Read Tacana Juan 7 Bible Online

Juan 7 - Tacana bible

Juan 7

¹Da su beju Jesús Galilea yahua je aseana. Aimue Judea yahua su anija puana mahue, dapia judío cuana sa ehuidusuji cuana ja tueda manuameja atana putsu.

²Beju judío cuana sa erere tsine banime enariatiani putsu, Jesús sa edue cuana ja tueda uja atana: —Be upia anitiji. Putique Judea yahua su dapia tsine eba puji. Dapia mique ebuqueji cuana ja di miada ai nimetiuda yainia cuana pabata.

³(null)

⁴A mi cristiano cuana ja shanapataja su, tuna butse su ai nimetiuda aida mique a taji. Be rubuajiji ai nimetiuda cuana aji.

⁵Daja mimitana huecuana, tu peje su jei putana mahue putsu.

⁶Da su Jesús ja atana huecuana: —Quema puti hora cuinaji mahue tsuhu.

⁷Micuaneda bahui meputique. Micuaneseda puji mu saida eputi puji, Diusu tsada mahue cuana da micuana neje aimue eduininitani mahue putsu. Ema neje bahui eduininitani huecuana, tuna ai jucha cuana yatani yama etuaquisainia putsu.

⁸Meputique tsine eba puji. Aimue ema eputi mahue tsuhu.

⁹Da su Jesús anitiana. Jesús putiana tsine ebati puji

¹⁰Beju mesa edue cuana tsine su putitana su, Jesús di tije putiana. Cuatsa mahue rubuajiji putiana.

¹¹Judío cuana sa ehuidusuji cuana ja Jesús chacudhaatana tsine su cristiano cuana duju su. —¿Juque pa da tueda deja? —putana huecuana. Uja cristiano cuana quisabatana huecuana: —¿Ahua micuaneda mue ba tueda deja?

¹²Cristiano cuana ja ehuidusuji cuana ebia su iyubatana putsu, mue tuneda jajeutsuti putana. Tuneda cama cuatsa mahue etsia quisa jaatitana huecuana. Jesús jepuiti jaquisatitana huecuana. Piada piada, “Tueda da deja butsepi”, putana. Pia cuana, “Tueda da deja madhada, cristiano cuana baseaji putsu”, putana.

¹³

¹⁴Beju tsine edusete su Jesús templo su nubiana cristiano cuana ebuetsuapiru puji.

¹⁵Da su judío cuana sa ehuidusuji cuana nimetiunetitana. Uja Jesús quisabatana huecuana: —Aimue mida jabuetsuatiji mahue biame, ¿cuaja ni da mida bahue eni pamapa ai cuana pu cua?

¹⁶Jesús ja jeutsutana huecuana: —Yama ebuetsuainia ai cuana da aimue quema jabuetsuati quitaita mahue. Tueda da Tata Diusu sa jabuetsuati cuana. Tuahueda ema beitutana mesa jabuetsuati cuana cristiano cuana ebuetsua puji.

¹⁷Quebata ja Diusu sa ai tsada cuana yatani su, tueda bahue epu quema jabuetsuati cuana da Diusu peje jenetia. Aimue quema piba hue ebuetsuainia mahue tueda bahue epu.

¹⁸Quebata tuseda puji saida emimiani su, tueda quita aida cristiano cuana ja pabata mesa tsada. Quebata mu tu beituji sa puji saida emimiani su, tueda da deja saida, butsepi, cristiano cuana ja tu beituji aida pabata mesa tsada putsu.

¹⁹‘Ene mu da Moisés chenu ja micuana jacuatsasiati cuana tiataidha. Micuaneda ema manuameja yainia, tueda jacuatsasiati yama yainia mahue epuani putsu. ¿Ai puji ni da micuaneda ema manuameja yainia, micuaneda quitaita tueda jacuatsasiati yainia mahue biame?

²⁰Da su Jesús atana huecuana uja: —Mida da tseitsi. ¿Aiya mida manuameja yatani?

²¹Jesús ja uja jeutsutana huecuana: —Yama deja janahua tsine su saisiameana putsu, micuaneda ema manuameja yainia. Beju micuaneda quitaita mudumudu bahue janahua tsine su. Moisés chenu ja cuatsasiataidha deja yanana chidi cuana huitsanasiqui taji ocho tsineji su. Ecuana sa tata chenu cuana Moisés chenu ja equene daja ataidha. Da su beju janahua tsine biame, micuaneda deja yanana chidi ehuitsanasiquinia, tusa ocho tsine etsutiani su. Beju, ¿ai puji ni da su micuaneda ema manuameja yainia, deja nedaji saisiameana putsu?

²³

²⁴Ahua micuaneda juzgaja su, butsepi neje mejuzgaque. ¿Que jenetia Jesús?

²⁵Da su pia Jerusalén su aniji cuana tuneda cama uja jaquisabatitana: —¿Aimue jia maida ye deja ecuana sa ehuidusuji cuana ja manuameja yatani mahue?

²⁶Hue upia cristiano cuana buetsua epuneti. ¿Jucuaja su aimue einatani huecuana mahue? ¿Da su mu jia tuneda di tu peje su beju jei eputani? ¿Da su mu jia tuneda di tueda da Diusu sa Jabeituti Deja jei eputani?

²⁷Da su pia cuana ja atana huecuana uja: —¡Mahue! Aimue tueda Diusu sa Jabeituti Deja mahue. Ecuanaju mu bahue saisia quepia Jesús bataji puana. Diusu sa Jabeituti Deja beju ecuina su, aimue aidhe biame bahue epu mahue que jenetia pueitia. Daja jaquisatitana huecuana Cristo jepuiti, japitsati putsu.

²⁸Jesús ja id'aba putsu, jubida jeutsutana huecuana: —¿Ai micuaneda ema eshanapainia bata? ¿Ai micuaneda que jenetia ema epusiu bahue bata? Ema da ene quita Diusu peje jenetia pueana. Tuahueda quitaita ema huaratiatana. Micuaneda aimue shanapa tueda.

²⁹Yama mu tueda eshanapaeninia, tu neje ema anina putsu. Tuahueda ema micuana peje su beitutana.

³⁰Da su judío cuana sa ehuidusuji cuana ja Jesús inaja adhaatana, risi putsu, edusu puji. Beju aimue aiya biame ina atana, aimue mesa ina hora putsu.

³¹Dueji cristiano cuana tu peje su jei putana. Uja tuneda jaquisatitana: —Ye da Diusu sa Jabeituti Deja. ¿Ai puji ni da ecuaneda pia id'ua cua? ¿Aiya detse da tueda nimetiuda aida cuana ata cua, ye deja ja yatani nime? Fariseo cuana ja soldado cuana beitutana Jesús eina puji

³²Fariseo, sacerdote huaraji aida cuana ja cristiano cuana daja eputani shanapa putsu, templo sa soldado cuana beitutana huecuana Jesús eina puji dhahua.

³³Da su Jesús ja cristiano cuana uja atana: —Quejucua tsine puji hue beju ema micuana neje yaniti. Da su beju ema esiapatiyu ema beituji peje su.

³⁴Micuaneda ema echacudhaa. Aimue micuaneda ema eteje mahue, dapia ema yaniti putsu.

³⁵Da su ehuidusuji cuana uja jaquisabatitana tuneda cama: —¿Quepia jia da eputi tueda ecuaneda aimue eteje mahue? Cuapuitime pia yahua su eputi pia cristiano cuana ebuetsuati puji.

³⁶¿Ai ni da tueda quisa epuani? Jesús da eid'e jaametiji yahui nime

³⁷Tije tsine beju epupeni su, Jesús netianana. Cristiano cuana jubida neje uja atana: —Quebata cuana jaid'itija eputani su, mepueque ema peje su eid'iti puji.

³⁸Uja Diusu sa quirica su derejiji yani: “Quebata ema peje su jei epuani su, mesa enime su eid'e jaametiji yahui putiputi nime.”

³⁹Beju Jesús sa mimi cuana da uja epuani: Tu peje su jei eputani cuana ja Espíritu Santo ebatsuta tuna sa muesumu su. Beju aimue tsuhu tueda Espíritu Santo pueji mahue, Jesús cielo su mesa Tata Diusu peje su putiji mahue tsuhu putsu. Cristiano cuana jacuicuinatitana Jesús jepuiti

⁴⁰Cristiano cuana ja Jesús sa mimi id'aba putsu, tuneda cama jacuicuinapirutitana. Piada piada cuana uja putana: —Enei hue, ye deja da Diusu sa profeta pue taji.

⁴¹Pia cuana ja uja jeutsutana huecuana: —¡Mahue! Ye deja da Diusu sa Jabeituti Deja quitaita. Beju pia cuana di uja putana: —¿Quepia detse ye Jesús da Diusu sa Jabeituti Deja pu cua, tueda Galilea yahua jenetia putsu? Diusu sa Jabeituti Deja aimue detse Galilea yahua jenetia pue cua mahue.

⁴²Diusu sa quirica su Diusu sa Jabeituti Deja Judea yahua, Belén ejude jenetia mesa pue taji epuani. Echua puji David chenu sa familia jenetia mesa pue taji epuani. Tueda Belén ejude da echua puji David chenu sa ejude.

⁴³Daja da cristiano cuana mimitana. Ai jia Jesús puina cuaja jaduneti taji mahue jabatitana huecuana. Jasajasajatitana huecuana.

⁴⁴Pia cuana ja mu Jesús risi putsu, dusuja adhaatana. Judío cuana sa huaraji cuana Jesús peje su jei puja mahue putana

⁴⁵Da su beju templo sa soldado cuana jasiapatitana fariseo, sacerdote huaraji aida cuana peje su. Soldado cuana cuinatana su, fariseo cuana ja uja quisabatana huecuana: —¿Jucuaja su ni micuaneda mue Jesús duse?

⁴⁶Da su uja jeutsutana huecuana: —Aimue aidhe biame mimi tueda deja nime.

⁴⁷Da su fariseo cuana ja jubida d'ayatana huecuana uja: —¡Ai! Micuaneda di jia beju baseataitia.

⁴⁸¿Ai fariseo, sacerdote huaraji aida cuana ja tueda deja jei a atana bata?

⁴⁹Cristiano jacuatsasiati shanapa bue mahue cuana bahui tu peje su jei eputani. Da su Diusu ja pamatseta huecuana.

⁵⁰Beju fariseo Nicodemo di dapia anina. (Tueda da equene putiana Jesús peje su dhidha su.) Tuahueda uja atana huecuana:

⁵¹—Aidhe biame ecuaneda cuaja matse taji mahue ebainia id'abaji mahue. Daja ecuaneseda jacuatsasiati cuana epuani beju.

⁵²Da su jubida jeutsutana huecuana uja: —¿Ai puji mida daja emimiani? ¿Ai mida di tu nime Galilea yahua jenetia bata? Mimiameenique Diusu sa quirica su. Aimue Diusu sa profeta piada biame Galilea yahua jenetia ecuina mahue. Daja da quirica su epuani. Da su, ¿cuaja jia da Jesús Diusu sa profeta pu cua, tueda Galilea yahua jenetia putsu?

⁵³Da su beju tuneda mimipetana su, putitaibana huecuana.