Read Китоби Муқаддас 1992, 2016 Забур 144 Bible Online

Забур 144 - Китоби Муқаддас 1992, 2016 bible

Забур 144

¹Ҳамду санои Довуд. Туро, эй Худои ман, ки Подшоҳ ҳастӣ, болобардор хоҳам кард, ва исми Туро муборак хоҳам хонд то абад.

²Ҳар рӯз Туро муборак хоҳам хонд, ва исми Туро мадҳ хоҳам кард то абад.

³Худованд бузург аст ва бениҳоят мамдӯҳ; ва бузургии Ӯ беҳадду беканор аст.

⁴Аъмоли Туро насл бо насл ситоиш хоҳад намуд, ва қудрати Туро ривоят хоҳад кард.

⁵Дар бораи шукӯҳу шавкати ҷалоли Ту ва корномаҳои аҷоиби Ту фикру хаёл хоҳам кард.

⁶Ва дар бораи қуввати корҳои саҳмгини Ту сухан хоҳанд ронд; ва бузургии Туро нақл хоҳам кард.

⁷Зикри меҳрубониҳои бисьёри Туро ифода хоҳанд намуд, ва адолати Туро тараннум хоҳанд кард.

⁸Худованд бахшанда ва раҳим аст, собир ва серэҳсон.

⁹Худованд барои ҳама некӯст, ва марҳаматҳои Ӯ бар тамоми аъмоли Ӯст.

¹⁰Туро, эй Худованд, тамоми аъмолат ҳамд мегӯяд, ва порсоёнат Туро муборак мехонанд;

¹¹Аз ҷалоли малакути Ту сухан меронанд, ва қудрати Туро тавсиф менамоянд;

¹²То ки қудрати Ӯро ба банӣ‐одам маълум кунанд, ва ҷалоли шавкати малакути Ӯро.

¹³Малакути Ту малакути ҳамаи замонҳост, ва ҳукмфармоии Ту дар ҳамаи наслҳост.

¹⁴Худованд ҳамаи афтодагонро дастгирӣ мекунад, ва ҳамаи хамидақоматонро рост мегардонад.

¹⁵Чашмони ҳама сӯи Ту интизор дорад, ва Ту ризқи онҳоро дар вақташ мерасонӣ.

¹⁶Дасти Худро мекушоӣ, ва ҳамаи зиндаҳоро ба дилхоҳашон сер мекунӣ.

¹⁷Худованд дар ҳамаи тариқҳои Худ одил аст. ва дар тамоми аъмоли Худ пур аз эҳсон аст.

¹⁸Худованд наздик аст ба ҳамаи онҳое ки Ӯро мехонанд, ба ҳамаи онҳое ки Ӯро ба ростӣ мехонанд.

¹⁹Хоҳиши тарсгорони Худро ба ҷо меоварад, ва истиғосаи онҳоро мешунавад, ва онҳоро наҷот медиҳад.

²⁰Худованд ҳамаи дӯстдорони Худро нигаҳбонӣ мекунад, ва ҳамаи шариронро нест хоҳад кард.

²¹Даҳонам ҳамду санои Худовандро мегӯяд, ва тамоми башар исми қуддуси Ӯро муборак мехонад то абад.