Read Tacana Marcos 7 Bible Online

Marcos 7 - Tacana bible

Marcos 7

¹Beju fariseo, jacuatsasiati ebuetsuaji cuana Jerusalén ejude jenetia puetana Jesús peje su.

²Discípulo cuana diadiataina jamerucuatiji mahue beju batana huecuana.

³Tuneda buetsuataina ediadia puji jamerucuati taji, daja da judío tata chenu cuana sa puiti puidha putsu.

⁴Fariseo cuana iruiru jude jenetia jasiapati putsu, equene erucuatitani huecuana ediadia puji. Jamerucuatiji mue su, aimue ediadiatani huecuana mahue. Beju jucuada mecuana sa ai puiti cuana anitaina. Emeji cuana rucuataina huecuana. Jutu cuana di rucuataina huecuana.

⁵Da putsu, fariseo, jacuatsasiati ebuetsuaji cuana ja Jesús atana uja: —Mique discípulo cuana mu jamerucuati bue mahue ediadia puji. Cuaja ecuana sa tata chenu cuana sa puiti puidha nime, aimue yatani huecuana mahue. ¿Cuaja su jia daja eputani huecuana? ¿Cuaja su jia ediadiatani huecuana jamerucuatiji mahue?

⁶Da su Jesús ja jeutsutana huecuana: —Micuaneda da bubeta cuana. Profeta Isaías chenu butsepi quisa puidha micuana jepuiti. Uja Tata Diusu ja tueda deremetaidha:Ye cristiano cuana ja ema eiyubatani mimi neje bahui.Aimue ema ene putsu tuna sa muesumu neje eiyubatani huecuana mahue.

⁷¿Ai puji saida tuna sa ema peje su jamitsutsuati cuana pu cua?Beju tueda da yanacane hue, tuna sa jabuetsuati quitaita cuana bahui ebuetsuatani huecuana.Aimue quema jabuetsuati cuana mu ebuetsuatani huecuana mahue.

⁸Micuaneda Diusu sa jacuatsasiati cuana ichadera putsu, deja sa ai puiti cuana bahui yainia.

¹⁰Moisés chenu uja puidha: “Iyubaque mique tata detse. Ahua quebata papu mesa tata detse emadhabata su, tueda pamanu.”

¹¹Beju daja Moisés chenu buetsuataidha biame, micuaneda mu etsapiainia tusa jabuetsuati saida cuana. Uja micuaneda ebuetsuatani: “Quebata papu mesa chipilu Diusu etiata su, beju aimue mesa tata, cuara detse chipilu neje tsahua taji mahue, pamapa Diusu tiatana putsu.”

¹³Daja micuaneda ebuetsuainia putsu, Diusu sa jacuatsasiati cuana etaitanameinia. Tueda jacuatsasiati cuana ai eni mahue nime micuaneda yameinia. Daja nime ebia su jucuada ai madhada cuana di micuaneda yainia.

¹⁴Neicha Jesús ja cristiano cuana ihuatana. Uja quisapirutana huecuana: —Meid'abaque ema.

¹⁵Meshanapaenique. Etse ediainia cuana ja aimue detse etse madhata cua mahue. Beju etse emimiani cuana ja mu ene putsu etse emadhatani.

¹⁶Quebata idajararaji su, paidábata.

¹⁷Da su beju Jesús ja cristiano cuana jusiaicha putsu, ete su nubiana discípulo cuana neje. Nubipe putsu, discípulo cuana ja Jesús quisabatana uja: —¿Cuaja epuani mique quisa cuana?

¹⁸Da su Jesús ja jeutsutana huecuana: —¿A da micuaneda di pia cuana nime aimue eshanapainia mahue? Beju pamapa ediatani ai cuana ecuatsa je enubiani putsu, edhe su ecuinahu. Da su beju equita jenetia ecuinanani. Aimue detse tueda ai cuana ja deja madhata cua mahue. Jesús ja tueda quisa neje pamapa jana da saida buetsuatana huecuana.

²⁰Daja hue buetsuainiame atana huecuana uja: —Mimi madhada cuana ja mu ecuatsa jenetia ecuinanani putsu, deja emadhatani, muesumu jenetia ecuinanani putsu.

²¹Pamapa ai madhada cuana cristiano cuana sa piba jenetia ecuinanani. Tueda piba madhada cuana ja cristiano cuana jucha yametani. Tueda piba madhada ja tsi puji, jamanuametiji, pia sa ebutse neje jaquinatiji, pia sa ai cuana utsatabaji, jabaseatiji, envidia puji, mimi aida, aida jabatiji, saida piba mahueji yametani huecuana.

²³Pamapa tueda madhada ai cuana cristiano cuana sa piba jenetia ecuinanani. Tueda ai cuana ja bahui juchaji yametani cristiano cuana. Epuna ja pia yahua jenetia Jesús peje su jei puana

²⁴Da su beju Jesús tueda yahua jenetia putiana. Tiro, Sidón detse yahua naja su putiana. Dapia Jesús piada ete su nubiana. Tsada mahue mesa puana aiya pashanapata tu dapia yani. Uba hora quita chidi jarubutija pudhaana.

²⁵Piada epuna ja Jesús yani id'abatana. Mesa ebaquepuna chidi einid'u madhadaji puina. Epuna Jesús peje su pue putsu, tu butse su turusatiana.

²⁶Tueda epuna da judío mahue pia yahua jenetia puina. Beju epuna ja Jesús uja bajatana: —Jusiacuinaque einid'u madhada quema ebaquepuna peje jenetia.

²⁷Da su Jesús ja epuna uja jeutsutana: —Equene beju ebacua cuana padiadiata tupu. Saida mahue ebacua cuana sa jana mejemi putsu, uchi cuana etia puji. Ema equene pueana judío cuana emebaja puji. Beju judío cuana ja pamapa extranjero cuana uchi nime bame yatani.

²⁸Da su epuna ja jeutsutana uja: —Ehe, Echua Puji, mida ene putsu butsepi emimiani biame, uchi cuana ja di puchu cuana emetse sa misha jenetia yahua su edajajatani cuana ediatani.

²⁹Jesús ja epuna sa jajeutsuti id'aba putsu, uja jeutsutana: —Puchiditiyuque mique ete su. Miada ema saida jeutsuitia putsu, mique ebaquepuna beju saisitia. Einid'u madhada beju cuinanaitia tu peje jenetia.

³⁰Da su epuna mesa ete su putiyu putsu, ebaquepuna chidi tahui jude su einid'u madhadaji mahue beju batana. Jesús ja deja mimi bue mahue, jaid'abati bue mahue saisiametana

³¹Jesús Tiro yahua jenetia putiana. Sidón yahua je jaitianana. Piada tunca ejude cuana je di jaitiana putsu, Galilea bai su cuinatiana.

³²Piada piada cuana ja deja jaid'abati bue mahue dusutana Jesús peje su. Tueda mimi bue mahue puina. Da su Jesús bajatana huecuana tusa eme deja nedaji bia su pahuanata puji.

³³Da su Jesús ja deja nedaji chuadera dusutana. Mesa emejatsa detse nedaji sa eid'aja detse su nubiametana. Da su emejatsa su equedi icha putsu, nedaji sa yana d'apabatana.

³⁴Buepa huabata jabatsuati putsu, Jesús janasiatiana. Uja quisatana deja: —¡Jatsequed'iatique!

³⁵Da hora su quitaita deja sa eid'aja detse jad'eatiana. Saida beju mimi bahue puibana.

³⁶Da su Jesús ja dapia aniji cristiano cuana cuatsasiatana be aidhe biame paquisata huecuana puji. Beju jucuada nuati daja jubida cuatsasiatana biame, ebia su quita, cuaja Jesús ja ai cuana atana quisa putana huecuana.

³⁷Pamapa nimetiunetitana huecuana. Uja jaquisatitana huecuana: —Tuahueda pamapa ai cuana ebia su saida yatani. Jaid'abati bue mahue cuana biame eid'abametaniyu. Mimi bue mahue cuana di emimiametaniyu.