Read Tacana Lucas 17 Bible Online

Lucas 17 - Tacana bible

Lucas 17

¹Da su Jesús ja discípulo cuana uja atana: —Quebata ja piada eichacua ema peje su jei epuani cristiano tusa Diusu peje su janimetucheati etaitanameta su, tuseda puji ebia su saida pamanu bai dueda su, tueda eichacua jei epuani cristiano sa janimetucheati taitanameji mahue su hue. Beju ye mundo su jucuada ai cuana yani cristiano cuana sa Diusu peje su janimetucheati cuana etaitaname puji. Quebata ja daja etaitanameta huecuana su, Diusu ja tueda ematsetayu. ¡Aba tueda, ahua pia cuana daja etaitanameta su!

³Ahua mique edue ja mi ai jucha yata su, butseatique tu jucha yatani jepuiti. Ahua tusa jucha shanapa putsu, epibaturucati su, da su perdonaque.

⁴Quejucua nuati jia miqueda puji tuahueda mi ai jucha yata su, ahua tueda, “Perdonaque ema”, epu su, beju perdona taji. Diusu peje su jubida janimetucheati taji

⁵Apóstol cuana ja Jesús uja atana: —Echua Puji, tsahuaque ecuanaju Diusu peje su jubida enimetucheati puji.

⁶Da su Jesús ja jeutsutana huecuana uja: —Ahua micuaneda Diusu peje su mostaza ejaja chidi nime aihua dhucuana enimetucheatiani su, da su micuaneda ye aqui uja cuatsasia cua: “U jenetia mar su puderaque.” Ahua daja micuaneda ecuatsasia su, beju aqui epudera. Emebajaji sa mebaja taji

⁷‘Mique emebajaji te jenetia jubida mudumudupe putsu, jasiapatiba su, ¿ai miada, “Aniuteque, diadiaque”, ya bata?

⁸Miada tueda, “Jana quema basetatique. Equene ema ediadiani tsuhu baque. Tije chu mida ediadia”, ya.

⁹¿Ai miada emebajaji emudumuduani putsu, “Diusulupai”, ya bata?

¹⁰Daja huecha da Diusu neje. Tusa jacuatsasiati a putsu, uja puque: “Emebajaji saida mahue da ema, quema a taji ai cuana bahui yainia putsu.” Piada tunca lepraji deja cuana Jesús ja saisiametana

¹¹Jesús Jerusalén ejude su epuhu cama, Samaria, Galilea yahua detse dhede je jaitianana.

¹²Piada ejude chidi su ecuinahu cama, piada tunca lepraji deja cuana tsutana ejude esacuinaji su. Beju aimue Jesús nariatana huecuana mahue, lepraji ta huecuana putsu.

¹³Uqueda jenetia tsiatsiatana huecuana uja: —¡Echua Puji Jesús, ibunebaque ecuanaju!

¹⁴Da su Jesús ja atana huecuana: —Meputique sacerdote cuana peje su. Beju tuna eputahu cama, saisitana huecuana.

¹⁵Piada tuneda saida beju jabati putsu, jasiapatibana Jesús diusulupai ya puji. Diusu jubida mitsutsuatana.

¹⁶Jesús butse su turusati putsu, Diusulupai atana. Tueda da samaritano deja puina.

¹⁷Da su beju Jesús ja enetita cuana atana: —¿Aimue jia maida piada tunca yama saisiameitia mahue? ¿Juque ni da pia cuana?

¹⁸Ye judío mahue deja samaritano bahui jasiapataitia beidaji neje Diusu emitsutsua puji.

¹⁹Da su Jesús ja deja atana: —Netianaque. Putiyuque. Mida ema peje su jei puitia putsu, beju saisitia. Cuaja Diusu ecuatsasiati ecuina

²⁰Pia tsine fariseo cuana ja Jesús uja quisabatana: —¿Quetsunu jia da Diusu ecuatsasiati ecuina?

²¹Jesús ja jeutsutana huecuana: —Aimue micuaneda Diusu ecuatsasiati ba cua mahue, micuana duju su bataji mahue yani putsu.

²²Da su Jesús ja discípulo cuana uja atana: —Beju ema eputi tiempo ecuina. Aimue micuana neje ema yani mahue. Da tiempo su micuaneda ema ecuatsasiatiani baja ya biame, aimue ema eba mahue.

²³Beju piada piada cuana uja eputa: “Jesús beju jasiapataitiba. Dapia tueda yani.” Be jei meaji huecuana. Be ema mechacutiji.

²⁴Ema esiapati su, pamapa cristiano cuana ja ema jasiapatiana saida eshanapata. Tserutseru pamapa ja ebatani nime daja ema ebata huecuana, ema esiapati su.

²⁵Equene quema ebia su sufri pu taji. Cristiano cuana ja ema tsada mahue ebata.

²⁶Noé chenu sa tiempo su puidha nime, daja da epu, ema esiapati su. Diusu tsada mahue bataidha huecuana.

²⁷Da tiempo su Diusu ja cristiano cuana manuamepeji mahue su, diadiataidha, jaid'ititaidha, jabutsenetitaidha huecuana Noé chenu arca su nubidha teje. Aimue jei putaidha mahue huecuana Diusu sa jamatseti jubida epusiu. Tueda nai, ena jamatseti pupiruidha su chu, Diusu peje su japibatitaidha huecuana. Ena ja beju manuamepetaidha huecuana pamapa. Daja huecha cristiano cuana jei puja mahue eputa, ema jasiapatiji mahue su.

²⁸Daja huecha biahua tiempo cristiano cuana puidha Lot chenu anidha tiempo su. Da tiempo su beju diadiataidha, jaid'ititaidha, bajabajataidha, iruirutaidha, banabanataidha, ete cuana ataidha huecuana. Beju pamapa ataidha huecuana.

²⁹Lot chenu ejude Sodoma jenetia cuinanaidha su, beju cuati dajajaidha ejude Sodoma bia su. Pamapa tueda ejude su aniji cuana manupetaidha.

³⁰Daja da epu cristiano cuana neje, ema ye mundo su esiapati su.

³¹‘Da tiempo su ahua quebata mesa ete epa pachata bia su yani su, bute putsu, tipeida pajududu. Be ete su panubi mesa ai cuana ejemicuinati puji. Ahua quebata te su yani su, tipeida pajududu. Be ejude su pasiapati.

³²Mepibaque Lot chenu sa ehuane cuaja puidha.

³³Quebata ja ye mundo sa ai cuana ebia su tsada ebatani su, tueda quita etaitanamepeti. Quebata ja ye mundo sa ai cuana tsada mahue ebatani su, tueda da eid'e epueni.

³⁴Da tiempo su ema esiapati su, beta tahui jude su etahui sa epu. Beju piada Diusu ja edusuta. Pia mu eichajusiata.

³⁵Beta epuna edudududusa epu. Beju piada edusuta. Pia mu eichajusiata.

³⁶Beta deja te su emudumudusa epu. Daja huecha piada edusuta. Pia mu eichajusiata.

³⁷Da su beju Jesús quisabatana huecuana uja: —¿Echua Puji, ¿quepia jia da tueda ai cuana epu? Jesús jeutsutana: —Ai ihui esa su, samani cuana tipeida edhitatitani nime, daja huecha ema tipeida esiapati ye mundo su aniji cristiano cuana ecastiga puji, beju ebia su madhada hue eputa huecuana su.