Read Tabaa Zapotec Gálatas 5 Bible Online

Gálatas 5 - Tabaa Zapotec bible

Gálatas 5

¹Cristo bselé̱' dxi'u lu na' da nadxixruj bea na chee̱ gácadxu ca benne' quebe zaj nada'u. Le sua chuchu lu xel-la weselá da ba guzile, ne québedxa xexú'ule lu na' da na' dxun na le'e benne' zaj nada'u.

²Le xene da dxapa' le'e. Neda', Pablo, dxapa' le'e, che güele lataj chugu lu be̱la' chee̱le da na' dxulé'e na, quebe bi da ba neza gaca chee̱le da naca chee̱ Cristo.

³Dxaca lazra' xapa' le'e xecha lasa, che nu benne' chugu lu be̱la' chee̱' da na' dxulé'e na, dxun na ba xen gun bénnea' xúgute̱ da bdxixruj be'e Moisés.

⁴Le'e na' dxéquele nagá'anale xrlátaje lau Dios lawe' da nunle ca nadxixruj bea na, ba bcá'anale da naca chee̱ Cristo, ne dxexebéaj cuínale lu xel-la zri'i lazre' chee̱ Dios.

⁵Dxi'u, ne̱ chee̱ Be' Lá'azxa, ne lawe' da dxeajlí lázredxu Cristo, dxuxrén lázredxu nagá'anadxu xrlátaje lau Dios.

⁶Che nácadxu tuze nen Cristo, quebe bi da ba neza gaca na chee̱dxu che chugu lu be̱la' chee̱dxu da na' dxulé'e na, u che quebe chugu na. Da ba neza naca na chee̱dxu che dxeajlí lázredxu Cristo, na' xel-la dxeajlí lazre' chee̱dxu dxuzúa na dxi'u lu xel-la zri'i lazre'.

⁷Da xrlátaje bé̱nquezle. ¿Nuzra gulú'u xel-la le'e chee̱ québedxa guzúale dizra' da li?

⁸Quegá Dios be̱ne̱' da na'. Nácaqueze Le̱' Bénnea' bláwizre̱' le'e.

⁹Quebe gal-la lázrele da dxenná na: Láteze cua zichaj dxuchazra na ca naca cua.

¹⁰Dxuxrén lazra' Xránadxu ca naca chee̱le le'e, quebe guzúale chalá'ala da nigá dxuchálaja'. Dios gudée̱' lu da ba xa' bénnea' dxun zréajene̱' le'e, nútete̱ze naque̱'.

¹¹Da naca chia', bi bicha', la xapa' neda' bénneache dxal-la' chugu lu be̱la' chee̱' da na' dxulé'e na, quegá weláu zi' xuzre benne' judío neda' lawe' da che dxuna' da caní quebe xelaque̱' tula che cu'a lban chee̱ xaga béguaj chee̱ Cristo.

¹²Na'a ca naca chee̱ benne' ca', benne' dxelún zréajene̱' le'e, ne dxelenné̱' dxal-la' chugu lu be̱la' chee̱le da na' dxulé'e na, dxaca lazra' chugu ca da zaj naca benne' ca' chee̱ québedxa xelún zréajene̱' le'e.

¹³Bi bícha'dau', Dios bláwizre̱' le'e chee̱ gácale benne' quebe zaj nada'u, ne québedxa xu'ule lu na' da bdxixruj be'e Moisés. Quebe guchínele da nácale chee̱ gunle ca da dxezá lázrele. Le gun cuínale ca benne' zaj nada'u, chee̱ gunle zrin chee̱ le sa' ljwézrele tule xetule lu xel-la zri'i lazre' chee̱le.

¹⁴Xúgute̱ da nadxixruj bea na dxun bénnea' dxuzúe̱' dizra' da na' dxenná na: Bzri'i le sa' ljwezru' cáte̱ze nazrí'i cuinu'.

¹⁵Che dxunle ca dxelún be̱ xixre' ca', ne dxun zi' ljwézrele, ne dxasa ljwézrele tule xetule, le guxúe ga guzría xi' cuínale. Da dxundxu cáte̱ze dxezá lazre' be̱la' dxen chee̱dxu, ne da dxundxu cáte̱ze dxezá lazre' Be' Lá'azxa

¹⁶Da nigá dxapa' le'e: Le gun cáte̱ze dxulé'e Be' Lá'azxa le'e, na' quebe gunle cáte̱ze dxezá lazre' be̱la' dxen chee̱le.

¹⁷Da dxezá lazre' be̱la' dxen chee̱dxu dxedíl-lale̱ na da dxezá lazre' Be' Lá'azxa, na' da dxezá lazre' Be' Lá'azxa dxedíl-lale̱ na da dxezá lazre' be̱la' dxen chee̱dxu. Dxúpate̱ da caní dxeledíl-lale̱ ljwezre na, na' chee̱ le̱ na' quebe gaca gunle da dxaca lázrele gunle.

¹⁸Che dxunle ca da dxulé'e Be' Lá'azxa le'e, québedxa xu'ule lu na' da nadxixruj bea na.

¹⁹Zaj nulé'e láuqueze da dxelún benne' ca' dxelune̱' cáte̱ze da dxezá lazre' be̱la' dxen chee̱':Deledále̱ne̱' nu'ula xula.Dulucá'ana dítaje̱' le sa' ljwezre̱'Dxelune̱' da sban, ne da schanni'.

²⁰Dxelúe szrene̱' bedau' xiaj xaga, ne dxelune̱' xel-la wazrá'.Dxelecuídene̱' le sa' ljwezre̱', ne dxelezré̱'e̱.Dxelaque̱' wide', ne dxelezrá'a xíchaje̱'.Dxelenné̱' chee̱ ljwezre̱'.Dxelebéaj xichaj ljwezre̱' tue̱' xetue̱', ne dxelaque̱' chupa la'a.

²¹Dxelaque̱' xa lazre', ne dxelutie̱' benne'.Dxelezúzrene̱', ne dxeledanne̱' da cale̱la da dxelune̱' lu laní ca'. Zánete̱ da dxelundxe̱' bi chee̱ da caní. Che le̱ na' dxapa' le'e ca bé̱nqueza' nédxute̱, benne' dxelune̱' da caní quebe xelexú'e̱ naga dxenná bea Dios.

²²Da dxelún benne' ca' dxelune̱' cáte̱ze da dxulé'e Be' Lá'azxa le̱' zaj naca na caní:Zaj nazri'ine̱' le sa' ljwezre̱', ne zaj nape̱' xel-la dxebé.Dxelebeza zri lazre̱', ne zaj naque̱' zren lazre'.Zaj naque̱' zri'i lazre', ne dxelune̱' da zri'a chawe'.Zaj naque̱' li lazre'.

²³Zaj naque̱' dxexruj lazre', ne dxelenná be'e cuine̱'. Quebe de̱ da nadxixruj bea na da dxe̱ na dxi'u quebe gundxu da caní.

²⁴Benne' ca' zaj naque̱' bi chee̱ Cristo ba buludé̱'e̱ le̱'e̱ xaga béguaj be̱la' dxen chee̱' nen xúgute̱ da dxezá lazre na.

²⁵Che naca bandxu ne̱ chee̱ Be' Lá'azxa, dxal-la' gundxu ca da dxulé'e Be' Lá'azxa dxi'u.

²⁶Quebe dxal-la' gucá'ana szren cuínadxu, ne quebe gácadxu wide' tudxu xetudxu, ne quebe sua da xa lazre' ládujla dxi'u.