Read Tabaa Zapotec Los Hechos 9 Bible Online

Los Hechos 9 - Tabaa Zapotec bible

Los Hechos 9

¹Dxácate̱ na' Saulo quebe dxusane̱' dxune̱' ba xuzre gutie̱' benne' ca' dxeléajle̱'e̱ chee̱ Xránadxu. Chee̱ gune̱' caní guxíaje̱' xeajchálajle̱ne̱' bxruze blau.

²Gunabe̱' xiche da dxulé'e na nape̱' xel-la' dxenná bea da gu'e̱ chéaje̱' xudau' ca' zaj nnita xe̱zre Damasco, chee̱ séquene̱' cheajxedílaje̱' benne' ca' dxeléajle̱'e̱ chee̱ dizra' chawe' chee̱ Jesús, ne che̱'e̱ le̱', benne' biu, ne nu'ula ca', chee̱ guzré̱'e̱ le̱' lizre xia lu xe̱zre Jerusalén.

³Na' gate ne xu'e̱ neza zéaje̱', ne ca ba zua zrine̱' xe̱zre Damasco, na' bsaní' tu xi' naga zéaje̱' da za' xabáa.

⁴Saulo xeajcházie̱' lu xu, na' benne̱' chi'i tu benne' dxe̱'e̱ le̱': ―Saulo, Saulo, ¿bizr chee̱ na' nau zi' xuzru' neda'?

⁵Nadxa Saulo bche̱be̱': ―¿Nuzra Lue', Xran? Na' bénnea' beche̱be̱': ―Neda' naca' Jesús, benne' na' nau zi' xuzru'. Lue'ze dxun zi' cuinu', ca dxun be̱zre gate dxulíbeba' lawe' xágala da dxádue̱'-ba'.

⁶Nadxa Saulo dxezrizque̱' dxezrebe̱', gunné̱': ―Xran, ¿bi dxaca lazru' guna'? Na' Xránadxu guzre̱' le̱': ―Guxasa, guxú'u lu xe̱zre, na' xelé̱queze̱' lue' da dxal-la' gunu'.

⁷Benne' ca' zjácale̱ Saulo belezrébele̱'e̱ lawe' da belenne̱' chi'i benne' na', san quebe nu belelé'ene̱'.

⁸Nadxa Saulo bexase̱' lu xu na', na' gate guxá' lawe̱', quebe guca lé'ene̱'. Ca' guca, belequé̱'e̱ ne̱'e̱, ne guleché̱'e̱ le̱' lu xe̱zre Damasco.

⁹Guzúe̱' na' chunna zra quebe dxelé'ene̱', ne quebe bi güe'e gudawe̱'.

¹⁰Lu xe̱zre Damasco na' zua tu benne' dxéajle̱'e̱ chee̱ Jesús le̱' Ananías, na' Xránadxu ble'e lawe̱' le̱' tu lu da ble'e le̱', na' guzre̱' le̱': ―Ananías. Na' le̱' beche̱be̱': ―Nigá zua', Xran.

¹¹Nadxa gunná Xránadxu, dxe̱'e̱ le̱': ―Guxasa, guxíaj neza da nazí le na: Neza Li, na' lizre Judas guche̱bu' chee̱ tu benne' Tarso, le̱' Saulo. Benne' nigá dxuláwizre̱' Dios.

¹²Tu lu da blé'ene̱', ba blé'ene̱' tu benne' le̱' Ananías chu'e̱ guzé̱ ne̱'e̱ le̱' chee̱ xelé'ene̱'.

¹³Gate benne̱' da nigá, na' gunná Ananías: ―Xran, benne' zan ba buluzenne̱' neda' chee̱ benne' nigá, ne chee̱ xúgute̱ da cale̱la da dxune̱' chee̱ benne' ca' dxeléajle̱'e̱ chiu' Lue' lu xe̱zre Jerusalén.

¹⁴Na'a ble̱'e̱ nigá nape̱' xel-la' dxenná bea chee̱ benne' xíchaje̱ ca' chee̱ bxruze ca', chee̱ che̱'e̱ lizre xia xúgute̱ benne' dxelenné̱' Dios lu Lau' Lue'.

¹⁵Na' Xránadxu guzre̱' le̱': ―Guxíaj. Neda' ba gucá'a benne' na' chee̱ cheajzenne̱' benne' xe̱zr la xu ca', ne benne' wenná bea ca', ne benne' Israel ca', ca naca chia' neda'.

¹⁶Neda' gulé'eda' le̱' ca naca da zante̱ da saque̱'e̱ ne̱ chia' neda'.

¹⁷Nadxa Ananías guzé̱'e̱ zéaje̱' xu'u naga zua Saulo. Gate guxú'e̱ na', guxrúa ne̱'e̱ lawe' le̱', na' guzre̱' le̱': ―Saulo, bicha'. Xránadxu Jesús, Bénnea' ble'e lawe̱' lue' la neza naga za'u, nasel-le̱' neda' chee̱ xelé'enu', ne chee̱ súale̱ Be' Lá'azxa lue'.

¹⁸Ca' guca beléxrujte̱ lu xiaj lawe̱' da zaj naca ca xrlacu bela, na' belé'ene̱'. Na' bexasa Saulo, ne gudxúate̱' nisa.

¹⁹Gudé na' gudawe̱', ne bedipe̱'. Begá'ane̱' tu chupa zra nen benne' Damasco ca' dxeléajle̱'e̱ chee̱ Jesús. Saulo dxuchálaje̱' chee̱ Jesús lu xe̱zre Damasco

²⁰Nadxa guzú lau Saulo dxuchálaje̱' chee̱ Jesús lu xu'u ga dxelezraga judío ca' zaj nnite̱' Damasco, dxenné̱' Jesús naque̱' Zri'ine Dios.

²¹Xúgute̱ benne' belénene̱' chee̱' belexebánene̱', dxelenné̱': ―¿Quegá benne' nigá bénnea' gudáu zi' xuzre̱' benne' ca' zaj zre̱'e̱ Jerusalén, benne' ca' dxelenné̱' Dios lu La Jesús? ¿Quegá lé̱queze̱' na' ble̱'e̱ nigá chee̱ che̱'e̱ benne' ca' xe̱zre Jerusalén chee̱ gudée̱' le̱' lu na' benne' xíchaje̱ ca' chee̱ bxruze ca'?

²²Saulo bchálajdxe̱' du lazre̱' chee̱ Jesús, ne dxulé'ene̱' Jesús naque̱' Cristo chee̱ Dios, na' bzua zrie̱' benne' judío ca' zaj zre̱'e̱ Damasco. Saulo dxelé̱' lu na' benne' judío ca'

²³Ca gudé zane' zra, benne' judío ca' belune̱' tuze dizra' xelútie̱' Saulo.

²⁴Gunezne̱' le̱' da nigá. Te zra ne chizrela gulebeza benne' judío ca' dxu'a dxa xu'u ca' naga dxelexedxúaj bénneache xe̱zre na', chee̱ xelútie̱' le̱'.

²⁵Nadxa benne' ca' dxeléajle̱'e̱ chee̱ Jesús gulegú'e̱ Saulo tu lu xcuite lba zren, na' buluxulétaje̱' le̱' chizrela le̱'e̱ ze'e da naxechaj na xe̱zre. Ca' guca, gulá Saulo. Saulo dxezrine̱' Jerusalén

²⁶Gate bezrín Saulo Jerusalén, guca lazre̱' gune̱' tuze benne' ca' dxeléajle̱'e̱ chee̱ Jesús, san benne' ca' dxelezrebe̱' le̱' lawe' da quebe dxeléajle̱'e̱ ba dxéajle̱'e̱ Saulo chee̱ Jesús.

²⁷Bernabé guché̱'e̱ Saulo, ne bze̱' le̱' lau benne' gubáz ca' chee̱ Jesús. Na' bchálajle̱ Bernabé gubáz ca' ca ble'e Saulo Xránadxu la neza, ne ca be̱n Xránadxu bchálajle̱ne̱' Saulo, ne ca bchalaj Saulo du lazre̱' lu xe̱zre Damasco nen xel-la' dxenná bea chee̱ La Jesús.

²⁸Nadxa Saulo begá'ane̱' Jerusalén, dxedále̱ne̱' benne' ca'.

²⁹Bchalaj Saulo du lazre̱' lu La Xránadxu, dxuchálajle̱ne̱' benne' ca' dxelenné̱' dizra' griego, san benne' caní gulaca lazre̱' xelútie̱' le̱'.

³⁰Gate guleque be'e biche ljwézredxu da caní, na' guleché̱'e̱ Saulo lu xe̱zre Cesarea, na' lu xe̱zre na' gulesel-le̱' le̱' xe̱zre Tarso.

³¹Nadxa benne' ca' dxelezrague̱' lu La Jesús tu tu xe̱zre zaj nababa Judea, ne Galilea, ne Samaria, gulebeza zri lazre̱', ne beledipa lazre̱'. Xel-la' dxelezrebe gulaque̱' Xránadxu tuze, na' lawe' da gúcale̱ Be' Lá'azxa le̱', gulane̱'. Pedro dxexune̱' Eneas

³²Gate dxedá Pedro dxeajnné̱'e̱ biche ljwézredxu ca', na' guxíajqueze̱' xeajnné̱'e̱ benne' ca' dxeléajle̱'e̱ chee̱ Jesús lu xe̱zre Lida.

³³Na' bezrague̱' tu benne' le̱' Eneas, bache guca xrunu' iza de̱' lu da'a lawe' da naque̱' benne' zrinnaj.

³⁴Na' gunná Pedro, dxe̱'e̱ le̱': ―Eneas, Jesucristo ba bexune̱' lue'. Bexasa, ne butube da'a chiu'. Na' bexásate̱ Eneas na'.

³⁵Belelé'e xúgute̱ benne' le̱', benne' zaj zre̱'e̱ xe̱zre Lida, ne xe̱zre Sarón, na' belexaque̱' chee̱ Xránadxu. Dorcas dxexebane̱' ládujla benne' gate

³⁶Lu zra na' zua tu nu'ula le̱' Tabita lu xe̱zre Jope. Dxéajle̱'e̱ chee̱ Jesús. Lu dizra' griego le̱' Dorcas. Nu'ula nigá dxúnqueze̱' da xrlátaje, ne dxácale̱ne̱' benne' xache' ca'.

³⁷Lu zra ca' guxú'u Dorcas xel-la' we̱', na' gutie̱'. Na' bulugazje̱' le̱', ne belexrue̱' le̱' tu lu xu'u naga zua gudxupe' cuía dxala.

³⁸Xe̱zre Jope na' zua na gagu naga zua xe̱zre Lida naga zua Pedro, na' lawe' da zaj neze benne' Jope ca' zue̱' na', na' gulesel-le̱' chupa benne' biu cheajlegue̱zre̱' le̱': ―Gudázega xe̱zre Jope.

³⁹Nadxa Pedro guxíajle̱ne̱' benne' ca'. Gate bzrine̱' na', na' beleché̱'e̱ le̱' naga zrua Dorcas na', na' xúgute̱ nu'ula ca' ba zaj nate benne' chie̱' zaj naxéchaje̱' Pedro dxelebezre̱', ne dxululé'ene̱' le̱' zra nu'ula, ne zra benne' biu, da ca' be̱n Dorcas na' gate ne zue̱' nen benne' ca'.

⁴⁰Nadxa guleaj Pedro xúgute̱ benne' ca', na' bzu zribe̱' bchálajle̱ne̱' Dios. Na' gunné̱'e̱ nu'ula gate na', gunné̱': ―Tabita, bexasa. Nadxa nu'ula na' bexá' lawe̱', na' gate blé'ene̱' Pedro, bexase̱' gudxé'e̱.

⁴¹Na' Pedro bequé̱'e̱ ne̱'e̱, bechise̱' le̱'. Nadxa gunné̱' biche ljwézredxu ca', ne nu'ula ca' ba gute benne' biu chee̱', na' blé'ene̱' benne' ca' le̱' naca bane̱'.

⁴²Ca guca da nigá belén ca naca benne' zaj zre̱'e̱ xe̱zre Jope, na' benne' zan guléajle̱'e̱ chee̱ Xránadxu.

⁴³Pedro begá'ane̱' zane' zra lu xe̱zre na' lizre Simón, tu benne' dxucá'ana chawe' xide zra be̱ xixre'.