Read Tabaa Zapotec Hebreos 1 Bible Online

Hebreos 1 - Tabaa Zapotec bible

Hebreos 1

¹Dios bchálajle̱ne̱' xra xrtáudxu ca' gate nate zane' lasa, ne zane' ca bchálaje̱' lu dxu'a benne' ca' buluchálaje̱' waláz chee̱'.

²Na'a, lu zra caní, Dios ba bchálajle̱ne̱' dxi'u lu dxu'a Zrí'inequeze̱'. Dios be̱ne̱' xe̱zr la xu nigá lu na' Zrí'ine̱' nigá, ne ba be̱ne̱' naca chee̱' xúgute̱ da ca' be̱ne̱'.

³Zri'ine Dios nigá naque̱' Benne' dxulé'ene̱' ca naca xel-la' szren chee̱ Dios, ne naque̱' ca da nácaqueze Dios, na' nuxre̱' xúgute̱ da ca' nune̱', dxuchínene̱' dizra' chee̱' da nápale̱'e̱ na xel-la' waca. Gate ba gudúe̱' dul-la da nabágadxu xeajxedxé'e̱ chalá'a xabe̱la chee̱ lataj blau chee̱ Dios xabáa. Zri'ine Dios nácadxe̱' blau ca gubáz chee̱ xabáa ca'

⁴Zri'ine Dios nácadxe̱' blau ca gubáz chee̱ xabáa ca' chee̱ Dios, ca naca La Cristo da bzua Dios, nácadxa na blau ca la gubáz chee̱ xabáa ca'.

⁵Dios cabata' guzre̱' tu gubáz chee̱ xabáa ca guzre̱' Cristo, gunné̱':Lue' nacu' Zri'ina'.Neda' nácaqueza' Xrau' na'a zra. Cá'anqueze cabata' guzre̱' tu gubáz chee̱ xabáa ca gunné̱' chee̱ Cristo:Neda' gaca' Xre̱',na' Le̱' gaque̱' Zri'ina'.

⁶Gate bzue̱' Zrí'ine̱' lu xe̱zr la xu nigá, gunné̱':Xúgute̱ gubáz chee̱ xabáa ca' xelue lá'ane̱' Le̱'.

⁷Ca naca chee̱ gubáz chee̱ xabáa ca', Dios gunné̱':Dsesel-le̱' gubáz chee̱' ca' ca tu be' da dxaca,ne dxuchínene̱' gubáz we̱n zrin chee̱' ca' ca tu xi'.

⁸Ca naca chee̱ Zrí'ine̱', gunná Dios:Lataj blau chiu' lue', Dios, zúate̱queze.Xel-la' dxenná bea chiu' naca na xlátaje̱.

⁹Nazri'inu' da xlátaje̱, ne dxezra'u da cale̱la.Chee̱ le̱ na' Dios chiu' ba bé̱nnadxe̱' Lue'xel-la dxebé ca da bnézruje̱' bi ljwezru' ca'.

¹⁰Cá'anqueze guzre̱' Le̱':Lue', Xran, nédxudaute̱ be̱nu' xe̱zr la xu.Nen xel-la' waca chiu' be̱nu' xabáa.

¹¹Da caní weledé chee̱ na, san Lue' súate̱quezu'.Xúgute̱ da caní welaca gula ca zra lana bénneache.

¹²Na' xutubu' na ca tu ladxe',ne gucha'u na ca dxun tu benne' dxuché̱'e̱ zra lane̱'.Lue' zúaquezu' chadía chacanna,na' xel-la' nabán chiu' quebe téqueze chee̱ na.

¹³Dios cabata' guzre̱' tu gubáz chee̱ xabáa ca guzre̱' Zrí'ine̱', gunné̱':Gudxe'e chalá'a xabe̱la chia',cadxa guzúa' benne' ca' dxeledábague̱' Lue' zran ni'u.

¹⁴Xúgute̱ gubáz chee̱ xabáa ca' zaj naque̱' be' ca' dxelún zrin chee̱ Dios, na' dxesel-le̱' gubáz chee̱ xabáa ca' chee̱ xelácale̱ne̱' benne' ca' dxelezi'e̱ xel-la' weselá.