Read Tacana Mateo 4 Bible Online

Mateo 4 - Tacana bible

Mateo 4

¹Da su beju Espíritu Santo ja Jesús d'anita yahua su dusutana Ishahua ja papirubata puji.

²Dapia d'anita yahua su Jesús dhemanuana, pushi tunca tsine diadiaji mahue putsu.

³Da su Ishahua ja tueda nariatana tu epiruba puji. Tuahueda Jesús uja atana: —Ahua mida Diusu sa ene quita ebacua su, cuatsasiaque ye tumu cuana ai dia taji cuana su patsapiati.

⁴Da su Jesús ja uja Ishahua jeutsutana: —Aimue daja yama ya mahue. Uja derejiji yani: “Aimue cristiano cuana ai dia taji cuana neje bahui eid'e yanita mahue. Pamapa Diusu sa mimi neje di eid'e yanita huecuana.”

⁵Da su Ishahua ja Jesús Jerusalén ejude sa templo matina du dusutana.

⁶Dapia Jesús uja atana: —Ahua mida Diusu sa ene quita Ebacua su, tenaque yahua su u jenetia, uja derejiji yani putsu:Diusu ja ángel cuana ecuatsasiata mi painatsihuata huecuana puji.Tuna sa eme neje mi einatsuta huecuana mique ehuatsi tumu su edhapujuti mahue puji.

⁷Da su Jesús ja Ishahua uja jeutsutana: —Aimue yama daja ya mahue. Daja huecha uja derejiji yani: “Be abaji mique Diusu.”

⁸Da su Ishahua ja Jesús dusutana emata bauda matina su. Da jenetia pamapa ye mundo sa ejude aida cuana Jesús bametana.

⁹Uja Ishahua ja atana: —Ahua mida ema butse su, tururu putsu, ema emitsutsua su, yama mi pamapa ye ejude aida cuana etiape miada ecuatsasia puji.

¹⁰Da su Jesús ja Ishahua uja jeutsutana: —Netideraque ema naja jenetia, Ishahua. Daja huecha derejiji yani: “Mique Diusu bahui mitsutsua taji. Tueda bahui mique mebaja taji.”

¹¹Da su beju Ishahua netiderana Jesús peje jenetia. Netiderana su, ángel cuana Jesús peje su cuinatana tu emebaja puji. Jesús da Galilea yahua su quisaquisa pupiruana

¹²Beju Juan Bautista terijiji yani Jesús bahue puana su, Galilea yahua su putiana.

¹³Nazaret ejude su cuinati putsu, jaitianana Capernaum ejude su dapia yaniti puji. Tueda ejude da bai maje su anina. Tueda ejude da Zabulón, Neftalí yahua detse naja su anina.

¹⁴Beju tueda ai cuana puana, cuaja Isaías chenu ja biahua tiempo deretaidha batame. Uja deretaidha:

¹⁵Zabulón yahua su aniji cuana ja hueda jubida batana.Daja huecha Neftalí yahua su aniji cuana ja batana.Tueda yahua detse da Galilea yahua, Jordán ena chu maje yani.Dapia dueji judío mahue cuana yani.

¹⁶Tuneda apuda su yani biame, beju hueda jubida batana huecuana.Manu su hue yanita huecuana biame, beju Diusu sa hueda tuna peje su cuinana.

¹⁷Da tsine jenetia da Jesús quisaquisa pupiruana uja: —Mepibaturucatique, Diusu ecuatsasiati beju enariatiani putsu. Jesús ja pushi esia puji cuana dharetana

¹⁸Jesús ja Galilea bai maje je epuhu je, beta deja detse batana. Piada Simón Pedro banime. Pia Andrés banime. Tuatseda edue tatse puina. Esia puji putsu, tarrafa siatasaina tse bai su.

¹⁹Jesús ja uja atana tse: —Metseda se cuana jemi bahue. Ema tije meaque. Jiahue jenetia yama metseda cristiano cuana ema peje su duseji yame.

²⁰Da hora su hue tarrafa cuana ichajusiatana tse Jesús ebuque puji. Beju putiana tse Jesús neje.

²¹Chuadera pad'i puti putsu, Jesús ja pia beta deja detse batana. Piada Jacobo banime. Pia Juan banime. Tuatseda edue tatse puina. Tuatse sa tata Zebedeo banime. Canoa aida su netina tuatse sa tata neje. Tarrafa cuana jabasetatitasaina huecuana. Jesús ja ihuatana tse.

²²Da su beju tuatseda metse sa tata canoa su ichajusiatana Jesús ebuque puji. Jesús ja dueji cristiano cuana buetsuatana

²³Beju Jesús da pamapa Galilea yahua je putiana. Pamapa jadhitati jude ete cuana su cristiano cuana buetsuatana. Diusu ecuatsasiati jepuiti quisaquisa puana. Pamapa cristiano cuana sa tsapiapiati chiqui cuana saisiametana.

²⁴Siria yahua su aniji cristiano cuana di Jesús jepuiti bahue putana. Pamapa tsapiapiati chiquiji, nedaji cuana dusutana huecuana Jesús peje su. Einid'u madhadaji, riaria neje enimetaitanani, ase bue mahue cuana dusutana huecuana. Beju Jesús ja pamapa saisiametana huecuana.

²⁵Dueji cristiano cuana ja Jesús tije atana. Galilea yahua, piada tunca ejude cuana, Jerusalén ejude, Judea yahua, Jordán ena chu maje je jenetia beju puetana huecuana Jesús tije ya puji.