Read Tabaa Zapotec San Juan 21 Bible Online

San Juan 21 - Tabaa Zapotec bible

San Juan 21

¹Ca gudé na' Jesús ble'e lawe̱' lau benne' ca' bsé̱dene̱' dxu'a nísadau' chee̱ Tiberias. Caní guca na.

²Zaj nazraga Simón Pedro, ne Tomás, bénnea' lé̱queze̱' Bi Lide', ne Natanael, benne' xe̱zre Caná da nababa Galilea, ne chupa zri'ine Zebedeo, ne xechupa benne' ca' bse̱de Jesús.

³Simón Pedro guzre̱' benne' ca': ―Cheajsendxa' bela. Benne' ca' gulenné̱': ―Cá'anqueze netu' wazá'le̱ntu' lue'. Nadxa xjaque̱', na' gulu'e̱ tu lu da dxedá lawe' nísadau'. Xe̱la na' quebe nu bela gulezénqueze̱'.

⁴Ca guzú lau dxaní'sise̱', ble'e lau Jesús dxu'a nísadau' na'. Benne' ca' bsé̱dene̱' quebe zaj nézene̱' che Jesús na'.

⁵Nadxa Jesús guzre̱' benne' ca': ―Bénne'dau', ¿quebe nu bela ne senle? Belexeche̱be benne' ca': ―Quebe bi ne sentu'-ba'.

⁶Nadxa guzre Jesús benne' ca': ―Le guzala xixruj na' chalá'a xabe̱la chee̱ da dxedá lawe' nísadau' na', na' senle bela. Ca' belune̱', na' ca dxelexequé̱'e̱ xixruj na' quebe dxelexegué'ene̱' na lawe' da nazrate̱ na bela zan.

⁷Nadxa bénnea' nazrí'idxa Jesús guzre̱' Pedro: ―Xránadxu na'. Ca ben Simón Pedro naca Xránadxu, na' bexázie̱' ladxe' dxexrúa cuzre̱' lawe' da nagüe̱' na, na' bexétaje̱' lu nisa.

⁸Xezícadxa benne' ca' belexezrine̱' dxu'a nísadau' na', zaj zre̱'e̱ lu da dxedá lawe' nísadau', dxelexezrube xue̱' xixruj na' nazrate̱ na bela ca' lawe' da dxe' da dxedá lawe' nísadau' na' lu nísadau' ca tu le gu'una xiaj.

⁹Gate belexétaje̱' lu xu bizre, na' belelé'ene̱' ba dxe' xi', ne ba zrua tu bela lawe' xi' na', na' de̱ na' xeta xtila.

¹⁰Nadxa Jesús guzre̱' benne' ca': ―Le cheajxrí' tu chupa bela ca', be̱ za guzénte̱le.

¹¹Begüén Simón Pedro lu da dxedá lawe' nísadau' na', ne bezrube xue̱' xixruj na' dxu'a nísadau' na'te̱, nazrate̱ na bela zri'a, tu gaxúa chi'inu xunba', na' lácala naca tu cá'ante̱ba' quebe gudxeza xixruj na'.

¹²Nadxa guzre Jesús benne' ca': ―Le da gágule xrsila. Netú benne' ca' quebe dxelexázrene̱' xuluche̱be̱' Le̱' nu Le̱', lawe' da zaj nézene̱' naque̱' Xránadxu.

¹³Nadxa Jesús guqué̱'e̱ xeta xtila na', na' bnézruje̱' na benne' ca', ne cá'anqueze be̱ne̱' chee̱ bela ca'.

¹⁴Da nigá naca na da guxunne' lasa ble'e lau Jesús lau benne' ca' bsé̱dene̱' ca gudé bebane̱' ládujla benne' gate. Jesús dxuchálajle̱ne̱' Simón Pedro

¹⁵Ca gudé gulawe̱' xrsila, na' Jesús bche̱be̱' Simón Pedro: ―Simón, zri'ine Jonás, ¿nazrí'idxenu' neda' ca benne' caní? Beche̱be Pedro: ―Awe', Xran, nézenu' dxelé'eda' Lue' chawe'. Na' Jesús guzre̱' le̱': ―Bxue zríla'du chia' ca'.

¹⁶Nadxa Jesús bche̱be̱' le̱' da xula: ―Simón, zri'ine Jonás, ¿nazrí'inu' neda'? Pedro beche̱be̱': ―Awe', Xran, Lue' nézenu' dxelé'eda' Lue' chawe'. Jesús guzre̱' le̱': ―Bxue zrila' chia' ca'.

¹⁷Da guxunne' lasa Jesús bche̱be̱' le̱': ―Simón, zri'ine Jonás, ¿dxelé'enu' neda' chawe'? Pedro bewi'ine lazre̱' lawe' da bche̱be Jesús le̱' da guxunne' lasa che dxelé'ene̱' Le̱' chawe', na' guzre̱' Jesús: ―Xran, Lue' nézquezenu' xúgute̱. Lue' nézenu' dxelé'eda' Lue' chawe'. Na' Jesús guzre̱' le̱': ―Bxue zrila' chia' ca'.

¹⁸Da li dxapa' lue', gate ne nacu' benne' cuide' gucu' zra lanu', ne guxíaju' naga dxaca lazru'. Gate bache nacu' benne' gula, chilju' na'u, na' benne' xula gugácue̱' lue', ne che̱'e̱ lue' naga quebe gaca lazru' chéaju'.

¹⁹Gate gunná Jesús da nigá, dxuzéajni'ine̱' benne' ca' ca dxal-la' gate' Pedro chee̱ gucá'ana szrene̱' Dios. Ca gudé na' Jesús guzre̱' le̱': ―Be̱n neda' tuze. Da gaca chee̱ bénnea' nazrí'idxa Jesús

²⁰Gate bexechaj Pedro, blé'ene̱' bénnea' nazrí'idxa Jesús zéaje̱ nawe̱' le̱', naque̱' bénnea' dxe'e̱ cuita Jesús gate na' gulawe̱' xrche' na', ne bche̱be̱' Jesús: “Xran, ¿nuzra na' gudé Lue' lu na' benne' ca' dxeledábague̱' lue'?”

²¹Gate Pedro blé'ene̱' bénnea', na' bche̱be̱' Jesús: ―Xran, ¿gazra benne' nigá? ¿Aja gaca chee̱'?

²²Jesús beche̱be̱': ―Che neda' dxaca lazra' xegá'ane̱' nigá ca zrindxa zra xelá'a neda', ¿naca na chiu' lue' nézenu'? Lue', be̱n neda' tuze.

²³Belén benne' ca' zaj de̱'e̱ Jesús quebe gate benne' na'. Jesús quebe guzre̱' le̱' quebe gatie̱'. Guzre̱' le̱': “Che neda' dxaca lazra' xegá'ane̱' ca zrindxa zra xelá'a neda', ¿naca na chiu' lue' nézenu'?”

²⁴Benne' nigá naque̱' benne' dxexeche̱be̱' chee̱ da nigá, ne ba nuzúaje̱' na. Nézentu' dxenné̱' da li.

²⁵Cá'anqueze ne zaj de̱dxa da zante̱ da be̱n Jesús, na' chela xuaj tu tu na, dxéqueda' quebe gueque lu xe̱zr la xu nigá cha' xiche ca' dxal-la' guzúajdxu. Ca' naca na.