Read Tacana Mateo 8 Bible Online

Mateo 8 - Tacana bible

Mateo 8

¹Beju Jesús ja cristiano cuana buetsuape putsu, murucu aida je buteana. Dueji cristiano cuana ja tije atana.

²Piada deja lepraji ja Jesús nariatana. Tu butse su tururu putsu, uja atana Jesús: —Echua Puji, ahua mique tsada su, miada ema saisiame cua.

³Da su Jesús ja deja d'apabatana. Uja atana deja: —Tsada quema. Mida esaisi. Jesús daja epuani cama, deja lepraji saisiana.

⁴Neicha Jesús ja atana deja: —Be aidhe biame quisaji. Jabametitique sacerdote peje su tuahueda mi saisijiji pabata puji. Da su beju Diusu irutsuaque, cuaja Moisés chenu sa jacuatsasiati epuani batame, pamapa cristiano cuana ja mida saisijiji pashanapata puji. Capitán sa emebajaji nedaji Jesús ja saisiametana

⁵Da su beju Jesús Capernaum ejude su putibana. Dapia ejude su romano soldado cuana sa capitán ja Jesús uja bajatana:

⁶—Echua Puji, quema emebajaji da nedaji ete su esa. Ruburubu bue mahue. Ebia su sufri epuani tueda neda neje.

⁷Da su Jesús ja capitán uja atana: —Eputi da ema tu esaisiame puji.

⁸Capitán ja uja jeutsutana: —Echua Puji, ema mu aimue aidhe eni mahue quema ete su mida enubi puji. Beju mi yani jenetia cuatsasiaque hue quema emebajaji pasaisi puji.

⁹Ya di quema echua puji sa jacuatsasiati ema su yani. Daja huecha quema soldado cuana yani. Quema jacuatsasiati ema su yanita huecuana. Pamapa quema jacuatsasiati cuana yatani huecuana. Quema emebajaji cuana ja di quema jacuatsasiati cuana yatani. Da su ema bahue ahua miada u jenetia hue cuatsasia cua su, quema emebajaji saisi cua.

¹⁰Jesús ja daja id'aba putsu, nimetiunetiana. Mesa ebuqueji cuana uja atana: —Ene putsu, yama micuana equisainia, pamapa Israel yahua je aimue yama aidhe biame ye deja nime ba. Aimue aidhe biame Diusu peje su tu enimetucheatiani nime yama ba.

¹¹Ene putsu, jucuada israelita mahue cristiano cuana ye capitán nime pamapa mundo je cielo su enubita. Dapia yaniuteta huecuana Abraham, Isaac, Jacob chenu cuana neje ediadia puji.

¹²Beju Diusu ecuatsasiati da israelita cuana sa puji biame, aimue pamapa tuneda enubita mahue. Jucuada tuneda uqueda, apuda su Diusu ja ebeituta. Dapia apuda su ebia su epata, etsedhaitita ebia su sufri eputa huecuana putsu.

¹³Da su Jesús ja neicha hue capitán atana: —Putiyuque mique ete su. Mi jei puitia batame beju epu. Da hora su beju emebajaji saisiana. Jesús ja Pedro sa ehuane sa cuara nedaji saisiametana

¹⁴Da su beju Jesús da Pedro sa ete su putiana. Dapia Pedro sa ehuane sa cuara nedaji saina.

¹⁵Jesús ja tusa eme inatana cama, beju saisiana. Da su epuna netiana putsu, bapirutana huecuana. Jesús ja ebia su nedaji cuana saisiametana

¹⁶Beju dhidha su cristiano cuana ja einid'u madhadaji cuana dusutana Jesús peje su. Mesa mimi neje hue tuahueda einid'u madhada cuana jusiacuinatana cristiano cuana peje jenetia. Pamapa dapia nedaji cuana di saisiametana.

¹⁷Beju daja puana, cuaja Diusu sa profeta Isaías chenu ja deretaidha batame. Uja derejiji yani: “Tuahueda ecuana sa ai neda cuana saisiametana.” Cuaja Jesús tije ame

¹⁸Beju Jesús ja dueji cristiano cuana tu ebarereatani batana putsu, cuatsasiatana discípulo cuana bai chu maje paaniapetuta huecuana puji.

¹⁹Dapia piada jacuatsasiati ebuetsuaji ja Jesús atana: —Ebuetsuaji, yama mi tije aja quepia mi epuhu su.

²⁰Jesús ja jeutsutana: —Cuacuacuacua cuana sa rara yanita. D'ia cuana sa esaji yanita. Beju quema mu ai mahue quepia echua epahuati puji.

²¹Da su pia Jesús sa ebuqueji ja uja atana: —Echua Puji, quema tata papa putsu chu, yama mi tije ya.

²²Da su Jesús ja tueda jeutsutana: —Jiahue ema tije aque. Diusu shanapaji mahue cuana ja hue tuna sa manujiji cuana papapata. Jesús ja beni, bai mitanametana

²³Da su beju Jesús da discípulo cuana neje canoa aida su nubiana bai epetu puji.

²⁴Yanipetutasa cama, beni ebia su jubida pupiruana. Ena netianametana aida. Canoa dume su ena nubiana. Daja epuani biame, Jesús da canoa dume su tahuisaina.

²⁵Da su discípulo cuana ja tueda id'edeatana. Jubida atana huecuana uja: —¡Echua Puji, d'eji su ecuanaju aque! ¡Beju canoa yaninubiani!

²⁶Jesús ja jeutsutana huecuana: —¿Ai puji ni da micuaneda iyuame cuatajuse epuani? ¿Jucuaja su micuaneda aimue Diusu peje su enimetucheatiani mahue? Jesús daja mimi putsu, netianana. Beni, bai d'ayatana. Da su beju mitanasaisiana pamapa.

²⁷Discípulo cuana beju nimetiunetitana. Tuneda cama uja jaquisatitana: —¿Ai deja jia ye? Beni ja biame tueda eid'abatani. Bai ja di tusa jacuatsasiati eiyubatani. Beta deja einid'u madhadaji detse

²⁸Jesús da bai chu maje satsuati putsu, beta deja einid'u madhadaji detse dapia panteo jenetia cuinanana. Tuatseda einid'u madhadaji putsu, ebia su ate cristiano cuana neje puina. Da putsu, cristiano cuana dapia edid'i su aimue jaitianaja mahue putaina. Beju tuatseda Jesús peje su janariatiana.

²⁹Tsiatsia neje uja Jesús atana tse: —Jesús, Diusu sa Ebacua, ¿ai mique etseju neje yani? ¿A da miada etseju castigo su ebeitu, etseju sa castigo hora cuinaji mahue su?

³⁰Chuadera beju dueji cuchi cuana diadianiunetitaina.

³¹Beju einid'u madhada cuana ja Jesús atana: —Ahua miada ecuanaju ye deja detse peje jenetia ejusiacuina su, d'eji ecuanaju tiaque cuchi cuana sa equita cuana su enubi puji.

³²Da su Jesús ja d'eji tiatana huecuana. Beju einid'u madhada cuana deja detse peje jenetia cuinana putsu, cuchi cuana sa equita cuana su nubitana huecuana. Nubitana su, cuchi cuana jududutana bai su. Bai equehuehueji butsepi je dajajautetana. Dajajaute putsu huidipetana.

³³Da su beju cuchi quinaji cuana tipei pume ejude su tipeida jududutana. Dapia beju pamapa cuaja ai puana cuana quisapupirutana huecuana.

³⁴Da su pamapa ejude cristiano cuana putitana Jesús peje su ebati puji. Tu peje su cuinati putsu, beju jubida Jesús bajapirutana huecuana papuenitiyu tuna sa yahua jenetia puji. Da su Jesús putibana.