Read Tacana 2 Corintios 9 Bible Online

2 Corintios 9 - Tacana bible

2 Corintios 9

¹Edue cuana, aimue tsada quita mahue yama micuana ebaja puji edue tsahuaji mahue cuana metsuahuaque puji.

²Mara jaitianajiji jenetia micuaneda dhitapiruana chipilu cuana tuneseda puji. Macedonia yahua su aniji edue cuana di daja yama quisana micuaneda quitatita tsahuaja epuani mara jaitianajiji jenetia. Beju daja id'aba putsu, tuneda di janimetucheatitana pia tsahuaji mahue edue cuana chipilu neje etsahua puji.

³Da su yama ye quimisha edue micuana peje su ebeituinia tueda chipilu dhitajiji pabata huecuana puji. Beju paani tueda chipilu dhitapejiji micuana peje su ecuinatita huecuana su, ema pamapa edue cuana peje su micuana jepuiti saida mimiana putsu.

⁴Cuapuitime piada piada Macedonia yahua jenetia aniji edue cuana ema neje micuana peje su puti cua. Da putsu, tiempo neje hue yama micuana equisainia, chipilu dhitaichapejiji papu puji aimue pamapa ecuaneda bidhutada su ebameti mahue puji, ecuanaju micuana peje su ecuinati su.

⁵Da putsu, ema putiji mahue su, yama ye quimisha edue cuana micuana peje su ebeituinia micuana chipilu medhitatsahuataque puji. Ahua micuaneda daja edhitape mahue su, ema micuana peje su ecuinati su, micuaneda tipeitipei chipilu dhita cua ema nimebeidaji yame puji. Beju tueda saida mahue epu. Ebia su saida tueda chipilu dhitaichapejiji paani, ema cuinatiji mahue su. Ahua daja micuaneda ya su, pamapa edue cuana ja micuana sa tsada quitaita neje chipilu cuana edhitainia ebata. Aimue yama micuana cuatsasiana mahue ebata huecuana.

⁶Mepibaenitique tueda ai cuana su. Quebata ja ucua chidi hue ebanata su, ucua chidi hue ejemitsuati. Daja huecha quebata ja jucuada ebanata su, dueji ejemitsuati.

⁷Micuaneseda tia taji, cuaja micuaneda pibana batame. Be metiaji tiaja mahue neje ahua jubida neje. Beidaji neje tia taji, beidaji neje etiatani cuana Diusu ja eibunebatani putsu.

⁸Beju Diusu ja micuana pamapa ai saida cuana ebia su tiata cua pamapa micuana sa ai cuana pahueiti mahue. Ehueitiani cuana ebia su etiatayu mesa ai saida cuana paata huecuana puji.

⁹Uja epuani Diusu sa quirica su:Tuahueda pamapa muesumu neje puri cuana tiatana.Mesa ai saida mudu cuana da chujeji eni yanienitita.

¹⁰Micuana sa Diusu sa puji mudu da ejaja banajiji cuana nime. Cuaja Diusu ja ejaja cuana ebana puji etiatani nime, daja huecha tuahueda mesa mudu cuana micuana etiatani micuaneda ya puji. Cuaja Diusu ja tueda ejaja cuana ejucuametani cristiano cuana sa ediaji puji nime, daja huecha micuana sa mudu tuseda puji ejucuametayu mesa dharejiji cuana etsahua puji.

¹¹Tuahueda micuana sa ai cuana eyapacametayu micuaneda pia edue cuana ebia su etsahua puji. Beju ecuanaju micuana sa dhitajiji chipilu edue etsahuaji mahue cuana peje su edusuti su, beidaji eputa huecuana. Jamitsutsuati neje diusulupai Tata Diusu yata huecuana, micuaneda tsahuana putsu.

¹³Diusu emitsutsuata huecuana, micuaneda tueda jei yainia putsu, tuna etsahuainia je.

¹⁴Da su micuaneseda puji ibuneda neje Diusu jubida ebajata huecuana, Diusu ja edue tsahuataja cuana tueda dhitajiji chipilu neje micuana tsahuametana putsu.

¹⁵Beju yama Diusu diusulupai yainia, mesa Ebacua Jesucristo ecuana tiatana putsu. Tusa jaati ai cuana cuaja quisape taji mahue ecuaneda ebainia.