Read Tacana Apocalipsis 11 Bible Online

Apocalipsis 11 - Tacana bible

Apocalipsis 11

¹Da su beju etupuaji huara nime piada ja ema tiatana. Uja ema atana: —Netianaque. Putique Diusu sa templo su. Tupuaque templo. Altar di tupuaque. Idadaque quejucua Diusu mitsutsuaji cuana yani.

²Be tupuaji templo etsequeini. Tueda etsequeini su pamapa Diusu sa ejude su di Diusu tsada mahue cuana ja pamapa ai madhada cuana yatayu. Daja yatayu huecuana quimisha mara edusete puji.

³Da su quema emebajaji detse yama tucheda etiayu tuatseda quimisha mara edusete quema puji quisaquisa papu puji. Cotensio ejud'uji neje quisaquisa epuniuneti tse.

⁴Tuatseda da beta olivo equi detse, candelero detse nime Diusu butse su.

⁵Ahua aiya manuameja yata tse su, tuatse sa ecuatsa jenetia cuati utsu ecuinana tu emanuame puji.

⁶Tuatseda tucheda eni cielo eteri puji nai padajaja mahue puji, tueda quimisha mara edusete puji, tuatse quisaquisa epuniuneti tupu. Tuatseda tucheda eni ena cuana ami nime eturuca puji. Tuatseseda tsada su, ai neda papu yahua su bataji ameta cua tse.

⁷Da su tuatseda quisaquisa epupe su, ai senida madhada riji mahue rara jenetia ecuinana emanuame tse puji.

⁸Tuatse sa equita detse Jerusalén ejude duju su esati. Tueda ejude quitaita su equene tuatse sa Echua Puji curusu su tatatana huecuana. Tueda Jerusalén ejude su aniji cuana ja pamapa ai madhada cuana ataina Sodoma, Gomorra ejude detse su anitaidha cuana ataidha nime.

⁹Quimisha tsine edusete puji daja hue esati equita detse. Pamapa yahua cuana jenetia cristiano cuana epueta equita detse echama puji. Aimue papaja eputa huecuana mahue.

¹⁰Tuatseda cristiano cuana ebia su sufri ametana putsu, beidaji eputa huecuana, tuatse emanu esa ba putsu. Tuneda cama huamahuama ai saida cuana cha jatiatiyu eputa, ebia su beidaji eputa huecuana putsu.

¹¹Beju quimisha tsine edusete ejaitiana su, Diusu ja eid'emetayu tse. Neicha eid'e tuatseda ba putsu, ebia su iyuame eputa huecuana.

¹²Da su eid'abata tse etsui jubida cielo jenetia. Uja etsui ja yata tse: —Metsuaque upia. Etsui id'aba putsu, cielo su etsuati tse judu duje. Pamapa tuatse sa majai cuana ja echamata etsuahu tse.

¹³Da hora quitaita su tueda yahua erirebata jubida. Jerusalén ejude sa piada tunca parte edajajata. Siete mil cristiano cuana beju emanuta. Eid'e eputa cuana iyuame pu putsu, Diusu emitsutsuata huecuana.

¹⁴Daja beta puji sufrimiento jaitianana. Beju piada hue yani. Siete puji pututu

¹⁵Da hora quitaita su siete puji ángel ja mesa pututu turutana su, etsui cuana jubida cielo jenetia tsiatsiatana uja:Ye mundo su ejude cuana su aniji cristiano cuana ja Diusu, Cristo detse jei yatani beju.Cristo ja ecuatsasiaenitayu huecuana.Aimue epupeyu mahue mesa jacuatsasiati cuana.

¹⁶Neicha tueda beta tunca pushi ejaitiana edhi cuana Diusu butse su tururutana.

¹⁷Uja atana huecuana:Diusulupai, Tata Diusu aida, tucheda.Mida da chue pujianati eid'e jiahue teje.Mida pamapa pia cuana ebia su Echua Puji aida beju.Jiahue mida ecuatsasia epupiruani.

¹⁸Pamapa mi duininibaji cuana mi neje duininitana biame, jiahue beju cuinaitia mecuana sa castigo tuna peje su.Jiahue miada pamapa manujiji cuana ejuzgayu.Cuaja ye mundo su tuna sa ai jaati cuana jepuiti eturuca tiayuque huecuana.Daja huecha mique emebajaji, profeta, dharejiji cuana miada echuje saida etiayu, mundo su mi saida mebajatana huecuana putsu.Pamapa mi iyubaji aida, ahua chidi puji cuana jiahue miada echuje saida etiayu.Daja huecha jiahue miada mundo taitanameji cuana etiatanamepeyu. Daja etsui cuana putana cielo jenetia.

¹⁹Da su beju Diusu sa templo eteriji tsequed'iajiji yama bana. Diusu sa jamitsuti cacha nime edume su yani bana. Beju bataji puana tserutseru, etsui, tiri, iyaru cuana. Yahua di jubida rirebatana.