Read Tacana Juan 19 Bible Online

Juan 19 - Tacana bible

Juan 19

¹Da su beju Pilato ete su neicha nubiana. Tuahueda soldado cuana cuatsasiatana Jesús huacabiti neje paicheta huecuana puji.

²Da su junu aquid'aji bauda jenetia corona a putsu, Jesús sa echua su ichatana huecuana tu neje eshishati puji. Daja a putsu beju, Jesús jud'utana huecuana ebiad'amaji idhiria neje.

³Mimi neje Jesús bid'ida a putsu, madhabapirutana huecuana uja: —¡Viva judío cuana sa echua puji! Daja epuani je, buahuapatsitana huecuana.

⁴Da su Pilato neicha cuinanana judío ehuidusuji cuana peje su. Uja atana huecuana: —Mechamaque. Yama tueda ejemicuinainia micuaneda bahue epu puji tueda jucha mahue yama ebainia.

⁵Pilato emimiani cama, Jesús jemicuinatana huecuana. Corona aquid'aji bauda jenetia ajiji tusa echua su anina. Ebiad'amaji idhiria neje jud'ujiji. Da su Pilato ja atana huecuana: —¡U hue da ye deja! ¡Mechamaque!

⁶Sacerdote huaraji aida, templo sa soldado cuana ja Jesús ba putsu, jubida neje biatsiatsiapirutana huecuana uja: —¡Metataque curusu su! ¡Metataque curusu su! Da su Pilato ja atana huecuana: —Beju micuaneda hue metatatique, ye deja jucha mahue yama ebainia putsu.

⁷Beju judío ehuidusuji cuana ja Pilato jubida neje jeutsutana: —Tueda da Diusu sa Ebacua jabametiana. Da putsu, tuseda manu taji, cuaja ecuanaju sa jacuatsasiati epuani batame.

⁸Pilato ja tueda mimi cuana id'aba putsu, ebia su iyuame pupiruana.

⁹Neicha dusutana Jesús ete dume su. Dapia tueda quisabatana uja: —¿Que jenetia da mida? Jesús ja mue jeutsu.

¹⁰Da su Pilato ja neicha quisabatana: —¿Ema mi jeutsuja mahue yainia? Bahue puque, quema tucheda yani mi curusu su etata puji, ahua mi d'eji su ya puji.

¹¹Da su Jesús ja jeutsutana: —Miqueda mu mue ai biame ema neje a taji, ahua Diusu sa tsada mahue su. Da su ema mi peje su menajatiatana cuana da mi ebia su jucha aida eputani.

¹²Da hora jenetia Pilato ja cuaja Jesús mesiame ya puji chacutana. Beju judío ehuidusuji cuana ja mu mue d'eji tia atana. Ebia su jubida biatsiatsiatana huecuana uja: —Ahua miada tueda deja d'eji etia su, aimue mida mique echua puji aida sa eshanapa epu mahue. Tueda Jesús echua puji puja putsu, romano echua puji aida neje emajaitiani.

¹³Pilato ja tueda mimi cuana id'aba putsu, Jesús pajemicuinata huecuana cuatsasiatana. Huaraji sa aniude su aniuteana.

¹⁴Beju piada tsine pascua tsine yani hue su. Buepatia puina. Da su Pilato ja judío cuana sa ehuidusuji cuana uja atana: —¡Hue upia micuana sa echua puji!

¹⁵Beju ebia su jubida biatsiatsiatana huecuana: —¡Pamanu! ¡Pamanu! ¡Metataque hue curusu su! Da su Pilato ja quisabatana huecuana: —¿Ai yama micuana sa echua puji curusu su etata bata? Beju sacerdote huaraji aida cuana ja Pilato uja jeutsutana: —Aimue tueda da ecuanaju sa echua puji mahue. Ecuaneda da Roma ejude su echua puji sa emebajaji cuana.

¹⁶Da su mimipetana huecuana su, Pilato ja Jesús menajatiatana soldado cuana peje su tu curusu su patatata huecuana puji. Beju dusutana huecuana. Jesús curusu su tatatana huecuana

¹⁷Da su beju cuinanatana huecuana curusu eti jude Calavera banime murucu su.

¹⁸Dapia cuinati putsu, Jesús curusu su tatatana huecuana. Beta deja detse di tatatana huecuana pia beta curusu detse su. Piada Jesús sa bai eni bene netiatsuatana huecuana. Pia d'ani bai bene netiatsuatana huecuana.

¹⁹Pilato ja soldado cuana cuatsasiatana curusu su Jesús sa echua bia su padereta puji. Da su uja deretana huecuana: “Ye da Jesús Nazaret ejude jenetia. Tueda da judío cuana sa Echua Puji.”

²⁰Jucuada judío cuana ja tueda mimi cuana mimiametana, tueda eti jude Jerusalén ejude naja su anina putsu. Tueda mimi cuana quimisha yana su deretana huecuana. Hebreo, griego, latín yana cuana su deretana huecuana.

²¹Da putsu beju, sacerdote huaraji aida cuana Pilato peje su putitana tu uja equisa puji: —Be dereji uja: “Judío cuana sa Echua Puji.” Dereque uja: “Tueda pa da judío cuana sa Echua Puji.”

²²Da su Pilato ja atana huecuana: —Cuaja yama dereitia beju, daja hue paaniti.

²³Jesús sa ejud'uji cuana pushi soldado cuana ja tuneda cama jasajasajatiatitana. Jesús sa ebia jud'uji ebia su saida, chujeneda puina. Rusujiji mahue tad'ijiji.

²⁴Da su soldado cuana uja jaquisatitana: —Be pad'iutija pushi eped'u su ye ejud'uji. Ebia su saida suerte paatija quebata sa puji epu. Beju uja derejiji yani Diusu sa quirica su: “Quema ejud'uji jasajasajatiatitana huecuana. Tueda ejud'uji puji suerte atana huecuana.” Beju daja soldado cuana ja atana, cuaja Diusu sa quirica su biahua tiempo deretaidha batame.

²⁵Beju curusu naja su Jesús sa cuara anina. Mesa cuara sa d'ana María di anina. Tueda da Cleofas sa ehuane puina. María Magdalena di tuatse neje beju anina.

²⁶Da su Jesús ja mesa cuara bautetana. Mesa discípulo ibuneda di bautetana. Jesús ja tuatse baute putsu, uja mesa cuara atana: —Mama, hue upia mique ebacua puji eneti. Tuahueda mi ebata mique ebacua quitaita pu cua nime.

²⁷Da su beju mesa discípulo uja atana: —Hue upia mique cuara puji eneti. Baque tueda mique cuara quitaita pu cua nime. Beju da tsine jenetia María anipiruana tueda discípulo sa ete su. Jesús manuana

²⁸Da su beju Jesús bahue puana pamapa beju apejiji. Pamapa Tata Diusu ja tueda tiatana ai cuana apetana. Da su uja puana: —Jaid'itija ema. Daja Jesús puana, cuaja Diusu sa quirica su derejiji yani batame.

²⁹Beju dapia da emeji vino patseda neje sejeajiji anina. Huapese nime tsabiatana huecuana vino tsetseda su. Da su hisopo equi echa huitsana su huapese nime icha putsu, Jesús sa ecuatsa su atsuatana huecuana tu edhibita puji.

³⁰Jesús ja vino tsetseda tsaba putsu, uja puana: —Pamapa apejiji beju. Daja mimipe putsu, beju mesa echua jahueririati putsu, manuana. Piada soldado ja Jesús sa atsupa su lanza neje d'acuatana

³¹Beju piada tsine pascua tsine yani hue su. Judío ehuidusuji cuana sa tsada mahue puana equita cuana curusu cuana su pabadeta puji, janahua tsine hue quita putsu. Tueda da tsine iyuda epuani putsu, equita cuana curusu cuana su pabadeta mecuana sa tsada mahue puana. Da putsu, Pilato bajatana huecuana curusu cuana su tatajiji cuana sa etidada cuana pajarijariameta tuna pamanupudata puji. Daja huecha bajatana huecuana equita cuana pajemiuteta curusu cuana jenetia, janahua tsine cuinaji mahue su.

³²Da su beju soldado cuana putitana curusu cuana eneti su. Equene Jesús neje tatajiji detse sa etidada cuana jarijariatana huecuana.

³³Jesús peje su macha janariatitana huecuana su, tueda manujiji batana huecuana. Da putsu, aimue tusa etidada jarijariatana huecuana mahue.

³⁴Piada soldado ja Jesús sa atsupa su lanza neje d'acuatana. Beju ami, yahui cuinanana.

³⁵Tueda ai cuana da yama quitaita bana. Ema butsepi quisa epuani micuaneda jei epu puji.

³⁶Tueda ai cuana daja puana, cuaja uja Diusu sa quirica su derejiji yani batame: “Aimue tusa etsau jarijariatana huecuana mahue.”

³⁷Pia su derejiji yani uja: “Ed'acuaji cuana ja tueda echamata.” Jesús sepulcro su huananubiatana huecuana

³⁸Beju daja pupeana su, José Arimatea ejude jenetia Pilato peje su putiana Jesús sa equita ebajati puji. José da Jesús sa rubuajiji ebuqueji puina, judío ehuidusuji cuana iyubatana putsu. José ja Jesús sa equita dusutana, Pilato ja tueda d'eji tiatana putsu.

³⁹Nicodemo ja di José tsahuatana. Tueda Nicodemo da equene dhidha su putiana Jesús peje su tu neje quisaquisa epu puji. Quimisha tunca kilo especias dusetana Jesús sa equita epapi puji. Tueda especias da banime mirra, áloes neje huarujiji.

⁴⁰Da su beju José, Nicodemo detse ja Jesús sa equita dusutana. Equita babutana tse ebabuji bauda neje. Tueda ebabuji da puida huanime puina, especias su tsabiajiji putsu. Daja judío cuana a bahue puina manujiji cuana sepulcro su ehuananubia puji.

⁴¹Dapia Jesús curusu su tatatana huecuana naja su beju eti jude ania chidi anina. Dapia rara aida, eichacua anina tumu epa su aidhe biame tsuhu huananubiaji mahue puina. Tueda rara aida sepulcro puji puina.

⁴²Da dume su Jesús sa equita huananubiatana tse. Tuatseda beju tipei neje daja atana, janahua tsine hue quita putsu.