Read Tacana Hebreos 8 Bible Online

Hebreos 8 - Tacana bible

Hebreos 8

¹Ibuneda edue cuana, meid'abaenique yama equisainia ai cuana. Beju ecuaneseda yani sacerdote aida cielo su Diusu sa bai eni bene yani.

²Dapia cielo su Diusu ja ataidha iyuda ete su ecuaneseda puji Diusu ebajatani pamapa hora su.

³Pamapa equene sacerdote cuana sa echua puji aida cuana Diusu peje su ai eirutsuaji cuana eirutsuatani. Da su beju Cristo sa di Diusu peje su irutsua taji puina.

⁴Cristo ahua ye mundo su ani cua hue su, aimue detse sacerdote pu cua mahue, sacerdote cuana yani hue putsu. Tueda sacerdote cuana ja daja hue Diusu eirutsuaderatani, cuaja Moisés chenu sa jacuatsasiati puidha batame.

⁵Tueda sacerdote sa Diusu peje su eirutsuaji mudu cuana da aimue ene quita mahue. Yahua su iyuda ete eti jude di aimue ene quita mahue. Beju ene quita iyuda ete eti jude da cielo su yani. Moisés ja yahua su iyuda ete eti jude aji mahue su, Diusu ja uja tueda cuatsasiataidha: “Yahua su di aque iyuda ete eti jude cielo su yani eti jude nime cuaja mi yama emata su bameana nime.”

⁶Beju Cristo sa Diusu peje su eirutsuaji mudu cuana da ene quita, sacerdote cuana sa ebia su saida. Tuahueda equene sacerdote cuana ebia su saida Diusu ebajatani ecuaneseda puji. Diusu ja tueda sacerdote aida, ebia su saida ichatana mesa jamitsuti eichacua neje. Uja Diusu sa jamitsuti eichacua epuani: Diusu ja cristiano cuana sa jucha cuana eperdonatayu Cristo jepuiti.

⁷Israelita cristiano cuana ja mecuana sa Diusu neje jamitsuti cuana aimue apetaidha mahue. Da putsu, Diusu ja pia jamitsuti eichacua tiataidha huecuana.

⁸Diusu ja tueda israelita cristiano cuana nimebutsepi mahue bataidha. Uja tuna jepuiti Diusu puidha mesa quirica su:Jiahue pia jamitsuti eichacua yama etia israelita cristiano cuana.

⁹Tata chenu cuana neje puidha jamitsuti nime epu mahue.Tueda equene jamitsuti yama tiaidha huecuana, yama Egipto yahua jenetia jemicuinaidha huecuana su.Beju yama tiaidha jamitsuti cuana aimue apetaidha huecuana mahue.Da putsu, yama setana huecuana.

¹⁰Neicha jamitsuti eichacua yama etiayu huecuana.Da tiempo su yama quema jacuatsasiati cuana eshanapamepeyu huecuana.Da su ema da tuna sa Diusu epu.Daja huecha quema dharejiji cuana eputayu.

¹¹Aimue tuneda cama huamahuama ema jepuiti jabuetsuati taji mahue, pamapa su ema eshanapaenita huecuana putsu.Pamapa ai eni mahue, aida cuana ja ema eshanapaenitayu.

¹²Beju yama tuna sa ai madhada cuana eperdonayu.Tuna sa jucha cuana dhipape putsu, aimue yama neicha epibayu mahue.

¹³Daja Diusu puidha mesa jamitsuti eichacua jepuiti. Equene jamitsuti eturucata jamitsuti eichacua neje, equene jamitsuti da tupu saida mahue putsu. Beju ai tupu saida mahue cuana da yapetayu.