Read Tacana Romanos 10 Bible Online

Romanos 10 - Tacana bible

Romanos 10

¹Edue cuana, quema tsada pamapa judío cuana d'eji su paputa. Da puji yama Diusu jubida ebajainia pamapa hora su.

²Bahue ema Diusu ebia su mebajaja yatani huecuana. Daja biame, cuaja Diusu ja cristiano cuana enimbutsepiatani aimue eshanapatani huecuana mahue. Aimue Cristo peje su jei puja eputani huecuana mahue Diusu ja panimebutsepiata huecuana puji. Tuneda quitaita hue janimebutsepiatija, Diusu sa jacuatsasiati cuana bahui a putsu.

⁴Cristo ja mu pamapa Moisés chenu sa jacuatsasiati cuana saida apetana putsu, aimue detse etse jacuatsasiati cuana a cua mahue nimebutsepi epu puji. Jiahue tu peje su jei pu putsu bahui, etse nimebutsepi pu cua.

⁵Edue cuana, biahua tiempo Moisés chenu ja uja deretaidha tueda ai cuana jepuiti: “Ahua quebata ja Diusu sa jacuatsasiati cuana aja yatani su, tuseda pamapa quitana ape taji nimebutsepi epu puji.”

⁶Beju jiahue yama micuana saida equisa. Atasaida nimebutsepi epu puji. Cristo peje su jei pu putsu bahui, micuaneda nimebutsepi pu cua.

⁸Be daja hue ai saida cuana bahui aja meaderaji Cristo etejeti puji, tueda mu micuana naja su yani putsu. Diusu sa quisa saida cuana ecuanaju quisaquisa epuani su, jei pu putsu bahui, micuaneda nimebutsepi pu cua.

⁹Uja ecuanaju quisaquisa epuani: Ahua quebata cristiano cuana butse su, “Cristo da quema Echua Puji”, epu su, ahua Diusu ja Cristo id'emetana jei epu su, da su tueda d'eji su epu. Daja huecha Diusu ja tueda enimebutsepiatayu.

¹¹Uja Diusu sa quirica su derejiji yani: “Quebata tu peje su jei epu su, ene quita d'eji su epueniyu.”

¹²Beju Cristo ja judío, judío mahue cuana tupupai ebatani, tueda da pamapa sa Echua Puji aida putsu. Aiya papu tu ebajata su, tuahueda mesa jaibunebati cuana etiata.

¹³Uja derejiji yani: “Pamapa Echua Puji sa ebani su Diusu ebajatani cuana Diusu ja d'eji su yata.”

¹⁴Daja biame, ¿cuaja ni da Diusu bajame ata cua huecuana, Echua Puji Jesucristo peje su jei puji mahue putsu? Daja huecha, ¿cuaja ni da tu peje su jei pume puta cua huecuana, tusa quisa saida cuana id'abaji mahue putsu?

¹⁵Daja huecha, ¿cuaja ni da aiya quisame ata cua huecuana, ahua Diusu ja mue beitu su? Uja Diusu sa quirica su derejiji yani: “Saida chidi Diusu sa quisaquisa puji cuana, Diusu sa quisa saida cuana quisaquisa eputaniuneti huecuana putsu.”

¹⁶Beju aimue pamapa jei putana mahue Diusu sa quisa saida cuana su. Profeta Isaías chenu ja uja Diusu ataidha tueda ai cuana jepuiti: “Echua Puji, ¿quejucua cuana ja bahui ema jei atana, mique quisa saida cuana quisaquisa puana su?”

¹⁷Da su beju cristiano cuana sa jei epu puji equene Cristo sa quisa saida cuana id'aba taji.

¹⁸¿Ai judío cuana ja Diusu sa quisa saida cuana mue id'aba bata?Pamapa yahua je quepia tuna yanita je Diusu sa quisa saida cuana cuinatiana.

¹⁹¿Ai judío cuana ja Diusu sa quisa saida cuana mue shanapa bata? Biahua tiempo Moisés chenu ja Diusu sa quirica su deretaidha cuaja Diusu ja judío cuana ataidha. Uja Diusu ja ataidha huecuana, jei aja mahue ataidha huecuana putsu:Micuaneda envidia epu, yama pia judío mahue cristiano cuana micuana sa eturuca eibuneba su.Ema eshanapatani huecuana biame, quema dharejiji cristiano quitaita cuana eputa huecuana micuana sa eturuca.Yama micuana eduininiame tuna jepuiti.

²⁰Daja huecha Isaías ja cuaja Diusu puidha uja deretaidha:Judío mahue cuana ja ema mue chacu biame, ema tejetana huecuana.Ema tuna peje su jabametiana, ema mue chacu huecuana biame.

²¹Cuaja neicha Diusu puidha judío cuana jepuiti Isajas ja deretaidha uja: “Judío cuana ja mu aimue ema jei aja atana mahue, yama pamapa tsine ibuneda neje ihuana huecuana biame. Japibatadadatitana huecuana ema neje.”