Read Tacana 1 Corintios 13 Bible Online

1 Corintios 13 - Tacana bible

1 Corintios 13

¹Edue cuana, ebia su saida quita cristiano cuana ibuneda eba puji. Ahua ema bue mahue biame tsapiapiati yana cuana su mimi cua su, tueda da chuje mahue, ahua yama cristiano cuana ibuneda ba bue mahue su. Quema mimi cuana da bombo, platillo sa id'apadada nime.

²Ahua ema bahue cuaja ai cuana epu pu cua su, tueda da chuje mahue, ahua yama cristiano cuana ibuneda ba bue mahue su. Ahua yama pamapa etsia cuana, daja huecha pamapa ai cuana eshanapa su, tueda da chuje mahue, ahua yama cristiano cuana ibuneda ba bue mahue su. Ahua ema Diusu peje su ebia su jatucheameti cua su, emata enetiadera puji, tueda da chuje mahue, ahua yama cristiano cuana ibuneda ba bue mahue su.

³Ahua yama pamapa quema ai cuana puri cuana tia cua su, tueda da chuje mahue, ahua yama cristiano cuana ibuneda ba bue mahue su. Ahua ema Cristo jepuiti pamanuameta huecuana puji emenajatiati su, tueda da chuje mahue, ahua yama cristiano cuana ibuneda ba bue mahue su.

⁴Ahua quebata ja ibuneda ba bahue su, tueda saida, paciencia aidaji epu cristiano cuana neje.

⁵Aimue tueda envidia, cachi puji mahue. Aimue tueda ebia su aida ebatiani mahue. Aimue tueda duinini aida mahue.

⁶Aimue tueda beidaji epuani mahue pia cuana sa jucha jepuiti. Beidaji tueda epuani, pia cuana ja ai saida cuana yatani su.

⁷Ahua quebata ja ibuneda ebatani su, tuahueda pia cuana ebianetiata. Pia cuana saida ebata. Pia cuana neje paciencia aidaji epu.

⁸Pamapa Diusu ja etiatani ai cuana epupeta biame, aimue ecuaneda huamahuama ibuneda ebarijiti mahue. Beju tiempo ecuina su, aimue ecuaneseda cuaja ai cuana epu quisa pu taji mahue. Aimue ecuana sa bue mahue biame tsapiapiati yana cuana su mimi taji mahue. Tueda ai cuana etaitanapeta. Jiahue ecuaneda bahue epudujudujuani.

⁹Daja huecha quisaquisa epuani ecuaneda eshanapapad'ipad'inia ai cuana.

¹⁰Beju Cristo epue su, pamapa ecuaneda eshanapaeniyu.

¹¹Ema yanana tupu, yanana nime mimiana. Daja huecha yanana nime japibatina. Deja equita puana su, deja bahue eni nime mimipiruana. Daja huecha japibapirutiana.

¹²Beju ecuaneda jiahue quita aimue Diusu eshanapaeninia mahue. Yanana piba pishihue cuana nime ecuana sa piba cuana Diusu peje su. Aimue ecuaneda ebaeninia mahue, espejo padhepadhe su echamatiani nime. Beju Cristo epue su, pamapa ai cuana batasaida ecuaneda eshanapaenipeyu, Diusu quitaita sa ebu ecuaneda eba putsu. Jiahue quita ecuaneda eshanapadujudujuainia. Da tsine su cuaja Diusu ja ecuana jiahue eshanapaenitani nime, daja ecuaneda eshanapaenipeyu.

¹³Edue cuana, saida da Espíritu Santo sa ai jatiati cuana ecuaneseda yani puji. Daja biame, Diusu peje su janimetucheati cuana da Espíritu Santo sa ai cuana ebia su saida quita. Tu peje su janimeid'uati cuana di tueda ai cuana ebia su saida quita. Ibuneda jabati da tueda ai cuana ebia su saida.