Read Tabaa Zapotec 2 Corintios 11 Bible Online

2 Corintios 11 - Tabaa Zapotec bible

2 Corintios 11

¹Le guchaga lau neda' chee̱ nnia' late' da ca zeaje na. Ájate̱ze naca na, le guchaga lau neda',

²lawe' da dxé'le̱'a gunne xue chee̱le le'e lu da nusebaga Dios neda', ne lawe' da ba nache̱be lazra' chee̱le gácale zru'ula Cristo, dxaca lazra' gudéa' le'e lau Le̱' ca tu nu'ula cuíde'dau' du lazre' súale̱be' benne' chee̱be'.

³Ca be̱n be̱la' gula na' guzí xe̱ba' Eva nen xel-la neze chee̱ba', dxezreba' güele lataj nu si xe̱ le'e, na' cuásale lu xichaj lázrdaule chee̱ québedxa gácale du lázrele chee̱ Cristo.

⁴Le'e dxuchaga laule benne' ca' zá'aque̱' dxuluchálaje̱' chee̱ tu Jesús, benne' nazrá' ca Bénnea' bzénentu' le'e chee̱ Le̱', ne du lázrele dxezí' lu na'le tu be' da nazrá' ca Be' na' da ba guzí' lu na'le, ne dxezí' lu na'le tu dizra' da nazrá' ca naca dizra' chawe' da ba guzí' lu na'le.

⁵Dxéqueda' quebe zaca' neda' látezdxa ca benne' gubáz zren ca', benne' ca' zéajle̱le le'e.

⁶Láqueze quebe gaca guchálaja' xrtándau', dxéajni'ida' da na' dxuchálaja' chee̱ na, na' blé'entu' caní naca na lu xúgute̱ da ba be̱ntu'.

⁷¿Be̱na' tu da cale̱la gate bzenda' le'e dizra' chawe' chee̱ Cristo, ne quebe bi bchízruja' le'e, na' be̱n cuina' dxexruj lazre' chee̱ xegá'ana szrenle le'e?

⁸Guca na ca gudawa' dumí chee̱ xezícadxa cue' bi chee̱ Cristo gate guzi'a da belunne̱' neda' chee̱ be̱na' zrin ga zúale le'e.

⁹Gate na' guzúale̱na' le'e, ne bxázrjeda', quebe bi guzí' lu na'a da naca chee̱le, san bi bíchedxu zá'aque̱' xe̱zr la xu Macedonia belunne̱' neda' ca da guchínneda'. Be̱na' ba xuzre quebe bi gunábeda' le'e, na' cá'anqueze guna'.

¹⁰Lawe' da núnbe'a da li chee̱ Cristo, quebe zua nu benne' naga nababa xe̱zr la xu Acaya gaca guzague̱' neda' chee̱ québedxa gucá'ana szren cuina' chee̱ da nigá dxuna'.

¹¹¿Bizr chee̱ na' dxennía' caní? ¿Naca na lawe' da quebe nazrí'ida' le'e? Nézqueze Dios nazrí'ida' le'e.

¹²Gúnqueza' ca dxuna' chee̱ quebe gata' lataj chee̱ benne' ca' dxelaca lazre̱' xulucá'ana szren cuine̱' lawe' da dxeléquene̱' dxelune̱' zrin cáte̱ze dxuntu' netu'.

¹³Benne' caní zaj naque̱' gubáz quebe nasel-la Cristo. Dxelezí xe̱'e̱ bénneache, ne dxululé'e cuine̱' ca gubáz chee̱ Cristo.

¹⁴Quebe naca da nigá da xebánedxu lawe' da Satanásqueze dxulé'e cuina na ca tu gubáz chee̱ xabáa zue̱' lu xel-la naxaní' chee̱ Dios,

¹⁵na' chee̱ le̱ na' dxululé'e cuine̱' ca benne' dxelún da xrlátaje. Benne' caní xelebía xi'e̱ ca ba naca chee̱ benne' dxelún da caní. Da guzaca Pablo lawe' da naque̱' gubáz chee̱ Cristo

¹⁶Xecha lasa dxapa' le'e, quebe nu benne' dxal-la' guéquene̱' nadá xichaj lázrdawa'. Che ca'an dxéquele le'e, le gunna neda' lataj guchálajle̱na' le'e ca tu benne' nadá xichaj lázrdawe̱', chee̱ gaca gucá'ana szren cuina'.

¹⁷Quebe dxapa' le'e da nigá lu xel-la dxenná bea chee̱ Xránadxu. Guchálaja' ca tu benne' nadá xichaj lázrdawe̱', nnia' tu da gucá'ana szren cuina'.

¹⁸Lawe' da zaj zra' benne' zante̱ dxulucá'ana szren cuine̱' lu da zaj naque̱' chee̱ xe̱zr la xu nigá, cá'anqueze neda' gucá'ana szren cuina'.

¹⁹Lawe' da nácale̱'e̱le benne' sina dxuchaga laule du lázrele benne' zaj nadá xichaj lázrdawe̱'.

²⁰Dxuchaga laule benne' ca' dxelexune̱' le'e ca benne' zaj nada'u, ne benne' ca' dxuluchínene̱' le'e, ne benne' ca' dxelenná bé'ene̱' le'e, ne benne' ca' dxuluzúe̱' le'e chalá'ala, ne benne' ca' dxelegape̱' xraga laule.

²¹Láqueze dxedué'eda' dxennía' da nigá, quebe guca' benne' dxechugu lazre' chee̱ guna' ca dxelún xezícadxa benne'. Na'a gaca' lazre' dxugu guna' caní.Ba dxelechugu lazre' benne' xezícadxa dxulucá'ana szren cuine̱'.Cá'anqueze neda' xechugu lazra' guna' na, láqueze naca tu da ca zeaje da dxennía'.

²²¿Zaj naque̱' benne' hebreo?Cá'anqueze neda' naca' benne' hebreo.¿Zaj naque̱' benne' Israel? Cá'anqueze neda'.¿Zaj naque̱' zri'ine zre sua Abraham? Cá'anqueze naca' neda'.

²³¿Zaj naque̱' we̱n zrin chee̱ Cristo?Nácadxa' neda' we̱n zrin chee̱' ca benne' ca',lácala dxuchálaja' ca tu benne' nadá xichaj lázrdawe̱' gate dxennía' da nigá.Ba be̱ndxa' zrin ca benne' ca'.Ba buluzálajdxa bénneache neda' ca nu bzálaj benne' ca'.Ba gulegu'udxa bénneache neda' lizre xia ca belune̱' chee̱ benne' ca',na' zane' lásate̱ ba guzúa' lu da ste̱be chee̱ xel-la gute.

²⁴Gazxu' lasa ba belúe benne' judío ca' neda' xide che̱nnu dxua weaj.

²⁵Chunna lasa beline̱' neda' xaga. Tu lasa belú'e̱ neda' xiaj.Chunna lasa guxaze da dxedá lawe' nísadau' da xu'a lu nisa.Tu lasa, tu zra tu xe̱la guxu'a lu nísadau'.

²⁶Zane' lásate̱ guxu'a neza, ne guzúa' lu da ste̱be:Chee̱ xe̱gu ca', ne chee̱ gubán ca'.Chee̱ benne' walázr chia' ca', ne chee̱ benne' zitu' ca'.Guzúa' lu da ste̱be lu xe̱zre, ne le̱'e̱ xixre', ne lu nísadau',ne ládujla benne' we̱n lazre' dxelenné̱' zaj naque̱' bi bíchedxu.

²⁷Be̱nle̱'a zrin, ne guzúa' lu da zi' da xa'.Zane' lásate̱ quebe gusia' dxe̱la.Gudúnle̱'a, ne gubílele̱'e̱da', na' zane' lásate̱ be̱na' gubasa.Catite̱ bexaga', ne bexázrjeda' zra lana' gacua'.

²⁸Da zrendxa ca da caní, ne xezícadxa da guzraca'.Xúgute̱ zra dxéqueda' zi' lawe' da zua' gunne xue chee̱ xúgute̱ cue' bi chee̱ Cristo.

²⁹Che nu benne' nate ni'a ne̱'e̱ lu xel-la dxeajlí lazre' chee̱',cá'anqueze neda' dxéqueda' nate ni'a ná'aqueza'.Che nu benne' dxelune̱' dxeajchaze̱', néda'queze dxaca' tul-la.

³⁰Che dxun na ba xen gucá'ana szren cuina',gucá'ana szren cuina' chee̱ da ca' dxululé'e na nate ni'a na'a.

³¹Dios, Xra Xránadxu Jesucristo, Bénnea' naca chee̱' güe lá'anatequezdxu Le̱', nézene̱' dxennía' da li.

³²Gate guzúa' xe̱zre Damasco, benne' wnná bea na' dxune' zrin chee̱ wenná bea Aretas bzre̱'e̱ benne' dxuluxúe̱' dxa xu'u chee̱ xe̱zre na', chee̱ xele̱l-le̱' neda'.

³³Na' bi bíchedxu ca' bululetje̱' neda' tu lu xcuite xia ga dxu'u lení' chee̱ xu'u lu ze'e da naxechaj na xe̱zre na'. Ca' guca na, gulá' lu na' benne' ca'.