Read Tabaa Zapotec San Juan 13 Bible Online

San Juan 13 - Tabaa Zapotec bible

San Juan 13

¹Naca na zra nedxu gate za chu'u Laní Pascua chee̱ judío ca'. Jesús ba nézene̱' ba bzrin zra xezé̱'e̱ lu xe̱zr la xu nigá chee̱ xexíaje̱' naga zua Xre̱'. Nazrí'iquezne̱' benne' zaj naca chee̱', benne' zaj zre̱'e̱ xe̱zr la xu, na' na'a ba zua gulé'ene̱' benne' ca' tu da zrendxa da gulé'e na nazrí'ine̱' le̱'.

²Da xriwe̱' ba nagú'u na xichaj lázxdau Judas Iscariote, zri'ine Simón, ca dxal-la' gune̱' chee̱ gudée̱' Jesús lu na' benne' guledábague̱' Le̱'. Nézqueze Jesús ze̱'e̱ naga zua Dios, ne dxal-la' xezrine̱' naga zua Dios, na' Xre̱' ba bnézruje̱' Le̱' dute̱ xel-la' dxenná bea. Chee̱ le̱ na', gate dxelawe̱' xrche', guxasa Jesús, na' gudúe̱' ladxe' naxrúa cuzre̱', ne bnase̱' tu ladxe' dxu'a le̱'e̱.

⁵Nadxa gudé̱'e̱ nisa tu zriga xia zren, ne guzú lawe̱' dxibe̱' ni'a benne' ca' dxusé̱dene̱', na' bsebizre̱' ni'e̱ nen ladxe' na' da nunase̱' dxu'a le̱'e̱.

⁶Ca bzrine̱' chee̱ quibe̱' ni'a Simón Pedro, le̱' guzre̱' Jesús: ―Xran, ¿Lue' quíbequezu' ni'a?

⁷Jesús beche̱be̱': ―Na'a quebe dxéajni'inu' da dxuna'. Te na'a chéajni'inu' na.

⁸Pedro guzre̱' Le̱': ―Cabata' quibu' ni'a. Jesús guzre̱' le̱': ―Che quebe quiba' ni'u, quebe gaca gacu' neda' tuze.

⁹Na' Simón Pedro guzre̱' Jesús: ―Xran, quegá tuze ni'a quibu'. Cá'anqueze na'a, ne xíchaja'.

¹⁰Jesús guzre̱' le̱': ―Benne' ba bexuzrte̱ guzje̱', tuze ni'e̱ dxal-la' chadxe lawe' da ba naxádxequeze̱'. Le'e ba naxádxele, san quegá xúgute̱le.

¹¹Gunná Jesús: “Quegá xúgute̱le”, lawe' da nézene̱' nu na' gudée̱' Le̱' lu na' benne' dxeledábague̱' Le̱'.

¹²Ca gudé gudibe Jesús ni'a benne' ca', na' bexrúe̱' ladxe' chee̱' cuzre', ne bebe'e̱ ga dxelawe̱', na' guzre̱' benne' ca': ―¿Dxéajni'ile le'e da ba be̱na'?

¹³Le'e dxe̱le neda': Benne' Wese̱de, ne: Xran, na' caní dxal-la' nnale lawe' da caní naca'.

¹⁴Che neda', Benne' Weséde chee̱le, ne Xránale, ba gudiba' ní'ale, cá'anqueze le'e dxal-la' quíbele ni'a ljwézrele tule xetule.

¹⁵Neda' ba ble'eda' le'e tu da dxulé'e na, chee̱ gunle le'e ca da be̱na' neda'.

¹⁶Da li dxapa' le'e, tu benne' we̱n zrin quebe nácadxe̱' szren ca xrane̱', na' tu benne' gubáz quebe nácadxe̱' szren ca benne' nasel-le̱' le̱'.

¹⁷Che dxéajni'ile da caní, ne dxunle ca zaj naca na, gaca chee̱le tu da ba neza.

¹⁸’Quebe dxuchálaja' chee̱ xúgute̱le le'e. Neda' núnbe'a benne' ca' gucá'a, san dxal-la' gaca ca naxúaj na lu xiche chee̱ Dios, dxenná na: Benne' dxágule̱ neda' ba gudábague̱' neda' chee̱ gudée̱' neda'.

¹⁹Dxapa' le'e da nigá na'a, nédxula gate quebe ne gaca na, chee̱ gate gaca na, na' chéajle̱le le'e zúaqueza' neda'.

²⁰Da li dxapa' le'e: Benne' dxezí' lu ne̱'e̱ Bénnea' dxusel-le̱' neda', neda' na' dxezí' lu ne̱'e̱, na' benne' dxezí' lu ne̱'e̱ neda', dxezí' lu ne̱'e̱ Xra' nasel-le̱' neda'. Dxenná Jesús gudé Judas Le̱' lu na' benne' dxeledábague̱' Le̱'

²¹Ca gudé gunná Jesús da nigá, na' guzúe̱' ste̱be lu xichaj lázrdawe̱', na' bzéajni'ine̱' benne' ca', gunné̱': ―Da li dxapa' le'e, tu benne' ládujla le'e gudée̱' neda' lu na' benne' ca' dxeledábague̱' neda'.

²²Nadxa benne' ca' dxuse̱de Jesús gulezú lawe̱' dxelenná' ljwezre̱', ne quebe zaj nézene̱' nu chee̱ na' dxuchalaj Jesús.

²³Tu benne' ca' dxuse̱de Jesús, bénnea' nazrí'ile̱'e̱ Jesús le̱', zue̱' cuita Jesús naga dxelawe̱' xrche',

²⁴na' Simón Pedro be̱ne̱' tu da dxunna bea lau bénnea' chee̱ guche̱be̱' Jesús nu chee̱ na' dxenné̱' caní.

²⁵Nadxa bénnea' de̱'e̱ cuita Jesús bche̱be̱' Le̱': ―Xran, ¿nuzra na'?

²⁶Beche̱be Jesús: ―Gusebisa' late' xeta xtila, na' bénnea' gunézruja' na, benne' ná'queze̱'. Nadxa Jesús bsebise̱' late' xeta xtila, na' bnézruje̱' na chee̱ Judas Iscariote, zri'ine Simón.

²⁷Ca gucá'a Judas xeta xtila na', na' da xriwe̱' guxú'ute̱ na lu xichaj lázrdawe̱'. Nadxa Jesús guzre̱' le̱': ―Da dxal-la' gunu', bé̱ntega na.

²⁸Benne' ca' zaj zre̱'e̱ dxelawe̱' na' quebe guléajni'ine̱' bizr chee̱ na' guzre̱' Judas na' caní.

²⁹Lawe' da nua Judas bzude' dumí, bal-le̱' guléquene̱' Jesús guzre̱' le̱' bi si'e̱ chee̱ laní na', u bi gunézruje̱' benne' xache' ca'.

³⁰Ca gudé gudagu Judas xeta xtila na', na' bdxúaje̱'. Ba guxrinne. Da nadxixruj bea cube

³¹Ca gudé bdxuaj Judas, gunná Jesús: ―Na'a gulé'e lau xel-la' szren chia' neda', Benne' Gulje̱' Bénneache, na' xegá'ana szren Dios ne̱ chia' neda'.

³²Che neda', Benne' Gulje̱' Bénneache, dxulé'eda' ca naca xel-la' szren chee̱ Dios, na' Dios gulé'ene̱' ca naca xel-la' szren chia' neda', ne la gúnte̱queze̱' na.

³³Le'e, bidu chia' ca', québedxa sua' scha' nen le'e. Le'e wexílajle neda', san ca gucha' benne' judío ca', dxapa' le'e na'a, quebe gaca sa'le le'e naga cha'a neda'.

³⁴Tu da cube dxixruj be'eda' le'e. Le zri'i le sa' ljwézrele tule xetule ca neda' nazrí'ida' le'e. Caní dxal-la' zri'i ljwézrele tule xetule.

³⁵Che nazrí'i ljwézrele tule xetule, na' xúgute̱ bénneache xeleque bé'ene̱' nácale neda' tuze. Jesús dxenné̱' nna Pedro quebe núnbe'e̱ Le̱'

³⁶Simón Pedro bche̱be̱' Jesús: ―Xran, ¿gazra chéaju'? Beche̱be Jesús: ―Naga cha'a neda', quebe gaca sá'le̱nu' neda' na'a. Te na'a wadéquezu' naga tea' neda'.

³⁷Nadxa gunná Pedro: ―Xran, ¿bizr chee̱ na' quebe gaca sá'le̱na' Lue' na'a? Zúaqueza' guzúa' xel-la' nabán chia' chee̱ guna' Lue' tuze.

³⁸Jesús beche̱be̱': ―¿Zúaquezu' guzú' xel-la' nabán chiu' chee̱ gacu' neda' tuze? Da li dxapa' lue', nédxudxa ca cuezre xjeaj, lue' wannáquezu' chunna lasa quebe núnbe'u neda'.