Read Tacana Marcos 10 Bible Online

Marcos 10 - Tacana bible

Marcos 10

¹Da su beju Jesús cuinanana Capernaum ejude jenetia. Judea yahua su putiana. Jordán ena chu maje anipetutiana. Neicha hue dueji cristiano cuana tu peje su jadhitatitana. Da su Jesús ja buetsuapirutana huecuana.

²Beju piada piada fariseo cuana ja Jesús nariatana mimi neje tu yaba puji. Da su Jesús quisabatana huecuana: —¿Ahua saida deja ja quirica derejiji neje mesa ehuane emesiaenita puji?

³Da su Jesús ja quisabatana huecuana uja: —¿Cuaja ni Moisés chenu ja cuatsasiataidha?

⁴Tuneda jeutsutana: —Moisés chenu ja deja cuana d'eji tiataidha quirica derejiji neje ehuane emesiaenita puji.

⁵Da su Jesús ja quisatana huecuana: —Judío cristiano cuana nimetadada putsu, Moisés chenu ja daja cuatsasiataidha.

⁶Uja Moisés chenu deretaidha: “Equene su Diusu ja deja, epuna ataidha.”

⁷Neicha Moisés chenu ja deretaidha uja: “Da putsu, deja ja mesa tata, cuara detse ichajusia taji mesa ehuane neje yaniti puji. Beju tuatseda mu piada hue pu cua nime epu.” Beju daja Diusu sa quirica su epuani. Aimue Diusu ja tuatseda beta nime ebatani mahue. Piada nime hue ebatani tse.

⁸(null)

⁹Da putsu beju, aimue detse aidhe sa biame jamesiati taji pu cua mahue, Diusu ja tuatseda dunemetana putsu. Daja Jesús ja jeutsutana huecuana.

¹⁰Da su beju ete su tuna mehua anitana su, discípulo cuana ja Jesús quisabatana tusa jabuetsuati jenetia.

¹¹Jesús beju jeutsutana huecuana uja: —Ahua quebata yahue ja mesa ehuane jucha mue biame emesiata su, ahua pia neje ehuaneti su, da su tuahueda jucha aida yatani.

¹²Daja huecha ahua quebata ehuane ja mesa yahue jucha mue biame emesiatu su, ahua pia neje yahueti su, tueda epuna ja di jucha aida yatani. Jesús ja yanana cuana bunebatana

¹³Da su beju piada piada yanana chidi cuana Jesús peje su dusetana huecuana, Jesús ja mesa eme tuna bia su huana putsu, tuneseda puji Diusu ebajata puji. Beju discípulo cuana sa tsada mahue puana. Yanana chidi duseji cristiano cuana d'ayapirutana huecuana.

¹⁴Jesús ja daja ba putsu, discípulo cuana neje duininiana. Tuahueda atana huecuana uja: —D'eji metiaque yanana cuana ema peje su papueta. Be menahueji huecuana, Diusu ecuatsasiati da tuna nime cuana sa putsu.

¹⁵Ene putsu, yama micuana equisainia, etse sa nimemitsida pu taji ye yanana cuana nime Diusu ecuatsasiati su enubi puji.

¹⁶Da su Jesús ja yanana cuana id'amitana. Mesa eme detse yanana cuana bia su huana putsu, Diusu peje su ibuneda neje menajatiatana huecuana. Deja chipiluji

¹⁷Jesús epupiruhu cama, piada deja tu peje su jududubeana. Tu butse su beju tururuana. Da su deja ja Jesús quisabatana: —Echua Puji, mida da saida. ¿Ai ni quema a taji Diusu neje cielo su eid'e yanieniti puji?

¹⁸Da su Jesús ja tueda jeutsutana: —¿Jucuaja su miada ema, saida, yainia? Diusu bahui da saida. Ahua mida cielo su eid'e anienija su, Moisés chenu sa jacuatsasiati cuana apeque. Da su deja ja neicha Jesús quisabatana: —¿Quebata jacuatsasiati cuana quema a taji?

¹⁹Jesús ja deja jeutsutana: —Be cristiano manuameji. Be pia sa ebutse quinaji. Be tsi puji. Be bid'umimi puji. Mique tata, cuara detse iyubaque. Mida quitaita ibuneda ebatiani nime, daja pia cuana ibuneda baque.

²⁰Da su deja ja Jesús atana: —Beju pamapa tueda jacuatsasiati cuana yama butsepi yainia ema yanana jenetia jiahue teje. ¿Ai pia ni da quema a taji yani?

²¹Beju Jesús ja tueda uja atana: —Ahua mida nimebutsepi puja su, irutique pamapa mique ai cuana. Pamapa mique chipilu cuana puri cristiano cuana tiaque. Tiape putsu, tije ema aque. Ahua daja ya su, cielo su pamapa ai eichacua cuana mique yani.

²²Beju deja ja daja id'aba putsu, ebia su jatacuamadhapirutiana, tueda ebia su chipiluji putsu.

²³Da su deja putibana su, Jesús ja mesa discipulo cuana uja atana: —Ene putsu, yama micuana equisainia, atadhada chipiluji cuana Diusu ecuatsasiati su enubi puji. Ebia su atasaida caballo acusha id'aja je ejaitiana puji.

²⁵

²⁶Da su discípulo cuana da Jesús daja epuani id'aba putsu, ebia su nimetiunetitana huecuana. Uja jaquisabatitana huecuana: —¿Aidhe jia da d'eji su pu cua?

²⁷Beju Jesús ja tuna chama putsu, uja atana huecuana: —Cristiano cuana aimu tuna mehua quitaita hue d'eji su jaatita cua mahue. Diusu sa puji mu mue ai biame atadhada mahue. Beju Diusu ja aidhe papu biame d'eji su ata cua.

²⁸Da su Pedro ja Jesús uja atana: —Echua Puji, ecuanaju beju pamapa ecuanaju sa ai cuana ichajusiana mi tije ya puji.

²⁹Da su Jesús ja Pedro jeutsutana uja: —Enei hue yama micuana equisainia, quebata ja mesa edue, dudu, tata, cuara, ehuane, yanana cuana, daja huecha ete, te cuana ema jepuiti eichajusiata su, Diusu ja tueda ai ichajusiajiji cuana ebia su dueji eturuca etiatayu ye mundo su. Daja biame, cristiano cuana ja madhada hue tueda yatayu. Beje Diusu ja tueda cielo su eid'e yameenititayu.

³⁰

³¹Da su beju jiahue equene, aida eputani cuana da ai eni mahue tije eputayu. Daja huecha jiahue ai eni mahue tije eputani cuana da equene aida eputayu. Neicha hue Jesús ja cuaja mesa manu epu quisatana

³²Beju tuneda edid'i su yaseneti cama, Jerusalén ejude su epuhu je, Jesús da discípulo cuana hui su putiana. Discípulo cuana iyuame neje Jesús tije putitana. Da su neicha hue Jesús ja chujemame ihua putsu, quisapirutana huecuana. Ai cuaja epu tu jepuiti quisapirutana huecuana uja:

³³—Meid'abaque. Ecuaneda Jerusalén ejude su epuhu. Dapia sacerdote huaraji aida, jacuatsasiati ebuetsuaji cuana peje su ema emenajatiata. Romano soldado cuana peje su ema emenajatiata huecuana ema pamanuameta huecuana puji.

³⁴Ema neje eshishatita huecuana. Equedi neje ema equid'uata huecuana. Eicheta huecuana ema. Daja a putsu, ema emanuameta huecuana. Beju quimisha tsine ejaitiana su, ema manujiji cuana duju jenetia enetianayu. Jacobo, Juan detse ja Jesús bajatana

³⁵Zebedeo sa ebacua Jacobo, Juan detse ja Jesús nariatana. Uja Jesús bajatana tse: —Ebuetsuaji, tiaque etseju sa jabajati.

³⁶Da su Jesús ja quisabatana tse: —¿Ai ni da yama metseseda puji a cua?

³⁷Beju jeutsutana tse uja: —D'eji tiaque etseju mi neje ecuatsasia epu puji, mi ecuatsasiati su. Piada mique bai eni bene, pia mique d'ani bai bene etseju paaniute.

³⁸Da su Jesús ja tuatseda jeutsutana: —¿Ai metseda ebajainia ai cuana bahue bata? ¿Ai metseda sufri pu cua, manu cua ema epu nime bata?

³⁹Da su tuatseda jeutsutana Jesús uja: —A cua detse etseju. Da su Jesús ja quisatana tse uja: —Enei hue, ema sufri epu nime, daja metseda di sufri epu.

⁴⁰Daja biame, aimue metse sa jabajati yama tia cua mahue. Quema bai eni bene, quema d'ani bai bene metseda yaniute puji aimue quema puji aimue quema puji dhare taji mahue. Tata Diusu ja bahui tueda aniude detse tiata cua. Mesa beta dharejiji detse bahui etiata.

⁴¹Da su beju pia discípulo cuanaja id'aba putsu, duininitana huecuana Jacobo, Juan detse neje.

⁴²Da su Jesús ja pamapa su ihuatana tu naja su. Uja atana huecuana: —Micuaneda bahue pamapa ejude sa huaraji aida cuana ja ebia su tucheda neje cristiano cuana ecuatsasiatani.

⁴³Beju micuaneda mu aimue daja epu mahue. Quebata micuaneda huaraji aida puja epu su, tuseda pia cuana mebaja taji. Quebata micuaneda ehuidusuji puja epu su, pia cuana sa emebajaji pu taji.

⁴⁴(null)

⁴⁵Ema da Diusu sa Jabeituti Deja biame, ema pueana ye mundo su aniji cristiano cuana emebaja puji. Aimue ema pue cristiano cuana ja ema pamebajata puji. Beju ema pueana emanu puji, dueji cristiano cuana d'eji su paputa puji. Jesús ja deja padha saisiametana

⁴⁶Da su pia ejude su cuinatitana huecuana. Tueda ejude banime Jericó. Ejude jenetia ejaitianatani huecuana su, dueji cristiano cuana ja buquenatana huecuana. Beju edid'i buahua su ejude chu bene piada deja padha anina. Tueda deja banime Bartimeo puina. Tueda da Timeo sa ebacua puina.

⁴⁷Jesús enariatiani id'abatana putsu, tsiatsiapiruana uja: —¡Jesús, David chenu sa familia jenetia, ibunebaque ema!

⁴⁸Da su pia cuana ja deja d'ayatana. —Mitanaque —atana huecuana. Da su cha ebia su hue jubida tsiatsiana deja uja: —¡Jesús, David chenu sa familia jenetia, ibunebaque ema!

⁴⁹Da su Jesús netisenana. Cuatsasiatana huecuana uja: —Meihuaque deja padha. Da su deja padha ihua putsu, uja atana huecuana: —Janimetucheatique. Netianaque, tuahueda mi eihuatani putsu.

⁵⁰Deja ja beju mesa ebiad'amaji jusia putsu, tenana. Jesús nariatana.

⁵¹Da su Jesús ja tueda quisabatana uja: —¿Ai ni mique yama cuaja a cua? Padha ja beju jeutsutana: —Ebuetsuaji, ema jabatija.

⁵²Da su Jesús ja cuatsasiatana deja: —Puchiditiyuque. Ema peje su mi jei puitia putsu, saisitia mi beju. Da hora su beju padha jabatiana. Jesús tije apirutana edid'i je.