Read Tacana Hebreos 12 Bible Online

Hebreos 12 - Tacana bible

Hebreos 12

¹Da su jiahue mepibaenitique tueda dueji Diusu peje su janimetucheatitaidha tata chenu cuana peje su. Tuneda ebia su sufri putaidha biame, daja hue Diusu peje su jubida janimetucheaderatitaidha huecuana. Beju ecuaneseda di tuna nime pamapa ai jucha cuana ichadera taji jucha cuana enahuebameti mahue puji. Paciencia neje ehui su meputija Diusu sa mudu yadera puji.

²Pachamaenideratija Jesucristo ejeitid'u mahue puji. Tuahueda ecuana ehuidusutani. Ecuana sa janimetucheati cuana Diusu peje su butsepi yametani. Bidhutada curusu su emanu puji biame, tuseda puji mue ai bidhutada puana dapia emanu puji. Tueda bahue puana curusu su manu putsu, ebia su beidaji neje neicha eid'e enetianayu. Jiahue beju Diusu sa bai eni bene yanieni da jenetia tu neje ecuatsasia epu puji.

³Mepibaenitique Jesucristo peje su. Juchaji cuana ja tueda ebia su sufri ametana biame, aimue janimetuchedataitanametiana mahue. Daja huecha micuaneda di be menimetuchedataitanametiji.

⁴Aimue aiya biame micuana amicuametana mahue, jucha cuana parijita huecuana quisaquisa puana su.

⁵Be mesetaji micuaneda da Diusu sa ebacua cuana. Tuahueda micuana aba neje ebuetsuatani. Uja puana mesa quirica su derejiji yani:Ebacua, be tsada mahue quema jabutsepiati cuana mi peje su.Be janimetuchedataitanatiji, yama mi ebutsepiainia su.

⁶Beju yama ibuneda ebainia cuana bahui yama ebutsepiainia.Pamapa yama ebatsuinia ebacua cuana yama ebutsepiainia.

⁷Da su micuaneseda tuchea taji, Diusu ja micuana ebutsepiatani su. Daja micuana yatani micuana sa saida puji, micuana ebacua nime ebatani putsu. ¿Aimue jia maida tata cuana ja tuna sa ebacua cuana ebutsepiatani mahue?

⁸Ahua micuana Diusu ja ebutsepiatani mahue su, da su aimue micuaneda Diusu sa ebacua quitaita mahue.

⁹Enei hue, ecuana sa tata cuana ecuana ebutsepiatani putsu, ecuaneda iyuda neje ebainia huecuana. Daja huecha ecuana sa Tata Diusu peje su ecuaneseda jamenajatiati taji ecuaneda eid'e yanieniti puji.

¹⁰Ecuana sa tata cuana ja ecuaneda yanana tupu quejucua tiempo chidi puji ecuana ebutsepiatani, cuaja mecuana sa piba cuana epuani batame. Diusu ja mu ecuana ebutsepiatani ecuana sa saida quita puji ecuaneda tu nime jucha mahue papueni puji.

¹¹Enei hue, ecuaneseda tsada mahue jabutsepiati cuana, neda putsu. Daja biame, jabutsepiati cuana ejaitianani su, ecuaneda Diusu neje saida, nimebutsepi epuani. Rejada saida Diusu eichadera puji

¹²Da su jiahue nimetucheda mepuque.

¹³Saida, butsepi neje mepuniunetique pia cuana di micuana tije saida papuniunetita puji. Diusu peje su nimepishihue cuana micuana tije a putsu, enimetucheatita huecuana.

¹⁴Saida mepuque pamapa cristiano cuana neje. Diusu nime jucha mahue mepuque. Jucha mahue cuana ja bahui Echua Puji Jesucristo ebata.

¹⁵Merejatique. Be meichaderaji Diusu sa jaibunebati cuana. Be micuaneda cama huamahuama memadhatiji, jaduininibati putsu. Meperdonaque pamapa micuana neje ai madhada eputani cuana.

¹⁶Be quebata epuna ahua deja jabutsenetiji mahue biame, paquinati. Daja huecha quebata jabutsenetiji epuna ahua deja be pia neje paquinati. Be tsada mahue mebaji Diusu sa ai iyuda cuana. Be Esaú chenu nime mepuji. Tuahueda mesa tata ja tu etiata ai cuana tsada mahue bataidha. Piada jana dhepe echuje neje turucataidha.

¹⁷Da su chu beju neicha mesa tata chenu sa ai cuana inatsuja ataidha su, mesa tata ja cuaja tia taji mahue bataidha, pia ebacua jamitsuti tiataidha putsu. Esaú chenu ebia su janebatidha biame, cuaja inatsu tayuji mahue bataidha.

¹⁸Biahua tiempo israelita cristiano chenu cuana Diusu netidha emata senida butse su anidha. Tueda emata jenetia Diusu ja mesa jacuatsasiati cuana tiataidha huecuana. Emata jenetia utsu jubida cuinanaidha. Apuda eni, judu padha, beni nime jubida anidha.

¹⁹Da su pututu etsui jubida id'abataidha huecuana. Diusu ja mitsutaidha huecuana mimi jubida neje. Emata pad'apabata huecuana mahue ataidha huecuana. Cristiano ja animalo ja emata etidhita su, tumu ahua, lanza neje pamanuameta huecuana. Da su Diusu ebia su bajataidha huecuana pamimiriji, mesa jacuatsasiati etsui jubida iyubataidha huecuana putsu.

²¹Beju tueda ai cuana da ebia su iyuda puidha putsu, Moisés chenu biame riariaidha, ebia su iyuame pu putsu. Beju tueda ai iyuda puidha cuana neje jiahue micuaneseda ai biame a taji mahue. Micuaneda mu aimue iyuda neje Diusu enariainia mahue cuaja israelita chenu cuana ja tueda yahua su emata senida nariame ataidha nime.

²²Micuaneda eid'e eni Diusu sa ejude Jerusalén banime cielo su enariatiani. Daja huecha tusa emata saida Sión banime cielo su enariatiani. Dapia dueji ángel cuana ja Diusu emitsutsuatani.

²³Micuaneda da Diusu sa dharejiji ebacua cuana. Pamapa mesa dharejiji cuana sa ebani cuana mesa cielo su yani quirica su derejiji yani. Diusu ebaji saida micuaneda enariainia. Tu peje su jei epuani je manutana cuana sa enid'u cuana cielo su micuaneda enariainia. Diusu ja nimebutsepi atana cuana sa enid'u cuana enariainia.

²⁴Micuaneda Jesús quitaita enariainia. Tuahueda Tata Diusu ebajatani ecuaneseda puji, cuaja Diusu sa jamitsuti eichacua epuani batame. Micuaneda tusa ami d'uichajiji enariainia. Tueda ami jepuiti Diusu ja micuana eperdonatani. Biahua tiempo Diusu Caín chenu neje eturuca puidha, tuahueda mesa edue Abel chenu manuametaidha putsu. Beju jiahue aimue Diusu cristiano cuana neje eturuca epu mahue, mesa Ebacua Jesús manuametana huecuana biame.

²⁵Da putsu, merejatique. Be meichaderaji Diusu sa jiahue equisatani ai cuana. Mepibaenique ecuana sa tata chenu cuana. Diusu ja ye jubida quisataidha huecuana, ye mundo su anidha huecuana su. Manuametaidha huecuana, mesa quisa saida cuana id'abaja mahue ataidha huecuana putsu. Beju jiahue Diusu ja ecuana cielo jenetia mesa quisa saida cuana equisatani. Tata chenu cuana ebia su madhada hue ecuaneseda puji epu, ahua ecuaneda tueda cielo jenetia quisa saida cuana eichadera su.

²⁶Biahua tiempo Diusu ja yahua riariametaidha mesa etsui neje. Beju Diusu uja puidha mesa quirica su derejiji yani: “Neicha yama eriariame yahua. Aimue yahua bahui mahue. Cielo di yama eriariame.”

²⁷Beju tueda mimi derejiji yani ja ecuana eshanapametani Diusu ja pamapa mesa jaati ai cuana etaitanamepeta, riariame putsu. Daja biame, tu ecuatsasiati bahui yanienitiyu.

²⁸Aimue quetsunu su biame etiatanaeni mahue. Da su Diusu diusulupai ecuaneseda a taji tuahueda tu ecuatsasiati etaitanaeni mahue su, ecuana ichatana putsu. Iyuda neje ecuaneseda Diusu mebaja taji tueda beidaji yame puji.

²⁹Daja iyuda neje ecuaneseda Diusu mebaja taji, tueda da cuati utsu ja pamapa ai cuana etiumepetani nime putsu.