Read Tabaa Zapotec Efesios 4 Bible Online

Efesios 4 - Tabaa Zapotec bible

Efesios 4

¹Chee̱ le̱ na' dxata' xúeda' le'e, neda', xu'a lizre xia lawe' da dxuna' zrin chee̱ Xránadxu, chee̱ gunle da xrlátaje ca dxal-la' xelún bénneache ba gucá'a Dios le̱', ca gucá'aqueze̱' le'e.

²Le gaca dxexruj lazre', ne zri'i lazre'. Le cueza lazre', ne le cue' gunne xue chee̱ tule xetule lu xel-la zri'i lazre' chee̱le.

³Le gun ba xuzre gácaquezle tuze, guchínele xel-la waca chee̱ Be' Lá'azxa lu xel-la dxebeza zri lazre' da na' dxun na le'e tuze.

⁴Tuze naca be̱la' dxen chee̱ Cristo da nácadxu.Tuze naca Be' Lá'azxa, Nu na' zúale̱ne' tu tudxu.Tuze da dxuxrén lázredxu, da na' sidxu lu na' Dios.

⁵Tuze Bénnea' naque̱' Xránadxu.Tuze da dxeajlí lázredxu.Tuze ca dxedxúadxu nisa.

⁶Tuze Bénnea' naque̱' Dios, ne Xra xúgute̱dxu.Le̱' naque̱' Benne' xíchaje̱ xúgute̱dxu.Dxulé'e cuine̱' lu da dxundxu xúgute̱dxu.Zúaqueze̱' lu xichaj lázrdau xúgute̱dxu.

⁷Tu tudxu nasidxu tu xel-la waca cha chee̱dxu ca da nunna Cristo dxi'u.

⁸Naca na ca naxúaj na lu dizra' lá'azxa, dxenná na:Begüéne̱' xabáa, gate gudé bzétaje̱' benne' guledábague̱' Le̱'.Na' bnézruje̱' bénneache xel-la waca ca'.

⁹¿Bi zéaje̱ na, dxenná na: Begüene̱'? Zéaje̱ na nédxula bétaje̱' lu xe̱zr la xu nigá.

¹⁰Bénnea' bétaje̱' nácaqueze̱' Bénnea' begüéne̱' lu da blaudxa lu xabáa chee̱ gaca bea na xu'u lu ne̱'e̱ xúgute̱ da de̱,

¹¹na' be̱nne̱' cha chee̱dxu xel-la waca chee̱:Gaca bál-ladxu benne' gubáz chee̱'.Gaca guzendxu xezícadxu bénneache dizra' chawe' chee̱'.Gácadxu xezícadxu benne' dxuxúedxu bi chee̱' ca'.Na' gusé̱dedxu-be' xezícadxu.

¹²Ca'an be̱ne̱' chee̱ bpa'adxe̱' bi chee̱' ca' chee̱ xelunbe' zrin xulucá'anabe' xrlátaje bénneache ca' zaj naque̱' zruza ni'a na' Cristo:

¹³Chee̱ gácadxu tuze ca dxéajle̱dxu,ne ca núnbeadxu Zri'ine Dios,chee̱ gácadxu benne' du lazre',chee̱ gácadxu cáte̱ze nácaqueze Cristo.

¹⁴Caní nacan chee̱ québedxa gácadxu ca bidu ca', bi ca' dxelezibe' bítete̱ze dizra' da zaj naca na ca tu be' da zeaj na nila na'la, ne québedxa güedxu lataj xelún zréaje benne' we̱n da zrinnaj ca' dxi'u, chee̱ quebe xelezí xe̱'e̱ dxi'u chee̱ gundxu da cale̱la.

¹⁵Lu xel-la zri'i lazre' dxal-la' guchálajdxu da li chee̱ gácadxu cáte̱ze nácaqueze Cristo, Bénnea' naque̱' xichaj be̱l-la' dxen da nácadxu dxi'u.

¹⁶Le̱' dxune̱' tuze xúgute̱ ni'a na' zaj zria be̱l-la' dxen chee̱' chee̱ gaca na tu be̱l-la' dxen nazá'ate̱ chee̱ na, ne chee̱ xelún zrin xúgute̱ ni'a na' ca' chee̱ gula be̱l-la' dxen na', ne gaca na chawe' lu xel-la zri'i lazre'. Xel-la nabán cube da dxunna Cristo dxi'u

¹⁷Da nigá dxapa' le'e, ne dxusebaga' le'e waláz chee̱ Xránadxu chee̱ québedxa gunle ca dxelún bénneache quebe zaj núnbe'e̱ Dios, benne' ca' dxelune̱' cáte̱ze dxeléquene̱' xrlátaje,

¹⁸benne' ca' zaj nachul-la xichaj lázrdawe̱'. Benne' caní quebe zaj nape̱' xel-la nabán li lazre' da dxunna Dios bénneache:Zaj nachul-la nanítene̱', ne zaj naca zide' lázrdawe̱'.

¹⁹Québedxa dxelexedué'ene̱'.Belezanne cuine̱' dxelune̱' da schanni'.Du lazre̱' dxelune̱' xúgute̱ da sban.

²⁰Quegá caní nazé̱dele le'e chee̱ Cristo,

²¹che da li xca' bénnele da dxuchalaj Le̱', ne nusé̱dene̱' le'e ca naca da li da zúale̱ Jesús.

²²Ca naca da be̱nle nédxula, le guzúa chalá'ala da gúcale lawe' da guzrínnajle lu da sban da guzá lázrele.

²³Dxal-la' gácale benne' cube lu xichaj lázrdaule.

²⁴Dxal-la' gunle da naca chee̱ benne' cube na' da be̱n Dios le'echee̱ gunle da naca na xlátaje̱, ne da li da naca na lá'azxa.

²⁵Chee̱ le̱ na' québedxa gun lázrele.Le nne̱ da li tule xetule lawe' da nácadxu ni'a na' tuze be̱l-la' dxen chee̱ Cristo.

²⁶Che dxezrá'ale, quebe dxal-la' gunle dul-la, ne quebe zrá'ale scha'.

²⁷Quebe güele da xriwe̱' lataj guchixre chee̱ na le'e.

²⁸Bénnea' guque̱' gubán québedxa dxal-la' cuane̱'. Dxal-la' gune̱' tu zrin chawe' nen ni'a ná'queze̱' chee̱ gape̱' da gunézruje̱' benne' dxelexázrjene̱'.

²⁹Quebe nne̱le dizra' cale̱la. Le guchalaj da naca na xrlátaje chee̱ xelezé̱ tipa benne' xelenne̱', ne xelezí'e̱ na ba neza.

³⁰Quebe guzúa xáchele Be' Lá'azxa chee̱ Dios, lawe' da zúale̱ Be' le'e chee̱ gaca bea na nácale bi chee̱ Dios ca zrindxa zra xezí' lu ne̱'e̱ dxi'u.

³¹Le guzúa chalá'ala:Xel-la dxecuide', ne xel-la dxezrá'a, ne xel-la xichaj zra'a,ne xel-la wetil-la dizra', ne xel-la wechacha, ne xúgute̱ da zrinnaj.

³²Dxal-la' gácale du lazre', ne xache lázrele tule xetule,ne gunite laule chee̱ tule xetule ca be̱n Dios,bnite lawe̱' chee̱le le'e lawe' da nácale bi chee̱ Cristo.