácantu'.

³¹Nadxa benne' judío ca' gulequé̱'e̱ xiaj xetú chee̱ xelútie̱' Jesús.

³²Nadxa Jesús guzre̱' benne' ca': ―Ba bé̱nqueza' da zan da chawe' laule le'e, dxuchíneda' xel-la' waca chee̱ Xra'. ¿Nula chee̱ da chawe' caní güele neda' xiaj?

³³Belexeche̱be benne' judío ca': ―Quebe güentu' lue' xiaj lawe' da nunu' da chawe'. Dxuntu' na lawe' da gunnéu' schanni' chee̱ Dios. Lue' nacu' bénneache, na' dxun cuinu' Dios.

³⁴Nadxa Jesús guzre̱' benne' ca': ―Lu da nadxixruj bea chee̱le le'e naxúaj xrtizra' Dios, dxenná na: Le'e nácale dios ca'.

³⁵Quebe gaca tábagadxu ca da naxúaj na lu xiche chee̱ Dios, na' Diósqueze̱' gunné̱' chee̱ benne' ca' gulezí'e̱ xrtizre̱' zaj naque̱' dios ca'.

³⁶Che Dios bzue̱' neda', ne gusél-le̱' neda' lu xe̱zr la xu nigá, ¿bizr chee̱ na' dxennale le'e gunnéa' schanni' chee̱ Dios lawe' da gunnéa' naca' Zri'ine Dios?

³⁷Che quebe dxuna' ca naca da dxun Xra', quebe chéajle̱le chia'.

³⁸Che dxuna' na, lácala quebe dxéajle̱le chia' ne̱ chee̱ da dxennéa', le chéajle̱ chia' ne̱ chee̱ da ca' dxuna', chee̱ nézele Xra' zúale̱ne̱' neda', na' neda' zúale̱na' Xra'.

³⁹Xetú lasa gulaca lazre̱' xele̱l-le̱' Jesús, na' Le̱' gulé̱' lu na' benne' ca'.

⁴⁰Nadxa bezrín Jesús dxu'a xe̱gu Jordán chalá'a naga dxalaj gubizra, na' begá'ane̱' na', naga guzúa Juan nédxute̱ dxuchúe̱' bénneache nisa.

⁴¹Benne' zan xjaque̱' xeajlenné̱'e̱ Jesús, na' gulenné̱': ―Juan, da li quebe bi xel-la' waca zren be̱ne̱', na' xúgute̱ da gunné̱' ca naca chee̱ benne' nigá naca na da li.

⁴²Benne' zan guléajle̱'e̱ chee̱ Jesús lataj na'.