Read Tabaa Zapotec San Juan 16 Bible Online

San Juan 16 - Tabaa Zapotec bible

San Juan 16

¹Gunná Jesús: ―Dxapa' le'e da caní chee̱ quebe gusán lázrele da naca chia'.

²Welexebéaje̱' le'e lu xu'u naga dxelezrague̱', na' zrin zra gate nútete̱ze benne' gutie̱' le'e guéquene̱' gune̱' zrin chee̱ Dios.

³Caní xelune̱' lawe' da quebe ne xelúnbe'e̱ Xra', ne neda'.

⁴Dxapa' le'e da nigá chee̱ gate zrin zra na', na' cheajsá lázrele ba gucha' le'e da nigá. Da dxun Be' Lá'azxa Nadxa gunná Jesús: ―Quebe gucha' le'e da nigá nédxute̱ lawe' da zúale̱queza' le'e.

⁵Na'a wexá'a cheajxezúale̱na' Xra' nasel-le̱' neda', na' netule le'e quebe dxuché̱bele neda' ga cha'a.

⁶Dxewí'ine lázrele lawe' da gucha' le'e da caní.

⁷Na'a dxapa' le'e da li: Cháwe'dxa gaca chee̱le le'e che xexá'a neda' lawe' da che quebe xexá'a, quebe xida Be' Lá'azxa xedajsúale̱ne̱' le'e, Bénnea' gácale̱ne̱' le'e. Che xexá'a neda', sel-la' Le̱' chee̱le.

⁸Gate xida Le̱', na' gulé'ene̱' bénneache zaj naque̱' benne' dul-la, ne quebe dxelune̱' da xrlátaje, na' Dios guzría xi'e̱ benne' caní.

⁹Zaj naque̱' benne' dul-la lawe' da quebe dxeléajle̱'e̱ chia' neda'.

¹⁰Xeleque bé'ene̱' quebe dxelune̱' da xrlátaje lawe' da xexá'a neda' naga zua Xra', na' le'e québedxa lé'ele neda'.

¹¹Xeleque bé'ene̱' Dios guzría xi'e̱ le̱' lawe' da ba guchugue̱' chee̱ da xriwe̱', da na' dxenná bea na lu xe̱zr la xu nigá.

¹²’Ne dé̱le̱'e̱ da dxal-la' xapa' le'e, san le'e quebe gaca chéajni'ile na na'a.

¹³Gate xida Be' Lá'azxa, Bénnea' dxulé'ene̱' da li, Le̱' gulé'ene̱' le'e ca naca xúgute̱ da li lawe' da quebe guchálaje̱' cheé̱zqueze̱'. Wanné̱' xúgute̱ da xénene̱', na' guzéajni'ine̱' le'e ca da dxal-la' gaca na.

¹⁴Le̱' gucá'ana szrene̱' neda' lawe' da wazi'e̱ chee̱ da naca chia' neda', na' guzéajni'ine̱' na le'e.

¹⁵Xúgute̱ da napa Xra', cheé̱queza' naca na, na' chee̱ le̱ na' gunnéa', wazí' Be' Lá'azxa da naca chia', na' guzéajni'ine̱' na le'e. Xel-la' dxelewí'ine lazre' chee̱ benne' ca' xexaca na xel-la' dxelebé

¹⁶Gunná Jesús: ―Xetú chí'idau', na' le'e québedxa lé'ele neda', na' xetú chi'i, na' xelé'ele neda' lawe' da xexá'a neda' naga zua Xra'.

¹⁷Nadxa bal-la benne' ca' dxuse̱de Jesús buluche̱be ljwezre̱': ―¿Bizra zéaje̱ da nigá? Dxe̱'e̱ dxi'u, xetú chí'idau' québedxa lé'edxu Le̱', na' xetú chi'i, na' xelé'edxu Le̱' lawe' da xexíaje̱' naga zua Xre̱'.

¹⁸¿Bi zéaje̱ da na', xetú chí'idau'? Quebe dxéajni'idxu bi chee̱ dxuchálaje̱'.

¹⁹Guque be'e Jesús dxelaca lazre̱' xuluche̱be̱' Le̱', na' guzre̱' benne' ca': ―Neda' gucha' le'e, xetú chí'idau' québedxa lé'ele neda', na' xetú chi'i, na' xelé'ele neda'. ¿Da nigá na' dxuche̱be ljwézrele?

²⁰Da li dxapa' le'e, wabézrele le'e, ne xewi'ine lázrele, san bénneache chee̱ xe̱zr la xu nigá xelebene̱'. Lácala le'e xewi'ine lázrele, xel-la' dxewí'ine lazre' chee̱le xexaca na xel-la' dxebé.

²¹Gate tu nu'ula zua sane̱' bidau' zue̱' ste̱be lawe' da ba bzrin zra sua xel-la' dxudía chee̱'. Gate te galaj bidu na', na' québedxa dxeajsá lazre̱' da guzaque̱' lawe' da dxebéle̱'e̱ne̱' chee̱ bidu na' ba gúlajbe'.

²²Cá'anqueze le'e zúale ste̱be na'a, san neda' welá'queza' xedajxenná'a le'e, na' lu xichaj lázrdaule súate̱queze xel-la' dxebé, da naca na tu xel-la' dxebé da quebe nu seque' cua.

²³’Lu zra na' québedxa bi guché̱bele neda'. Da li dxapa' le'e, Xra' gunne̱' le'e xúgute̱ da nábale lu La' neda'.

²⁴Nédxula quebe bi gunábale lu La' neda'. Na'a le naba, na' si'le, chee̱ súale̱'e̱le xel-la' dxebé. Jesús guchuchuj guléaje̱' da dxaca lu xe̱zr la xu nigá

²⁵Gunná Jesús: ―Ba gucha' le'e da caní nen dizra' ca' da dxululé'e na. Wazrín zra gate québedxa guchálajle̱na' le'e da naca da dxulé'e na. Guchálajle̱na' le'e caníqueze da naca chee̱ Xra'.

²⁶Lu zra na' nábale Xra' lu La' neda', na' quebe dxennéa' neda' gata' xueda' Xra' waláz chee̱le,

²⁷lawe' da Xrá'queze nazrí'ine̱' le'e. Nazrí'ine̱' le'e lawe' da nazrí'ile le'e neda', ne dxéajle̱le chia' za'a naga zua Dios.

²⁸Guzá'a lau Xra' chee̱ bla'a lu xe̱zr la xu nigá chee̱ xexá'a naga zua Xra'.

²⁹Nadxa benne' ca' dxuse̱de Jesús gulé̱'e̱ Le̱': ―Na'a dxuchálajle̱nu' netu' caníqueze. Quebe dxuchínenu' dizra' ca' da dxululé'e na.

³⁰Na'a dxeque bé'entu' nézenu' xúgute̱ da ca', na' quebe dxal-la' nu guche̱be Lue'. Chee̱ le̱ na' dxéajle̱ntu' chiu' za'u naga zua Dios.

³¹Jesús guzre̱' benne' ca': ―¿Dxéajle̱le chia' na'a?

³²Za' zra, ne ba naca zra ná'queze gate le'e gase dínnajle ca'ale xrneza cha chee̱le, na' gucá'anale neda' tuza'. Quebe zúaqueza' tuza' lawe' da zúale̱ Xra' neda'.

³³Dxapa' le'e da nigá chee̱ gápale xel-la' dxebeza zri lazre' lawe' da nácale neda' tuze. Lu xe̱zr la xu nigá dxun na ba xen si sácale. Le gun chuchu lázrdaule, lawe' da ba bchuchuj bléaja' da dxaca lu xe̱zr la xu nigá.