Read Tabaa Zapotec Hebreos 3 Bible Online

Hebreos 3 - Tabaa Zapotec bible

Hebreos 3

¹Le'e, benne' bícha'dau', nácale bi chee̱ Dios, lawe' da nácale benne' ca' ba gunné̱ Dios, le nna' xanne' Jesucristo, Bénnea' gusel-la Dios chee̱ gaque̱' bxruze blau chee̱ da dxéajle̱dxu.

²Jesús nigá guque̱' li lazre' lau Dios, Bénnea' bzue̱' Le̱' lu zrin na' da ba be̱ne̱', ca guca Moisés, guque̱' li lazre' lu zrin na' be̱ne̱' lau benne' ca' gulaque̱' bi chee̱ Dios.

³Jesús dxal-la' sidxe̱' xel-la' ba lá'ana ca da si' Moisés, ca dxaca chee̱ benne' dxune̱' tu xu'u, dxezidxe̱' xel-la' ba lá'ana ca da dxezí' xu'u ná'queze.

⁴Tu tu xu'u naca na da be̱n benne', san Dios nune̱' xúgute̱ da zaj zua.

⁵Ca we̱n zrin chee̱ Dios guca Moisés li lazre' lu zrin na' be̱ne̱' lau benne' ca' gulaque̱' bi chee̱ Dios, na' bchálaje̱' ca naca da nne̱ Dios ca te na'.

⁶Cristo naque̱' li lazre' ca Zrí'inequeze Dios laudxu dxi'u. Nácadxu ca lizre Dios che se̱ cháchadxu lu da dxuxrén lázredxu ca zrindxa zra cheajsé̱ chee̱dxu, ne dxebéle̱'e̱dxu lu da dxebeza lázredxu. Bi ca' chee̱ Dios xelexezí' lazre̱' naga zua Dios

⁷Caní naca, naca na ca da dxenná Be' Lá'azxa lu xiche lá'azxa, dxenné̱':Na'a, che le'e dxenle ca da dxenná Dios,

⁸quebe gácale lázrdau zide' ca gulaca benne' ca' guledábague̱' Dios,na' belune̱' Dios ze̱de le̱'e̱ xixre' lawe' lataj.

⁹Belún xra xrtaule ca' neda' ze̱de chee̱ guna' ca gunnía',lácala belelé'ene̱' da be̱na' láwela chua iza.

¹⁰Chee̱ le̱ na' bzra'a xichja' benne' ca',na' gunnía': Tu dxelebéaj xíchajzqueze benne' caní neda',ne dxeledábague̱' ca naca da bdxíxruja'.

¹¹Chee̱ le̱ na' bzra'a xichja' benne' ca', ne bzua chúchua' da gucha' benne' ca',gunnía' quebe xelexú'e̱ naga xelexezí' lazre̱' naga zúaqueza' neda'.

¹²Le'e, benne' bícha'dau', le guxúe cuínale chee̱ quebe gaca lázrdau zide' netule le'e, quebe cuásale lau Dios ban lawe' da quebe dxéajle̱le chee̱ Le̱'.

¹³Le gutipa lázrele tule xetule tu zra tu zra, dxácate̱ ne zúadxu lu zra da nunna Dios dxi'u, chee̱ quebe si xe̱ dul-la netule le'e, na' gácale lázrdau zide'.

¹⁴Che se̱ cháchadxu ca zrin zra cheajsé̱ chee̱dxu ca naca da dxuxrén lázrequezdxu nédxute̱, na'a nácadxu bi chee̱ Cristo.

¹⁵Naca na ca dxenná na lu xiche lá'azxa:Na'a, che le'e dxenle ca da dxenná Dios,quebe gácale lázrdau zide' ca gulaca benne' ca' guledábague̱' Dios.

¹⁶¿Nuzra benne' ca' belenne̱' dizra' chee̱ Dios, na' ca gudé na' guledábague̱' Dios? Zaj naca xúgute̱ benne' ca' bebéaj Moisés lu xe̱zr la xu Egipto.

¹⁷¿Nuzra benne' ca' bzra'a Dios le̱' láwela chua iza? Zaj naca benne' ca' belún dul-la, na' gulátie̱' le̱'e̱ xixre' lawe' lataj.

¹⁸¿Nuzra benne' ca' bzua chuchu Dios xrtizre̱' gate guzre̱' le̱' quebe xelexú'e̱ naga xelexezí' lazre̱' naga zua Le̱'? Zaj naca benne' ca' guledábague̱' xrtizra Dios.

¹⁹Na'a dxelé'edxu quebe guca xelexú'e̱ lawe' da quebe guléajle̱'e̱ chee̱ Le̱'.