Read Tacana Hebreos 1 Bible Online

Hebreos 1 - Tacana bible

Hebreos 1

¹Biahua tiempo Diusu ja profeta cuana jepuiti mesa quisa cuana pamapa nuati, tsapiapiati jabuetsuati neje ecuana sa tata chenu cuana quisataidha.

²Jiahue mu mesa quisa saida cuana ecuana quisatana mesa Ebacua Jesucristo jepuiti. Diusu ja pamapa ai cuana ataidha mesa Ebacua Jesucristo jepuiti. Tueda pamapa ai cuana Diusu ja Jesucristo tiataidha tuseda puji cama papu puji.

³Jesúcristo ja Tata Diusu Aida cristiano cuana ebametani. Tueda da ene quita Diusu, Tata Diusu neje tupupai putsu. Pamapa Diusu ja ai ataidha cuana tusa tucheda neje yasemetani. Tueda curusu su manuana ecuana sa jucha cuana dhipa putsu, ecuana d'eji su ya puji. Daja a putsu, cielo su tsuatibana Diusu sa bai eni bene yaniute puji, da jenetia tu neje tupupai ecuatsasia epu puji. Diusu sa Ebacua Jesucristo da ángel cuana ebia su aida

⁴Jesucristo da pamapa ángel cuana ebia su aida, Diusu sa Ebacua putsu.

⁵Aimue ai hora su biame Diusu ja quebata ángel biame uja ataidha mahue:Mida da quema ebacua.Beju ema da mique tata. Daja huecha aimue quebata ángel biame uja ataidha mahue:Ema tuseda puji tata epuani.Tueda quema puji ebacua epuani.

⁶Diusu ja Jesús ye mundo su beitutana su, pamapa ángel cuana cuatsasiatana Jesús pamitsutsuata huecuana puji.

⁷Diusu sa ángel cuana jepuiti uja derejiji yani Diusu sa quirica su:Diusu ja mesa ángel cuana beni, cuati utsu nime hus ataidha tu emebaja puji.

⁸Diusu sa Ebacua Jesucristo da ene quita Diusu. Uja Diusu puidha Cristo jepuiti:Mida da Diusu.Mida da ecuatsasia epueni.Butsepi neje mida ecuatsasia equeni.

⁹Pamapa ai saida, butsepi cuana miqueda tsada eni.Pamapa ai madhada cuana miada jubida eduininibainia.Da putsu, yama mi pia cuana ebia su nimebeidaji yame.

¹⁰Pia su uja Diusu puidha Cristo jepuiti:Mida da Echua Puji aida.Miada ye mundo aidha.Buepa di miada aidha.

¹¹Beju tueda pamapa ai cuana etaitanapeta biame, mida daja hue yanienitiyu.Tueda pamapa ai cuana ejud'uji edhi nime eputa.

¹²Tueda ai cuana miada etanuja ejud'uji pu cua nime.Tueda ai cuana pamapa miada eturucapeyu etse pia ejud'uji neje jaturucati cua nime.Mida mu daja hue yanienitiyu.Aimue emanu mahue.

¹³Daja huecha aimue Diusu ja quebata ángel uja ataidha mahue:Aniuteque quema bai eni bene ema neje tupupai ecuatsasia epu puji, yama mi neje jamajaitiji cuana pishitiame putsu, mique eme su eicha teje. Daja Diusu ja ataidha Cristo jepuiti bahui.

¹⁴Pamapa ángel cuana da Diusu sa emebajaji cuana Diusu ja ebeitutani huecuana mundo su mesa d'eji su eputani cuana etsahua puji.