Read Tacana Juan 1 Bible Online

Juan 1 - Tacana bible

Juan 1

¹Equene beju Jesucristo anidha. Ye mundo aniji mahue su, beju anidha. Tata Diusu bameji epuani. Ye mundo su pueana cristiano cuana peje su Tata Diusu ebameti puji. Tueda da Diusu putsu, equene jenetia Tata Diusu neje anidha.

²Equene pamapa ai cuana ajiji mahue su, tueda mu Tata Diusu neje anidha beju.

³Tu jepuiti Tata Diusu ja pamapa ai cuana ataidha.

⁴Tu jepuiti pamapa su eid'e eputani. Cuaja id'eti ja cristiano cuana hueda etiatani nime, daja tuahueda Diusu sa quisa saida cuana cristiano cuana equisatani.

⁵Apuda ja hueda cuaja dhamu taji mahue ebatani nime, daja da ai madhada cuana ja mesa jabuetsuati saida cuana aimue nahuebata cua mahue.

⁶Jesucristo ja buetsuapiruji mahue su, piada deja anina. Tueda Juan Bautista banime puina.

⁷Diusu ja cristiano cuana peje su tueda beitutana Jesucristo jepuiti quisaquisa papu puji, Jesús peje su jei paputa huecuana puji.

⁸Beju aimue Juan Tata Diusu bameji puina mahue. Tueda pueana Jesucristo jepuiti cristiano cuana peje su quisaquisa epu puji bahui.

⁹Jesucristo ja mu butsepi neje Tata Diusu bametana cristiano cuana peje su. Tueda ye mundo su pueana cristiano cuana Diusu sa ene quita quisa saida cuana equisa puji.

¹⁰Ye mundo su anina biame, Tata Diusu ja tu jepuiti pamapa ai cuana ataidha biame, cristiano cuana ja mue shanapa atana.

¹¹Mesa judío cristiano quitaita cuana peje su pueana biame, aimue batsutana huecuana mahue.

¹²Pamapa tu batsu putsu, jei putana cuana mu Diusu sa ebacua cuana atana.

¹³Cristiano cuana da bacuaji eputani mecuana sa utsatada jenetia hue. Diusu ja mu ecuana mesa ebacua yatani, cuaja mesa tsada epuani nime bahui.

¹⁴Jesucristo da Diusu bameji epuani. Tueda da deja bataji puana. Ecuana duju su ibuneda neje ye mundo su puniunetina. Butsepi mimiana. Tata Diusu sa piada quita Ebacua putsu, ebia su saida puina beju ecuanaju bana.

¹⁵Juan Bautista da tu jepuiti uja quisa puana: —Ye Jesucristo jepuiti ema quisaquisa puana. Ema tije epusiu biame, ema ebia su aida, ema bataji puji mahue su, tueda anidha putsu. Daja Juan Bautista Jesucristo jepuiti cristiano cuana peje su quisa puana.

¹⁶Jesucristo ja ecuana ebia su mesa jaibunebati tiatana, ecuana ebia su ibuneda ebatani putsu.

¹⁷Moisés chenu ja ecuana jacuatsasiati jubida cuana bahui tiataidha. Beju Jesucristo ja mu ecuana ebia su ibunebatana. Mesa ene quita quisa saida cuana ecuana buetsuatana.

¹⁸Beju aimue quetsunu su biame aiya Tata Diusu ba. Tusa piada quita Ebacua ja bahui tueda batana, tu naja su yani putsu. Tuahueda ecuana cuaja Diusu quisatana. Juan Bautista ja Jesucristo quisaneticuinatana

¹⁹Jerusalén ejude su aniji cuana ja sacerdote cuana, mecuana sa etsahuaji cuana neje beitutana Juan Bautista peje su. Putitana huecuana Juan peje su, aidhe tueda, equisaba puji.

²⁰Da su Juan ja uja jeutsutana huecuana: —Aimue ema Diusu sa Jabeituti Deja mahue.

²¹Beju neicha quisabatana huecuana Juan: —¿Aidhe da mida? ¿A da mida Diusu sa profeta Elías chenu id'eyujiji? Juan ja jeutsutana huecuana uja: —Aimue ema Elías chenu mahue. Da su neicha quisabatana huecuana: —¿A da mida tueda Diusu sa profeta epusiu ecuanaju eid'uainia? Juan ja jeutsutana huecuana: —Mahue.

²²Neicha Juan quisabatana huecuana: —Da su, ¿aidhe da mida? Beju quisaque ecuanaju, ecuanaju beituji cuana ecuanaju sa quisa taji putsu.

²³Da su Juan ja uja jeutsutana huecuana: —Ema da deja quisaquisa epuani d'anita yahua su. Cuaja Diusu sa profeta Isaías chenu quisa puidha batame, daja jubida yama cristiano cuana equisainia: “Mebasetatique Echua Puji ecuina su puji.”

²⁴Da su fariseo sa jabeituti cuana ja neicha Juan quisabatana: —Da su, ¿ai puji ni miada cristiano cuana eichaderainia Diusu sa puji yahui neje, mida Diusu sa Jabeituti Deja, Elías chenu, Diusu sa profeta mahue biame?

²⁵

²⁶Da su Juan ja jeutsutana huecuana: —Yama cristiano cuana eichaderainia Diusu sa puji yahui neje. Beju piada deja mu micuana duju su yani. Mue micuaneda shanapa tsuhu tueda.

²⁷Tueda ema tije epusiu biame, ema ebia su aida epuani. Aimue ema tupu mahue tu emebaja puji.

²⁸Beju daja Juan, fariseo cuana sa jabeituti cuana neje mimiana Betábara banime ejude naja su, Jordán ena chu maje. Tueda ena su Juan ja cristiano cuana Diusu sa puji ichaderatasaina yahui neje. Jesús da Huisha Janana nime

²⁹Pia huenati Jesús Juan peje su putiana. Juan ja Jesús ba putsu, uja cristiano cuana atana: —Mechamaque. Tueda deja da Diusu peje su eirutsua puji Huisha Janana nime. Tueda emanu cristiano cuana sa jucha cuana edhipa puji.

³⁰Uja yama equene micuana quisana tu jepuiti: “Ema tije piada deja epusiu. Ema tije epusiu biame, tueda da ema ebia su aida, ema bataji puji mahue su, tueda anidha putsu.”

³¹Yama quitaita aimue tueda shanapaina mahue. Beju jiahue yama Diusu sa puji eichaderainia israelita cuana yahui neje tueda da Diusu sa Jabeituti Deja tuna eshanapame puji.

³²Juan ja daja hue cristiano cuana quisainiame atana: —Aimue yama tueda shanapaina mahue. Su pad'i beju Espíritu Santo cielo jenetia ebuteni huaitucu nime yama bana. Jesús bia su netiuteana. Equene Diusu ja ema uja atana: “Quebata deja bia su Espíritu Santo, bute putsu, yaniti su, tueda da quema Jabeituti Deja. Tuahueda cristiano cuana quema puji eichaderata Espíritu Santo sa tucheda neje.”

³³

³⁴Beju tueda yama bana. Yama micuana butsepi equisainia, tueda deja da Diusu sa Ebacua. Jesús ja mesa discípulo cuana dharepirutana

³⁵Pia huenati neicha Juan dapia aniana. Beta tu buqueji detse di tu neje aniana.

³⁶Juan ja Jesús ejaitianasa ba putsu, ebuqueji detse uja atana: —Mechamaque tueda deja. Tueda da Tata Diusu peje su eirutsua puji Huisha Janana nime. Tueda emanu cristiano cuana sa jucha cuana edhipa puji.

³⁷Juan sa ebuqueji detse ja daja id'aba putsu, Jesús tije apirutana tse.

³⁸Jesús jababarereati putsu, tuatseda tu tije epuhu batana. Da su uja atana tse: —¿Ai metse echacuinia? Da su jeutsutana tse uja: —Ebuetsuaji, ¿quepia mique ete?

³⁹Jesús ja jeutsutana tse: —Mepueque eba puji. Da su beju tu neje putiana tse quepia tu yani su. Beju tsinecua epuani putsu, Jesús buquetana tse yapuna teje.

⁴⁰Tuatseda piada banime puina Andrés. Tueda da Simón Pedro sa edue puina.

⁴¹Da su beju Andrés tipeida putiana mesa edue Pedro echacu puji. Tu tsu putsu, uja quisatana Pedro: —Beju etseju Diusu sa Jabeituti Deja Cristo tejeitia.

⁴²Da su Andrés ja Simón dusutana Jesús yani su. Jesús ja Simón ba putsu, uja atana: —Mida Simón banime. Mida da Jonás sa ebacua. Jiahue jenetia beju mida Pedro banime epu. Jesús ja Felipe, Natanael detse dharetana

⁴³Pia huenati Jesús putija puana Galilea yahua su. Da hora su Jesús ja Felipe tsutana. Tsu putsu, uja atana: —Tije ema aque.

⁴⁴Felipe da Andrés, Pedro detse sa ejude jenetia puina. Tueda ejude Betsaida banime puina.

⁴⁵Da su beju Felipe ja Natanael chacutitana. Tejeti putsu, uja quisatana Natanael: —Baitia da ecuanaju piada deja Jesús banime. Tueda da José sa ebacua Nazaret ejude jenetia. Moisés chenu ja tu jepuiti deretaidha mesa jacuatsasiati quirica su. Diusu sa profeta chenu cuana ja di tu jepuiti deretaidha. Tueda da Diusu sa Jabeituti Deja.

⁴⁶Da su Natanael ja atana: —¿Ai saida cuana Nazaret ejude jenetia cuinana cua bata? Felipe ja jeutsutana uja: —Pueque eba puji. Da su putiana tse Jesús eba puji.

⁴⁷Beju Jesús ja Natanael enariatisiu ba putsu, uja atana: —Hue upia epusiu deja israelita quitaita. Tueda da deja butsepi, jabaseati bue mahue.

⁴⁸Da su Natanael ja uja Jesús quisabatana: —¿Cuaja ni miada ema eshanapainia? Jesús ja tueda jeutsutana: —Felipe ja mi ihuaji mahue su, yama mi baitia higuera equi ema su eneti mane, ema dapia mue neti biame.

⁴⁹Da su Natanael ja Jesús uja atana: —Ebuetsuaji, ene putsu, mida da Diusu sa Ebacua. Mida da israelita cuana sa Echua Puji.

⁵⁰Da su Jesús ja tueda uja atana: —Beju mida ema peje su jei epuani, “Yama mi higuera equi ema su eneti baitia”, yama mi aitia putsu. Beju yama ebia su aida nimetiuda ai cuana yayu miada eba.

⁵¹‘Ene putsu, yama pamapa micuana butsepi equisainia, cielo ed'ianeti jenetia Diusu sa ángel cuana butenuati, tsuanuati ema emebaja puji micuaneda eba.