Read Tacana Apocalipsis 14 Bible Online

Apocalipsis 14 - Tacana bible

Apocalipsis 14

¹Neicha yama chamana. Huisha Janana Nime bana Sion Emata bia su eneti. Tu neje piada cien pushi tunca pushi ejaitiana mil cristiano cuana netitaina. Mecuana sa emata cuana su Diusu sa ebani, Huisha Janana Nime sa ebani di derejiji yani yama bana.

²Da su beju etsui cielo jenetia nai id'apadada, tiri, dueji harpa cuana eturutani nime yama id'abana.

³Satsu eichacua satsutana huecuana Diusu sa aniude butse su, pushi ai eid'e, edhi cuana butse su. Tueda piada cien pushi tunca pushi ejaitiana mil d'eji su pujiji cristiano cuana bahui satsu eichacua bahue putana.

⁴Mundo su anitaina huecuana su, aimue chuamadhada epuna neje jaquinatitaina mahue huecuana. Tuneda pamapa nimebutsepi Huisha Janana Nime tije yatani huecuana, queje papu tu eputiani su. Diusu ja d'eji su atana huecuana tuseda puji paputa huecuana puji. Huisha Janana Nime sa puji di paputa huecuana puji.

⁵Bid'umimi pu bue mahue putaina huecuana. Diusu butse su jucha mahue, nimebutsepi eputani huecuana. Quimisha ángel cuana quisatana

⁶Da su beju equene puji ángel buepa su ecuabetsani yama bana. Diusu sa quisa saida cuana dusutana pamapa tsapiapiati yana su mimiji cuana pamapa ejude cuana je equisati puji.

⁷Tueda jubida tsiatsiana uja: —Diusu meiyubaque. Memitsutsuaque tueda, juzga hora beju cuinaitia putsu. Tuahueda saida eturuca etiatayu saida a bahue putaina cuana. Daja huecha madhada a bahue putaina cuana eturuca castigo etiatayu. Memitsutsuaque tueda, tuahueda cielo, yahua, mar, pamapa ena cuana ataidha putsu.

⁸Da su beju beta puji ángel yama bana. Tueda uja puana: —Babilonia ejude aida beju dajajaitia. Tueda ejude su aniji cuana ja pamapa yahua cuana su aniji cuana jucha ametana.

⁹Da su beju quimisha puji ángel yama bana. Tueda uja tsiatsiana: —Ahua quebata cuana ja ai senida madhada emitsutsuata su, ahua tusa marca mecuana sa emata, ahua eme su eichametita su, Diusu tuna neje ebia su eduinini. Ángel cuana, Huisha Janana Nime butse su Diusu ja ecastigaenitayu huecuana cuati utsu, azufre neje.

¹¹Daja hue sufri epuenita huecuana. Tueda cuati castigo utsu sa judu daja hue etsuaeniti. Tsine, dhidha aimue mecuana sa janahua epu mahue ai senida madhada, mesa eimea di mitsutsuatana huecuana, daja huecha mesa ebani neje marcajiji huecuana putsu.

¹²Da su Diusu sa dharejiji cuana sa paciencia aidaji pu taji sufrimiento cuana etuchea puji. Daja huecha Diusu sa jacuatsasiati cuana a putsu, Cristo peje su enimetucheaderati puji.

¹³Da su beju uja etsui ja ema atana cielo jenetia: —Dereque ye mimi cuana yama etiainia: “Cristo peje su jei pu putsu emanutani cuana da beidaji eputa.” Espíritu Santo ja uja jeutsutana: —¡Ehe! Beidaji eni eputa huecuana, ejanahuata putsu. Mundo su ai saida cuana atana jepuiti Diusu ja echuje etiata huecuana. Ángel ja cristiano cuana manuamepirutana mundo su

¹⁴Da su beju judu pasane yama bana. Tueda judu bia su piada yani bana. Tueda da Diusu sa Jabeituti Deja. Mesa echua bia su corona oro jenetia anina. Hoz queuda dusutaina.

¹⁵Pia ángel cielo su yani templo jenetia cuinanana. Tuahueda judu bia su aniji jubida tsiatsia neje uja atana: —Mique hoz queuda neje cristiano cuana manuamepiruque mundo su, beju emanuame hora cuinaitia putsu. Cuaja deja ja arusu erajatani nime, daja mique hoz queuda neje cristiano cuana a taji.

¹⁶Da su mundo su manuametana huecuana.

¹⁷Da su beju pia ángel cuinanana templo jenetia. Tuahueda di hoz queuda dusutaina.

¹⁸Pia ángel macha altar jenetia cuinanana. Tueda da cuati utsu metse puina. Tuahueda hoz metse eneti ángel tsiatsia neje uja atana: —Mique hoz queuda neje cristiano cuana manuamepiruque mundo su. Cuaja deja ja uva edu edheutani nime, daja mique hoz queuda neje cristiano cuana a taji.

¹⁹Da su ángel ja mundo su manuametana huecuana. Pamapa tueda ai cuana da Diusu sa castigo tucheda.

²⁰Cuaja uva sa ena ecuinanani epudutani huecuana su nime, daja mecuana sa ami cuinanana. Caballo sa etsedu teje ami puana quimisha cien kilómetro ejude jenetia uquedame.