Read Tabaa Zapotec 2 Tesalonicenses 1 Bible Online

2 Tesalonicenses 1 - Tabaa Zapotec bible

2 Tesalonicenses 1

¹Neda', Pablo, nen Silvano, ne Timoteo, dxugápantu' le'e diuzre. Dxuzúaja' da nigá chee̱le le'e, bi bícha'dau', nazrágale chee̱ Cristo lu xe̱zre Tesalónica, ne nácale bi chee̱ Xradxu Dios, ne chee̱ Xránadxu Jesucristo.

²Dxenaba' lau Xradxu Dios, ne lau Xránadxu Jesucristo gune̱' chee̱le da chawe', ne gunne̱' le'e xel-la dxebeza zri lazre'. Dios guchi'e̱ da belún benne' dul-la ca' gate xelá' Cristo

³Le'e, bi bícha'dau', dxal-la' xé̱quezentu' Dios: Xcalenu' ca naca chee̱le, da dxal-la' guntu' lawe' da ba dxegula xel-la dxeajlí lazre' chee̱le, ne ba zúadxa xel-la nazrí'i lazre' le̱n ljwézrele tule xetule.

⁴Chee̱ le̱ na' dxuchálajntu' ca naca chee̱le le'e láwela bi ca' chee̱ Cristo. Dxuchálajntu' ca dxuchaga laule da dxelún benne' ca' zaj nau zi' xuzre̱' le'e, ne ca naca xel-la zi' da dxedele, san nácale zren lazre', ne dxeajlí lázrele Dios.

⁵Da nigá dxulé'e na xlátaje̱ naca Dios ca dxuchi'e̱ da dxelún bénneache, dxenné̱' naca chee̱le chu'ule naga dxenná bea Le̱' lawe' da dxedele xel-la zi' chee̱ la' xel-la dxenná bea chee̱'.

⁶Xlátaje̱ naca gudé Dios benne' ca' xel-la zi', benne' ca' dxuludée̱' le'e xel-la zi' na'a,

⁷na' guzúe̱' le'e naga xezí' lázrele chee̱ xel-la zi' da dxedele na'a. Xezí lázrele tu zren nen netu' gate xelá' Xránadxu Jesús, ze̱'e̱ xabáa nen gubáz blau ca' chee̱ xabáa chee̱'.

⁸Ze̱'e̱ nu'e̱ xi' chee̱ gudée̱' lu da ba xa' benne' ca' quebe dxelexúnbe'e̱ Dios, ne quebe dxuluzúe̱' dizra' ca dxenná dizra' chawe' chee̱ Xránadxu Jesucristo.

⁹Benne' caní xelecuase̱' naga zua Xránadxu lu xel-la szren chee̱', ne xel-la dxenná bea chee̱', na' xeledée̱' xel-la zi' chee̱ da ba xa' chadía chacanna.

¹⁰Caní gaca gate xelá' Xránadxu lu zra na' chee̱ xulucá'ana szren benne' chee̱' ca' Le̱', na' benne' ca' dxeajlí lazre̱' Le̱' xelape̱' Le̱' ba lá'ana. Le'e gunle benne' ca' tu zren lawe' da guxéajle̱le chee̱ da beché̱bentu'.

¹¹Chee̱ le̱ na' tu dxuchálajle̱quezentu' Dios ca naca chee̱le, ne dxenábantu' Le̱' gaca chee̱le sile da na' bláwizre̱' le'e sile. Cá'anqueze dxenábantu' lau Dios guchínene̱' xel-la waca chee̱' chee̱ gaca gunle ca naca xúgute̱ da xrlátaje da dxezá lázrele, ne xúgute̱ zrin dxunle ne̱ chee̱ xel-la dxeajlí lazre' chee̱le.

¹²Caní gunle, gucá'ana szrenle La Xránadxu Jesucristo, na' Le̱' gape̱' le'e ba lá'ana ne̱ chee̱ xel-la xrlátaje chee̱ Dios chee̱dxu, ne chee̱ Xránadxu Jesucristo.