Read Tabaa Zapotec Los Hechos 2 Bible Online

Los Hechos 2 - Tabaa Zapotec bible

Los Hechos 2

¹Ca bzrin zra Pentecostés, xúgute̱ benne' ca' dxeléajle̱'e̱ chee̱ Jesús zaj nazrague̱' tuze lataj.

²Ca' guca, belenne̱' tu schaga da za' lu be' zran xabáa, ca dxun tu be' bdunu', na' belén na xúgute̱ benne' zaj zre̱'e̱ lu xu'u naga zaj dxe'e̱.

³Nadxa belelé'ene̱' lu be' xi' ca', da dxelala, na' xeajlezúa na xíchaj tu tu benne' ca'.

⁴Nadxa guzúale̱tequeze Be' Lá'azxa xúgute̱ benne' ca', na' tu tue̱' gulezú lawe̱' dxuluchálaje̱' dizra' nazrala cáte̱ze dxuchine Be' Lá'azxa le̱'.

⁵Ca lu zra ca' zaj zra' xe̱zre Jerusalén benne' judío ca' dxulucá'ana szrénqueze̱' Dios. Benne' caní zá'aque̱' xúgute̱ xe̱zr la xu zaj dxe' lu xe̱zr la xu nigá.

⁶Ca belenne̱' bénneache ca naca schaga na' da dxaca na, na' belexezrague̱', ne quebe zaj nézene̱' bi na', lawe' da dxelén tu tu benne' ca' dizra' cha chee̱' da dxuluchalaj benne' ca' dxeléajle̱'e̱ chee̱ Jesús.

⁷Na' belexebánele̱'e̱ne̱', ne belexruse̱', ne gulé̱ ljwezre̱' tue̱' xetúe̱': ―Zaj naca benne' Galilea xúgute̱ benne' caní dxuluchálaje̱'.

⁸¿Ájazra na' dxendxu dxuluchálaje̱' dizra' cha chee̱dxu dxi'u?

⁹Zradxu dxi'u nigá, nácadxu benne' xe̱zr la xu Partia, ne benne' xe̱zr la xu Media, ne benne' xe̱zr la xu Elam, ne benne' xe̱zr la xu Mesopotamia, ne benne' chee̱ xe̱zre ca' zaj nababa Judea, ne benne' chee̱ naga nababa Capadocia, ne benne' chee̱ naga nababa Ponto, ne benne' chee̱ naga nababa Asia,

¹⁰ne benne' chee̱ naga nababa Frigia, ne benne' chee̱ naga nababa Panfilia, ne benne' xe̱zr la xu Egipto, ne benne' chee̱ xe̱zr la xu Africa da zua dédedxa chee̱ xe̱zre Cirene. Cá'anqueze zaj zra' benne' xe̱zr la xu Roma nigá. Bal-la benne' Roma ca' zaj naque̱' benne' judío, benne' gulálaje̱' ca', ne benne' zaj nazi'e̱ ca naca da nadxixruj bea chee̱ benne' judío ca'.

¹¹Cá'anqueze nácadxu benne' xe̱zr la xu Creta, ne benne' xe̱zr la xu Arabia. Xúgute̱dxu dxendxu lu dizra' cha chee̱dxu dxuluchalaj benne' caní ca naca da zren ca' da dxun Dios.

¹²Xúgute̱' belexebánene̱', ne quebe zaj nézene̱' bi da dxaca na', na' gulenaba ljwezre̱' tue̱' xetúe̱': ―¿Bizra zéaje̱ da nigá?

¹³Benne' xula ca' belún le̱', gulenné̱': ―Dxelezuzre benne' caní. Da bchalaj Pedro lau benne' ca'

¹⁴Nadxa guxasa Pedro nen benne' chinéaj gubáz chee̱ Cristo, na' zizraj bchálajle̱ne̱' bénneache zaj zra' na'. Dxe̱'e̱ le̱': ―Le'e, benne' Judea, ne xúgute̱le le'e nazrágale xe̱zre Jerusalén. Dxal-la' nézele le'e da nigá. Le xen xanne' ca naca da xapa' le'e.

¹⁵Netu' quebe dxezúzrentu' ca dxéquele le'e. Za gudete̱ xrsila na'a. Netú benne' quebe dxezúzrene̱' ca ná'queze.

¹⁶Da nigá naca da gunnáqueze Joel, bénnea' bchálaje̱' waláz chee̱ Dios gate na' gunné̱':

¹⁷Caní dxenná Dios: “Lu zra bze̱be wasél-laqueza'Be' Lá'azxa chia' chee̱ súale̱ne̱' xúgute̱ bénneache.Zrí'inele bi biu ne bi nu'ula welenné̱quezebe' waláz chia' neda'.Bi cuide' ca' welelé'equezebe' ca da gulé'eda'-be'.Na' benne' gula ca' welennéquezene̱' xe̱la.

¹⁸Ca lu zra na' guzuáqueza' Be' Lá'azxa chia'nen bi we̱n zrin chia' ca', benne' biu ne nu'ula ca',na' guchálajquezebe' waláz chia' neda'.

¹⁹Lu be' zran xabáa gulé'equezda' xel-la' waca chia',na' lu xe̱zr la xu dxe'ela gulé'eda' da xelunna bea na,dxen, ne xi', ne zren da naca ca beuj gasaj.”

²⁰Gubizra xechul-la na,na' beu' xexaca na xrna ca dxennedxu ca za zrin zra xelá' Xránadxu.Zra na' gaca na tu zra chee̱ da xebánedxune zra na' walé'equezdxu xel-la' szren chee̱ Dios.

²¹Nadxa xelelá xúgute̱ benne' ca'xelenné̱' Xránadxu lu xel-la' dxeleajlí lazre' chee̱'.

²²’Chee̱ le̱ na', le'e, benne' Israel, le xen ca da xapa' le'e. Jesús, benne' Nazaret, guque̱' tu benne' bedxúaje̱' xrlátaje lau xúgute̱le le'e ne̱ chee̱ da be̱n Dios laule le'e. Lu na' Jesús Dios blé'ene̱' da zan da dxebánedxu, ne xel-la' waca ca', ne da dxelunna bea na ca ba nézquezle le'e.

²³Gate Dios be̱'e̱ lataj tu benne' bdee̱' Le̱' lu na'le le'e cáte̱ze bache núnqueze̱' nedxu, nadxa le'e gudé̱l-lale Le̱', na' bé̱tele Le̱' gate na' bdele Le̱' lu na' benne' ca' dxelune̱' da cale̱la, benne' ca' buludé̱'e̱ Le̱' xaga béguaj naga gutie̱'.

²⁴Nadxa Dios bsebane̱' Le̱', bebéaje̱' Le̱' lu xel-la' gute. Quebe guxú'u ájala xegá'ane̱' chalásaze lu xel-la' gute na'.

²⁵Ca naca da nigá bchalaj wenná bea David ca naca chee̱ Jesús na', gate gunné̱':Belé'equezda' Xrana' lawa' nigá.Le̱' zue̱' cuita' xabe̱la, chee̱ quebe bi guchebe na neda'.

²⁶Chee̱ le̱ na' gubéle̱'e̱da', ne bil-la' lu xel-la' dxebé chia'.Chee̱ le̱ na' guxrén lázrequeza' Le̱' gate gatia',

²⁷lawe' da quebe xucá'anaquezu' neda' lu lataj chee̱ benne' gate.Quebe güéquezu' lataj guzru be̱l-la' dxen chia' neda',naca' benne' we̱n zrin chiu', ne benne' nazrí'inu'.

²⁸Blé'equezenu' neda' ca dxal-la' guna' chee̱ zrué'eda' xel-la' nabán,na' gúnnale̱'u neda' xel-la' dxebé lawe' da zúale̱nu' neda'.

²⁹’Le'e, bi bícha'dau'. Naca bea na gute xra xrtáudxu David, na' bulucache̱' le̱' lu xe̱dxu ba chee̱' da zúaqueze na na'a nagá zúadxu.

³⁰David na' guque̱' tu benne' bchálaje̱' waláz chee̱ Dios, ne gunézene̱' ca da nache̱be lázrequeze Dios gune̱'. Gunné̱ lie̱' tu benne' zri'ine zre sua David na' gaque̱' Cristo, Bénnea' nna béaqueze̱', xequé̱'e̱ lawe̱' chee̱ David.

³¹Ca' guca, David nigá belé'equezne̱' nedxu ca naca da dxal-la' gaca chee̱ Cristo, na' bchálaje̱' ca guca gate bebán Cristo, gunné̱': “Benne' nigá quebe xegá'anaqueze̱' lataj chee̱ benne' gate, ne quebe gúzruqueze be̱l-la' dxen chee̱'.”

³²Caní guca, Dios bsebane̱' Jesús nigá, na' netu' dxexeché̱bentu' da li ca guca da nigá.

³³Ca' guca, Dios bzue̱' Jesús lu xabáa chee̱' nen xel-la' waca chee̱', na' be̱'e̱ Le̱' lataj gusel-le̱' Be' Lá'azxa chee̱' nigá ca nache̱be lázrequeze̱' nedxu gune̱', na' xúgute̱ da caní dxelé'ele le'e, ne dxenle zaj naca na da dxun Be' Lá'azxa na'.

³⁴David na' quebe begüéne̱' xabáa, san lé̱queze̱' gune̱':Xránadxu Dios guzre̱' Xrana':“Gudxe'e cuita' xabe̱la nigá

³⁵ca zrindxa zra guzúa' benne' dxedábague̱' lue' chee̱ nna be'enu le̱'.”

³⁶’Xúgute̱le le'e, benne' Israel, dxal-la' nézquezle da nigá: Jesús nigá, bénnea' bda'le le'e xaga béguaj, Dios ba nune̱' Le̱' Xránale ne Cristo chee̱le, Benne' guselé̱' le'e.

³⁷Gate benne' ca' belenne̱' da nigá, na' belexewí'ine lazre̱', na' buluche̱be̱' Pedro, ne benne' gubáz ca' chee̱ Jesús, dxelé̱'e̱ le̱': ―Benne' bíchentu', ¿ájazra dxal-la' guntu' xca'?

³⁸Nadxa gunná Pedro: ―Le xebí'i lazre' lau Dios, ne le chua nisa tu tule chee̱ gácale Jesucristo tuze, chee̱ gunite lau Le̱' chee̱le le'e ca naca dul-la da nabágale. Ca' gaca, nadxa Dios sél-laqueze̱' Be' Lá'azxa chee̱' chee̱ súale̱ne̱' le'e.

³⁹Da nigá nache̱be lazre' Dios naca na chee̱le le'e, ne chee̱ zrí'inele, ne chee̱ xúgute̱ benne' zaj zre̱'e̱ zitu', xúgute̱ benne' ca' dxaca lazre' Dios nne̱'.

⁴⁰Ca naca dizra' nigá, ne xezícaladxa dizra' da bchalaj Pedro, bzéajni'ine̱' benne' ca', na' gunné̱': ―Le la ládujla benne' we̱n da cale̱la caní.

⁴¹Ca'an guca, benne' ca' guléajle̱'e̱ chee̱ da bchalaj Pedro belexedxúe̱' nisa, na' lu zra na' belaca tuze ca chi dxua gaxúa benne' nen benne' ca' ba dxeléajle̱'e̱ chee̱ Jesús.

⁴²Na' xúgute̱ benne' ca' gulezúa típaqueze̱' ca da dxuluse̱de benne' gubáz chee̱ Jesús le̱', na' gulezúe̱' tuze nen le sa' ljwezre̱' chee̱ bululáwizre̱' Dios, ne buluzrague̱' chee̱ xelawe̱' da dxusá lázredxu ca guca gate gute Cristo. Ca belún benne' nedxu ca', benne' guleajlí lazre̱' Cristo

⁴³Xúgute̱ benne' ca' gulezrebe̱' gate belelé'ene̱' xel-la' waca zante̱, ne da dxelunna bea na da dxelún benne' gubáz chee̱ Jesús.

⁴⁴Xúgute̱ benne' ca' dxeléajle̱'e̱ chee̱ Jesús gulaque̱' tuze, ne bulunézruje̱' da de̱ chee̱' tue̱' xetúe̱'.

⁴⁵Belutie̱' xúgute̱ da zaj nape̱', ne bulunézruje̱' dumí na' chee̱ benne' ca' ca da dxelexázrjene̱'.

⁴⁶Xugu' zra belexezrague̱' lu xudau', ne cá'anqueze lu lizre cha chee̱', chee̱ xelawe̱' da dxusá lázredxu ca guca gate gute Cristo. Gulawe̱' tu zrente̱ lu xel-la' dxelebé, ne dute̱ xel-la' dxelexruj lazre' chee̱'.

⁴⁷Belúe lá'ane̱' Dios, na' xúgute̱ bénneache guléquene̱' benne' ca' ba lá'ana. Tu zra tu zra Xránadxu bzane̱' benne' ca' chee̱ Cristo ca dxelezí' lu ne̱'e̱ tu tue̱' Cristo.