Read Tacana Romanos 3 Bible Online

Romanos 3 - Tacana bible

Romanos 3

¹Da su, ¿a da saida judío epu puji?

²Ehe, saida da, tueda saida eni putsu. Equene Diusu ja judío cuana mesa jacuatsasiati cuana menajatiataidha.

³Piada piada tuneda Diusu tije aja ataidha mahue biame, Diusu ja mesa jamitsuti cuana tuna neje apetaidha.

⁴Arijija mahue ataidha mesa jamitsuti tuna neje, tuneda daja biame. Pamapa cristiano cuana da bid'umimi puji biame, tueda mu butsepi. Uja derejiji yani Diusu sa quirica su:Diusu, mique mimi cuana da butsepi.Aimue detse mida bid'umimi puji aiya biame tuaquisata cua mahue.

⁵Beju cuapuitime piada piada cuana uja pu cua: “Saipie hue ecuanaju jucha ya puji. Aimue butsepi mahue Diusu ja ecuana ecastigata puji. Ecuana sa jucha jepuiti Diusu butsepi ebametiani. Ahua ecuaneda jucha ya mahue su, ¿cuaja ni da ecuaneda Diusu da butsepi bahue pume pu cua? Da su saipie hue ecuaneda jucha ya puji Diusu da butsepi pabameti puji.”

⁶Be daja mepibaji. Diusu ja pamapa jucha yatani cuana ejuzgatayu, tueda da butsepi putsu.

⁷Ahua ecuaneda jucha ya su, aimue tueda Diusu sa puji saida mahue. Cuapuitime etse uja pu cua: “Saipie hue ema bid'umimi epu puji. Yama bid'umimi a putsu, cristiano cuana ja Diusu da ene quita ebata. Da putsu, ema Diusu sa cuaja castiga taji mahue.” Beju aimue saida mahue daja epibati puji. Piada piada cuana yama pa ai madhada cuana a taji ebuetsuainia Diusu butsepi ebame puji. Aimue daja yama cristiano cuana ebuetsuainia mahue, daja yama ebuetsuainia eputani huecuana biame. Beju Diusu ja jubida ematseta huecuana, daja eputani huecuana putsu. Pamapa su juchaji ta huecuana

⁹¿Ai judío cuana da pia cristiano cuana ebia su saida bata? Pamapa judío cuana, pamapa judío mahue cuana neje tupupai juchaji eputani Diusu butse su.

¹⁰Beju uja derejiji yani Diusu sa quirica su:Aimue aidhe biame nimebutsepi mahue.

¹¹Aimue aiya biame Diusu eshanapatani mahue.Aimue aiya biame Diusu tsada ebatani mahue.

¹²Pamapa su jeitid'ujiji eputaniuneti castigo su eputi teje.Aimue aiya biame ai saida cuana yatani mahue.

¹³Tuna sa mimi cuana da adhida.Jabaseati aida ta huecuana.Tuna sa jabaseati mimi cuana da bacua sa jaati nime.

¹⁴Duinini mimi madhada cama emimitani huecuana.

¹⁵Jamanuameti aida cuana eputani huecuana.

¹⁶Quepia tuna eputitani su pia cuana sufri yametani huecuana.

¹⁷Nimepijaja bue mahue ta huecuana.

¹⁸Aimue Diusu eiyubatani huecuana mahue.

¹⁹Beju judío cuana bahue eputani Diusu ja ematsetayu huecuana, jacuatsasiati cuana ema su yanita putsu. Tueda jacuatsasiati ja uja ebuetsuatani: Diusu ja pamapa cristiano cuana emitanameta, tu butse su juchaji eputani huecuana putsu.

²⁰Aimue cristiano cuana Diusu butse su nimebutsepi puta cua mahue, tueda jacuatsasiati cuana a putsu. Tueda jacuatsasiati quitaita ja pamapa cristiano cuana da juchaji ebuetsuatani. Janimetucheati jepuiti bahui Diusu ja ecuana nimebutsepi yatani

²¹Beju jiahue Diusu ja ecuana ebuetsuatani cuaja ecuaneda d'eji su pu cua. Aimue jacuatsasiati cuana jepuiti ecuana nimebutsepi yatani mahue. Jesucristo jepuiti mu ecuana nimebutsepi yatani. Biahua tiempo Moisés chenu, Diusu sa profeta chenu cuana tueda ai cuana jepuiti quisa putaidha.

²²Beju quebata judío ahua judío mahue cristiano cuana ahua Jesucristo peje su jei eputa su, Diusu ja d'eji su yata huecuana.

²³Pamapa cristiano cuana da Diusu butse su tupupai juchaji eputani. Tu butse su tsabaji mahue eputani mahue.

²⁴Daja biame, Diusu ja cha nimebutsepi ame hue yatani huecuana, Jesucristo jepuiti d'eji su yatani huecuana putsu.

²⁵Cristo jucha jepuiti curusu su manuana putsu, Diusu ja nimebutsepi yatani huecuana, ahua Cristo peje su jei eputa huecuana su. Daja Diusu ja yatani tueda da butsepi pashanapata huecuana puji. Biahua tiempo aimue Diusu ja pamapa juchaji cuana matsepetaidha mahue, tuna sa jucha cuana jepuiti Cristo curusu su emanu puji ebeituta shanapa putsu.

²⁶Biahua tiempo Diusu pacienciaji aidaji puidha juchaji cuana neje. Jiahue mu Cristo peje su jei eputani cuana Diusu ja nimebutsepi yatani. Daja a putsu, Diusu butsepi ebametiani.

²⁷Aimue ecuaneda jacuatsasiati cuana a putsu, enimebutsepiatiani mahue. Diusu ja mu ecuana enimebutsepiatani, ecuaneda Cristo peje su jei epuani su. Da putsu, ecuaneseda cuaja aida jabati taji mahue, aimue ecuaneda janimebutsepiati cua mahue putsu.

²⁸Bahue ecuaneda quebata papu Cristo peje su jei epu su, Diusu ja tueda enimebutsepiata. Aimue tu mehua quitaita janimebutsepiatita cua mahue, jacuatsasiati cuana a putsu.

²⁹Judío cuana Diusu tuneseda puji bahui pepe hue eputani. Beju aimue daja mahue. Tueda mu pamapa cristiano cuana sa Diusu.

³⁰Tuahueda pamapa cristiano cuana tupupai ebatani. Quebata papu nimebutsepi ata cua, ahua tu peje su jei epu su.

³¹Cuapuitime piada piada micuaneda uja pu cua: “Diusu ja ema nimebutsepi atana, Cristo peje su jei puana putsu. Da su aimue quema jacuatsasiati cuana a taji mahue.” ¡Mahue! Be daja mepibatiji. Ebia su ecuaneseda jacuatsasiati cuana a taji, Diusu sa dharejiji cuana putsu.