Read Tabaa Zapotec San Juan 12 Bible Online

San Juan 12 - Tabaa Zapotec bible

San Juan 12

¹Xrupa zra nédxudxa gate za chu'u Laní Pascua chee̱ judío ca', guxíaj Jesús xe̱zre Betania naga zua Lázaro, bénnea' bsebán Jesús ládujla benne' gate'.

²Lu xe̱zre na' belune̱' tu xrche', chee̱ gulape̱' ba lá'ana Jesús. Marta bdee̱' xel-la' wagu, na' Lázaro dxé'le̱ne̱' benne' ca' dxelágule̱ne̱' Jesús.

³Nadxa María guqué̱'e̱ tu xia da za da dxelále̱'e̱ zixre, da naca na chee̱ dusén lase, da zácale̱'e̱ na, na' gulu'e̱ da za na' ni'a Jesús, ne bsebizre̱' na nen xicha xíchaje̱'. Ca naca benne' zaj zra' xu'u na' gulelé'ene̱' ca dxelá da zixre na'.

⁴Nadxa Judas Iscariote, zri'ine Simón, tu benne' ca' dxuse̱de Jesús, ne naque̱' bénnea' gudée̱' Jesús lu na' benne' guledábague̱' Le̱', gunné̱':

⁵―¿Bizr chee̱ na' quebe gudá'u da zixre na', na' sidxu na dumí lazruj chee̱ chunna gaxúa zra chee̱ gácale̱dxu benne' xache' ca'?

⁶Quebe gunná Judas da nigá lawe' da dxe'e̱ gunne xue chee̱ benne' xache' ca'. Naque̱' gubán, ne nu'e̱ bzude dumí chee̱ benne' ca' dxuse̱de Jesús, ne dxebane̱' late' weaj dumí na' da dxuluzré̱'e̱ lu bzude na'.

⁷Nadxa Jesús guzre̱' Judas na': ―Be̱ lataj nu'ula nigá lawe' da be̱ne̱' da nigá chee̱ dxucá'ana chawe̱' neda' chee̱ gate xulucache̱' neda' lu xe̱dxu ba.

⁸Benne' xache' ca' tu zrázqueze̱' ládujla le'e. Neda' quebe tu súazqueza' nen le'e. Dxelune̱' tuze dizra' xelútie̱' Lázaro

⁹Zane' benne' judío ca' belenne̱' zua Jesús xe̱zre Betania, na' xjaque̱' na', quegá tuze zeajlenné̱'e̱ Jesús. Cá'anqueze zeajlenné̱'e̱ Lázaro, bénnea' bsebán Jesús ládujla benne' gate ca'.

¹⁰Nadxa benne' xíchaje̱ ca' chee̱ bxruze ca' belune̱' tuze dizra' cá'anqueze xelútie̱' Lázaro,

¹¹lawe' da ne̱ chee̱ Lázaro benne' zan benne' judío ca' dxelebéaj xíchaje̱' bxruze ca' chee̱ xeleajlé̱'e̱ chee̱ Jesús. Dxexú'u Jesús Jerusalén

¹²Benne' zan ba zjaca Jerusalén, zjaque̱' Laní Pascua na', na' zra xula belenne̱' ba za' Jesús lu xe̱zre na'.

¹³Nadxa gulechugue̱' zina', na' xjaque̱' xeajlexrígale̱' Jesús, ne dxelenné̱' zizraj: ―¡Gaca ba lá'azxa Dios! ¡Ba neza zrente̱ naca na chee̱ Benne' ze̱'e̱ waláz chee̱ Xránadxu Dios! ¡Ba neza zrente̱ naca na chee̱ Wenná Bea chee̱ xe̱zre Israel!

¹⁴Jesús xeajxraque̱' tu burro, na' guzríe̱'-ba', ca naxúaj na lu xiche chee̱ Dios, dxenná na:

¹⁵Quebe zrébele le'e, benne' zre̱'e̱ xe̱zre Sión.Le nna'xque, ba za' Wenná Bea chee̱le.Zrie̱' tu burro.

¹⁶Nédxute̱ benne' ca' dxuse̱de Jesús quebe guléajni'ine̱' da na' dxaca na. Ca gudé na', gate begá'ana szren Jesús lau Dios, na' xeajlesá lazre̱' xúgute̱ da caní zaj naxúaj na lu xiche chee̱ Dios ca naca chee̱ Jesús, na' ca'an guca chee̱'.

¹⁷Benne' ca' zaj zre̱'e̱ nen Jesús gate gunné̱' Lázaro lu xe̱dxu ba, ne bsebane̱' le̱' ládujla benne' gate, buluzenne̱' bénneache Jerusalén ca da guca na'.

¹⁸Chee̱ le̱ na' benne' caní xeajlexrígale̱' Jesús lawe' da belenne̱' ca naca xel-la' waca zrente̱ da be̱ne̱'.

¹⁹Nadxa benne' fariseo ca' gulé̱ ljwezre̱': ―Ba dxelé'ele quebe séquedxu bi gundxu. Ca naca bénneache dxelune̱' Le̱' tuze. Dxelexilaj benne' griego ca' Jesús

²⁰Zaj zra' bal-la benne' griego ca' ládujla benne' ca' belezrine̱' Jerusalén chee̱ xulucá'ana szrene̱' Dios lu laní na'.

²¹Benne' caní belezrine̱' lau Felipe, benne' Betsaida chee̱ ga nababa Galilea, ne naque̱' Jesús tuze, na' gulata' xuene̱' le̱', dxelenné̱': ―Benne', dxaca lázrentu' le'entu' Jesús.

²²Felipe guxíaje̱' xeaje̱zre̱' Andrés caní, na' xjaca dxupe̱' xeajlegue̱zre̱' Jesús ca'.

²³Nadxa Jesús guzre̱' benne' dxupa ca': ―Ba bzrin zra xegá'ana szrena' neda', Benne' Gulje̱' Bénneache.

²⁴Da li dxapa' le'e, tu binne zrua' xtila wegá'ana na tuze na che quebe xexruj na lu xu, ne gacu na xu. Che gacu na xu, na' gunna na lina. Caní dxal-la' gaca chia' neda'.

²⁵Benne' dxe'e̱ gunne xue gapa chi'e̱ xel-la' nabán chee̱' gunitie̱' na. Bénnea' dxuzúe̱' chalá'ala xel-la' nabán chee̱' lu xe̱zr la xu nigá, gapa chi'e̱ na, ne zrué'ene̱' xel-la' nabán da zeajlí canna.

²⁶Che nu benne' dxaca lazre̱' gune̱' zrin chia', dxal-la' gaque̱' neda' tuze, na' gátete̱ze sua' neda', na' súaqueze benne' dxune̱' zrin chia'. Che nu benne' dxune̱' zrin chia', Xra' gape̱' le̱' ba lá'ana. Jesús dxuchálaje̱' ca gaca gate gatie̱'

²⁷Gunná Jesús: ―Na'a sté̱bele̱'e̱ zua'. ¿Bizra nnia'? ¿Nnia': Xrae, bselá neda' lu da dxal-la' gaca chia' na'a? Belájqueza' chee̱ gaca chia' da caní.

²⁸Xrae, bca'ana szren lau'. Nadxa ben tu chi'i benne' dxenné̱' xabáa: ―Ba bca'ana szrena' na, ne gucá'ana szrena' na xetú.

²⁹Benne' ca' zre̱'e̱ na' dxelenne̱' gulenné̱' guziu' gunné̱. Xebal-le̱' gulenné̱': ―Tu gubáz chee̱ xabáa bchálajle̱ne̱' Le̱'.

³⁰Nadxa Jesús guzre̱' benne' ca': ―Quegá gunné̱ chi'e̱ na' ne̱ chia' neda'. Gunné̱ na ne̱ chee̱le le'e.

³¹Na'a ba bzrin zra guchi'a Dios chee̱ bénneache zre̱'e̱ xe̱zr la xu nigá, na' na'a cueaj Dios chalá'ala da xriwe̱', da na' dxenná bea na lu xe̱zr la xu nigá, chee̱ québedxa nna bea na.

³²Gate xelechise̱' neda' lu xe̱zr la xu nigá le̱'e̱ xaga béguaj, na' neda' nnia' xúgute̱ bénneache chee̱ xelaque̱' neda' tuze.

³³Gate gunné̱' caní, ble'e Jesús ca gatie̱'.

³⁴Nadxa benne' zan ca' gulé̱'e̱ Jesús: ―Netu' bénentu' ca da naxúaj na lu xiche chee̱ da nadxixruj bea na da dxenná na waca bánqueze Cristo chadía chacanna. ¿Bizr chee̱ na' dxennáu' Benne' Gulje̱' Bénneache xelechise̱' Le̱'? ¿Nuzra na' Benne' Gulje̱' Bénneache?

³⁵Nadxa Jesús guzre̱' benne' ca': ―Xetú chí'idauze xel-la' naxaní' sua na ládujla le'e. Le ta na'a dxácate̱ ne zua xel-la' naxaní' nen le'e, chee̱ quebe xrínnele, lawe' da benne' dxedé̱' lu da chul-la quebe nézene̱' ga zéaje̱'.

³⁶Le cheajlé̱ chee̱ xel-la' naxaní' da naca' neda' dxácate̱ zua xel-la' naxaní' nen le'e, chee̱ gácale tuze xel-la' naxaní' na'. Ca gudé gunná Jesús da nigá, na' bezé̱'e̱ bcache cuine̱' lau benne' ca'. Benne' judío ca' quebe dxeleajlé̱'e̱ chee̱ Jesús

³⁷Lácala ble'e Jesús zane' xel-la' waca zrente̱ lau benne' judío ca', quegá xúgute̱' guleajlé̱'e̱ chee̱',

³⁸lawe' da be̱n na ba xen guca ca da gunná Isaías, benne' bchálaje̱' waláz chee̱ Dios, gunné̱':Xran, ¿nuzra guxeajlé̱ chee̱ dizra' chee̱dxu?¿Nuzra na' ble'e Xránadxu xel-la' waca chee̱'?

³⁹Ca'an guca, quebe guca xeleajlé̱'e̱ chee̱' lawe' da caní gunnáqueze Isaías na':

⁴⁰Dios be̱ne̱' benne' ca' la chul-la, ne be̱ne̱' zide' lázrdawe̱',chee̱ quebe xelelé'ene̱' nen xiaj lawe̱',ne quebe xeléajni'ine̱' lu xichaj lázrdawe̱',ne quebe xelelé̱'e̱ lawa' neda' chee̱ xexuna' le̱'.

⁴¹Isaías na' gunné̱' da nigá lawe' da blé'ene̱' xel-la' szren chee̱ Jesús, ne bchálaje̱' ca naca chee̱'.

⁴²Zane' benne' judío ca' guléajle̱'e̱ chee̱ Jesús, ne cá'anqueze bal-la benne' xíchaje̱ ca'. Quebe belexeche̱be̱' láwela bénneache lawe' da belezrebe̱' da xelún benne' fariseo ca', chee̱ quebe xelexebéaje̱' le̱' xu'u naga dxelezrague̱'.

⁴³Caní belune̱' lawe' da beledánedxene̱' xel-la' ba lá'ana da dxelúe bénneache le̱' ca xel-la' ba lá'ana da dxue Dios le̱'. Dizra' chee̱ Jesús guchi'a na chee̱ da dxelún bénneache

⁴⁴Jesús gunné̱' zizraj: ―Benne' dxéajle̱'e̱ chia', quegá chee̱za' dxéajle̱'e̱, cá'anqueze dxéajle̱'e̱ chee̱ Xra' nasel-le̱' neda'.

⁴⁵Bénnea' dxelé'ene̱' neda', dxelé'equezne̱' Xra' nasel-le̱' neda'.

⁴⁶Neda', xel-la' naxaní', bla'a lu xe̱zr la xu nigá chee̱ québedxa xelexegá'ana benne' dxeléajle̱'e̱ chia' lu da chul-la.

⁴⁷Che nu benne' dxenne̱' dizra' chia', ne quebe dxune̱' ca naca na, quegá neda' guzría xi'a le̱', lawe' da quebe bla'a neda' chee̱ guzría xi'a bénneache. Bla'a chee̱ guselá' benne' ca'.

⁴⁸Benne' dxuzúe̱' neda' chalá'ala, ne quebe dxune̱' ca naca dizra' chia', ba zua da guzría xi na le̱'. Dizra' da ba gunnéa' naca na da guzría xi na bénnea' lu zra bze̱be na'.

⁴⁹Caní gaca na lawe' da quebe dxuchálaja' cheé̱zqueza', lawe' da Xra' nasel-le̱' neda' ba gunná bé'ene̱' neda' bi dxal-la' nnia', ne bi dxal-la' gusé̱deda'.

⁵⁰Neda' nezda' gunná be'e Xra' neda' caní chee̱ xelezeque bénneache xelape̱' xel-la' nabán da zeajlí canna. Ca'an naca, da dxennéa' neda', dxennéa' na ca gunná be'e Xra' neda'.