Read Китоби Муқаддас 1992, 2016 1 Вақоеънома 13 Bible Online

1 Вақоеънома 13 - Китоби Муқаддас 1992, 2016 bible

1 Вақоеънома 13

¹Ва Довуд бо мириҳазорҳо ва мирисадҳо, бо ҳамаи раисон машварат кард.

²Ва Довуд ба тамоми ҷамоати Исроил гуфт: «Агар шумо салоҳ бинед, ва агар ин аз ҷониби Худованд Худои мо бошад, ба ҳар тараф назди бародарони худ, ки дар ҳамаи заминҳои Исроил боқӣ мондаанд, ва бо онҳо ба коҳинон ва левизодагоне ки дар шаҳрҳои худ ва ҳаволии онҳо мебошанд, бифиристем, то ки онҳо назди мо ҷамъ шаванд;

³Ва сандуқи Худои моро назди худ бикӯчонем, зеро ки дар айёми Шоул мо ба он муроҷиат накардаем».

⁴Ва тамоми ҷамоат гуфтанд, ки «чунин бикунем», зеро ки ин кор ба назари тамоми қавм писанд омад.

⁵Ва Довуд тамоми Исроилро аз Шиҳӯри Миср то даромадгоҳи Ҳамот ҷамъ кард, то ки сандуқи Худоро аз Қирьят‐Еорим биёранд.

⁶Ва Довуд ва тамоми Исроил ба Баало, яъне ба Қирьят‐Еорим, ки дар Яҳудо мебошад, баромаданд, то ки сандуқи Худованд Худоро, ки Ӯ бар каррубиён нишастааст, ва исми Ӯ бар он хонда мешавад, аз он ҷо биёранд.

⁷Ва сандуқи Худоро бар аробаи нав гузошта, аз хонаи Абинодоб бароварданд, ва Уззо ва Аҳью аробаро меронданд.

⁸Ва Довуд ва тамоми Исроил бо суруд ва барбат ва уд ва даф ва санҷ ва карнай ба ҳузури Худованд бо тамоми қувват бозӣ мекарданд.

⁹Ва ҳангоме ки ба хирмангоҳи Кидӯн расиданд, Уззо дасташро ба сандуқ дароз карда, онро нигоҳ дошт, зеро ки говон онро яктарафа гардонида, моил ба афтодан карда буданд.

¹⁰Ва хашми Худованд бар Уззо аланга зада, ӯро барои он ки дасташро ба сандуқ дароз карда буд, зарба зад; ва ӯ дар он ҷо ба ҳузури Худо мурд.

¹¹Ва Довуд ғамгин шуд, ки Худованд Уззоро зарба зад; ва он макон то имрӯз Форас‐Уззо номида мешавад.

¹²Ва Довуд дар он рӯз аз Худованд тарсида, гуфт: «Сандуқи Худоро назди худ чӣ гуна биёрам?»

¹³Ва Довуд сандуқро назди худ ба шаҳри Довуд набурд, ва онро ба хонаи Убайд‐Адӯми ҷаттӣ равона кард.

¹⁴Ва сандуқи Худо бо хонадони Убайд‐Адӯм дар хонаи вай се моҳ монд, ва Худованд хонадони Убайд‐Адӯм ва тамоми дороии варо баракат дод.