Read Tabaa Zapotec San Juan 6 Bible Online

San Juan 6 - Tabaa Zapotec bible

San Juan 6

¹Ca gudé na' guxíaj Jesús xecha la'a dxu'a nísadau' chee̱ Galilea, da nazíqueze le na nísadau' chee̱ Tiberias.

²Benne' zante̱ zjácale̱ne̱' Jesús lawe' da ba belelé'ene̱' xel-la' waca zren ca' da dxun Le̱', dxexune̱' benne' we̱' ca'.

³Nadxa Jesús guluéne̱' tu lu xi'a, na' gudxé'e̱ na' nen benne' ca' dxusé̱dene̱'.

⁴Ba zua gagu Laní Pascua chee̱ judío ca'.

⁵Gate ble'e Jesús benne' zan ca' zá'aque̱' zeaj nawe̱' Le̱', na' guzre̱' Felipe: ―¿Gazra cheajxridxu da xelagu benne' zan caní?

⁶Gunná caní Jesús chee̱ la' bi nna Felipe, lawe' da ba neze Jesús ca da gune̱'.

⁷Nadxa beche̱be Felipe: ―Che sidxu xeta xtila lazruj da sidxu chee̱ chupa gaxúa zra, quebe gueque na xelezí' benne' caní late' weaj.

⁸Nadxa Andrés, xetú benne' ca' dxuse̱de Jesús, ne naque̱' bi biche Simón Pedro, guzre̱' Jesús:

⁹―Ze̱ tu bi cuide' nigá nápabe' gazxu' xeta xtila zrua' cebada, ne chupa bela. ¿Ájazra gun da nigá gueque na chee̱ xúgute̱ benne' caní?

¹⁰Nadxa gunná Jesús: ―Le xe̱ xúgute̱' xelebé'e̱. Naca lu daca lataj na', na' gulebé' ca du chi xun gaxúa benne' biu.

¹¹Nadxa gucá'a Jesús xeta xtila ca', na' ca gudé guzre̱' Dios “Xcalenu'”, bnézruje̱' na benne' ca' dxusé̱dene̱', na' benne' caní gulísie̱' na láwele benne' zan ca' zaj dxe'e̱ na'. Cá'anqueze be̱n Jesús chee̱ bela ca', na' bnézruje̱' ca da gulaca lazre' benne' ca'.

¹²Gate gulélaje benne' ca', na' Jesús guzre̱' benne' ca' dxusé̱dene̱': ―Le xutupa da bízrujdu ca' da dxelexegá'ana na, chee̱ quebe bi gaca dítaje.

¹³Belexequé̱'e̱ na, na' buluzré̱'e̱ chazrinnu xcuite da bizruj ca' zaj nagá'ana na chee̱ da gazxu' xeta xtila zrua' cebada ca'.

¹⁴Nadxa benne' zan ca', gate belelé'ene̱' xel-la' waca zren nigá da be̱n Jesús, gulenné̱': ―Da li benne' nigá naque̱' bénnea' guchálaje̱' waláz chee̱ Dios, bénnea' dxal-la' le̱'e̱.

¹⁵Guque bé'ene̱' Jesús dxelaca lazre̱' xeleché̱'e̱ Le̱' xadía chee̱ xuluzúe̱' Le̱' ca benne' wenná bea, na' bezé̱'e̱ na', ne begüéne̱' lu xi'a sibe na' chee̱ sue̱' le̱ze̱'. Jesús dxedé̱' lawe' nísadau'

¹⁶Gate ba za xrinne, benne' ca' dxuse̱de Jesús belétaje̱' dxu'a nísadau',

¹⁷na' gulu'e̱ lu da dxedá lawe' nísadau', ne gulezú lawe̱' zjaque̱' xeledée̱' xechalá'a nísadau' chee̱ xelezrine̱' xe̱zre Capernaum. Ca guxrinne, quebe ne xezrín Jesús na'.

¹⁸Nadxa guzú lau dxaca tu be' bdunu' lawe' nísadau' na', na' xeajxruza chee̱ nísadau' na' guxásale̱'e̱ na.

¹⁹Gate ba guledée̱' lu nísadau' na' catite sadxu tu chi'i zren, na' belelé'ene̱' Jesús ba dxezrine̱' naga ziaj da dxedá lawe' nísadau', dxezé̱'e̱ lawe' nísadau', na' belezrebe̱'.

²⁰Nadxa Jesús guzre̱' benne' ca': ―Neda' na'. Quebe zrébele.

²¹Nadxa lu dute̱ xel-la' dxelebé gulezí' lu ne̱'e̱ Le̱' lu da dxedá lawe' nísadau' na', na' chadite̱ belezrine̱' lu xe̱zr la xu naga zjaque̱'. Benne' zan ca' dxelexílaje̱' Jesús

²²Zra xula benne' zan ca', benne' belexegá'ana xecha la'a nísadau', guleque bé'ene̱' ba zeajxaca benne' ca' dxuse̱de Jesús lu da dxedá lawe' nísadau' tu licha' da dxe' chalá'a na', na' Jesús quebe guxíajle̱ne̱' benne' ca'.

²³Dxácate̱ na' xezícala da dxeledá lawe' nísadau', da ca' beledxúaj na xe̱zre Tiberias, belezrín na tu lataj da zua gáguze naga gulawe̱' xeta xtila na' ca gudé guzre Xránadxu Dios: “Xcalenu'.”

²⁴Chee̱ le̱ na' gate benne' zan ca' guleque bé'ene̱' québedxa zua Jesús na', ne cá'anqueze benne' ca' dxusé̱dene̱', na' gulu'e̱ lu da dxeledá lawe' nísadau', ne xjaque̱' xe̱zre Capernaum zeajlexedílaje̱' Jesús. Jesús naque̱' xeta xtila da dxunna na xel-la' nabán li lazre'

²⁵Gate benne' zan ca' belezrine̱' xecha la'a dxu'a nísadau', na' belexezrague̱' Jesús, ne buluche̱be̱' Le̱': ―Benne' Wese̱de, ¿bata bla'u nigá?

²⁶Jesús guzre̱' benne' ca': ―Da li dxapa' le'e, dxexílajle le'e neda' lawe' da gudágule, ne béljele, ne quegá lawe' da ble'ele xel-la' waca ca' da ble'eda' le'e.

²⁷Quebe cue'le gunne xue sile da gágule da te chee̱ na. Le cue' gunne xue sile da gágule da zeajlí canna, da na' gunna na le'e xel-la' nabán da zeajlí canna. Da nigá naca na xel-la' wagu da gunna' neda', Benne' Gulje̱' Bénneache, le'e, lawe' da bzua Xra' Dios nen neda' da dxunna bea na naca' Zrí'ine̱'.

²⁸Nadxa buluche̱be̱' Le̱': ―¿Bi dxal-la' guntu' chee̱ gaca ca da dxaca lazre' Dios guntu'?

²⁹Jesús beche̱be̱': ―Da dxaca lazre' Dios gunle naca na chéajle̱le chia' neda', naca' Bénnea' gusel-la Dios.

³⁰Nadxa buluche̱be̱' Le̱': ―¿Bizra xel-la' waca gunu' chee̱ le'entu' na, na' chéajle̱ntu chiu'? ¿Bizra dxunu'?

³¹Xra xrtauntu' ca' gulawe̱' xeta maná le̱'e̱ xixre' lawe' lataj, ca naxúaj na lu xiche chee̱ Dios, dxenná na: Dios bgawe̱' benne' ca' xeta xtila da za xabáa.

³²Beche̱be Jesús: ―Da li dxapa' le'e, quegá Moisés na' bnézruje̱' benne' ca' xeta xtila da za xabáa. Dios, Xra', dxunne̱' le'e xeta xtila da za xabáa da naca na li lazre'.

³³Xeta xtila na' da dxunna Dios le'e naca na Bénnea' bétaje̱' xabáa, ne dxunézruje̱' chee̱ bénneache xel-la' nabán li lazre'.

³⁴Nadxa benne' ca' gulé̱'e̱ Le̱': ―Xran, tu bé̱nnazqueze chee̱ntu' xeta xtila caní.

³⁵Jesús guzre̱' benne' ca': ―Neda' naca' xeta xtila da dxunna na xel-la' nabán li lazre'. Benne' xide̱' naga zua' neda' cabátadxa tune̱', na' benne' chéajle̱'e̱ chia' cabátadxa bílene̱'.

³⁶Naca na ca ba gucha' le'e. Le'e na' quebe dxéajle̱le chia', lácala ba ble'ele neda'.

³⁷Xúgute̱ benne' ca' dxunna Xra' neda', xelelé̱'e̱ lawa', na' benne' ca' xelelé̱'e̱ naga zua', quebe guzúa' benne' ca' chalá'ala.

³⁸Neda' guzá'a xabáa, quegá chee̱ guna' ca dxaca lázrequeza' neda'. Bla'a chee̱ guna' ca da dxaca lazre' Xra', gusel-le̱' neda'.

³⁹Da dxaca lazre' Xra', nasel-le̱' neda', naca na chee̱ quebe gunitia' netú benne' ca' ba be̱nne̱' chia'. Nacan chee̱ gusebana' benne' ca' lu zra bze̱be.

⁴⁰Da dxaca lazre' Xra', nasel-le̱' neda', naca na chee̱ xelapa bénneache xel-la' nabán da zeajlí canna, xúgute̱ benne' ca' xelenné̱'e̱ neda', Zri'ine Dios, ne xeléajle̱'e̱ chia' neda', na' chee̱ gusebana' neda' benne' ca' lu zra bze̱be na'.

⁴¹Gate belenne̱' da nigá, na' judío ca' gulezú lawe̱' dxelezí tizre̱' Jesús lawe' da gunné̱': “Neda' naca' xeta xtila da betaj xabáa.”

⁴²Nadxa gulenné̱': ―¿Quegá benne' nigá zri'ine José? Dxi'u núnbeadxu xra xrne̱'e̱. ¿Bizr chee̱ na' dxenné̱' bétaje̱' xabáa?

⁴³Nadxa Jesús guzre̱' benne' ca': ―Québedxa si tízrale.

⁴⁴Quebe nu benne' gaca xide̱' naga zua' neda', che quebe xedajgúa Xra' nasel-le̱' neda' bénnea', na' neda' gusebana' bénnea' lu zra bze̱be na'.

⁴⁵Lu xiche ca' naga naxúaj da gulenná benne' ca' buluchalaje̱' waláz chee̱ Dios, dxenná na: Dios gusé̱dene̱' xúgute̱ bénneache. Ca' gaca na, xúgute̱ benne' ca' dxuluzé̱ nague̱' ca da dxuse̱de Xra', dxelelé̱'e̱ naga zua'.

⁴⁶’Quebe ne le'e nu benne' Xra'. Benne' tu licha', bénnea' blé'ene̱' Le̱', naca bénnea' guzé̱'e̱ naga zua Dios.

⁴⁷Da li dxapa' le'e, nu benne' dxéajle̱'e̱ chia' neda' nape̱' xel-la' nabán da zeajlí canna.

⁴⁸Neda' naca' xeta xtila da dxunna na xel-la' nabán li lazre'.

⁴⁹Xra xrtáule ca' gulawe̱' xeta maná le̱'e̱ xixre' lawe' lataj, na' gudé na' xúgute̱ benne' ca' gulatie̱'.

⁵⁰Xeta xtila nigá naca na da za xabáa, na' che nu benne' gawe̱' na, quebe gatie̱' tu chi'ize.

⁵¹Néda'queza' naca' xeta xtila da dxunna na xel-la' nabán da za xabáa. Benne' gawe̱' xeta xtila nigá waca bánqueze̱' chadía chacanna. Xeta xtila na' da dxunna' neda' naca na be̱la' dxen cheé̱zqueza', da gunna' chee̱ xelaca bánqueze bénneache.

⁵²Nadxa benne' judío ca' gulezú lawe̱' dxuluche̱be ljwezre̱', dxelenné̱': ―¿Ájazra gun benne' nigá, gunne̱' dxi'u be̱la' dxen cheé̱zqueze̱' chee̱ gágudxu na?

⁵³Jesús guzre̱' benne' ca': ―Da li dxapa' le'e, che le'e quebe gágule be̱la' dxen chia' neda', Benne' Gulje̱' Bénneache, ne che quebe xí'ajle dxen chia', quebe gápale xel-la' nabán li lazre'.

⁵⁴Benne' dxawe̱' be̱la' dxen chia', ne dxí'aje̱' dxen chia' nape̱' xel-la' nabán da zeajlí canna, na' neda' gusebana' bénnea' lu zra bze̱be na'.

⁵⁵Be̱la' dxen chia' naca na xel-la' wagu li lazre' chee̱ bénne'du xu'ule, na' dxen chia' naca na da xele'aj bénneache da naca na li lazre'.

⁵⁶Benne' dxawe̱' be̱la' dxen chia', ne dxí'aje̱' dxen chia', naque̱' neda' tuze, na' néda'queza' naca' bénnea' tuze.

⁵⁷Xra' nasel-le̱' neda' xu'u lu ne̱'e̱ xel-la' nabán li lazre', na' neda' naca bana' ne̱ chee̱ Le̱'. Cá'anqueze bénnea' dxawe̱' da naca chia' neda' gaca bánqueze̱' ne̱ chia' neda'.

⁵⁸Da nigá naca na xeta xtila da za xabáa. Xeta xtila nigá quebe naca na ca xeta maná da gulagu xra xrtáule ca', na' gudé na' gulate xúgute̱'. Benne' dxawe̱' xeta xtila nigá waca bánqueze̱' chadía chacanna.

⁵⁹Bse̱de Jesús ca naca da caní naga zaj zra' benne' zan ca' lu xu'u naga dxelezraga bénneache chee̱ xe̱zre Capernaum. Ca naca dizra' na' da dxunna na xel-la' nabán da zeajlí canna

⁶⁰Gate belén benne' zan ca' da nigá dxuse̱de Jesús, na' benne' ca' zjácale̱ Jesús gulenné̱': ―Dizra' caní dxenná Jesús zaj nácale̱'e̱ na ste̱be sidxu. ¿Nuzra gaca gun caní?

⁶¹Guque bé'ene̱' Jesús dxelenné̱' chee̱ xrtizre̱', na' bche̱be̱' benne' ca': ―¿Dxuzúa dizra' nigá le'e ste̱be?

⁶²¿Ájazra gunle checa' lé'ele neda', Benne' Gulje̱' Bénneache, xegüéna' xabáa naga zua' nédxute̱?

⁶³Be' naca na da dxunna xel-la' nabán li lazre'. Da naca na be̱la' dxen quebe bi zaca na. Dizra' ca' da ba gucha' le'e zaj naca na chee̱ Be', ne zaj naca na da dxelunna na xel-la' nabán li lazre'.

⁶⁴Bál-lale le'e quebe dxéajle̱le chia'. Caní gunná Jesús lawe' da nézene̱' nédxudaute̱ nu benne' ca' quebe dxeléajle̱'e̱ chee̱', ne nua' gudé Le̱' lu na' benne' guledábague̱' Le̱'.

⁶⁵Nadxa gunná Jesús: ―Chee̱ le̱ na' gucha' le'e, quebe nu benne' gaca xide̱' naga zua' neda' che quebe xedajgúa Xra' bénnea'.

⁶⁶Lu zra ná'queze benne' zan ca', benne' xjácale̱ne̱' Jesús, québedxa xjácale̱ne̱' Le̱'.

⁶⁷Nadxa Jesús bche̱be̱' benne' chazrinnu ca' dxusé̱dene̱', gunné̱': ―¿Cá'anqueze le'e dxaca lázrele xexíajle?

⁶⁸Beche̱be Simón Pedro: ―Xran, ¿nuzra chéajle̱ntu'? Dizra' chiu' naca na da dxunna na xel-la' nabán da zeajlí canna.

⁶⁹Netu' dxéajle̱ntu' chiu', ne nézentu' nacu' Cristo, Zri'ine Dios ban.

⁷⁰Jesús beche̱be̱': ―Neda' gucá'a le'e, benne' chazrinnu, na' tu benne' ládujla le'e xu'e̱ da xriwe̱'.

⁷¹Da nigá gunná Jesús, bchálaje̱' ca naca chee̱ Judas Iscariote, zri'ine tu benne' le̱' Simón, lawe' da gudé Judas nigá Jesús lu na' benne' guledábague̱' Le̱'. Naque̱' tu benne' chazrinnu ca' dxuse̱de Jesús.