Read Tabaa Zapotec Apocalipsis 21 Bible Online

Apocalipsis 21 - Tabaa Zapotec bible

Apocalipsis 21

¹Ca gudé na' ble'eda' tu xabáa cube, ne tu xe̱zr la xu cube, lawe' da belexenite xabáa nedxu, ne xe̱zr la xu nedxu, na' québedxa de̱ nísadau'.

²Neda', Juan, ble'eda' xe̱zre lá'azxa, da naca na Jerusalén cube, dxetaj na xabáa, za na naga zua Dios. Xe̱zre na' nabeza na ca tu nu'ula wechaga na' nupá'a cuínabe' chee̱ gácabe' tuze nen benne' chee̱be'.

³Benda' chi'i tu benne' da za' xabáa, dxenné̱': ―Gunná'xque, Dios zue̱' ládujla bénneache, na' xelaque̱' xe̱zre chee̱', na' Dios súaqueze̱' nen benne' ca', ne gaque̱' Dios chee̱'.

⁴Dios tu súale̱zqueze̱' benne' ca' chee̱ québedxa xelebezre̱', na' québedxa gata' xel-la' gute, ne xel-la' gubezre, ne xel-la' dxebezre xache', ne xel-la' dxudía, lawe' da ba gudé chee̱ xúgute̱ da gulaca nédxute̱.

⁵Nadxa Dios, Bénnea' dxe'e̱ lataj blau na' gunné̱': ―Gunná'xque, neda' dxuna' cube xúgute̱ da ca'. Cá'anqueze gunné̱': ―Bzuaj dizra' caní lawe' da naca li lazre', na' waca guxrén lázrele le̱ na.

⁶Gudé na' guzre̱' neda': ―Ba be̱na' xúgute̱ da ba gunnía' guna'. Neda' naca' Benne' zúaqueze̱' nédxudaute̱, ne Benne' zúaqueze̱' bzé̱bedxa. Naca' Bénnea' dxuna' su lau sua xúgute̱, ne dxuna' xexuzre na. Nu benne' dxebílene̱', neda' gunézruja' nisa beaj xí'aje̱' da gunezruj na le̱' xel-la' nabán, ne quebe bi quízruje̱'.

⁷Nu benne' zrue'ene̱' si'e̱ xúgute̱ da caní, neda' gaca' Dios chee̱', na' le̱' gaque̱' zri'ina'.

⁸Benne' ca' zaj naque̱' zra' chebe, ne benne' ca' quebe dxeléajle̱'e̱ chia', ne benne' ca' dxelune̱' da zrinnaj, ne benne' ca' dxelutie̱' benne', ne benne' dxelune̱' da sban, ne benne' wazrá' ca', ne benne' dxulucá'ana szrene̱' bedau' xiaj xaga ca', ne xúgute̱ benne' dxelún lazre̱', gudéa' le̱' lu xi' chee̱ da dxuzézrele̱'e na da dxe' ca nísadau', da naca na da zi' da xa' da zeajlí canna. Jerusalén cube

⁹Nadxa bla' tu gubáz chee̱ gazre gubáz chee̱ xabáa ca' belúxrue̱' gazre xé'ena bzri ca' naga zaj xu'u da gazre da ba xa' bze̱be ca', na' guzre̱' neda': ―Gudá. Gulé'eda' lue' nu'ula wechaga na', zru'ula Bénnea' naque̱' Zríla'dau'.

¹⁰Lu da ble'e Be' Lá'azxa neda', gubáz chee̱ xabáa na' guché̱'e̱ neda' tu xi'a zren, ne sibe, na' blé'ene̱' neda' ca naca xe̱zre lá'azxa zren na', Jerusalén cube. Dxetaj na xabáa naga zua Dios.

¹¹Xe̱zre nigá dxácatite na nen da xabáa chee̱ Dios, na' xel-la' dxácatite chee̱ na naca na ca dxácatite tu xiaj xrtante̱, ca tu xiaj jaspe, da naca na ca xiaj esa' xrtante̱.

¹²Dxu'a xe̱zre na' naxechaj na tu ze'e sibe, na' napa na chazrinnu dxa xu'u, na' tu tu dxa xu'u ca' zaj ze̱ tu weaj gubáz chee̱ xabáa, na' le̱'e̱ dxa xu'u ca' zaj naxúaj la chazrinnu cue' benne' Israel.

¹³Zaj zua chunna dxa xu'u weaj dapa sácate̱.

¹⁴Lu lane ze'e da naxechaj na xe̱zre na' zaj zra' chazrinnu xiaj, na' zaj naxúaj lu xiaj ca' la chazrinnu benne' gubáz chee̱ Bénnea' naque̱' Zríla'dau'.

¹⁵Gubáz chee̱ xabáa na' dxuchálajle̱ne̱' neda' nuxre̱' tu da naca na ca tu xia xtila da naca na oro chee̱ gudxixre̱' xe̱zre na', ne dxa xu'u chee̱ na ca', ne ze'e da naxechaj na.

¹⁶Xe̱zre na' naca na lé̱bete̱ dapa saca. Lé̱bete̱ naca na xel-la' tunna, ne xel-la' laga chee̱ na. Gubáz na' bdxixre̱' xe̱zre na' nen da nuxre̱', na' naca na laga catite̱ sadxu tapa gaxúa zra, na' xel-la' laga, ne xel-la' tunna, ne xel-la' sibe chee̱ na zaj naca na lé̱bete̱.

¹⁷Gudé na' bdxixre̱' xel-la' sibe chee̱ ze'e na' naxechaj na. Naca na tu gaxúa tape xun zrita, na' chazrita chee̱ gubáz chee̱ xabáa na' naca na lé̱bete̱ ca chee̱ bénneache.

¹⁸Ze'e na' da naxechaj na xe̱zre na' naca na xiaj jaspe, na' xe̱zre na' naca na oro du lazre', da naca na ca xiaj esa' du lazre'.

¹⁹Xiaj lane ze'e na' zaj naca na xiaj xrtante̱ ca':Xiaj nedxu naca na xiaj jaspe,na' xiaj gudxupe' naca na xiaj zafiro,na' xiaj guxunne' naca na xiaj ágata,na' xiaj gudape' naca na xiaj esmeralda,

²⁰na' xiaj gázxue naca na xiaj ónice,na' xiaj xrupe naca na xiaj cornalina,na' xiaj gazre naca na xiaj crisólito,na' xiaj xrunu' naca na xiaj berilo,na' xiaj ga naca na xiaj topacio,na' xiaj chi naca na xiaj crisoprasa,na' xiaj chinéaj naca na xiaj jacinto,na' xiaj chazrinnu naca na xiaj amatista.

²¹Chazrinnu da dxusezxuj na dxa xu'u ca' zaj naca na chazrinnu bga ca'. Tu tu na naca na tuze bga. Neza blau chee̱ xe̱zre na' naca na oro du lazre', ca xiaj esa' du lazre'.

²²Quebe ble'eda' netú xudau' xe̱zre na', lawe' da Xránadxu Dios, Bénnea' nape̱' dute̱ xel-la' dxenná bea, nácaqueze̱' xudau' chee̱ xe̱zre na', ne cá'anqueze naca Bénnea' naque̱' Zríla'dau'.

²³Xe̱zre na' quebe nachine na gusení' gubizra na', ne beu', lawe' da dxusení'queze da xabáa chee̱ Dios ga na', na' Bénnea' naque̱' Zríla'dau' naque̱' xel-la' naxaní' chee̱ na.

²⁴Bénneache chee̱ xúgute̱ cue' xe̱zr la xu, bénneache gulelé̱', xeledé̱' lu xel-la' naxaní' chee̱ xe̱zre na', na' benne' wenná bea ca' chee̱ xe̱zr la xu xelu'e̱ da gunni'a chee̱' lu xe̱zre na'.

²⁵Dxa xu'u chee̱ xe̱zre na' quebe xelezxuj na te zra, na' québedxa gata' chizrela.

²⁶Xelu'e̱ xel-la' szren, ne xel-la' ba lá'ana chee̱ xúgute̱ cue' xe̱zr la xu lu xe̱zre na'.

²⁷Cabata' chu'u da sban ga na', ne netú benne' dxune̱' da zrinnaj, ne netú benne' dxun lazre'. Xelú'uze benne' ca' zaj naxúaj le̱' lu xiche chee̱ xel-la' nabán da napa Bénnea' naque̱' Zríla'dau'.