Read Tacana 1 Corintios 10 Bible Online

1 Corintios 10 - Tacana bible

1 Corintios 10

¹Edue cuana, be mesetaji judío cuana sa tata chenu cuana. Cuaja putaidha huecuana d'anita yahua je putaniunetidha huecuana su, be mesetaji. Diusu ja judu neje huidusutaidha huecuana. Tueda judu tuna hui su puniunetidha putsu, tije ataidha huecuana. Mar Dherena dusete je, ena sarajiji yahua murida bia je jaitianataidha huecuana.

²Moisés chenu da tuna sa ehuidusuji echua puji puidha. Pamapa tuneda tu neje dunejiji anidha.

³Diusu ja mihuataidha huecuana. Tumu jenetia yahui cuinanametaidha tuna eid'ime puji. Cristo bataji mahue tuna neje anidha etsahua huecuana puji. Beju tuneseda puji Cristo da tumu epa jenetia yahui cuinanaidha nime puidha, tu peje jenetia eid'e jaametiji yahui cuinanaidha putsu.

⁵Daja puidha biame, dueji tuneda aimue Diusu beidaji ametaidha mahue, Diusu sa jacuatsasiati cuana aja mahue ataidha putsu. Da su Diusu ja manuametaidha huecuana d'anita yahua su.

⁶Beju tueda biahua tiempo ai cuana da daja puidha ecuaneseda saida puji, tuna ataidha nime ai utsatada madhada cuana aimue ecuaneda yaicha puji mahue.

⁷Be micuaneda diusu eimea peje su irutsuaji cuana mepuji, tuna putaidha nime. Beju uja derejiji yani Diusu sa quirica su tuna jepuiti: “Tuneda aniutetaidha ediadia, eid'iti puji. Netianataidha huecuana diusu eimea cuana butse su etiritiri puji.”

⁸Be ecuaneda mecuana sa ai utsatada madhada cuana paatija. Tuneda tuna sa ai utsatada madhada cuana ataidha putsu, Diusu ja beta tunca quimisha ejaitiana mil manuametaidha piada tsine su.

⁹Aimue ecuana sa Echua Puji Jesucristo aba taji mahue. Daja tuneda Diusu abataidha putsu, Diusu ja madhada bacua cuana beitutana tuna peje su pamanuameta huecuana puji.

¹⁰Be memimibapebapeja Diusu sa puji. Daja piada piada cuana ja ataidha putsu, Diusu ja mesa ángel beitutana pamanuameta huecuana puji.

¹¹Beju daja puidha biahua tiempo ecuana sa saida puji. Pamapa tueda puidha cuana da derejiji yani ecuaneda emimiame puji.

¹²Parejatita Diusu peje su janimetucheatiji pepe hue eputani cuana padajajata mahue puji.

¹³Pamapa cristiano cuana sa tupupai abajiji pu taji. Beju daja biame, Diusu ja ecuana etsahuata pamapa japirubati cuana etucheame puji. Ishahua ja epiruba puji enariata su, Diusu ja ecuana etucheameta.

¹⁴Da su, edue cuana, mepibaenique quema mimi cuana diusu eimea cuana jepuiti. Menetideraque tueda diusu eimea cuana jenetia.

¹⁵Beju micuaneda eshanapaeninia tueda ai cuana. Mebaque quema mimi cuana butsepi ahua mahue.

¹⁶Ecuaneda Echua Puji sa cena ediainia su, diusulupai Tata Diusu ecuaneda yainia Cristo sa ami d'uichajiji, mesa equita ped'uped'uajiji sa puji. Ecuaneda vino iyuda eid'inia su, ecuaneda tu neje dunejiji yani ebametani Cristo sa ami curusu su d'uichajiji jepuiti. Daja huecha pan ediainia su, ecuaneda tu neje dunejiji yani ebametani Cristo mesa equita curusu su jamenajatiatiana jepuiti.

¹⁷Ecuaneda dueji biame, pamapa ecuaneda Cristo peje su dunejiji yani.

¹⁸Daja huecha israelita cuana sa sacerdote cuana edunetitani Diusu peje su irutsuajiji jana ediatani huecuana su.

¹⁹Aimue eimea irutsuaji cuana tueda bid'umimi diusu eimea cuana neje edunetitani mahue, irutsuajiji jana ediatani huecuana su, tueda eimea cuana eid'e mahue putsu. Ene putsu, aimue bid'umimi diusu eimea quitaita cuana peje su jana eirutsuatani huecuana mahue.

²⁰Da mu tueda eimea irutsuaji cuana ja einid'u madhada cuana peje su jana eirutsuatani. Aimue Diusu peje su eirutsuatani huecuana mahue. Beju quema tsada mahue micuaneda einid'u cuana neje dunejiji yani epu.

²¹Micuaneda Echua Puji Jesucristo sa misha su ediadiani putsu, aimue einid'u madhada cuana sa misha su di diadia taji mahue.

²²Micuaneda da Diusu sa puji dharejiji cuana putsu, ¿ai puji ni micuaneda Diusu duininiameja? ¿Micuaneda jia maida tu ebia su tucheda? Pia sa ai saida puji mechacuque

²³Beju micuaneda d'eji su putsu, pamapa ai cuana a cua. Ahua micuaneda bid'umimi diusu eimea peje su irutsuajiji jana diaja su, beju daja a cua. Daja biame, ebia su saida padiadia mahue, cuapuitime pia edue ja jucha ata cua, micuana jana ediainia ba putsu.

²⁴Be micuaneseda saida puji mechacuji. Pia edue cuana sa saida puji chacu taji.

²⁵Beju meaque cuaja yama equisa nime. Micuaneda aicha iru jude su aicha ebajati su, be mequisabaji ahua eimea peje su irutsuajiji. Da su aimue tueda mu cuaja biame micuaneseda puji, mue shanapa putsu.

²⁶Saida tueda aicha ebaja puji, pamapa ye mundo sa ai cuana da Diusu sa putsu. Tuahueda pamapa ai cuana ichatana ecuana sa saida puji.

²⁷Ahua quebata Diusu peje su jei puji mahue ja micuana ediadia puji eihuata su, beju meputique hue. Mediaque pamapa ediaji ai cuana misha su eichatani huecuana. Be mequisabatiji que jenetia tueda aicha.

²⁸Ahua pia edue ja micuana: “Tueda aicha eimea peje su irutsuajiji”, equisatani su, da su ebia su saida edia mahue puji, aimue tueda edue cuaja biame ya mahue puji.

²⁹Micuaneseda tueda edue sa piba saida ba taji. Micuaneseda puji tueda aicha edia puji mue ai jucha biame, ebia su saida be edia mahue puji, aimue tueda edue cuaja biame ya mahue puji.

³⁰Ahua cuapuitime quebata micuaneda uja epu: “¿Ai puji ni da yama pia sa enime tije a cua? ¿Ahua yama tueda jana sa puji Diusu diusulupai yainia su, ai puji ni da ema pia cuana ja mimimadhabata cua?”

³¹¡Jade! Yama micuana ejeutsu. Pamapa micuaneda yainia cuana Diusu sa puji micuaneseda a taji. Ahua micuaneda ediadiani su, ahua eid'itiani su, pamapa micuaneda ai yainia cuana Diusu sa puji a taji.

³²Be cristiano cuana cuaja biame meaji. Be judío, Diusu peje su jei puji mahue, Cristo jepuiti edue cuana cuaja biame meaji.

³³Pamapa cristiano cuana neje saida meanija. Pia sa saida puji mechacuque. Cuaja yama pamapa cristiano cuana saida bame yainia nime, daja huecha micuaneseda bame a taji Cristo peje su jei paputa huecuana puji.