Read Tabaa Zapotec San Juan 19 Bible Online

San Juan 19 - Tabaa Zapotec bible

San Juan 19

¹Nadxa Pilato guqué̱'e̱ Jesús, na' bdxixruj bé'ene̱' xelu'e̱ Le̱' xide'.

²Benne' dxjaque̱' wedil-la buluzríe̱' xichaj Jesús tu da' belune̱' zruze xaga xeche', ne bulugácue̱' Le̱' tu ladxe' bzawe.

³Nadxa guléchaje̱' Le̱', dxelenné̱': ―¡Gaca ba lue', wenná bea chee̱ judío ca'! Nadxa belú'e̱ dxu'a lau Jesús.

⁴Nadxa bdxuaj Pilato da xula, ne guzre̱' benne' ca': ―¡Le nna'xque! Dxebéaja' benne' nigá chee̱ nézele quebe dxezrelda' bi da zrinnaj nabague̱'.

⁵Bdxuaj Jesús zria xíchaje̱' da naca zruze xaga xeche', ne nacue̱' ladxe' bzawe na'. Nadxa Pilato guzre̱' benne' ca': ―Nigá zua bénnea'.

⁶Gate benne' xíchaje̱ ca' chee̱ bxruze ca', ne xra'aga we̱n zrin chee̱' ca' belelé'ene̱' Jesús, na' gulezú lawe̱' dxelenné̱' zizraj: ―¡Bde̱'e̱ xaga béguaj! ¡Bde̱'e̱ xaga béguaj! Pilato guzre̱' benne' ca': ―Le che̱'e̱, ne le gudé̱'e̱ xaga béguaj lé'equeze, lawe' da quebe dxezrelda' bi da zrinnaj nabague̱'.

⁷Na' benne' judío ca' belexeche̱be̱': ―Netu' nápantu' tu da nadxixruj bea na, ne ca dxenná na dxal-la' gatie̱' lawe' da dxun cuine̱' Zri'ine Dios.

⁸Gate ben Pilato da nigá, na' bezrébedxe̱'.

⁹Bexu'e̱ xu'u na', na' bche̱be̱' Jesús: ―¿Gazra benne' Lue'? Quebe bi beche̱be Jesús.

¹⁰Nadxa guzre Pilato Le̱': ―¿Quebe dxexeche̱bu' chia'? ¿Quebe nézenu' Lue' napa' neda' xel-la' dxenná bea gudá'a Lue' xaga béguaj, ne napa' xel-la' dxenná bea gusana' Lue'?

¹¹Beche̱be Jesús: ―Quebe bi xel-la' dxenná bea napu' bi gunu' chia' chela ca be̱nna Dios lue' xel-la' dxenná bea nigá. Chee̱ le̱ na', bénnea' bdee̱' neda' lu na'u dul-la zrendxa nabague̱' ca lue'.

¹²Lu zra na'te̱ gudilaj lazre' Pilato ájala gune̱' gusane̱' Jesús, san benne' judío ca' gulenné̱' zizraj: ―Che gusanu' benne' nigá, quebe nacu' César tuze, bénnea' dxenná bea Roma. Nu benne' dxun cuine̱' wenná bea dxedábague̱' César.

¹³Nadxa Pilato, gate benne̱' da nigá, bdxixruj bé'ene̱' xelexebéaje̱' Jesús, na' gudxé'e̱ lataj blau chee̱', da zua lataj na' nazí le na Gabata nen dizra' hebreo, da zéaje̱ na chale'aj xiaj ta'a.

¹⁴Naca na zra za zrin Laní Pascua, ca du wagubizra. Nadxa Pilato guzre̱' benne' judío ca': ―Nigá zua wenná bea chee̱le.

¹⁵Na' benne' ca' gulenné̱' zizraj: ―¡Gatie̱'! ¡Gatie̱'! ¡Bde̱'e̱ xaga béguaj! Pilato guzre̱' benne' ca': ―¿Gudá'a wenná bea chee̱le xaga béguaj? Belexeche̱be benne' xíchaje̱ ca' chee̱ bxruze ca': ―Netu' zua tuze wenná bea chee̱ntu'. ¡César!

¹⁶Nadxa Pilato bdee̱' Jesús lu na' benne' ca' chee̱ te̱'e̱ xaga béguaj, na' guleché̱'e̱ Jesús. Jesús dxedé̱'e̱ xaga béguaj

¹⁷Na' bdxuaj Jesús nu'e̱ xaga béguaj chee̱ chéaje̱' lataj na' nazí le na Zrita Xichaj Benne' Gate, na' nen dizra' hebreo nazí le na Gólgota.

¹⁸Buludé̱'e̱ Jesús xaga béguaj lataj na', na' tu zren nen Jesús buludé̱'e̱ xechupa benne' xaga béguaj ca' chalá'a weaj naga da' Jesús.

¹⁹Pilato bdxixruj bé'ene̱' buluzúe̱' le̱'e xaga béguaj xichaj Jesús da dxenná na: Jesús, Benne' Nazaret, Wenná Bea Chee̱ Judío Ca'.

²⁰Zane' benne' judío ca' bululabe̱' da na' lawe' da zua lataj na' naga buludé̱'e̱ Jesús xaga béguaj gáguze naga dxe' xe̱zre na', na' da na' naxúaj na nen dizra' hebreo, ne nen dizra' griego, ne nen dizra' latín.

²¹Chee̱ le̱ na' benne' xíchaje̱ ca' chee̱ bxruze chee̱ judío ca' gulé̱'e̱ Pilato: ―Quebe guzúaju' na: Wenná Bea Chee̱ Judío Ca'. Bzuaj na: Le̱' Gunné̱' Naque̱' Wenná Bea Chee̱ Judío Ca'.

²²Beche̱be Pilato: ―Da bzuaja', ba naxúajqueze na.

²³Ca gudé buludá' benne' dxjaque̱' wedil-la Jesús xaga béguaj, na' belexequé̱'e̱ zra lane̱', ne belebeque̱' na tapa cue', tu cue' weaj chee̱ tu tu benne' dxjaque̱' wedil-la. Belecá'aqueze̱' ladxe' dxexrúa cuzre̱' da quebe nadía na. Tu ca nácheze na.

²⁴Chee̱ le̱ na' benne' dxjaque̱' wedil-la gulé̱ ljwezre̱': ―Quebe chézadxu na. Cwéajdxu da gunna bea na chee̱ la' nu xala le̱ na. Ca'an guca, guca li da naxúaj na lu xiche chee̱ Dios, da dxenná na: Belexelé̱'e̱ zra lana', ne guléaje̱' da gunna bea na chee̱ le̱ na. Caní belún benne' dxjaque̱' wedil-la.

²⁵Gáguze naga zua xaga béguaj chee̱ Jesús ze̱ xrna Jesús nen bi bila xrne̱'e̱, ne María, zru'ula Cleofas, ne María Magdalena.

²⁶Gate ble'e Jesús xrne̱'e̱, ne cuita xrne̱'e̱ na' ze̱ Juan, benne' bse̱de Jesús, bénnea' nazri'idxe̱', na' guzre̱' xrne̱'e̱: ―Nú'uladau', na' ze̱ zri'inu'.

²⁷Nadxa guzre Jesús bénnea': ―Na' ze̱ xrna'u. Zra na'te̱ benne' nigá beche̱'e̱ nu'ula na' lizre̱'. Dxate Jesús

²⁸Ca gudé gunná Jesús da nigá, lawe' da nézene̱' xúgute̱ na ba guca li, ne chee̱ guca li ca naxúaj na lu xiche chee̱ Dios, gunné̱': ―Dxebíleda'.

²⁹Zua na' tu dxe'e nupe zichaj, na' bulusubise̱' tu da dxezrupe na nupe zichaj na', ne buluzúe̱' na lawe' tu xia tunna, na' buluzúe̱' na dxu'a Jesús.

³⁰Na' Jesús guzrupe̱' nupe zichaj na', na' gunné̱': ―Ba guca li ca naca na. Nadxa bse dxu'a xíchaje̱', gutie̱'. Tu benne' dxeje̱' wedil-la dxechizie̱' xia lachú'u Jesús

³¹Naca na zra za zrin Laní Pascua, na' judío ca' quebe gulaca lazre̱' xelexegá'ana benne' ca' le̱'e̱ xaga béguaj ca' lu zra dxulupá'ane̱' lawe' da naca zra na' tu zra blau. Chee̱ le̱ na' gulenabe̱' lau Pilato dxixruj bé'ene̱' xelíchaje̱' ni'a benne' ca' zaj de̱'e̱ xaga béguaj ca', ne xelexequé̱'e̱ le̱' le̱'e̱ xaga béguaj ca'.

³²Nadxa tu benne' ca' dxjaque̱' wedil-la gudíchaje̱' ni'a benne' nedxu na', ne cá'anqueze chee̱ benne' xetú de̱'e̱ cuita Jesús.

³³Gate bzrine̱' naga da' Jesús, blé'ene̱' ba gutie̱', na' chee̱ le̱ na' quebe gudíchaje̱' ni'e̱.

³⁴Tu benne' ca' dxjaque̱' wedil-la guchízie̱' xia chee̱' lachú'u Jesús, na' bdxuaj dxen, ne nisa na'.

³⁵Benne' dxuchalaj da nigá naque̱' benne' blé'ene̱' na, ne dxuchálaje̱' da li, ne nézene̱' dxenné̱' da li, chee̱ cá'anqueze le'e chéajle̱le chee̱ Jesús.

³⁶Da caní guca na chee̱ guca li ca da naxúaj na lu xiche chee̱ Dios, da dxenná na: Quebe gulíchaje̱' netú zrita chee̱'.

³⁷Xetú da naxúaj na lu xiche chee̱ Dios dxenná na: Welelé'ene̱' bénnea' belune̱' we̱'. Dxulucache̱' Jesús

³⁸Ca gudé na' José, benne' xe̱zre Arimatea, xeajnabe̱' Pilato gu'e̱ le̱' lataj xexu'e̱ Jesús. José naque̱' tu benne' guque̱' Jesús tuze, san bagácheze lawe' da bzrebe̱' judío blau ca'. Pilato be̱'e̱ le̱' lataj, na' bexu'e̱ Jesús.

³⁹Cá'anqueze Nicodemo, bénnea' xeajchálajle̱ne̱' Jesús chizrela, bzrine̱' na', nu'e̱ tu gaxúa xiaj nedxe, ne tu da dxelále̱'e̱ zixre.

⁴⁰Nadxa José, ne Nicodemo belexequé̱'e̱ Jesús, na' buluchele̱' Le̱' ladxe' nen nedxe na' ca naca da zjácale̱ benne' judío ca' da dxelune̱' chee̱ benne' gate', gate na' dxulucache̱' le̱'.

⁴¹Lataj na' naga buludé̱'e̱ Jesús xaga béguaj zua tu lataj naga zaj ze̱ xaga ca', na' láwela lataj na' zua tu ba cube le̱'e̱ xiaj na', naga quebe nu ne chú'uqueze benne' gate'.

⁴²Lu ba na' belegu'e̱ Jesús lawe' da zua ba na' gáguze, ne lawe' da ba dxebía gubizra, ne ba zua su lau zra dxulupá'ana judío ca'.