Read Tacana Lucas 1 Bible Online

Lucas 1 - Tacana bible

Lucas 1

¹Ibuneda Teófilo, mi peje su ye quirica yama ebeituinia pamapa Jesús ja ecuana duju su atana cuana equisa puji.

²Jesús batana cuana ja tu ai atana cuana ema quisaenitana. Tuneda Cristo sa quisa saida cuana quisaquisa putana.

³Saida yama pibana tueda ai cuana edere puji, pamapa tueda ai cuana yama butsepi quisachacuana putsu. Beju jiahue cuaja pupirume puana pamapa tueda ai cuana yama butsepi edereinia mi etiame puji.

⁴Ye quirica mi etiameinia mi buetsuatana Cristo jepuiti ai cuana saida eshanapa puji. Beju jiahue mida yama tueda ai cuana equisa. Angel Juan Bautista bataji epu quisa puana

⁵Da tiempo su Herodes Judea yahua sa echua puji puina. Tueda yahua su piada sacerdote di anina. Tueda banime puina Zacarías. Tuahueda pia sacerdote neje Diusu mebajataina templo su. Tueda sacerdote cuana da Abías cuana puina. Zacarías sa ehuane Elisabet banime puina. Tueda di Zacarías nime Aarón chenu sa familia jenetia puina.

⁶Tuatseda Diusu butse su nimebutsepi puina. Aiya biame cuaja tuaquisa taji mahue tse batana huecuana. Pamapa Diusu sa jacuatsasiati cuana jei ataina tse.

⁷Betana su bacua mahue edhi puina tse, Elisabet jabuacuati bue mahue puina putsu.

⁸Beju Abías cuana sa jaturucati tsine cuinana su, Zacarías dharetana huecuana iyuda eti jude su enubi puji, Diusu butse su insensario neje ejudua puji.

⁹

¹⁰Beju Zacarías ja ejuduatani tupu, pamapa cristiano cuana etseque su Diusu neje jamitsunetitanetina.

¹¹Da hora su Diusu sa ángel Zacarías peje su bataji puana. Bai eni bene altar su ángel neticuinana.

¹²Angel ba putsu, Zacarías rubutanana. Cuaja pu taji mahue jabanetiatiana.

¹³Da su ángel ja Zacarías uja atana: —Zacarías, be iyuame puji. Diusu ja mique jabajati id'abatana. Elisabet beju ebacuati. Tueda yanana Juan miada ebaniicha.

¹⁴Metseda ebia su beidaji epu. Tueda yanana bataji epu su, jucuada cristiano cuana di beidaji eputa.

¹⁵Mique ebacua deja aida epu Diusu sa puji. Aimue vino tsetseda id'i bahue epu mahue. Tu bataji puji mahue jenetia Espíritu Santo sa tucheda mesa yani epu.

¹⁶Tuahueda dueji israelita cuana Diusu peje su neicha esiapametayu.

¹⁷Tueda da Echua Puji Jesucristo hui su epu. Tueda ebia su nimetucheda epu, cuaja profeta Elías chenu puidha nime. Tata cuana, mecuana sa ebacua cuana neje saida yameta. Diusu jei aja mahue cuana ebuetsuata Diusu sa jacuatsasiati cuana jei paata huecuana puji. Cristiano cuana ebasetata Echua Puji saida einatsu puji.

¹⁸Daja ángel ja Zacarías atana. Da su Zacarías ja ángel uja quisabatana: —¿Cuaja ni da ye ai cuana pu cua? Etseju mu beju edhi.

¹⁹Da su ángel ja Zacarías uja jubida jeutsutana: —Ema da Gabriel banime. Ema da Diusu sa ani jude butse su eneti tu emebaja puji. Diusu ja ema mi peje su beitutana ye quisa saida mi equisa puji.

²⁰Da su beju mida mimi bue mahue epu yanana bataji epu teje, miada quema jaquisati mue jei aitia putsu. Cuaja mi yama equisainia nime, beju daja epu.

²¹Da cama beju, etseque su cristiano cuana ja Zacarías ecuinana id'uatanetina. Uja tuneda japibatitana: “¿Jucuaja su da ebia su etsunutani Zacarías?”

²²Beju Zacarías cuinana putsu, cuaja mitsu taji mahue cristiano cuana batana. Eme neje bahui shanapametana huecuana. “Zacarías tahui su nime jia da ai bataitia. Da putsu, cuaja mimi taji mahue ebatiani”, japibatitana huecuana.

²³Beju mesa mudumudu taji tsine cuana pupeana su, Zacarías mesa ete su jasiapatibana.

²⁴Quejucua tsine jaitianana su, beju Elisabet dheji puana. Pishica badi mesa ete jenetia mue cuinana puana.

²⁵Uja tueda japibatiana: “Diusu ja ema ibunebatana. Beju u jenetia su aimue cristiano cuana ema neje eid'ebatita mahue, ema bacuaji putsu.” Angel da Jesús bataji epu quisa puana

²⁶Elisabet sucuta badi dheji yani su, Diusu ja ángel Gabriel beitutana María peje su. María sa ete Nazaret ejude su anina. Tueda ejude Galilea yahua su anina.

²⁷Beju María deja shanapa bue mahue puina. José neje yahueti jamitsuti mesa anina. Tueda José da echua puji David chenu sa familia jenetia puina.

²⁸Beju ángel María naja su janariatiana putsu, uja atana: —María, yama mi equisainia, Diusu ja mi pia epuna cuana ebia su eibunebatani. Beju tueda mi neje yani.

²⁹Da su María nimetiuichana, ángel sa mimi id'aba putsu. Uja ángel quisabatana: —¿Jucuaja su mi ema daja emitsuinia?

³⁰Angel María jeutsutana: —María, be iyuame puji. Diusu ja mi dharetana.

³¹Jiahue mida dheji epu. Piada ebacua mida ebacuinati. Tueda ebacua miada Jesús ebani eicha.

³²Tueda da ebia su aida epu, Diusu Aida sa Ebacua putsu. Diusu ja tueda huaraji aida eichata. Echua puji David chenu puidha nime, daja Diusu ja tueda Echua Puji eichata.

³³Israelita cuana sa Echua Puji tueda epu ecuatsasiaenita huecuana puji. Tu ecuatsasiati aimue epupe mahue beju.

³⁴Da su María ja ángel quisabatana: —¿Cuaja ni da pu cua ye ai cuana, aimue ema deja shanapa bue mahue putsu?

³⁵Da su ángel ja María jeutsutana: —Espíritu Santo da mi peje su epue. Diusu Aida ja mi judu padha nime neje ebabuta. Da su beju tueda yanana bataji epu Diusu sa puji ichaderajiji epu. Diusu sa Ebacua epu.

³⁶Mique edue puji Elisabet di bacuaji epu, punatia biame. Cristiano cuana, “Elisabet jabacuati bue mahue”, mimitaina biame, beju bacuaji epu. Sucuta badi tueda dheji beju.

³⁷Diusu sa puji mu mue ai biame atadhada mahue.

³⁸Da su María ángel uja atana: —Ema da Diusu sa emebajaji. Daja Diusu ja ema paata, cuaja miada ema equisainia batame. Mimipe putsu, ángel putibana. María Elisabet peje su pereperetiana

³⁹Beju quejucua tsine jaitianana su, María tipeida putiana Zacarías, Elisabet detse sa ejude su. Tueda ejude da Judea yahua emata chidi cuana duju su anina.

⁴⁰Dapia cuinati putsu, Zacarías sa ete su nubiana. Elisabet mitsutana.

⁴¹Elisabet ja María sa jamitsuti id'aba putsu, mesa edhe su yanana ruburubuana.

⁴²Da su Espíritu Santo ja Elisabet uja jubida quisametana: —Diusu ja mi pamapa pia epuna cuana ebia su ibunebatana. Mique ebacua di daja huecha ibunebatana.

⁴³¿Ai eni ema bata miada ema eperejeu puji, mida da quema Echua Puji sa cuara putsu?

⁴⁴Miada ema mitsuana su, quema yanana edhe su ruburubuana, tueda beidaji pu putsu.

⁴⁵Beidaji mida, Diusu sa jaquisati su mi jei puana putsu. Pamapa Diusu ja mi quisatana cuana epupe.

⁴⁶Da su María uja puana:Yama Diusu emitsutsuainia.

⁴⁷Tuahueda ema beidaji ametana.Tueda da ema D'eji su Aji.

⁴⁸Ema ai eni mahue papu biame, ema ibunebatana.Jiahue jenetia pamapa cristiano cuana quema puji saida emimita,

⁴⁹Diusu tucheda ja ai saida nimetiuda cuana ema peje su atana putsu.Tueda da saida, butsepi.

⁵⁰Pamapa tu eiyubatani cuana eibunebatani.

⁵¹Ai aida cuana atana.Ebia su aida jabatiji cuana pishitiametana.

⁵²Huaraji aida, tucheda eni cuana dajajametana.Beju nimemitsida cuana aida atana.

⁵³Diusu shanapaja cuana tusa ai cuana shanapameenitana.Diusu shanapaeni bahue epudhaatani cuana mu aiji mahue jusiaderatana.

⁵⁴Cuaja ecuana sa tata chenu cuana Diusu ja mesa jamitsuti ataidha batame, daja jiahue israelita cuana ibunebatana.

⁵⁵Abraham chenu mesa jamitsuti tiataidha uja:“Yama mida eibuneba.Pamapa mique bataji epusiu familia cuana di yama eibunebaeniti.”Da nime tu mebajaji israelita cuana tsahuatana, cuaja mesa jamitsuti tiataidha huecuana batame.

⁵⁶Da su María quimisha badi aniana Elisabet sa ete su. Da su beju jasiapatibana mesa ete su. Juan Bautista bataji puana

⁵⁷Beju Elisabet sa neda pu taji tsine cuinana su, deja janana bataji puana.

⁵⁸Pamapa Elisabet sa familia, tu naja su aniji cuana tu peje su putitana epereti puji. Diusu ja Elisabet ibunebatana bahue putana huecuana.

⁵⁹Beju ocho tsine su yanana dusutana ehuitsanasiqui puji. Pamapa tuneda Zacarías ebani ichaja putana.

⁶⁰Beju Elisabet sa tsada mahue puana. Uja atana huecuana: —Mahue, Juan da banime epu quema yanana.

⁶¹Da su cristiano cuana ja Elisabet uja atana: —¿Jucuaja su ni? Aimue piada biame mique familia cuana duju su Juan banime ani cua mahue. Beju bahue mida ecuana sa puiti. Etse sa familia quitaita sa ebani cuana jenetia dhare taji ebani eicha puji.

⁶²Da su beju tuneda seña neje Zacarías quisabatana uja: —¿Ai ebani mique tsada ebacua sa epu?

⁶³Da su Zacarías ja quirica su uja deretana: “Mesa ebani da Juan epu.” Da su pamapa su nimetiunetitana.

⁶⁴Da hora su beju neicha Zacarías mimipiruibana. Diusu sa puji saida mimipiruana.

⁶⁵Tu naja su netiji cuana jubida nimetiunetitana. Tueda yahua je aniji cuana jaquisatitana cuaja puana ai cuana.

⁶⁶Ebia su japibatitana huecuana ye ai cuana jepuiti. Huamahuama uja jaquisabatitana huecuana: —¿Ai deja jia ye yanana epu? Diusu sa tucheda Juan neje yani batana huecuana putsu, daja jaquisatitana huecuana. Zacarías Juan jepuiti satsuana

⁶⁷Espíritu Santo Zacarías peje su pue putsu, uja mimiametana:

⁶⁸Beju pamitsutsuatija israelita cuana sa Diusu, ecuana peje su pueitia beju ecuana d'eji su ya puji.

⁶⁹Ecuana Salvador tucheda tiatana.Tueda da David chenu sa familia jenetia.

⁷⁰Biahua tiempo Diusu ja mesa profeta chenu cuana uja quisaquisa ametaidha:

⁷¹“Yama Salvador ebeitu israelita cuana peje su tuna sa majai cuana peje jenetia d'eji su epu puji, tuna duininibaji cuana peje jenetia di d'eji su epu puji.

⁷²Aimue da yama eseta mahue quema tuna neje jamitsuti cuana.Beju yama eichenuba huecuana.”Daja Diusu sa profeta chenu cuana quisaquisa ametaidha.

⁷³Uja Diusu ja Abraham chenu mesa jamitsuti tiataidha:

⁷⁴“Yama israelita cuana tuna sa majai cuana peje jenetia d'eji su yayu ema saida iyuame mahue neje pamebajata huecuana puji.

⁷⁵Tuneda ema saida, butsepi neje pamebajata, eid'e yani tupu.”Daja Diusu ja Abraham chenu ataidha.

⁷⁶Beju quema ebacua chidi, mida Diusu aida sa quisaquisa puji epu.Echua Puji hui su mi epuniuneti cristiano cuana ebaseta puji, tueda saida pabatsuta huecuana puji.

⁷⁷Echua Puji ja mesa cristiano cuana d'eji su yatayu.Tuna sa jucha cuana eperdonatayu.

⁷⁸Beju Diusu ja daja ecuana yameta, tuahueda ecuana ebia su eibunebatani putsu.Tusa quisa saida cuana hueda nime cielo jenetia ecuana peje su.

⁷⁹Jucha su epuniuneti cuana Diusu ja mesa quisa saida cuana eshanapametayu.Emanu puji iyuame eputani cuana di eshanapametayu.Tuneseda puji tueda quisa saida cuana da hueda nime.Tuahueda ecuana enimepijajametayu.Quema ebacua chidi, pamapa ye ai saida cuana miada cristiano cuana eshanapame. Daja Zacarías satsuana mesa ebacua jepuiti.

⁸⁰Beju yanana Juan saida, nimetucheda, jubida sehuana. Beju deja puana su, d'anita yahua su netina. Dapia tu mehua netina israelita cuana peje su quisaquisa epupiru teje.