Read Tacana Juan 12 Bible Online

Juan 12 - Tacana bible

Juan 12

¹Beju sucuta tsine yani hue pascua tsine puji Jesús da Lázaro sa ete su Betania ejude su putiana. Tueda Lázaro da Jesús ja equene id'emetaibana.

²Dapia jana atana huecuana Jesús sa puji. Lázaro di tu neje diadiana. Marta ja jana derutana.

³Da su beju mesa edue María ja litro edusete chujeneda saida puida dusetana. Tueda puida nardo banime puina. Duse putsu, Jesús sa ehuatsi bia su d'uichatana. Da su muriatana mesa echuaina neje. Ehuani neje ete sejeatana.

⁴Beju Judas Iscariote di dapia anina. Jesús sa piada discípulo puina. Tueda quitaita ja Jesús emenajatiata puina. Tuahueda María ja daja yatani ba putsu, uja puana:

⁵—Tueda puida da piada mara pucue mudu chuje tupu. ¿Jucuaja su ni da aimue ecuaneda iruitia mahue puri cuana etsahua puji?

⁶Beju Judas ja aimue puri cuana ibunebatana mahue. Tsi puji bahui da tueda puina. Discípulo cuana sa chipilu quinaji puina putsu, chipilu shitara su tsi bahue puina. Da putsu, Judas daja puana.

⁷Da su beju Jesús ja Judas atana: —Be daja puji. María ja quema manu tsine cuinaji mahue su, ema puida neje papitana.

⁸Puri cuana da micuana neje pamapa hora su yanita. Ai hora papu micuaneseda tsada su, tsahua cua huecuana. Ema mu aimue micuana neje daja yani mahue. Quejucua tiempo chidi hue ema micuana neje yaniti. Lázaro di manuameja adhaatana judío cuana sa ehuidusuji cuana ja

⁹Beju dueji judío cuana ja Jesús Betania ejude su yani shanapapirutana. Da su tueda ejude su beju putitana huecuana Jesús ebati puji. Lázaro di ebati puji putitana huecuana, tueda id'eibana putsu.

¹⁰Sacerdote huaraji aida cuana ja Lázaro di manuameja adhaatana, tu id'eibana jepuiti, dueji cristiano cuana Jesús peje su jei putana putsu.

¹¹Cristiano cuana sacerdote cuana peje jenetia netideratasaina Jesús tije ya puji. Da putsu, sacerdote cuana ja Lázaro di manuameja atana. Jesús da Jerusalén ejude su nubiana

¹²Dueji cristiano cuana Jerusalén su putitana pascua tsine ebati puji. Pia huenati su bahue putana huecuana Jesús Jerusalén ejude su enubi.

¹³Da su beju tumi ina nime eina cuana dheutana huecuana. Da neje ejude tsahua su putitana huecuana Jesús etsu puji. Jesús ba putsu, tsiatsiapirutana huecuana uja: —¡Gloria, Tata Diusu sa Jabeituti Deja epusiu! ¡Diusu sa ebani su tueda epusiu! ¡Diusu ja tueda paibunebata! ¡Tueda da israelita cuana sa Echua Puji! ¡Gloria Tata Diusu!

¹⁴Da su beju Jesús ja asunu chidi bianitana, cuaja Diusu sa quirica su derejiji yani batame. Uja derejiji yani:

¹⁵“Be iyuame mepuji Jerusalén ejude su aniji cristiano cuana. Mechamaque micuana sa Echua Puji epusiu asunu bia je.”

¹⁶Beju discípulo cuana ja tueda mimi mue shanapa cuaja epuani. Jesús cielo su putibana su, da su chu beju shanapaenitana huecuana cuaja epuani tueda derejiji mimi cuana. Daja Jesús sa pu taji puina Jerusalén ejude su, Diusu sa quirica su daja derejiji putsu, shanapatana huecuana.

¹⁷Equene Lázaro id'eibana batana cuana ja pia cristiano cuana ejude su butsepi pamapa quisatana.

¹⁸Da putsu, pamapa su ejude jenetia cuinanatana Jesús etsu puji.

¹⁹Da su fariseo cuana tuneda cama jaquisatitana uja: —Mebaque hue, pamapa cristiano cuana tu tije epuhu. ¿Cuaja ni ecuaneda a cua? Griego cristiano cuana ja Jesús chacutana

²⁰Beju dapia Jerusalén ejude su piada piada extranjero cuana Grecia yahua jenetia anitaina pascua tsine eba puji.

²¹Ye cuana ja da Felipe nariatana. Uja atana huecuana: —Tata, Jesús baja ecuanaju.

²²Da su Felipe ja Andrés quisatitana. Tuatseda Jesús quisatitana cuaja extranjero cuana putana.

²³Da su Jesús ja id'aba putsu, uja atana: —Beju quema manu hora enariatiani. Manu putsu, ema neicha eid'eyu. Cristiano cuana ema ba putsu, ema pamapa pia cuana ebia su tucheda eni eshanapata huecuana.

²⁴Yama micuana butsepi equisainia, quema manu da piada trigo ejaja yahua su papaicha cua nime. Ahua ejaja yahua su mue dajaja su, ahua med'i neje mue biapapa su, da su piada hue yaniti. Beju ahua yahua su papajiji su, jucuada ejaja cuana ehuiruti.

²⁵Quebata ja Diusu jei aja mahue yata su, aimue tueda Diusu neje cielo su eid'e epueniti mahue. Quebata ja mu emanu teje Diusu jei yata su, tueda saida Diusu neje cielo su eid'e epueniti.

²⁶Quebata ja ema mebajaja yata su, ema tije paata. Beju quepia ema yani su dapia da ema neje quema emebajaji cuana paanitita. Quebata ja ema emebajatani, quema Tata Diusu ja tueda saida echuje etiatayu.

²⁷‘Beju jiahue mu ema ebia su etacuamadhatiani. ¿Ai yama, “Tata Diusu, d'eji su ema aque ye sufrimiento epusiu jenetia”, ebaja bata? Aimue daja yama quema Tata ebaja mahue, ema emanu puji pueana putsu.

²⁸Da su Jesús ja mesa Tata Diusu uja atana: —Tata, cristiano cuana bameque mida da ebia su aida, tucheda eni. Jesús beju daja mimipeana su, Tata Diusu ja cielo jenetia uja atana: —Beju yama quema tucheda bameana. Neicha yama daja yayu.

²⁹Dapia eneti cristiano cuana ja Diusu sa etsui id'aba putsu, piada piada, “Etiriani beju”, putana. Pia cuana mu, “Angel ja tueda quisatana”, putana.

³⁰Da su Jesús ja atana huecuana: —Tueda etsui da mimiana micuana sa saida equisa puji. Aimue quema puji mahue.

³¹Tiempo cuinaitia beju Diusu ja ye mundo su aniji cuana ejuzga puji. Cristiano madhada cuana sa echua puji Ishahua ejusiata beju.

³²Yama dueji cristiano cuana ema peje su jei yameyu, judío cuana ja curusu su ema ejemitsuata su.

³³Tueda mimi neje Jesús ja cristiano cuana cuaja tueda emanu shanapametana.

³⁴Da su cristiano cuana ja Jesús uja atana: —Beju ecuana sa jacuatsasiati quirica cuana su, “Diusu sa Jabeituti Deja da eid'e epueni. Aimue emanu mahue”, derejiji yani. Da su, ¿jucuaja su mida, “Diusu sa Jabeituti Deja curusu su ejemitsuatayu”, epuani? ¿Aidhe da ye Diusu sa Jabeituti Deja?

³⁵Da su Jesús ja jeutsutana huecuana: —Ema da hueda nime. Quejucua tsine hue micuana neje ema yaniti micuana Diusu sa jabuetsuati cuana ebuetsua puji. Jei mepuque ema peje su, micuana neje ema yani tupu, micuaneda matsejiji epu mahue puji. Be apuda su puniunetiji cuana nime mepuji. Tuneda da castigo su eputita.

³⁶Ema da hueda nime. Jei ema meaque, ema micuana neje yani tupu. Jei ema peje su pu putsu, micuaneda hueda su epuniunetiani cristiano cuana nime epu, Diusu sa ebacua cuana micuaneda epu. Beju mimipe putsu, Jesús da cristiano cuana peje jenetia putiana tu mehua yaniti puji. Judío cuana Jesús peje su jei puja mahue putana

³⁷Jesús da jucuada ai nimetiuda aida cuana atana biame, judío cuana tu peje su jei puja mahue putana.

³⁸Tuna jepuiti Diusu sa profeta Isaías chenu ja quirica su uja deretaidha:Diusu, aimue aiya biame ecuanaju sa mi jepuiti quisa su jei putana mahue.Miada mique tucheda bameana biame, aimue jei puja putana mahue.

³⁹Beju cuaja jei a taji mahue batana huecuana. Uja Isaías chenu ja deretaidha neicha:

⁴⁰Diusu ja padha nime, nimetadada ametana huecuana jei paputa mahue huecuana puji.Daja Diusu ja atana huecuana aimue pabatita, pashanapatita mahue puji, daja huecha be pasiapatita Diusu peje su tuahueda pasaisiameta huecuana puji.

⁴¹Jesús ye mundo su pueji mahue su, Isaías ja tueda tucheda eni shanapataidha. Da putsu, daja Isaías chenu ja Jesús jepuiti deretaidha.

⁴²Beju daja biame, jucuada judío cuana Jesús peje su jei putana. Piada piada ehuidusuji cuana di tu peje su jei putana. Cuatsa mahue jei putana huecuana, fariseo cuana ebia su iyuda putsu. Quisa puja mahue putana huecuana, Jesús peje su jei putana jepuiti, cuapuitime fariseo cuana ja jadhitati ete su mue nubiame ata cua huecuana putsu.

⁴³Diusu ebia su fariseo cuana iyubatana huecuana.

⁴⁴Da su beju Jesús ja uja jubida quisatana cristiano cuana: —Aidhe de ema peje su jei epuani, tueda da ema beituji peje su di jei epuani.

⁴⁵Aiya da ema ebatani, daja huecha ema beituji di ebatani.

⁴⁶Ema da hueda nime. Quebata ema peje su jei epu, aimue apuda su epuniunetitani cuana nime epu mahue.

⁴⁷Mue ema ye mundo su pue cristiano cuana ematse puji mahue. Beju yama pueana cristiano cuana d'eji su ya puji. Ahua aiya quema quisa cuana mue aja mahue yata su, Diusu ja tueda ematsetayu.

⁴⁸(null)

⁴⁹Aimue ema quema piba cuana emimiani mahue. Tata Diusu ja ema cuatsasiatana ai cuana bahui yama equisainia.

⁵⁰Bahue ema ahua cristiano cuana quema Tata sa jabuetsuati cuana jei yata su, cielo su eid'e epuenitayu huecuana. Da putsu, quema Tata ja ema equisatani cuana bahui yama ebuetsuainia.