Read Tacana 1 Tesalonicenses 1 Bible Online

1 Tesalonicenses 1 - Tacana bible

1 Tesalonicenses 1

¹Ema da Pablo. Yama ye quirica ebeituinia Tesalónica ejude su aniji edue cuana peje su. Ema da upia edue Silvano, Timoteo detse neje. Tuatse neje yama quirica edereinia. Edue cuana, micuaneda Tata Diusu neje dunejiji yani. Echua Puji Jesucristo neje di micuaneda dunejiji yani. Tuatseda meibunebataque, menimepijajametaque. Tesalónica ejude su aniji edue cuana Diusu peje su jubida janimetucheatitana

²Edue cuana, pamapa hora su ecuanaju diusulupai Diusu yainia micuana jepuiti.

³Tu butse su micuana ecuanaju epibainia, micuaneda tuseda puji emudumuduani putsu. Jubida micuaneda tu peje su enimetucheatiani. Ebia su ibuneda neje emebajainia. Jubida micuaneda Echua Puji Jesucristo peje su enimeid'uatiani. Pamapa ye ai cuana ecuanaju tu butse su epibainia putsu, diusulupai ecuanaju Diusu yainia.

⁴Edue cuana, bahue ecuanaju Diusu ja micuana dharetana, micuana ebia su ibuneda ebatani putsu.

⁵Equene ecuanaju micuana peje su quisaquisa puana Diusu sa quisa saida cuana. Espíritu Santo di mi peje su tucheda neje cuinana, ecuanaju micuana peje su quisaquisa puana su. Tuahueda micuana saida shanapametana ecuanaju sa ene quita quisa saida cuana. Beju micuaneda bahue, ecuanaju micuana neje anina su, saida ecuanaju jadusutiana micuana sa saida puji.

⁶Ecuanaju sa puiti cuana micuaneda jabuetsuatiana. Daja huecha Echua Puji Jesucristo sa puiti cuana. Ecuanaju sa jaquisati cuana su micuaneda jei puana putsu, Espíritu Santo ja micuana ebia su beidaji ametana. Pia cuana ja micuana duininibatana biame, micuaneda ecuanaju sa jaquisati cuana su jei puana beidaji neje.

⁷Da putsu beju, micuana sa puiti cuana da saida Macedonia, Acaya yahua detse su aniji edue cuana pabuetsuatita puji.

⁸Beju micuana peje jenetia Jesús quisa saida cuana cuinanana. Pamapa yahua, ejude cuana je cuinatiana. Pamapa cristiano cuana bahue eputani micuaneda Diusu peje su jubida enimetucheatani. Da putsu, aimue ecuanaju sa micuana jepuiti saida mimi taji mahue, pamapa cristiano cuana bahue putsu.

⁹Beju tuneda quitaita huecha ecuanaju saida equisatani micuana jepuiti. Cuaja micuaneda ecuanaju saida batsuana, equisatani huecuana. Daja huecha cuaja micuana sa bid'umimi diusu eimea cuana mesiana eid'e eni Diusu tije a putsu, tu emebaja puji, ecuanaju equisatani huecuana.

¹⁰Cuaja micuaneda Diusu sa Ebacua, Jesucristo cielo jenetia esiapati eid'uainia, ecuanaju equisatani huecuana. Diusu ja Jesucristo manujiji cuana duju jenetia netianametaibana. Tueda Jesucristo ja huecha ecuana d'eji su yametayu Diusu sa castigo jubida epusiu jenetia.