Read Tabaa Zapotec 1 Timoteo 2 Bible Online

1 Timoteo 2 - Tabaa Zapotec bible

1 Timoteo 2

¹Da dxundxa na ba xen dxenné̱ xúeda' lue', dxal-la' nábale lau Dios gácale̱ne̱' bénneache, ne guchálajle̱le Dios, ne gucá'ana szrenle Le̱', ne nábale Dios gunne̱' le'e da dxexázrjele, ne xe̱le Dios: Xcalenu'. Dxal-la' gunle caní, guchálajle̱le Dios da naca na chee̱ xúgute̱ bénneache.

²Cá'anqueze dxal-la' nábale Le̱' gácale̱ne̱' benne' xichje ca', benne' dxelenná be'ene̱' bénneache, ne benne' xu'u lawe' ca' chee̱ chadxu chawe', ne súadxu lu xel-la dxebeza zri lazre', ne guzúa cuínadxu lu na' Dios du lázredxu, ne gápadxu ba lá'ana bénneache.

³Da nigá naca na xrlátaje, ne da dxezaca ba lazre' Dios, weselá chee̱dxu,

⁴lawe' da dxaca lazre' Le̱' xelelá xúgute̱ bénneache, ne xelúnbe'e̱ da li.

⁵Zua tuze Dios, ne zua tuze wenaba chee̱ bénneache lau Dios, Bénnea' naque̱' Jesucristo, ne cá'anqueze be̱n cuine̱' bénneache.

⁶Jesucristo bzua cuine̱' lu xel-la gute chee̱ bexá'awe̱' xúgute̱ bénneache, na' blé'ene̱' da na' ca bzrin zra chee̱ na.

⁷Chee̱ le̱ na' bzue̱' neda' gubáz chee̱' chee̱ cu'a lban, ne gulé'eda' benne' ca' quebe zaj naque̱' judío dxal-la' xeleajlí lazre̱' Cristo, ne xelune̱' ca naca da li. Lau Cristo dxexeche̱ba', ne quebe dxun lazra'.

⁸Chee̱ le̱ na' dxaca lazra' xuluchálajle̱ xúgute̱ bénneache Dios gátete̱ze na', ne xelechisa ne̱'e̱ dute̱ xel-la li lazre' chee̱' lau Dios, ne quebe xelezré̱'e̱ ljwezre̱', ne quebe xeledíl-lale̱ne̱' ljwezre' ca'.

⁹Nu'ula ca' dxal-la' xelácue̱' da naca xlátaje̱, ne ca naca chee̱ da dxelúe lechítaje̱ cuine̱' dxal-la' gaca na xel-la dxexruj lazre', ne xel-la du lazre', ne quegá ca dxulupá'a xíchaje̱', ne quegá lechítaje̱ da naca na oro, ne quegá bga ca', ne quegá zra lane̱' da zácale̱'e̱ na.

¹⁰Dxal-la' xelune̱' da gácale̱ na bénneache, ca dxal-la' xelún nu'ula ca' ba zaj nuzúa cuine̱' lu na' Dios.

¹¹Nu'ula ca' dute̱ lu xel-la dxexruj lazre' chee̱' dxal-la' xuluzé̱ nague̱' gate nu dxuse̱de xrtizra Dios, ne quebe xelenné̱' chee̱ na.

¹²Quebe dxunna' lataj nu'ula gusé̱dene̱' benne' biu ca', ne quebe nna be'ene̱' le̱', san dxal-la' sue' zrize.

¹³Caní naca na lawe' da be̱n Dios teca Adán, na' gudé na' be̱ne̱' Eva, nu'ula chee̱ Adán na'.

¹⁴Adán, quebe guzí xe̱ da xriwe̱' le̱', san guzí xe̱ na Eva, nu'ula na', na' gudé guzí xe̱ na le̱', na' be̱ne̱' dul-la.

¹⁵Tu nu'ula gape̱' xel-la weselá che dxezane̱' bidu ca', ne cheajlí lazre̱' Dios, ne nazri'ine̱' Le̱', ne nuzúa cuine̱' lu na' Dios, ne gaque̱' dxexruj lazre'.