Read Tabaa Zapotec San Juan 8 Bible Online

San Juan 8 - Tabaa Zapotec bible

San Juan 8

¹Na' Jesús guzé̱'e̱ zéaje̱' lu Xi'a Xaga Olivo. Jesús dxuchálajle̱ne̱' tu nu'ula dxune̱' dul-la dxíchaje̱' xrba chee̱ xel-la' nuchaga na'

²Zra xula, gate guxaní', na' bezrín Jesús chale'aj xudau' na'. Xúgute̱ benne' ca' gulebigue̱' naga zua Jesús, na' Le̱' gudxé'e̱, ne guzú lawe̱' dxusé̱dene̱' benne' ca'.

³Nadxa benne' ca' dxuluxuzájle̱'e̱ da nadxixruj bea Dios, ne benne' fariseo ca' guleché̱'e̱ tu nu'ula naga zua Jesús, belelé'ene̱' le̱' dxune̱' dul-la dxíchaje̱' xrba chee̱ xel-la' nuchaga na'. Buluzé̱' nu'ula na' laduj benne' zaj zre̱'e̱ na',

⁴na' gulé̱'e̱ Jesús: ―Benne' Wese̱de, nu'ula nigá blé'entu' le̱' dxune̱' dul-la dxíchaje̱' xrba chee̱ xel-la' nuchaga na'.

⁵Da bdxixruj be'e Moisés dxenná be'e netu' gútentu' nu'ula caní, güentu' le̱' xiaj. ¿Bizra dxennáu' Lue'?

⁶Caní gulenná benne' ca' chee̱ xuludxixre̱' Jesús chee̱ xelezéquene̱' xelagu zria Le̱'. Nadxa gudxé' luche Jesús, ne guzú lawe̱' dxuzúaje̱' lu xu nen zrube ne̱'e̱.

⁷Benne' ca' buluché̱bequeze̱' Jesús, na' Le̱' bezé̱' dxe̱'e̱ benne' ca': ―Nútete̱zlale le'e quebe nabágale dul-la, waca su laule güele nu'ula nigá xiaj.

⁸Na' bebé' luche Jesús, ne bzúajqueze̱' lu xu.

⁹Benne' ca', gate belenne̱' da nigá, quebe bzua xichaj lázrdawe̱' le̱' zrize, na' belexedxúaje̱' tu weaje̱'. Belexedxúaj za'a benne' gúladxa, na' ca belexedxúaj xúgute̱ benne' ca' dxelagu zrie̱' nu'ula', na' begá'ana Jesús tuze̱' nen nu'ula na', ze̱' laduj benne' ca' dxuluzé̱ nague̱' chee̱'.

¹⁰Nadxa bezé̱' Jesús, ne gate québedxa nu benne' ca' ble'e Jesús, benne' dxulagu zrie̱' nu'ula na', nadxa guzre̱' le̱': ―Nu'ula, ¿gazra na' benne' ca' gulagu zrie̱' lue'? ¿Quebe nu chilá' benne' guzría xi'e̱ lue'?

¹¹Nu'ula na' gunné̱': ―Quebe nu chilá', Xran. Nadxa Jesús guzre̱' nu'ula na': ―Cá'anqueze neda', quebe guzría xi'a lue'. Bexíaj, ne québedxa gunu' dul-la. Jesús dxusení'e̱ lu xichaj lázxdau bénneache

¹²Bchálajle̱ Jesús benne' ca' xecha lasa, gunné̱': ―Neda' naca' xel-la' naxaní' chee̱ lu xichaj lázxdau bénneache. Benne' dxedále̱ne̱' neda' gape̱' xel-la' naxaní' nigá da gunezruj na le̱' xel-la' nabán li lazre', na' cabata' tadxe̱' lu da chul-la chee̱ dul-la da zaj nabague̱'.

¹³Nadxa benne' fariseo ca' gulé̱'e̱ Le̱': ―Lue' dxexeche̱bu' cheé̱zquezu', na' da dxexeche̱bu' quebe bi zaca na.

¹⁴Beche̱be Jesús: ―Da dxexeche̱ba' zaca na lácala néda'queza' dxexeche̱ba' cheé̱zqueza'. Neda' nezda' gala za'a, ne gala cha'a. Le'e quebe nézele gala za'a, ne gala cha'a.

¹⁵Le'e dxuchí'ale cáte̱ze dxenná xichaj lázrdaule. Bla'a neda', quegá chee̱ guchi'a ca da dxun nu benne'.

¹⁶Che dxuchi'a, dxuchi'a cáte̱ze naca na, lawe' da quebe dxuchi'a néda'za'. Xra' nasel-le̱' neda' dxuchi'e̱ tu zren nen neda' ca naca da dxelún bénneache.

¹⁷Lu da nadxixruj bea chee̱le le'e naxúaj gate zaj zra' chupa benne' dxelexeche̱be̱' tuz ca dxelenné̱', naca da li xrtizra' benne' ca'.

¹⁸Néda'queza' dxexeche̱ba' da naca cheé̱zqueza', na' Xra' nasel-le̱' neda', cá'anqueze dxexeche̱be̱' chia'.

¹⁹Nadxa benne' ca' buluche̱be̱' Jesús: ―¿Ga na' Xrau'? Jesús beche̱be̱': ―Le'e quebe núnbeale da nácaqueza' neda', ne quebe núnbeaquezle Xra'. Chela da li núnbeale neda', cá'anqueze núnbeale Xra'.

²⁰Da caní bchalaj Jesús dxácate̱ na' dxusé̱dene̱' bénneache chale'aj xudau' naga zaj nnita xi'ina dumí chee̱ xudau'. Quebe nu gude̱la Le̱' lawe' da quebe ne zrin zra chee̱'. Dxenná Jesús: “Naga cha'a neda' quebe gaca sa'le le'e”

²¹Nadxa Jesús guzre̱' benne' ca': ―Wexá'a neda', na' le'e xexílajle neda', na' wátele lu dul-la nabágale, lawe' da naga cha'a neda', le'e quebe gaca sa'le.

²²Nadxa benne' judío ca' gulé̱ ljwezre̱': ―¿Gute cuine̱', ne chee̱ le̱ na' dxenné̱' quebe gaca chéajdxu naga cheaj Le̱'?

²³Nadxa Jesús guzre̱' benne' ca': ―Le'e nácale chee̱ zran xabáa nigá. Neda' naca' chee̱ xabáa na'la. Le'e nácale chee̱ xe̱zr la xu nigá. Neda' quebe naca' chee̱ xe̱zr la xu nigá.

²⁴Chee̱ le̱ na' gucha' le'e wátele lu dul-la nabágale, lawe' da che quebe dxéajle̱le zúaqueza' neda', wátele lu dul-la nabágale.

²⁵Nadxa benne' ca' buluche̱be̱' Jesús: ―¿Nuzra nacu' Lue'? Beche̱be Jesús: ―Nácaqueza' ca ba gucha' le'e nédxudaute̱.

²⁶Dé̱le̱'e̱ da dxal-la' nnia' chee̱le, ne da dxal-la' guchi'a ca naca da dxunle. Bénnea' gusél-le̱' neda' dxenné̱' da li, na' da dxapa' bénneache naca na da ba benda' gunné̱ Le̱', lácala quebe dxezaca ba lázrele̱nle na.

²⁷Benne' ca' quebe guléajni'ine̱' dxuchálajle̱ Jesús le̱' ca naca chee̱ Dios, Xre̱'.

²⁸Nadxa Jesús guzre̱' benne' ca': ―Gate le'e chísale sibe neda', Benne' Gulje̱' Bénneache, nadxa xúnbeale zúaqueza' neda', ne quebe bi dxuna' da naca cheé̱zqueza'. Tuze dxennéa' ca da ba ble'e Xra' neda'.

²⁹Bénnea' gusél-le̱' neda' zúale̱queze̱' neda'. Xra' quebe nucá'ane̱' neda' tuza' lawe' da tu dxúnzqueza' ca da dxezaca ba lazre' Le̱'.

³⁰Ca gunná Jesús da caní, guléajle̱ benne' zan chee̱'. Benne' zaj naque̱' chee̱ Dios, ne benne' ca' nuxru dul-la le̱'

³¹Nadxa Jesús guzre̱' benne' judío ca', benne' dxeléajle̱'e̱ chee̱': ―Che le'e se̱ típale lu da dxapa' le'e, da li nácale neda' tuze.

³²Gúnbeale da li, na' da li na' guselá na le'e.

³³Belexeche̱be benne' zan ca': ―Netu' nácantu' xrtia Abraham, ne quebe ne chú'untu' lu na' nu benne' ca benne' zaj nada'u. ¿Bizr chee̱ na' dxennáu' Lue' lantu'?

³⁴Jesús guzre̱' benne' ca': ―Da li dxapa' le'e, xúgute̱ benne' dxelúnqueze̱' dul-la, dúl-laqueze na' nuxru na benne' ca'.

³⁵Nu benne' xu'e̱ lu na' tu benne' ca benne' nada'u quebe tu súazqueze̱' xu'u na'. Zrí'inequeze bénnea' wazúatequezebe'.

³⁶Chee̱ le̱ na', che neda', Zri'ine Xra', guselá' le'e, da li láquezle le'e.

³⁷Nezda' nácale le'e xrtia Abraham. Na'a dxaca lázrele gútele neda' lawe' da quebe dxezí' lu na'le da dxapa' le'e.

³⁸Neda' dxuchálaja' ca naca da ble'e Xra' neda', na' le'e dxunle ca da guzre xráquezle le'e.

³⁹Belexeche̱be benne' ca': ―Xra xrtauntu' naca Abraham. Na' Jesús guzre̱' benne' ca': ―Chela nácale da li xrtia Abraham, na' gunle ca da be̱n Abraham.

⁴⁰Lácala gucha' le'e da li da ble'e Xra' neda', le'e dxaca lázrele gútele neda'. Abraham cabata' be̱ne̱' da caní.

⁴¹Le'e dxúnquezle ca da dxun xráquezle. Nadxa benne' ca' gulé̱'e̱ Jesús: ―Netu' quebe nácantu' bi lan. Zua tuze Xrantu', Dios.

⁴²Nadxa Jesús guzre̱' benne' ca': ―Chela naca Dios da li Xrale, le'e wazrí'ile neda' lawe' da za'a neda' naga zua Dios, ne zúaqueza' nigá. Quebe za'a da naca cheé̱zqueza'. Dios nasel-le̱' neda'.

⁴³¿Bizr chee̱ na' quebe dxezéquele chéajni'ile da dxennéa'? Naca na lawe' da quebe dxaca lázrele xénele dizra' chia'.

⁴⁴Xráquezle le'e naca da xriwe̱'. Le'e nácale chee̱ da na', ne dxaca lázrele gunle ca da dxaca lazre' le̱ na. Da xriwe̱' na' naca na we̱te benne' nédxudaute̱. Cabata' dxenné̱ na da li lawe' da quebe bi zua da li nen le̱ na. Gate dxun lazre' na, dxenné̱ na cáte̱ze naca na, lawe' da tu dxun lázrezqueze na, ne naca na da guzú lau na be̱n lazre' na.

⁴⁵Lácala dxapa' le'e da li, le'e quebe dxéajle̱le chia'.

⁴⁶¿Núlale le'e séquele gulé'ele nabaga neda' tu dul-la? Che dxennéa' da li, ¿bizr chee̱ na' quebe dxéajle̱le chia'?

⁴⁷Benne' naque̱' chee̱ Dios dxenne̱' dizra' chee̱ Dios. Le'e quebe nácale chee̱ Dios. Chee̱ le̱ na' quebe dxaca lázrele xénele chee̱ Dios. Cristo ba zúaqueze̱' nédxudxa ca Abraham

⁴⁸Nadxa benne' judío ca' gulé̱'e̱ Jesús: ―Da li dxennantu' gate dxennantu' nacu' benne' Samaria, ne xu'u be' xriwe̱'.

⁴⁹Jesús beche̱be̱': ―Quebe xu'a be' xriwe̱'. Neda' dxapa' ba lá'ana Xra' Dios, na' le'e dxuzúale neda' chalá'ala.

⁵⁰Quebe dxe'a gunne xue chee̱ gápale neda' ba lá'ana, ne si' lu na'le neda'. Zua Benne' xabáa dxezá lazre̱' gápale neda' ba lá'ana, ne Le̱' dxuchi'e̱ ca da dxunle.

⁵¹Da li dxapa' le'e: Benne' dxune̱' ca naca dizra' chia', cabata' gátequeze bénnea'.

⁵²Nadxa benne' judío ca' belexeche̱be̱': ―Na'a nézquezentu' xu'u be' xriwe̱'. Ba gulátequeze Abraham, ne xúgute̱ benne' ca' buluchálaje̱' waláz chee̱ Dios, na' lue' dxennáu' benne' gune̱' ca naca dizra' chiu' cabata' gátequeze̱'.

⁵³¿Nácadxu' szrendxa ca xra xrtáudxu Abraham? Gútequeze Le̱', ne cá'anqueze gulate benne' ca' buluchálaje̱' waláz chee̱ Dios. ¿Bízraqueze dxugune cuinu'?

⁵⁴Beche̱be Jesús: ―Che neda' dxucá'ana cuina' ba lá'ana, quebe bi zaca na. Benne' dxape̱' neda' ba lá'ana naque̱' Xra', Bénnea' dxennale le'e naque̱' Xrale.

⁵⁵Le'e quebe núnbeale Le̱'. Neda' núnbeaqueza' Le̱'. Chela dxennéa' quebe núnbe'a Le̱', naca' we̱n lazre' ca nácale le'e. Neda' da li núnbe'a Le̱', ne dxuna' ca da dxenné̱'.

⁵⁶Xra xrtáule Abraham, bénnea' gutie̱' nédxudaute̱, gubéle̱'e̱ne̱' lawe' da dxal-la' lé'ene̱' zra zua neda'. Blé'ene̱' na, na' gubéle̱'e̱ne̱'.

⁵⁷Nadxa benne' judío ca' gulé̱'e̱ Jesús: ―Québequeze ne su' chi xun iza, na' ¿dxennáu' blé'enu' Abraham?

⁵⁸Jesús beche̱be̱': ―Da li dxapa' le'e, nédxudaute̱ gate quebe ne sua Abraham, báchequeze zua' neda'.

⁵⁹Nadxa gulequé̱'e̱ xiaj chee̱ xelu'e̱ Jesús, na' Le̱' bcache cuine̱'. Bdee̱' ládujla benne' ca', na' bedxúaje̱' chale'aj xudau', ne bezé̱'e̱.