Read Tabaa Zapotec San Juan 20 Bible Online

San Juan 20 - Tabaa Zapotec bible

San Juan 20

¹Zra nedxu, guxíaj María Magdalena dxu'a ba na' dxaní'sise̱', gate ne nachúl-late̱, na' blé'ene̱' québedxa naduse xiaj dxu'a ba na'.

²Nadxa bexíaj chégüe̱' naga zua Simón Pedro nen xetú benne' bse̱de Jesús, bénnea' bzri'idxe̱' Jesús, na' guzre̱' benne' ca': ―Ba belequé̱'e̱ Xránadxu lu ba na', ne quebe nézentu' ga xeajlelú'e̱ Le̱'.

³Nadxa Pedro, ne bénnea' xetú beledxúaje̱' zjaque̱' dxu'a ba na'.

⁴Dxúpate̱' zjaca chégüe̱' tu zren, san bénnea' xetú guzá chégudxe̱' ca Pedro, ne bzrine̱' nédxudxa dxu'a ba na'.

⁵Na' xeajsé̱' su dxú'ala xeajnné̱'e̱ lu ba na', na' blé'ene̱' ladxe' da buluchele̱' Jesús xu'u na na', san quebe guxú'e̱ lu ba na'.

⁶Ca gudé na', bzrin Simón Pedro, na' guxú'e̱ lu ba na'. Cá'anqueze le̱' blé'ene̱' ladxe' na' xu'u na na',

⁷ne blé'ene̱' ladxe' da buluchele̱' xichaj Jesús, quebe xu'u na tu zren nen ladxe' da bedxela na le̱'. Nadube na, dxe' na chalá'ala.

⁸Nadxa cá'anqueze guxú'u bénnea' xetú, bénnea' bzrin nedxu dxu'a ba na', na' blé'ene̱' ladxe' ca', ne guxéajle̱'e̱.

⁹Quebe ne xeléajni'ine̱' da naxúaj na lu xiche chee̱ Dios da dxenná na xebán Jesús ládujla benne' gate'.

¹⁰Nadxa benne' ca' bse̱de Jesús belexezrine̱' xu'u naga zaj zre̱'e̱. Jesús dxulé'e lawe̱' María Magdalena

¹¹María begá'ane̱' dxu'a ba na', dxebezre̱'. Ca dxebezre̱' na', na' gulégüe̱' dxenné̱'e̱ lu ba na',

¹²na' blé'ene̱' chupa gubáz chee̱ xabáa zaj nácue̱' zra lane̱' chiche, zaj dxe'e̱ naga guxú'u Jesús. Tue̱' dxe'e̱ naga guzrúa xichaj Jesús, na' xetúe̱' dxe'e̱ zeaj zranle ga guzrúa ni'a Le̱'.

¹³Na' buluche̱be gubáz chee̱ xabáa ca' María na': ―Nu'ula, ¿bizr chee̱ na' dxebezru'? Le̱' guzre̱' gubáz chee̱ xabáa ca': ―Lawe' da belú'e̱ Xrana', ne quebe nezda' ga xeajlelú'e̱ Le̱'.

¹⁴Caní dxenné̱', na' bzéchaj xíchaje̱', ne blé'ene̱' Jesús ze̱' ca'ala, san quebe nézene̱' che Jesús na'.

¹⁵Nadxa Jesús bche̱be̱' María na': ―Nú'uladau', ¿bizr chee̱ na' dxebezru'? ¿Nu dxexílaju'? María gúquene̱' naque̱' benne' dxá'ane̱' xaga ca' zaj ze̱ na', na' guzre̱' Le̱': ―Benne', che lue' bi'u Le̱', gunná ga xeajlú'u Le̱', chee̱ cheajxezri'a Le̱'.

¹⁶Nadxa Jesús guzre̱' nu'ula na': ―María. María na' bexéchaje̱', ne guzre̱' Le̱' nen dizra' hebreo: ―¡Raboni! Dizra' nigá zéaje̱ na: Benne' Dxuse̱de.

¹⁷Jesús guzre̱' María na': ―Bsan neda' lawe' da quebe ne xegüéna' naga zua Xra'. Bexíaj, xeajxe̱zre bi bícha'dau' ca', benne' ca' bsé̱deda', xegüéna' naga zua Xra', ne nácaqueze̱' Xrale. Naque̱' Dios chia', ne Dios chee̱le.

¹⁸Nadxa bexíaj María Magdalena, xeajzenne̱' benne' ca' bse̱de Jesús ba blé'ene̱' Jesús, na' Le̱' guzre̱' le̱' da caní. Jesús dxulé'e lawe̱' benne' ca' bsé̱dene̱'

¹⁹Lu zra ná'queze, da naca na zra nedxu chee̱ da gazre zra, na' chizrela zaj nazraga benne' ca' bse̱de Jesús, ne zaj nusézxuje̱' dxa xu'u ca' lawe' da dxelezrebe̱' judío blau ca'. Na' guxú'u Jesús, guzé̱' laduj benne' ca', na' bgape̱' benne' ca' diuzre, dxenné̱': ―Le gapa xel-la' dxebeza zri lazre'.

²⁰Ca gudé gunná Jesús da nigá, na' blé'ene̱' benne' ca' ne̱'e̱, ne le̱'e̱ naga gudé xia na'. Benne' ca' bse̱de Jesús gulebéle̱'e̱ne̱' gate belelé'ene̱' Xránadxu.

²¹Nadxa Jesús guzre̱' benne' ca' xecha lasa: ―Le gapa xel-la' dxebeza zri lazre'. Cáte̱ze gusel-la Xra' neda', cá'anqueze dxusel-la' neda' le'e.

²²Nadxa blube̱' lau benne' ca' ne guzre̱' le̱': ―Le si' Be' Lá'azxa chee̱ Dios.

²³Benne' ca' dxunite laule le'e chee̱ dul-la zaj nabague̱' ba bnite lau Dios chee̱', na' benne' ca' quebe dxunite laule le'e chee̱ dul-la zaj nabague̱', quebe bunite lau Dios chee̱'. Tomás dxelé'ene̱' Xránadxu ba bebane̱'

²⁴Tomás, tu benne' chazrinnu ca' bse̱de Jesús, bénnea' le̱' Bi Lide', quebe zue̱' nen benne' ca' xezícadxa gate ble'e lau Jesús.

²⁵Ca gudé na' gulé̱'e̱ Tomás na': ―Ba blé'entu' Xránadxu. Gunná Tomás: ―Che quebe le'eda' ne̱'e̱ naga guledé bdiduj ca', ne gudéa' zrube na'a lu xe̱dxu chee̱ bdiduj ca', ne gudéa' na'a le̱'e̱ naga gudé xia na', québequeze chéajle̱'a.

²⁶Ca guca xrunu' zra, benne' ca' bse̱de Jesús zaj nazrágaqueze̱' lu xu'u na' xetú lasa, na' zua Tomás nen benne' ca'. Nadxa, lácala zaj naxezxuj dxa xu'u ca', ble'e lau Jesús lau benne' ca', ne guzé̱' laduj le̱', na' bgape̱' le̱' diuzre, gunné̱': ―Le gapa xel-la' dxebeza zri lazre'.

²⁷Nadxa Jesús guzre̱' Tomás: ―Bde zrube na'u nigá, ne gunná' na'a nigá. Be̱nna na'u, bde na le̱'a nigá. Québedxa gun chupa lazru', san guxéajle̱.

²⁸Nadxa beche̱be Tomás: ―Xrana', ne Dios chia'.

²⁹Jesús guzre̱' le̱': ―Tomás, na'a dxéajle̱'u lawe' da ba blé'enu' neda'. Ba neza zrente̱ naca na chee̱ benne' ca' dxeléajle̱'e̱ chia' lácala quebe ne xelelé'ene̱' neda'. Da dxaca lazre' Juan gun xiche nigá

³⁰Jesús be̱ne̱' da zandxa xel-la' waca zrente̱ lau benne' ca' bsé̱dene̱' da quebe zaj naxúaj na lu xiche nigá.

³¹Da caní zaj naxúaj na chee̱ chéajle̱le le'e chee̱ Jesús, naque̱' Cristo nasel-la Dios, ne Zri'ine Dios, ne chee̱ gápale xel-la' nabán lawe' da dxéajle̱le chee̱'.