Read Tabaa Zapotec Tito 1 Bible Online

Tito 1 - Tabaa Zapotec bible

Tito 1

¹Neda', Pablo, naca' we̱n zrin chee̱ Dios, ne gubáz chee̱ Jesucristo chee̱ guzéajni'ida' benne' ca' ba gucá'a Dios chee̱ xeleajlí lazre̱' Cristo, ne xelúnbe'e̱ da naca li lazre' chee̱ da naca chee̱ Dios,

²ne chee̱ xelebeza lazre̱' xel-la nabán chadía chacanna, da guche̱be lazre' Dios gunne̱' chee̱dxu gate za gunte̱' xe̱zr la xu nigá. Dios quebe dxun lazre̱',

³na' na'a, ca ba bzrin zra chee̱ na, ba bzéajni'ine̱' dxi'u ca naca xrtizre̱' ne̱ chee̱ da bxrize' Dios neda' cu'a lban chee̱ na. Dios nácaqueze̱' weselá chee̱dxu.

⁴Dxuzúaja' da nigá chiu', Tito. Nacu' ca zrí'inequeza' lawe' da dxeajlí lázredxu Cristo. Dxenaba' lau Xradxu Dios, ne lau Xránadxu Jesucristo, Benne' weselá chee̱dxu, gune̱' chiu' da cháwedau', ne xexache lazre̱' lue', ne gunne̱' lue' xel-la dxebeza zri lazre'. Zrin da dxun Tito lu xe̱zr la xu Creta

⁵Bcá'ana' lue' lu xe̱zr la xu Creta da naxechaj nisa chee̱ gucá'ana chawu' da quebe begá'ana chawe' ládujla bíchedu ca', ne chee̱ gunnitu' benne' gula chee̱ xudau' tu tu xé̱zredu ca', cáte̱ze bxríseda' lue' gunu'.

⁶Tu benne' gula chee̱ xudau':Dxal-la' gaque' benne' quebe bi zua da gagu na chie̱'.Dxal-la' súale̱ne̱' tuze nu'ula.Zrí'ine̱' dxal-la' xelácabe' bi ba dxéajlí lázrebe' Cristo.Quebe bi da zrinnaj dxelún zrí'ine̱' ca',ne quebe gaca nu gagu zria chee̱ da dxelunbe'.

⁷Lawe' da xu'u lu ne̱'e̱ zrin chee̱ Dios, tu benne' dxuxúe̱' benne' zaj nababe̱' chee̱ Cristo:Dxal-la' gaque̱' benne' quebe bi zua da gagu na zria chee̱'.Quebe dxal-la' gaque̱' benne' dxucá'ana szren cuine̱'.Quebe dxal-la' gaque̱' benne' xichaj zra'a.Quebe dxal-la' gaque̱' benne' dxé'aje̱' da dxuzuzre na le̱'.Quebe dxal-la' gaque̱' benne' dxedíl-lale̱ne̱' bénneache.Quebe dxal-la' gaque̱' benne' dxucúdee̱'.

⁸Dxal-la' súate̱ze̱' si' lu ne̱'e̱ benne' zjaque̱' lizre̱'.Dxal-la' gune̱' da naca cháwedau'.Dxal-la' gaque̱' benne' nna be'e cuine̱'.Dxal-la' gaque̱' benne' xrlátaje.Dxal-la' gaque̱' benne' nuzúa cuine̱' chee̱ Dios.Dxal-la' gaque̱' benne' dxuzéajni'i cuine̱'.

⁹Dxal-la' gaque̱' benne' nuzúa cuine̱' chee̱ dizra' li. Dizra' li naca na da bse̱de nu benne' le̱' chee̱ séquene̱' gusízrene̱' benne' xubla ne̱ chee̱ da li da dxusé̱dene̱', ne chee̱ séquene̱' guzexruje̱' lazre' benne' ca' dxelenné̱' chee̱ da li na'.

¹⁰Caní dxal-la' gune̱' lawe' da zrále̱'e̱ benne' dxelenné̱' chee̱ dizra' li, benne' dxelezí xe̱'e̱ benne' xubla lu da xala da dxlenné̱'. Zane' benne' Israel dxelune̱' caní.

¹¹Dxal-la' guzúa zriu' benne' dxelune̱' da caní lawe' da dxuluxrínnaje̱' xichaj lázxdau xúgute̱ benne' zaj zra' tu tu xu'u naga dxelú'e̱ chee̱ xulusé̱dene̱' da quebe naca xrlátaje. Dxelune̱' caní chee̱ xelezí' lu ne̱'e̱ dumí. Da nigá da dxelune̱' naca na da cale̱la.

¹²Tu benne' Creta naga zu', benne' gunné̱' waláz chee̱ xudau' chee̱ benne' ca', gunné̱': “Benne' Creta zaj nácaqueze̱' we̱n lazre', ne zaj naque̱' ca be̱ snia ca', ne zaj naque̱' benne' wagu xrata', ne zrawe̱de.”

¹³Da li gunné̱'. Chee̱ le̱ na' gudíl-laqueze benne' ca' chee̱ xelaque̱' li lazre' ca dxeleajlí lazre̱' Cristo,

¹⁴ne chee̱ quebe xuluzé̱ nague̱' dizra' da dxuluzaze benne' Israel ca', ne ca naca da nadxixruj bea ca' da dxelún benne' ca' dxuluzúe̱' chalá'ala dizra' li.

¹⁵Xúgute̱ naca na xrlátaje chee̱ benne' ca' zaj naca xrlátaje xichaj lázrdawe̱', san chee̱ benne' ca' dxelune̱' da sban, ne québedxa dxeléajle̱'e̱ chee̱ Cristo, quebe bi de̱ da naca xrlátaje. Zaj nazrinnaj xichaj lázrdawe̱'.

¹⁶Benne' caní dxelenné̱' zaj núnbe'ene̱' Dios, san da dxelune̱' dxulé'e na quebe naca da li da dxelenné̱'. Zaj naque̱' benne' we̱n da sban, ne benne' we̱n da cale̱la, ne quebe xelezéquene̱' xelune̱' tu da xrlátaje.